1. En yiero mane maberie mogik ma ng’ato onego otim e ngimane?

KINDE mang’eny, yiero ma jonyuol timo ne nyithindgi muloga ngimagi kuom higni mathoth. Ka janyuol otimo yiero marach, to mano nyalo kelo ne nyithinde chandruok. To ka gitimo yiero mabeyo, mano biro miyo nyithindgi obed gi ngima maber bang’e, kendo giyud mor madier. En adier ni nyithindo be nyaka tim yiero mabeyo e ngimagi. To yiero maberie mogik ma ng’ato nyalo timo en tiyo ne Wuonwa ma nie polo, ma en Jehova.​—Zab. 73:28.

2. Gin yiero mage mabeyo ma jonyuol Yesu notimo?

² Jonyuol Yesu ne dwaro ni nyithindgi oti ne Jehova, kendo yiero ma ne gitimo ne nyiso ni mano e gima ne duong’ e ngimagi. (Luka 2:40, 41, 52) Yesu bende ne otimo yiero mabeyo ma ne dhi konye timo dwach Jehova. (Mat. 4:1-10) Yesu nodongo mobedo ng’ama ng’won, jaratiro, kendo jachir. Janyuol moro amora moluoro Nyasaye digomb bedo gi wuoyi ma kamano.

3. Gin penjo mage ma wabiro nono e sulani?

³ E sulani, wabiro nono penjogi: Gin yiero mage ma Jehova ne otimo ne Yesu? Gin ang’o ma jonyuol ma Jokristo nyalo puonjre kuom jonyuol Yesu ma nopidhe e pinyka? Kae to, rowere nyalo puonjore ang’o kuom yiero mabeyo ma Yesu notimo?

4. En yiero mane maber ma Jehova notimo ka luwore gi ngima Yesu?

⁴ Jehova ne oyiero ne Yesu jonyuol mabeyo mogik. (Mat. 1:18-23; Luka 1:26-38) Weche ma yudore e Muma ma Maria nowacho kowuok e chunye nyiso kaka ne ohero Jehova kod Wachne. (Luka 1:46-55) Bende, yo ma Josef  noyie winjogo Jehova ka ne Jehova ochike mondo okend Maria nyiso ni ne en ng’ama oluoro Nyasaye kendo nodwaro more.​—Mat. 1:24.

5-6. Gin pek kaka mage ma Jehova ne ok ogeng’o ne Yesu?

⁵ Jehova ne ok oyiero ne Yesu jonyuol momewo. Chiwo ma Josef gi Maria nogolo ka ne onyuol Yesu nyiso kaka ne gin joma odhier. (Luka 2:24) Nyalo bedo ni Josef ne ni mana gi kiru moro matin e bath ode ma ne ni Nazareth kama ne otiyoe tij bao. Nenore ni ne gidak e ngima mayot, to ahinya-ahinya kaka ne gimedo bedo gi nyithindo mang’eny ma ok tin ne abiriyo.​—Mat. 13:55, 56.

⁶ Jehova nogeng’o ne Yesu chandruoge moko ma ne nyalo yude, to ok notimone kamano kinde duto. (Mat. 2:13-15) Kuom ranyisi, Yesu ne nyaka ng’e kaka ne onyalo dak gi wedene ma ne ok oyie kuom Nyasaye. Nyaka bed ni nowinjo malit ka joodgi monyuolego ne okwongo okwede ni ok ne en Mesia. (Mar. 3:21; Joh. 7:5) Yesu bende ne nyaka nyagre gi lit ma ne owinjo ka ne Josef wuon-gi ma nopidhe otho. Nikech ne en kayo, ne nyaka koro okaw ting’ moko mag wuon-gi e odgi. (Mar. 6:3) Kaka Yesu ne medo dongo, nodewo joodgi kendo noherogi. Nyalo bedo ni notiyo matek mondo joodgi oyud kaka ginyalo konyore. Mano nyiso ni nong’eyo kaka ng’ato nyalo winjo e dende bang’ tiyo matek odiechieng’ mangima.

