PAR ane japim kor lwasi moneno ranyisi ma nyiso ni kodh yamo mager dhi yweyo alwora moro ma ji mang’eny odakie. Nikech ok doher ni jogo ohinyre kata otho, otimo kinda ahinya mondo omi ji siem mapiyo ka weche pok okethore.

E yo ma kamano, Jehova sani siemo ji e wi masira moro ma biro, ma en masira marach moloyo masira moro amora ma jopim kor lwasi osegalando. Otimo kamano e yo mane? To ere kaka wanyalo bedo gadier ni omiyo ji thuolo moromo mar loko chunygi ka pok masirano otimore? Mondo wayud dwoko mag penjogo, we wakwong wane ane moko kuom siem ma Jehova nochiwo e kinde mokalo.

E kinde machon, Jehova nosiemo ji ka pok nokelo kum mopogore opogore ne joma ne odagi luwo chikene goyiem. (Nge. 10:25; Yer. 30:23) E moro ka moro kuom siemgo, ne ojanyiso jogo komondi kum ma ne odhi kelonegi kod lokruok ma nonego gitim mondo kumno kik yudgi. (2 Ru. 17:12-15; Neh. 9:29, 30) Jehova ne tiyoga gi jotichne e lando kum gi kinda ahinya mondo gikony ji timo lokruoge ma ne dwarore.​—Amos 3:7.

Achiel kuom jotich Jehova ma ne olando kum mag Jehova ne en Noa. Kuom higni mang’eny, nosiemo joma ne ger kendo ma ne nigi timbe maricho ni Ataro dhi ketho joma richo e piny. (Cha. 6:9-13, 17) Nonyisogi bende gima nonego gitim mondo gitony, to mano e momiyo bang’e ne oluong Noa ni “jal ma ne yalo wach makare.”​—2 Pet. 2:5.

Kata obedo ni Noa nolando kum ma Nyasaye ne dhi kelono gi kinda, jogo notamore winje. Ne ginyiso ni ne gionge yie. Mano e momiyo “Ataro nobiro moyweyogi giduto.” (Mat. 24:39; Hib. 11:7) Onge ng’ato ang’ata kuomgi ma ne nyalo ywak ni Nyasaye ne ok osieme chon.

Nitie kinde moko ma Jehova nosiemo ji kodong’ kinde machuok to okelo kum. Kata kamano, pod notemo matek mondo omi ji thuolo moromo mar loko chunygi. Kuom ranyisi, ka ne pok okelo Masiche Apar ne Jo-Misri, ne okwongo osiemogi. Par ane masira mar abiriyo. Jehova nooro Musa gi Harun ir Farao gi jotichne mondo ginyisgi ni ne odhi kelo kodh pe ma ne dhi ketho gik mang’eny. Nikech kodhno ne dhi chakore kinyne, be Jehova nomiyogi thuolo moromo mar yudo kar tony? Muma wacho niya: “Jotij Farao ma ne oluoro wach Jehova norwako jotijegi kod jambgi e udi mapiyo, to ma ne ok odewo wach Jehova noweyo jotijegi kod jambgi oko.” (Wuok 9:18-21, NW) Nenore maler ni Jehova nochiwo thuolo moromo mondo joma norwako siemno otony.

Ka ne masira mar apar pok otimore, Jehova nokwongo osiemo Farao gi jotichne. Kata kamano, fuwo nomakogi mi gitamore rwako siemno. (Wuok 4:22, 23) Nikech mano, yawuotgi makayo notho te. Lit ndi! (Wuok 11:4-10; 12:29) Be nitie gima ne ginyalo timo gi  thuolo matinno mondo masirano kik yudgi? Ee! Par ane: Donge e thuolo matinno Musa nonyiso Jo-Israel wach masira mar aparno kod gima ne ginyalo timo mondo gires joggi? (Wuok 12:21-28) Ji adi ma noluwo kaka Musa nochikogi? Nonro mosetim nyiso ni ji milion adek notony e masirano mi giwuok Misri. Kwanno noriwo Jo-Israel, jomoko ma ok Jo-Israel, kaachiel gi Jo-Misri.​—Wuok 12:38.

Ranyisigo nyiso maler ni kinde duto Jehova ne miyoga ji thuolo moromo mar kawo okang’ mowinjore ka pok nokelo kum. (Rap. 32:4) Nikech ang’o? En nikech “ok odwar ni oketh ng’ato ang’ata, to odwaro ni ji duto ochop kama gilokoe chunygi gia e richo.” (2 Pet. 3:9) Ee, Jehova ne dewo jogo. Nodwaro ni gilok chunygi kendo gikaw okang’ mowinjore ka pok okelo kum.​—Isa. 48:17, 18; Rumi 2:4.

E kindewagi bende, dwarore ni ji okaw okang’ mapiyo sama giwinjo siem ma Jehova chiwo e piny ngima. Ka ne Yesu ni e piny ka, nowacho ni piny marachni ibiro keth e kinde “masira maduong’.” (Mat. 24:21) Nonyiso jolupne gik ma ne dhi timore ka masirano chiegni. Gik ma Yesu nowachogo e gik ma timore e kindewagi.​—Mat. 24:3-12; Luka 21:10-13.

Nikech Jehova osechiwo siem chon, mano nyiso ni odwaro ni ji oyie bedo e bwo lochne. Odwaro ni joma winje obed gi ngima maber sani, kendo giyud gueth mogundho e piny manyien ma biro. (2 Pet. 3:13) Mondo Jehova okony ji bedo gi yie kuom gik mosingo, omiyo ji thuolo mar winjo ‘wach maber mar Pinyruoth’ ma Yesu nowacho ni ne idhi “yal e piny mangima mondo ochiw neno ne ogendni duto.” (Mat. 24:14) Jehova osechano jotichne mondo giyal wach maberno e pinje ma dirom 240. Doher ni ji mang’eny kaka nyalore orwak siemno mondo gibi gitony ne kum ma biro.​—Zef. 1:14, 15; 2:2, 3.

Kare penjo monego wapenjre ok en ka be Jehova siemoga ji ka pok okelo kum. Gik mosetimore kinde mokalo nyiso maler ni otimoga kamano. Penjo maduong’ en ma: Be ji biro rwako siem ma Jehova miyogi mi gilok chunygi ka pod thuolo nitie? Nikech Nyasaye siemo ji kokalo kuomwa, watiuru matek mondo wakony ji mang’eny kaka nyalore mondo gibi gitony sama ibiro keth piny marachni.