‘Wach Nyasaye Nigi Teko’
“Wach Nyasaye ngima kendo en gi teko.”—HIB. 4:12.
1. Ang’o momiyo wan gadier chuth ni Wach Nyasaye nigi teko? (Ne picha ma ni e chak sulani.)
KAKA jotich Jehova, wan gadier chuth ni Wach Nyasaye momiyo dhano, ‘ngima kendo nigi teko.’ (Hib. 4:12) Yo ma Muma oselokogo kit ngimawa nyiso maler ni Wach Nyasaye nigi teko mar loko ngima ji. Moko kuomwa chon ne gin jokuoge, joma tiyo gi yedhe ma mero ji, kata jochode. Moko bende ne odak adaka maber, kata kamano, pod ne gineno ni nitie gima ne giremo e ngimagi. (Ekl. 2:3-11) Nitie ji mang’eny ma ne piny oselalgo chuth, to sani giseyudo yo ma dhi e ngima mana nikech teko ma Wach Nyasaye nigo. Nyalo bedo ni isesomo weche mag joma kamago e bwo wich ma wacho ni “Muma Loko Kit Ngima Ji,” ma yudorega e Ohinga mar Jarito. Isefwenyo bende ni kata mana bang’ ng’eyo adiera, Jokristo pod nyaka dhi nyime timo lokruok mathoth, to Muma e ma nyalo konyogi timo mano.
2. Ere kaka teko ma Wach Nyasaye nigo notiyo e kinde joote?
2 Be onego wahum sama waneno ka ji mang’eny timo lokruok madongo nikech giyie puonjore Wach Nyasaye? Ooyo! Yo ma Wach Nyasaye lokogo kit ngima ji paronwa owetewa gi nyiminewa ma ne odak e kinde joote, kendo ma ne nigi geno mar dhi e polo. (Som 1 Jo-Korintho 6:9-11.) Bang’ ka jaote Paulo nosekwano ji ma nigi kido maricho mopogore opogore ma ok bi yudo pok e Pinyruodh Nyasaye, nowacho kama: “To mano e kaka moko kuomu ne chal.” Kata kamano, Wach Nyasaye kod roho maler nosekonyogi mi giloko ngimagi. Kata mana bang’ rwako adiera kendo bedo Jokristo, moko kuomgi pod ne nyaka ked matek mondo giwe timbe moko maricho. Muma wuoyo e wi achiel kuom owete ma ne owal e kinde Jokristo mokwongo ma ne ogol e kanyakla nikech richo maduong’ ma notimo; kata kamano, bang’ kinde, ne oduoke. (1 Kor. 5:1-5; 2 Kor. 2:5-8) Donge wayudo jip ahinya sama waneno kaka Wach Nyasaye osekonyo Jokristo wetewa e nyagore gi nyawo mopogore opogore ma gin-go?
3. Ang’o ma wadwaro nono e sulani?
3 Nikech Wach Nyasaye nigi teko mang’eny kendo en gima wan-go pile, dwarore ni wati kode maber. (2 Tim. 2:15) E sulani, wadwaro nono gik ma wanyalo timo mondo teko ma Wach Nyasaye nigo oti (1) e ngimawa wawegi, (2) sama wan e tij lendo, kod (3) sama wapuonjo e nyim ji e chokruok. Nono wechegi biro chwalowa mondo wanyis e rang’iny momedore ni wahero Wuonwa ma ni e polo kendo wamor kode, nikech opuonjowa mondo wayud konyruok.—Isa. 48:17.
E NGIMAWA WAWEGI
4. (a) Mondo wach Nyasaye oti e ngimawa, dwarore ni watim ang’o? (b) In itimoga ang’o mondo iyud thuolo mar somo Muma pile ka pile?
4 Mondo Wach Nyasaye oti e ngimawa, dwarore ni wasome pile ka pile ka nyalore. (Jos. 1:8) En adier ni thothwa odichga ahinya. Kata kamano, ok dwaher ni gimoro amora, moriwo nyaka gik mochuno e ngimawa, ochoch chenro ma wan-go mar somo Muma pile pile. (Som Jo-Efeso 5:15, 16.) Jotich Jehova mang’eny oseng’eyo riekni ma ginyalo tiyogo mondo giyud thuolo mar somo Muma pile, bed ni gisome gokinyi, odiechieng’, kata godhiambo. Gin gi paro kaka ma jandik-zaburi ne nigo ka nowero kama: “Ahero chikni . . . Apare e chunya pile ka pile.”—Zab. 119:97.
5, 6. (a) Ang’o momiyo paro matut kuom gik ma wasomo e Muma en gima duong’? (b) Ere kaka wanyalo paro matut kuom Ndiko e yo ma kelonwa ber? (c) Ere kaka somo Wach Nyasaye kendo paro matut kuome osekonyi in iwuon?