7. (a) Gin penjo mage ma joma okendore onego openjre e wi pidho nyithindo? (b) Ere kaka Ngeche 2:1-6 nyalo konyo jonyuol sama gitiego nyithindgi?

⁷ Ka un joma okendore, be uchano bedo gi nyithindo? Ka en kamano, unyalo penjoru kama: ‘Be wan joma obolore, mohero Jehova kod dwache, kendo ma Jehova nyalo yiero mondo opidhne nyathi?’ (Zab. 127:3, 4) To ka di po ni isebedo janyuol, penjri ane kama: ‘Be apuonjo nyithinda ber mar tiyo matek?’ (Ekl. 3:12, 13) ‘Be atemo matek mondo arit nyithinda kuom chandruoge ma nyalo yudogi nikech piny Satan marachni?’ (Nge. 22:3) En adier ni ok inyal geng’o ne nyithindi chandruoge duto. Kata kamano, mosmos inyalo ikogi e yor hera ne pek ma ginyalo romogo e ngimagi kuom puonjogi kaka ginyalo geno Wach Nyasaye sama gitimo yiero. (Som Ngeche 2:1-6.)  Kuom ranyisi, ka watni moro kwedo adiera, kony nyithindi mondo ging’e gimomiyo makruok gi Jehova e gima duong’ moloyo. (Zab. 31:23) Ka watgi kata osiepgi moro otho, konygi ng’eyo kaka gi nyalo yudo hoch kuom Wach Nyasaye, kod kaka ginyalo bedo gi chuny mokue.​—2 Kor. 1:3, 4; 2 Tim. 3:16.

8. Ka luwore gi Rapar mar Chik 6:6, 7, en ang’o ma Josef gi Maria ne nyaka tim?

⁸ Jonyuol Yesu ma nopidhe nokonye modongo ka en ng’at ma Nyasaye oyiego. Ne giluwo chik ma Jehova nomiyo jonyuol. (Som Rapar mar Chik 6:6, 7.) Josef gi Maria nohero Jehova ahinya, kendo gombogi maduong’ ne en konyo nyithindgi mondo gin bende gibed gi hera ma kamano.

9. Gin yiero mage madongo ma Josef gi Maria notimo?

⁹ Josef gi Maria ne nigi kinda mar puonjruok Wach Nyasaye kaka joot. Onge kiawa bende ni ne gidhiga e chokruoge ma juma ka juma e sunagogi ma ne ni Nazareth kendo dhi e Pasaka ma ne itimo Jerusalem higa ka higa. (Luka 2:41; 4:16) Nyalo bedo ni ne gitiyoga gi thuolo ma ne giwuothogo e yo ka gidhi Jerusalem e puonjo Yesu gi nyithindgi mamoko e wi jotich Nyasaye machon, kendo samoro ne girawoga kuonde miwuoye e Muma ma jotich Nyasayego nodakie. Kaka ne gimedo bedo gi nyithindo, nyalo bedo ni koro ok ne en gima yot ne Josef gi Maria mondo gimakre gi chenrogi mar pidho joot chiemb chuny. Kata kamano, ne giyudo ber mang’eny kuom makruok gi chenrono. Nikech ne giketo lamo Jehova obed gima okwongo e ngimagi, mano nokonyo nyithindgi mondo obed osiepe Nyasaye.

