1, 2. (a) En tich mane ma Yesu noketo motelo e ngimane, to nikech ang’o? (b) En ang’o ma nyaka watim mondo wayud nyak kaka “jotich ma tiyo kanyachiel gi Nyasaye”?

YESU KRISTO ne en fundi bao kendo jayalo. (Mar. 6:3; Rumi 15:8) Nolony e tijego duto. Kaka fundi, nopuonjore tiyo gi gige tich ma ne en-go mondo olok bao obed kombe, mesni, kod gige ot mamoko. Kaka jayalo kendo japuonj wach maber, notiyo gi lony ma ne en-go e Wach Nyasaye e konyo ji mondo ong’e Wachno. (Mat. 7:28; Luka 24:32, 45) Ka nochopo jahigni 30, noweyo tij bao nikech nong’eyo ni tich maduong’ ma Nyasaye noore ni otim e piny ne en yalo wach maber kendo puonjo ji Wach Nyasaye. (Mat. 20:28; Luka 3:23; 4:43) Tij yalo e ma Yesu noketo motelo e ngimane, kendo nodwaro ni jomamoko oriwre kode e tijno.​—Mat. 9:35-38.

² Samoro ok wan funde bao kaka Yesu, kata kamano, wan joyal wach maber. Mano en tich maduong’ ma Nyasaye bende timo duto ma nyalore mondo one ni tijno otim maber. Mano e momiyo iluongowa ni “jotich ma tiyo kanyachiel gi Nyasaye.” (1 Kor. 3:9; 2 Kor. 6:4) Wang’eyo maber ni “Wach Jehova en adiera.” (Zab. 119:159, 160) Omiyo, nyaka watem matek mondo wati “gi wach mar adiera e yo makare” sama wan e tij lendo. (Som 2 Timotheo 2:15.) Nikech mano, dwaher dhi nyime medo lony e tiyo gi gir tich maduong’ ma wan-go, ma en Muma, mondo wakony ji ong’e Jehova, Yesu, kod Pinyruoth. Mondo wayud nyak e tij lendo, riwruok mar  oganda Jehova oseloso gige tich mamoko monego wang’e tiyogo maber. Ging’ere kaka Gik Mwatiyogo e Puonjo Ji Muma.

3. Ang’o monego waket motelo sama pod wan gi thuolo mar chiwo neno, to Tich Joote 13:48 nigi paro mane ma nyalo konyowa?

³ Samoro inyalo wuoro gimomiyo waluongo gige tichgo ni Gik Mwatiyogo e Puonjo Ji Muma, to ok Gik Mwatiyogo e Yalo. Tiend “yalo” en kowo ote kata goyo milome; “puonjo” to dwaro ni wakony ng’ato mondo ote ma wan-go odonj e pache kod chunye mondo okaw okenge ma dwarore. Sama pod wan gi thuolo mar chiwo neno, gima onego waket motelo e tij lendo en chako puonjruok Muma gi ji kendo puonjogi adiera. Mano tiende ni wamany joma ‘chunygi ni kare ne ngima mochwere’ kendo wakonygi bedo gi yie.​—Som Tich Joote 13:44-48.

4. Ere kaka wanyalo fwenyo joma ‘chunygi ni kare ne ngima mochwere,’ to wanyalo yudogi nade?

⁴ Ere kaka wanyalo fwenyo joma ‘chunygi ni kare ne ngima mochwere’? Mana kaka e kinde Jokristo mokwongo, yo ma yot mar fwenyogi en mana ka walendonegi. Omiyo, onego watim mana kaka Yesu nonyiso jopuonjrene niya: “E taon kata e gweng’ moro amora mudonjoe, manyuru ng’at mowinjore.” (Mat. 10:11) Ok wagen ni joma wigi tek, joma ok ohero weche Nyasaye, kod joma wuondore biro rwako wach ma walando. Wamanyo mana joma obolore kendo ma nigi riyo mar ng’eyo adiera. Wanyalo manyo joma kamago mana kaka Yesu ne nyalo manyo bao mowinjore ne loso kombe, dhoudi, kod gik mamoko. Bang’ yudo bao mowinjore, notiyo gi gige tich kod lony ma ne en-go e loso gima nodwaro. Wan be onego watim mana kamano sama watemo konyo joma chunygi ni kare mondo obed jopuonjre Yesu.​—Mat. 28:19, 20.

