1. Ere kaka jotich Nyasaye nyiso ni giherore?

JOTICH Jehova duto e piny ngima gin joot achiel e yie kendo giherore ahinya. (1 Joh. 4:16, 21) Ok ginyis hera e gik madongo mitimo dichiel ka dichiel, kar mano, ginyiso hera e weche mapile kaka wuoyo mang’won kendo kecho ji. Sama wakecho ji kendo wang’won kodgi, wabedo ‘nyithindo moher ma timo kaka Nyasaye timo.’​—Efe. 5:1.

2. Yesu nonyiso nade ni nohero ji mana kaka Nyasaye?

² Yesu noluwo ranyisi mar Wuon-gi e yo makare chuth. Yesu nowacho niya: “Biuru ira, un duto mujony kendo ma ting’ turou, to anamiu yueyo . . . , nimar adembora kendo chunya muol.” (Mat. 11:28, 29) Sama waluwo ranyisi mar Kristo kuom ‘dewo jochan,’ Wuonwa ma ni e polo bedo ma mor kodwa kendo wan bende wabedo ma mor. (Zab. 41:1, NW) We wane ane kaka wanyalo bedo mang’won gi jomamoko e ngimawa mar joot, e kanyakla, kod e tij lendo.

3. Ere kaka dichwo nyalo bedo mang’won gi chiege kendo dewe? (Ne picha ma ni e chak sulani.)

³ Chwo onego oket ranyisi maber kuom bedo joma ng’won e ot. (Efe. 5:25; 6:4) Kuom ranyisi, ijiwogi ni gidag gi mondegi ‘ka gin gi ng’eyo malong’o’ ma tiende ni gibed mang’won kodgi kendo gidewgi. (1 Pet. 3:7) Dewo ng’ato kendo bedo mang’won kode gin gik ma dhi kanyachiel. Kuom ranyisi, dichwo ma dewo chiege ong’eyo maber ni kata obedo ni yo mochuego chiege opogore mabor kode, mano ok nyis ni chiege en chuech ma ni e rang’iny ma piny. (Cha. 2:18) Kuom mano, odewo ahinya kaka owinjo e chunye kendo omiye luor. Dhako moro modak e piny Kanada nowacho kama e wi chwore: “Odewo ahinya kaka awinjo e chunya kendo sama gimoro chando chunya, ok owachga ni, ‘Mano gima tin ma ok onego ochandi.’ Bende, ochikonaga ite maber. Sama okonyaga mondo abed gi paro mowinjore e wach moro, otimo kamano e yo mang’won.”

4. Ere kaka dichwo nyalo nyiso ni odewo chiege sama otudore gi mon mamoko?

⁴ Dichwo ma dewo chiege ok bi donjo e milruok mag kisera gi mon mamoko, kata temo ng’iyo kodgi e yo ma ok owinjore moriwo nyaka kuonde tudruok e intanet kata e simu. (Ayub 31:1) Obiro timo duto monyalo mondo kik otim gik ma nyalo ketho kendgi nikech ohero chiege, ohero Jehova, kendo osin gi richo.​—Som Zaburi 19:14; 97:10.

5. Ere kaka dhako nyalo bedo mang’won gi chwore?

⁵ Sama dichwo luwo ranyisi mar Yesu Kristo ma e wi dichwo, mano konyo chiege mondo omiye “luor matut.” (Efe. 5:22-25, 33) Luor ma dhako miyo chwore biro chwale mondo obed mang’won gi chwore sama chwore tiyo gi thuolo mang’eny e timo tije Nyasaye kata sama nitie weche moko ma chando chwore. Dichwo moro modak Britain wacho niya: “Nitie sama chiega nyalo fwenyo ni wach moro chando chunya to ahinya-ahinya sama ok amor. Kae to otiyo gi puonj ma yudore e Ngeche 20:5 mondo ong’e gima chando chunya kata kochuno ni orit kinde mowinjore ma wanyalo wuoyo e wi wachno kode ka po ni en gima wanyalo wuoye kanyachiel.”