10. Gin ang’o ma jonyuol ma Jokristo nyalo puonjore kuom Josef gi Maria?

¹⁰ Gin ang’o ma jonyuol ma Jokristo nyalo puonjore kuom Josef gi Maria? Puonj maduong’ moloyo en ni onego gipuonj nyithindgi hero Jehova gi chunygi duto kokalo kuom wechegi kod timbegi. Ng’e ni mich maberie mogik minyalo miyo nyithindi en konyogi giher Jehova. Kae to bende, konygi ng’eyo kaka ginyalo  bedo gi chenro mar somo Wach Nyasaye, lemo, dhi e chokruoge ma ok gibare, kod tij lendo. Timo gigo biro konyogi bedo osiepe Jehova. (1 Tim. 6:6) En adier bende ni nyaka imi nyithindi gik ringruok. (1 Tim. 5:8) Kata kamano, par ni winjruok maber ma ginyalo bedogo gi Jehova e ma biro miyo gitony e piny marachni ma gidonj e piny manyien mar Nyasaye, to ok gik ringruok. *​—Eze. 7:19; 1 Tim. 4:8.

11. (a) Ere kaka paro ma yudore e 1 Timotheo 6:17-19 nyalo konyo jonyuol mondo otim ne nyithindgi yiero mabeyo kinde ma pod gipidhogi? (b) Gin tije mage ma joodi nyalo chano timo, to gibiro yudo gueth mage ka gitimo tijego? (Ne sanduk ma wacho ni, “ Gin Ang’o Minyalo Chano Timo?”)

¹¹ En gima morowa neno kaka jonyuol mang’eny ma Jokristo timo yiero mabeyo ne nyithindgi mondo gibed gi winjruok maber gi Jehova! Gitimoga gik motudore gi lamo Jehova kanyachiel. Gidhiga e chokruoge mag kanyakla kod chokruoge madongo. Kendo gidhiga e tij lendo. Joot moko bende chiworega mondo gidhi gilend kuonde ma ok hiny lendee. Moko be limoga ofisewa kendo gichiwore mondo gikony tij gedo mitimo kuonde mopogore opogore. Joot ma yiero timo tije kaka mago nyaka chiwre e yor pesa kendo ginyalo romo gi pek moko. Kata kamano, gueth ma giyudo tegoga winjruokgi gi Nyasaye. (Som 1 Timotheo 6:17-19.) Nyithindo modongo e ute ma chalo kaka mago, bedoga nyithindo ma timbegi beyo kendo ok giywagga ang’e kata matin! *​—Nge. 10:22.

12. Ang’o ma Yesu ne nyaka tim ka nosebedo ng’ama duong’?

¹² Wuon Yesu ma ni e polo kinde duto notimone yiero mabeyo, to jonyuolne ma nopidhe e piny ka bende notimo kamano. Kata kamano, ka Yesu nosebedo ng’ama duong’, ne nyaka koro otim yierone owuon. (Gal. 6:5) Mana kaka wan, Yesu be ne nigi thuolo mar timo yiero. Nonyalo yiero timo gik ma more owuon. Kata kamano, noyiero dhi nyime tego winjruokne gi Jehova kendo timo dwache. (Joh. 8:29) Ere kaka ranyisine nyalo konyo rowere ma ndalowagi?

13. Gin yiero mage ma Yesu notimo ka ne pod en rawera?

¹³ Ka Yesu ne pod en rawera, noyiero miyo jonyuolne luor. Ne ok otamore timo kaka jonyuolne ne chike, kendo ne ok omino kodgi wach koparo ni oriek moloyogi. Kar mano, “nodhi nyime  luwo kaka ne gichike.” (Luka 2:51) Bende, onge kiawa ni nokawo ting’ ma ne en-go kaka wuoyi makayo. Notiyo matek mondo opuonjre tich ma ne wuon-gi ma nopidhe tiyo mondo okonygo joodgi.

14. Wang’eyo nade ni Yesu ne en japuonjre maber mar Wach Nyasaye?

¹⁴ Nyalo bedo ni jonyuol Yesu nonyise kaka nonyuole e yor hono kaachiel gi gima jotich Nyasaye moko nowacho e wi ngimane. (Luka 2:8-19, 25-38) To mago kende ne ok orome. Nodhi nyime puonjore Ndiko owuon. Wang’eyo nade ni Yesu ne en japuonjre maber mar Wach Nyasaye? En nikech ka ne pod en rawera, jopuonj ma ne ni Jerusalem ne “siko ka wuoro riekone mar ng’eyo tiend weche kod kaka ne odwoko.” (Luka 2:46, 47) Kendo ka en mana jahigni 12, nofwenyo kokalo kuom Ndiko ni Jehova en Wuon-gi.​—Luka 2:42, 43, 49.