5 Dwarore bende ni sama wasomo Muma, wapar matut kuom gik ma wasomo. (Zab. 1:1-3) Mano e ka wabiro tiyo gi rieko ma yudore e i Muma e ngimawa wawegi. Bed ni wasomo Muma ma ogo e buk kata ma dijitol, dwachwa maduong’ onego bed rwako wechego e chunywa.
6 Ere kaka wanyalo paro matut kuom Ndiko e yo ma kelonwa ber? Nitie jomoko ma oseyudo ber kuom penjorega penjo moko sa asaya ma gisesomo ndiko moro, kaka: ‘Wachni puonja ang’o e wi Jehova? Ere kaka asechako tiyo gi puonjni e ngimana? Gin kuonde mage monego atimie lokruok?’ Kaka wamedo paro matut e wi gik ma wasomo e Muma 2 Kor. 10:4, 5.
kendo lemo, e kaka wabiro yudo ka yotnwa medo tiyo gi puonj mag Muma e ngimawa. Ee, wabiro yie mondo teko ma Wach Nyasaye nigo oti e okang’ momedore e ngimawa wawegi.—SAMA WAN E TIJ LENDO
7. Ang’o ma wanyalo timo mondo teko ma Wach Nyasaye nigo oti sama wan e tij lendo?
7 Ang’o ma wanyalo timo mondo teko ma Wach Nyasaye nigo oti sama wan e tij lendo? Okang’ mokwongo en neno ni watiyo kode nyading’eny kaka nyalore. Owadwa moro ne oketo wachno kama: “Dabed ni inyalo yudo thuolo mar lendo gi Jehova owuon e ot ka ot, be in e ma ibiro wuoyo mang’eny, koso ibiro miye thuolo mondo en e ma owuo gi ji?” Gima notemo wacho en ni sama wasomo ne ji Muma achiel kachiel ka wan e tij lendo, wamiyo Jehova thuolo mar wuoyo gi joma walendonegi. Ndiko moyier maber nigi teko mang’eny moloyo gimoro amora ma wanyalo wacho. (1 The. 2:13) Penjri kama: ‘Be amanyoga thuolo mag somo ne ji Muma achiel kachiel sama alandonegi wach maber?’
8. Sama walendo, ang’o momiyo somo asoma ne ji Muma kende ok oromo?
8 En adier ni somo asoma ne ji Muma kende ok oromo. Nikech ang’o? En nikech ji mang’eny ok olony gi Muma, kata samoro giwinjo kore mana ma rach-rach. Mano ok en gima wendo, nikech kata mana e kinde Jokristo mokwongo bende thoth ji ne ok ong’eyo Wach Nyasaye e yo malong’o. (Rumi 10:2) Omiyo, ok onego wapar ni ng’ato biro winjo tiend gima ndiko moro puonjo mana nikech wasomone ndikono. Dwarore ni wakonygi fwenyo weche madongo e ndiko ma wasomonegi. Nyalo kata dwarore ni wanwo somo ndiko moro, kendo walere e yo matut. Timo kamano nyalo konyo ahinya e rwako Wach Nyasaye e pach ji kod chunygi bende.—Som Luka 24:32.
9. Ere kaka wanyalo iko pach ji ne ndiko ma wadwaro somonegi e yo ma chiwo luor mowinjore ne Muma? Chiw ane ranyisi.
9 Bende, sama waiko pach ji ne ndiko ma wadwaro somo, onego watim mano e yo ma chiwo luor mowinjore ne Muma. Kuom ranyisi, wanyalo wacho kama: “We wane ane paro ma Jachuechwa nigo e wi wachni.” Ka wawuoyo gi ng’ama ok ni e dinde ma luongore ni Jokristo, wanyalo wacho weche kaka: “Ne ane gima Ndiko Maler nyisowa.” To ka po ni walendo ne ng’ama weche din ok obadho, wanyalo penje kama: “Be isegawinjo gima ngero machonni wacho?” Kuom adier, ng’ato ka ng’ato nigi yo minyalo chopgo e chunye, omiyo, ber ka waketo mano e pachwa sama walendo ne ji mopogore opogore. Kik wati atiya gi yo achiel pile.—10. (a) Owadwa moro noneno nade teko ma Wach Nyasaye nigo sama ne en e tij lendo? (b) In iseneno teko mar Wach Nyasaye ka tiyo e yo mane sama ilendo?
10 Jolendo mang’eny osefwenyo ni somo ne joma gilendonegi Wach Nyasaye nyalo kelo ne jogo lokruok maduong’ e kit ngimagi. Kuom ranyisi, owadwa moro ne odok limo ng’at moro ma ne osebedo ka somo gasedewa kuom higni mang’eny. Ne ok omiyo amiya ng’atno Ohinga mar Jarito manyien kae to oweye kamano, kar mano, nosomone achiel kuom ndiko ma ne ni e i gasedno. Ndikono ne en 2 Jo-Korintho 1:3, 4 ma wacho ni, “Wuoro ma kecho ji kendo Nyasach hoch duto . . . hoyowa e masichewa duto.” Wechego nomulo chuny ng’atno ahinya, mi nokwayo owadwano mondo osomne ndikono kendo. Ng’atno ne owacho ni ne gidwaro hoch ahinya en gi chiege. Nochako rwako wach maber mowuok e Muma. Donge en adier ni teko ma Wach Nyasaye nigo nyalo tiyo kuom ji sama wan e tij lendo?—Tich 19:20.