6. Ere kaka waduto wanyalo jiwo nyithindo mondo gibed mang’won, to mano nyalo konyogi nade?

⁶ Sama jonyuol bedo mang’won e kindgi, giketo ne nyithindgi ranyisi maber. Jonyuol e ma nigi ting’ mar puonjo nyithindgi kaka ginyalo nyiso jomamoko ng’wono. Kuom ranyisi, jonyuol nyalo puonjo nyithindgi mondo kik giring aringa odhes e Od Romo. Sama jonyuol nigi nyithindgi e nyasi moro, ginyalo nyiso nyithindgi mondo kik girire riedo ne chiemo ka joma dongo pok ochiemo. Jomamoko ma ni e kanyakla bende nyalo konyo jonyuol e tiego nyithindgi mondo obed mang’won. Kuom ranyisi, ka nyathi otimo gimoro maber kaka chung’ ne ng’ama duong’ e kom, onego wapwo nyathino. Mano nyalo more mi ofweny ni kare “chiwo kelo mor mogundho moloyo kawo.”​—Tich 20:35.

7. Ere kaka Yesu nobedo mang’won gi ng’at ma ite nodino kendo ma ne ok nyal wuoyo maler, to mano puonjowa ang’o?

⁷ Kinde moro ka ne Yesu ni e alwora mar Dekapoli, ji nokelone “ng’at moro ma ite odino kendo ma ok ne nyal wuoyo maler.” (Mar. 7:31-35) Ne ok ochange e nyim oganda, kar mano, “notero ng’atno tenge.” Nikech ang’o? Samoro ng’atno ne wiye kuot kama ji ng’enyie. Nyalo bedo ni Yesu nofwenyo mano e momiyo notero ng’atno tenge e ka ochange. En adier ni wan ok  wanyal chango ji. Kata kamano, onego wadew kaka Jokristo wetewa winjo e chunygi kaachiel gi paro ma gin-go. Jaote Paulo nondiko kama: “Wadewreuru e kindwa mondo wajiw hera kod timbe mabeyo.” (Hib. 10:24) Yesu nong’eyo kaka ng’at ma ite nodinono ne winjo, to mano nomiyo ochange e yo maber. To mano doko ranyisi maber!

8, 9. Gin yore mage ma wanyalo bedogo mang’won gi joma oti kod joma nigi midekre? (Chiw ane ranyisi.)

⁸ Dew joma oti kod joma ong’ol. Gima duong’ ma kanyakla mar Jokristo ong’erego en hera to ok tije ma gitimo kende. (Joh. 13:34, 35) Herano miyo wachiwore konyo joma oti kod joma ong’ol mondo gibi e chokruok mag kanyakla kendo gidhi e tij lando wach maber. Gitimo kamano kata bed ni gitime e okang’ moro matin. (Mat. 13:23) Kuom ranyisi, Michael ma wuotho gi wheelchair mor ahinya gi yo ma joode kaachiel gi owete ma gin-go e grup mar tij lendo osebedo ka konyego. Owacho niya: “Yo ma gisirago osemiyo ok abara mayot ne chokruok kod tij lendo. Aheroga lendo gi troli kata mesa.”

⁹ Ofise Bethel bende niga gi owete gi nyimine moko ma hikgi oniang’ kod ma midekre tinde chando. Owete ma tayo nyisogi ng’wono kuom timo chenro mar konyogi lendo e yor ndiko barua kata goyo simu. Bill ma sani jahigni 86 ohero lendo kuonde maboyo kendo mosokore kokalo kuom barua. Owacho niya: “Wamor gi chenro mar ndiko ne ji barua.” Nancy ma sani hawo higni 90 wacho kama: “Ok andikga andika barupe mana mar kamano. An e tij lendo seche ma atimo mano. Adiera onego ochop ne ji mang’eny kaka nyalore!” Ethel ma ne onyuol e higa mar 1921 wacho niya: “Tinde awinjo ka an gi rem mang’eny. Nitie ndalo moko ma kata rwako nanga bedo matek.” Kata kamano, olendo kotiyo gi simu kendo nitie joma orwako wach ma owuoyogago e wi adiera. Barbara ma sani jahigni 85 wacho kama: “Nikech atuora, dhi e tij lendo kaka dwarore bedonaga matek. Kata kamano, tiyo gi simu miyo ayudo thuolo mar lendo ne jomamoko. Agoyo ne Jehova erokamano ahinya!” Kuom thuolo ma ok rom higa achiel, nitie owete gi nyimine ma oseti ma nolendo kuom seche 1,228, ne gindiko barupe 6,265, ne gigoyo simbe mokalo 2,000, kendo ne gimiyo ji buge kod gik mamoko ma romo 6,315! Onge kiawa ni kinda ma ne gitimono nomoro Jehova.​—Nge. 27:11.