15. Ere kaka Yesu nyiso ni noyiero timo dwach Jehova?

¹⁵ Yesu nopuonjore e wi migawo ma ne en-go motudore gi dwach Jehova kendo noyie timo migawono. (Joh. 6:38) Nong’eyo ni ji mang’eny ne dhi sin kode, kendo nyaka bed ni mano ne chando pache ahinya. Kata kamano, pod noyie winjo Jehova. Ka ne obatis Yesu e higa mar 29, gima duong’ e ngimane koro ne en timo dwach Jehova. (Hib. 10:5-7) Kata sama ne en e yadh-sand, ne ok oweyo timo dwach Jehova.​—Joh. 19:30.

16. En puonj mane ma nyithindo nyalo puonjore kuom Yesu?

¹⁶ Luor jonyuolni. Mana kaka Josef gi Maria, jonyuolni be gin joma orem. Kata kamano, pod Nyasaye omiyogi ting’ mar riti, tiegi, kendo tayi. Ka iwinjogi kendo imiyogi luor kaka joma onego otayi, to ‘weche nodhi kodi maber.’​—Efe. 6:1-4.

17. Ka luwore gi Joshua 24:15, en yiero mane ma rowere onego otim?

¹⁷ Yier ng’ama ibiro tiyone. Nyaka ipuonjri iwuon mondo ing’e Jehova, dwache, kod kaka ngimani otudore gi timo dwache. (Rumi 12:2) Timo kamano biro konyi timo yiero moro maduong’ e ngimani, ma en tiyo ne Jehova. (Som Joshua 24:15; Ekl. 12:1) Ka ibedo gi chenro mar somo kendo puonjori Muma pile,  hera ma iherogo Jehova kod yieni biro medo bedo motegno.

18. En yiero mane ma rowere nyaka tim, to mano biro konyogi nade?

¹⁸ Yier keto dwach Jehova obed mokwongo e ngimani. Piny Satan jiwo ji ni ka gitiyo gi nyalogi e timo gigegi giwegi, to mano biro miyo gibed ma mor. Adiera en ni, joma kedo mondo obed gi mwandu mag piny chwowore giwegi “kuonde duto gi lit mang’eny.” (1 Tim. 6:9, 10) To ka iyie winjo Jehova kendo iyiero keto dwache obed mokwongo e ngimani, yoreni duto biro dhi maber, kendo ibiro bedo “gi rieko.”​—Jos. 1:8.

19. En ang’o ma jonyuol nyaka par?

¹⁹ Ka in janyuol, tim duto minyalo mondo ikony nyithindi oti ne Jehova. Gen Jehova, to obiro konyi timo yiero mabeyo. (Nge. 3:5, 6) Par ni nyithindi biro puonjore ahinya kuom gik ma itimo to ok gik ma iwacho. Kuom mano, tim yiero ma biro konyogi bedo joma Jehova oyiego.

20. Gin gueth mage ma rowere nyalo yudo ka giyiero tiyo ne Jehova?

²⁰ Un rowere, jonyuolu nyalo konyou timo yiero mabeyo e ngima. Kata kamano, in gi ting’ mar timo gik ma Jehova dwaro mondo e ka oyie kodi. Omiyo, luw ranyisi mar Yesu kendo iyier tiyo ne Jehova Wuonu ma jahera. Ka itimo kamano, ibiro bedo gi ngima mopong’ gi mor. (1 Tim. 4:16) Kendo e kinde ma biro, ibiro mor dak e ngima maberie mogik!