5. En ang’o monego wang’e e wi Gik Mwatiyogo e Puonjo Ji Muma? Ler ane. (Ne pichni manie chak sulani.)

⁵ E sanduk moketie gige tich, moro ka moro kuom gigo nigi tich sie ma itimo kode. Kuom ranyisi, par ane gige tich ma nyalo bedo ni Yesu ne tiyogo e tije mar bao. * Ne dwarore ni obed gi gige tich ma ne nyalo konye e pimo bao, ng’ade, kendo kunyo buche kuome, goyo kabiru, kendo riwo bepe. E yo machalo kamano, moro ka moro kuom Gik Mwatiyogo e Puonjo Ji Muma nigi tichne sie. Omiyo, we wanon ane kaka wanyalo tiyo kodgi.

6, 7. (a) Ere kaka isetiyo gi kad mag jw.org? (b) Kalatese mag gwelo ji e chokruogewa miyo ji thuolo mar yiero ang’o?

⁶ Kad mag jw.org. Magi gin kad matindo ma wanyalo miyo ji mondo okonygi ng’eyowa maber kendo gidonj e websaitwa. Ka gisedonjo, ginyalo ng’eyo weche momedore kuomwa kendo kwayo mondo opuonjgi Muma. Chop sani, ji mokalo 400,000 osekwayo e jw.org mondo opuonjgi Muma, kendo pile pile wamedo yudo kwayo mag ji mathoth! Inyalo wuotho gi kadgo sama in e dijeni ma pile, mondo iti gi thuolo moro amora moneno e chiwo neno.

⁷ Kalatese mag gwelo ji. Kalatas ma watiyogo e gwelo ji e chokruogewa wachoga kama: “In bende ogweli mondo ipuonjri Muma gi Joneno mag Jehova.” Kae to omiyo ng’ato thuolo mar yiero kama doher ni opuonjree Muma. Onyalo puonjore “e chokruogewa mag lamo,” kata onyalo yiero mondo ‘achiel kuomwa odhi opuonje.’ Omiyo, kalatasno ok kony akonya ji ng’eyo ni wan jomage kae to oweyo gi kanyo, kar mano, ogwelo “joma nigi riyo mar ng’eyo Nyasaye” mondo gibi gipuonjre Muma kodwa. (Mat. 5:3) Kata kamano, ng’ato ang’ata oyiene biro e chokruogewa bed ni opuonjre Muma kodwa kata  ooyo. Ka gibiro, onge kiawa ni gibiro neno kendo winjo yo ma wapuonjogo adiera ma ni e Muma.

8. Ang’o momiyo dwarore ni wajiw ji obi e chokruogewa kata mana dichiel kende? Chiw ane ranyisi.

⁸ Dwarore ni mondo wadhi nyime jiwo ji obi e chokruogewa kata mana dichiel kende. Nikech ang’o? En nikech gibiro neno pogruok maduong’ ma ni e kindwa gi Babilon Maduong’ sama gineno kaka wan gi chiemb chuny modhuro kendo mamit, to kanise mamoko to ongego. (Isa. 65:13) Dichwo moro gi chiege e piny Amerka noneno mano higni moko mosekalo. Iluongogi ni Ray gi Linda. Ne gineno ni nonego gichak dhi e kanisa. Ne giyie ni Nyasaye nitie kendo ne gin gi riyo mar ng’eyo weche mathoth kuome, omiyo, ne gichako dhi e kanisni duto ma ne yudore e alwora ma ne gidakie, moro bang’ machielo. Kanisni ne thoth ahinya e alworano. Ka ne gichako, nitie weche ariyo ma ne ging’ado e chunygi ni ne gidhi nono e kanisa moro amora ma gidonjoe. Mokwongo, ne gidwaro ni gia gi gimoro ma gipuonjore, to mar ariyo, ne gidwaro neno gik ma nyiso ni jo kanisano gin joma oluoro Nyasaye adier. Bang’ wuotho chiegni e kanisni duto kuom higni mang’eny, chunygi nonyosore marach. Onge gimoro amora ma ne gipuonjore mochomo yo, kae to be gik ma ji timo e kanisnigo ne ok owinjore gi joma luongore ni jo Nyasaye. Bang’ dhi e kanisa mogik ka luwore gi list mag kanisni ma ne gichano dhiye, Linda nomako wuoth odok e tije, to Ray nochomo pacho. Sama Ray ne ni e yo koriembo, nopo koneno Od Romo mar Joneno mag Jehova. Kae to noparo e chunye ni: ‘Donge anyalo donjo mondo anee kaka gilemo?’ To kanyo kende e ma nonenoe gik ma ne gisebedo ka gidwaro! Ji duto e Od Romo ne mor, ne girwake maber, kendo ng’ato ka ng’ato norwakore e yo mowinjore. Ray nobet e kom ma ni machiegni gi jukwaa, kendo weche ma ne opuonj chieng’no nomore sidang’! Mano paronwa weche ma jaote Paulo nowacho kowuoyo e wi ng’at ma ohango dhi e chokruoge mag Jokristo. Nowacho ni ng’at ma kamano ne dhi hulo ayanga niya: “Adier Nyasaye ni e kindu.” (1 Kor. 14:23-25) Ray nochako dhi e chokruoge duto mitimo chieng’ Jumapil, kae to bang’e nochako dhi bende e chokruoge ma kor juma. Linda bende nochako dhi e chokruoge, kendo ne giyie mondo puonjgi Muma kata obedo ni ne gin johigni 70 gi wiye, mi gikone nobatisgi.