SAMA WAPUONJO E NYIM JI E CHOKRUOK
11. Owete ma puonjo ji e chokruok onego one migapgi nade?
11 Waduto wamorga ahinya gi chokruogewa mag kanyakla, mag alwora, kod chokruoge madongo mag ndalo adek. Gima duong’ momiyo wadhiga e chokruogego en lamo Jehova. Bende, puonj ma imiyowa e chokruogewa konyowa ahinya. Migawo mar puonjo e nyim ji e chokruogewa en migawo makende ahinya, kendo owete ma omi migepe ma kamago onego okawgi mapek. (Jak. 3:1) Nyaka gitem matek mondo gine ni gimoro amora ma gipuonjo otenore kuom Wach Nyasaye. Sama in gi migawo mar golo twak e nyim ji, ere kaka inyalo miyo teko ma Wach Nyasaye nigo oti kuom jowinjo?
12. Ere kaka jagol-twak nyalo siro twage gi Muma?
12 Sama omiyi migawo mar golo twak, ne ni isiro twagi gi Muma. (Joh. 7:16) Mano dwaro ni itim ang’o? Mokwongo, nyaka ibed motang’ mondo ranyisi mitiyogo, weche mosene, kaachiel gi yo migologo twagi kik um puonj ma ni e ndiko misomo. Bende, ber ng’eyo ni tiyo gi Muma e puonjo ok nyis ni koro isom ndiko turi. Kiwacho adier, sama isomo ndiko modhuro e twak, ndikogo duto nyalo kalo akala fwaya ne jowinjo. Omiyo, yier maber ndiko mibiro tiyogo, kendo isomgi, ilergi, iti gi ranyisi mowinjore, kendo ikony jowinjo neno kaka ginyalo tiyo gi puonj ma ni e ndikogo. (Neh. 8:8) Ka omiyi kalatas-twak (outline), non weche ma ni e iye maber kaachiel gi ndiko moket kanyo. Tem fwenyo tudruok ma nitie e kind weche mondik kanyogo gi ndiko moketi. Kae to yier ndiko mibiro tiyogo e gero weche madongo ma ni e twagi. (Mondo iyud paro momedore ma nyalo konyi, non lony namba 21 nyaka 23 e bug Tiegri e Skul mar Tij Nyasaye.) To gima kik wiyi wilgo ngang’ en ma: Lam Jehova kikwaye mondo okonyi lero ne ji adiera ma ni e Wachne e yo maber.—Som Ezra 7:10; Ngeche 3:13, 14.
13. (a) Ndiko nomulo chuny nyaminwa moro nade ka ne en e chokruok? (b) In iwuon iseyudo ber mage nikech yo milerogo Ndiko e chokruogewa?
13 Nitie nyaminwa moro ma a Australia ma nokalo e chandruok mang’eny ahinya ka ne pod otin. Kata obedo ni bang’e norwako adiera mi obatise, pod noyudo ka tekne yie ni Jehova ohere. Kata kamano, mosmos noduogo ofwenyo ni kare Jehova ohere ahinya. Ang’o ma nokonye? Chieng’ moro ka ne en e chokruok, owadwa moro ma ne golo twak notiyo gi ndiko moro e yo ma nomulo chunye ahinya. Nyaminwano noparo matut ahinya kuom ndikono, kendo notemo tude gi ndiko mamoko ma nong’eyo. * Be gima kamano osetimoreni bang’ winjo kaka ilero ndiko moro e chokruogewa mag kanyakla, mag alwora, kata chokruogewa madongo mag ndalo adek?—Neh. 8:12.
14. Ere kaka wanyalo nyiso ni wagoyo ne Jehova erokamano nikech Wachne ma omiyowa?
14 Donge wagoyo ne Jehova erokamano ahinya nikech omiyowa Wachne ma ni e Muma? Nomiyowa Wachne nikech oherowa, kendo osetimo kaka nosingo ni Wachne ne dhi siko nyaka chieng’. (1 Pet. 1:24, 25) Koro, gima onego wadhi nyime timo en somo Wach Nyasaye pile, tiyo gi puonjge e ngimawa, kendo tiyo kode e konyo jomamoko. Mano e yo ma wanyisogo ni wamor gi Wach Nyasaye, kendo wamor gi Jehova Nyasachwa ma e Jal ma nomiyowa Wachno.
^ par. 13 Ne sanduk ma wiye wacho ni, “ Ngimana ne Olokore.”