HIGNI moko 60 mosekalo, ne obatis wuon jal moro ma nyinge John mi obedo achiel kuom Joneno mag Jehova. Mani notimore e taon moro matin miluongo ni Gujarat ma ni e piny India. John kaachiel gi nyithindgi abich kod min-gi ne gin Jo-Katholik ma ti ma ta, kendo ne gikwedo wuon-gi nikech bedone Janeno.

Chieng’ moro gokinyi, lith lwet John nong’adore marach ka ne otemo yawo mkebe moro. Bang’e e odiechieng’no, wuon-gi noore mondo oter barua moro ne owadwa moro ma ne gin-go e kanyakla. Kata obedo ni nowinjo rem kamano, ne ok odwar tamore dhi kuma wuon-gi nooree. Omiyo, noboyo kama litno gi otamba kae omako wuoth.

Ka nochopo e dala ma ne ooreeno, chi owadwano e ma ne okawo baruano. En bende ne en Janeno. Sama John ne orieyo bade mondo omiye baruano, nofwenyo ni lwet John ne lit, mi ochiwore konye. Nokelo gigene mag lwoko adhola, noyweyo ne John lweteno gi yath, mi otueyonego maber. Bang’ mano, noloso ne John chai, ka e sechego bende ogoyone mbaka e yo mang’won e wi Muma.

Kaka ne gimedo goyo mbaka, e kaka paro duto maricho ma John ne nigo kuom Joneno ne ochako dok chien, omiyo, nopenjo miyono penjo moko e wi weche ariyo ma ne ok giwinjree gi wuon-gi. Wechego ne gin: Ka be Yesu e Nyasaye, kod ka be Jokristo onego olam Maria. Niketh miyono nosepuonjore dho Gujarati ma e dhok ma John nopon-go, nodwoko penjo ma John ne nigo, kae to nomiye buk matin miluongo ni “This Good News of the Kingdom.”

Bang’e ka John ne somo bugno, ne owuoro ahinya ni pok nowinjo adiera ma kamago nyaka nene. Ne odhi ir padrigi mi openje penjo ariyo ma ne chandeka. Padrino iye ne owang’ matek mi obaye gi Muma kokokne matek niya: “Iselokori Satan! Nyisa ane kama Muma wachoe ni Yesu ok en Nyasaye. Nyisa kama Muma wachoe ni ok onego walam Maria. Nyisawa!” Timno nobwogo John ahinya mi onyiso padrino niya: “Ok nachak anyon kanisa mar Katholik gi tienda.” To mana kar dhogeno, ne ok ochako odhi e Katholik kendo!

John nochako puonjore gi Joneno mag Jehova mi nokawo okang’ mar tiyo ne Jehova. Mosmos, joodgi moko bende ne orwako adiera. Sani John pod nigi mbala ma ne oyudo ka ne lith lwete ma korachwich ong’adore higni moko 60 mosekalo. Kata kamano, wiye pok owil gi tim achiel mar ng’wono ma nomulo chunye mi orwako adiera.​—2 Kor. 6:4, 6.