9, 10. (a) Ang’o momiyo tiyo gi traktwa aboro manyien yot? (b) Ler ane kaka wanyalo tiyo gi trakt ma wiye wacho ni Pinyruodh Nyasaye En Ang’o?

⁹ Trakt. Wan gi trakt aboro manyien ma yot tiyogo ahinya e chako mbaka gi ji. Nyaka ne wachak yudo trakt manyien-go e higa mar 2013, osegogi ma romo bilion abich! Gima ber gi traktgo en ni kiseng’eyo tiyo gi achiel e lendo, mamoko bedo ma yot tiyogo nikech giduto olosgi e yo machal. Ere kaka inyalo tiyo gi trakt e chako mbaka gi ng’ato?

¹⁰ Wawach ni iyiero tiyo gi trakt ma wiye wacho ni Pinyruodh Nyasaye En Ang’o? Nyis ng’atno penjo ma ni e nyim trakt, kae to ipenje ni: “Be isega penjorie ni Pinyruodh Nyasaye en ang’o? Didwok ni en . . . ?” Kae to nyise oyier dwoko achiel kuom dwoko adek ma onyis kanyogo. Bed ni oyiero dwoko makare kata ma ok kare, in kik imiye dwoko, kar mano, el i trakt kama wacho ni “Dwoko ma Muma Chiwo” kae to isom kode ndiko moket kanyogo, Daniel 2:44 kod Isaiah 9:6. Ka nyalore, dhi nyime nono kode weche mamoko ma ni e i traktno. Mogik, siemne penjo ma ubiro wuoye kiduogo, e tok trakt e bwo wich ma wacho ni “Tem Ane Dwoko Penjoni”: “Ngima biro chalo nade ka wan e bwo loch mar Pinyruodh Nyasaye?” Mano biro konyi  chako mbaka gi ng’atno kidok lime. Sama idok lime, inyalo nono kode somo mar 7 e brosua mar Wach Maber Mowuok Kuom Nyasaye! ma en achiel kuom gige tich ma watiyogo e chako puonjruok Muma gi ji.

11. Olos gasedewa e yo ma chalo nade, to en ang’o monego wang’e sama wamiyogi ji?

¹¹ Gasede. Kuom gasede duto e piny ngima, Ohinga mar Jarito kod Amkeni! e ma igoyo mang’eny moloyo, kendo miloko e dhok mang’eny moloyo! Nikech ji mang’eny nyalo yudogi, sula miketoga e nyimgi ilosoga e yo ma nyalo moro ng’ato ang’ata, kamoro amora. Onego wati kodgi e miyo ji siso mar dwaro ng’eyo gik ma nyalo konyogi moloyo e ngima. Kata kamano, mondo wachiw gaset moro ne joma owinjore, onego wang’e ni chutho-chutho gin jomage molosnegi gasedno.

12. (a) Gaset mar Amkeni! olos ahinya-ahinya ne jomage, to gima maduong’ momiyo igoye en ang’o? (b) En ber mane ma iseneno machiegnini kitiyo gi Amkeni! e lendo?

¹² Amkeni! olos ahinya-ahinya ne joma nigi ng’eyo matin e Muma kata ma ok ong’eyo Muma kata matin. Samoro ok ging’eyo puonj mag Jokristo, kata gin joma weche din ojogo, kata ok ging’eyo ni Muma oting’o puonj ma nyalo konyogi. Gima duong’ momiyo igoyoga Amkeni! en ni mondo okony joma some ong’e ni Nyasaye nitie. (Rumi 1:20; Hib. 11:6) Bende, okonyo ji bedo gi yie ni Muma en “wach Nyasaye.” (1 The. 2:13) Wiye adek miwuoye e Amkeni! ma 2018 gin: “Njia ya Maisha Inayoleta Furaha,” “Siri 12 za Mafanikio Katika Familia,” kod “Kukabiliana na Huzuni ya Kufiwa.”

13. (a) Ohinga mar Jarito mitiyogo e lendo olos ahinya-ahinya ne jomage? (b) En ber mane ma iseneno machiegnini kitiyo gi Ohinga mar Jarito e lendo?

¹³ Ohinga mar Jarito mitiyogo e lendo olos ahinya-ahinya ne joma omiyo Nyasaye kod Muma luor e okang’ moro. Kata obedo ni samoro ging’eyo weche moko e Muma, ok giwinj tiendgi maber. (Rumi 10:2; 1 Tim. 2:3, 4) Wiye adek miwuoye e Ohinga mar Jarito ma 2018 mitiyogo e lendo gin: “Be Muma Pod Konyo e Kindegi?,” “Ngima Biro Chalo Nade Kinde ma Biro?,” kod “Nyasaye Winjo Nade Sama Ichandori?”

14. (a) Vidio ang’wen moket e i Gik Mwatiyogo e Puonjo Ji Muma konyo e yo mane? (b) En ber mane ma iseneno sama itiyo gi vidiogo e lendo?

¹⁴ Vidio. E ndalo Yesu, fundi bao ne nyalo tiyo mana gige tich mag lwedo. Funde bao ma kindewagi to tiyo nyaka gi gige tich ma tiyo gi sitima, mafuta, kata betri, kaka masinde ming’etogo, mikunyogo, miruthogo, miripogo, gi mamoko. Kamano bende, mopogore gi bugewa, sani gigewa mag tich oriwo nyaka vidio, kendo ang’wen kuomgi oket e i Gik Mwatiyogo e Puonjo Ji Muma. Gin: Ang’o Momiyo Onego Ipuonjri Muma?, Ere Kaka Wapuonjoga Ji Muma?, Ang’o ma Timorega e Kingdom Hall?, kod Mashahidi wa Yehova Ni Nani? Vidio ma tugo kuom dakika ariyo kata matin ne mano owinjore ahinya gi limbe mokwongo. Vidio ma tugo kuom dakika mang’eny owinjore gi joma wadok limo kata joma nigi thuolo moromo. Mago gin gige tich ma nyalo jiwo ng’ato mondo ochak puonjore Muma kendo obi e chokruogewa.

15. Chiw ane ranyisi ma lero kaka vidio magwa nyalo konyo ji konyisgi e dhogi giwegi.

¹⁵ Ne ane ranyisini: Ka ne nyaminwa moro oromo gi dhako moro ma nobiro e pinygi kowuok Micronesia kendo ma wacho dho Yapese, notugone vidio mar Ang’o Momiyo Onego Ipuonjri Muma? e dho Yapese. Ka ne vidiono ochako tugo, dhakono nowacho kama: “Mae dhowa! Awuoro! Yo ma ng’ama lero vidioni wuoyogo nyiso maler ni owuok e  pinywa. Dhok mowachono en dhowa!” Bang’ mano, nonyiso nyaminwano ni koro nodhi somo gimoro amora ma yudore e dhogi e jw.org kaachiel gi neno vidio duto mag dhogi. (Pim gi Tich Joote 2:8, 11.) Ne ane ranyisi machielo. Nyaminwa moro modak Amerka nooro ne wuod owadgi modak e piny machielo adres ma yawo vidio achiel achielno e dhogi e jw.org. Bang’ neno vidiono, nondiko ne nyaminwano konyise niya: “Kama wacho ni piny duto nie bwo teko mar ng’at marach oyawo wang’a ahinya. Kendo asekwayo mondo ng’ato obi opuonja Muma.” Parie ni owadgino odak e piny moro ma ogoye tijwa marfuk!

16. Ler ane kaka itiyo gi moro ka moro kuom brosuagi: (a) Winj Nyasaye Mondo Idag Nyakachieng’. (b) Wach Maber Mowuok Kuom Nyasaye! (c) Gin Jomage Matimo Dwaro mar Jehova e Kindegi?

¹⁶ Brosua. Ere kaka inyalo puonjo ng’at ma ok ong’eyo somo maber, kata ng’at ma bugewa ok yudore e dhogi? Wan gi gir tich ma konyowa timo mano. En brosua ma wiye wacho ni Winj Nyasaye Mondo Idag Nyakachieng’. * Gir tich machielo ma wanyalo chakogo puonjruok Muma gi ji en brosua ma wiye wacho ni Wach Maber Mowuok Kuom Nyasaye! Inyalo tang’o ne ng’ato wiye 14 ma yudore e tok brosuano, kae to oyier achiel momako wang’e. Kae to chak kode puonjruok kitiyo gi wich moyierono. Be isetemo tiyo gi yorno sama idok limo joma nisewuoyogo? Brosua machielo ma watiyogo en ma wiye wacho ni Gin Jomage Matimo Dwaro mar Jehova e Kindegi? Olose mondo okony jopuonjrewa mag Muma ong’e riwruogwa e yo maber. Mondo ing’e kaka itiyo kode, som bug Ngimawa kod Tijwa Kaka Jokristo​—Chenro mar Chokruok ma Mach 2017.

17. (a) Buge ariyo ma wapuonjogo ji Muma konyo jopuonjre e yo mane? (b) Jopuonjre mosebatisi pod onego odhi nyime timo ang’o, to nikech ang’o?

¹⁷ Buge. Bang’ kisechako puonjruok gi ng’ato kitiyo gi brosua, inyalo tere e bug Gima Muma Puonjo sa asaya mineno ni ber. Bugno biro konye mondo ong’e weche Muma e yo matut. Bang’ tieko bugno kendo ineno ka japuonjreno timo dongruok, inyalo dhi nyime kode e bug “Ritreuru e Hera mar Nyasaye.” * Bugno biro konyo japuonjre mondo ong’e tiyo gi puonj mag Muma e ngimane. Par ni kata mana bang’ kosebatis japuonjre, pod onego odhi nyime puonjore nyaka otiek buge ariyogo duto. Timo kamano biro konye gurore motegno e adiera.​—Som Jo-Kolosai 2:6, 7.

18. (a) Ndiko mar 1 Timotheo 4:16 jiwowa mondo watim ang’o kaka joma puonjo ji adiera, to timo kamano kelo ber mane? (b) Sama watiyo gi Gik Mwatiyogo e Puonjo Ji Muma, dwachwa maduong’ onego obed ang’o?

¹⁸ Wan Joneno mag Jehova odhialwa gi migawo mar lando “adiera mar wach maber” ma nyalo konyo ji yudo ngima mochwere. (Kol. 1:5; som 1 Timotheo 4:16.) Mano e momiyo omiwa Gik Mwatiyogo e Puonjo Ji Muma. (Ne “ Gik Mwatiyogo e Puonjo Ji Muma.”) Omiyo, watiuru maber gi gige tich ma omiwago. Jalendo ka jalendo e monego oyier gir tich moneno ni ber gi ng’ama owuoyogo kata mopuonjo, kod sa mowinjore gi timo mano. Kik wachiw achiwa bugewa ao yaye kata miyogi joma ok oikore winjowa. Onego wapar kinde duto ni dwachwa maduong’ en konyo joma obolore kendo ma nigi riyo mar ng’eyo Nyasaye mondo gibed jopuonjre Yesu. Ee, watim duto ma wanyalo mondo wakony joma ‘chunygi ni kare ne ngima mochwere.’​—Tich 13:48; Mat. 28:19, 20.