10. Ere kaka wanyalo konyo Jokristo wetewa mondo giyud ber chuth e chokruok?

¹⁰ Dew joma obiro e chokruok. Dwaher ni owetewa gi nyiminewa oyud ber chuth e chokruok. Wanyalo konyogi timo mano kuom dewogi. Nade? Achiel kuom gik ma wanyalo timo en chopo e Od Romo chon mondo kik wachoch ji sama chokruok osechakore. En adier ni weche ma porega nyalo miyo wadek dichiel ka dichiel. Kata kamano, ka wan gi tim mar deko ne chokruok, nyalo bedo maber ka watimo lokruok. Ber paro kinde duto ni chutho-chutho joma oluongowa e gago mar chiemb chuny gin Jehova gi Yesu. (Mat. 18:20) Owinjore wamigi luor matut ahinya!

11. Ang’o momiyo owete ma nigi migepe mag puonjo e chokruok onego oluw puonj ma ni e 1 Jo-Korintho 14:40?

¹¹ Dewo Jokristo wetewa oriwo bende luwo puonj ma wacho niya: “Weuru mondo gik moko duto otimre e yo mobidhore kendo mochanore maber.” (1 Kor. 14:40) Owete ma nigi migepe mag puonjo e chokruok luwo puonjno kuom tiyo mana gi dakika momigi. Sama ok gikal sa, ginyiso ni gidewo joma nigi migepe ma luwo to kod jo kanyakla bende. Jokristo wetewa moko niga gi wuoth ma rabora sama gidok pacho.  Moko bende nyaka haw matatu, tuk-tuk, kod gik ma kamago e ka gichop ot chon. To moko bende joutegi ma ok Joneno dwaro ni gidog ot chon.

12. Ang’o momiyo jodongo ma tiyo matek owinjore omi “luor moloyo mapile”? (Ne sanduk ma wiye wacho ni “ Bed Mang’won gi Owete ma Tayo.”)

¹² Jokwath ma tiyo matek e kanyakla kendo ma lendo gi kinda owinjore omi “luor moloyo mapile.” (Som 1 Jo-Thesalonika 5:12, 13.) Onge kiawa ni imorga gi kinda ma jodongo timo mondo gikonyi. Donge inyalo nyiso ni imor kodgi kuom riwogi lwedo gi chunyi duto! Par ni ‘gisiko ka giriti kaka joma biro dwoko wach e bura.’​—Hib. 13:7, 17.

13. Ang’o ma wanyalo puonjore kuom yo ma Yesu ne dewogo ji?

¹³ Janabi Isaya nokoro e wi Yesu kama: “Odundu motore ok anotur: yuk tuoro magolo yiro ok anosim.” (Isa. 42:3) Hera ma Yesu noherogo ji ne miyo okechogi. Nong’eyo lit mag joma chunygi nonyosore kendo ma ne ipimo gi yuk tuoro kata kitambi ma chiegni sim. Mano nomiyo obedo mang’won kodgi. Kata mana nyithindo nohere. (Mar. 10:14) En adier ni waonge gi nyalo mar nono chuny ji kaka Yesu kendo ok wanyal puonjo ji kaka nopuonjo. Kata kamano, wanyalo bedo mang’won gi joma walendonegi mana kaka notimo. Mano oriwo yo ma wawuoyogo kodgi, seche ma wawuoye kodgi, kod thuolo ma wakawo sama wawuoyo kodgi.

14. Ang’o momiyo onego wati gi weche mang’won sama walendo ne ji?

¹⁴ Onego wawuo gi ji e yo mane? E kindewagi, dhano tara gi tara ‘hinyore kendo gidiwo mana ka rombe ma onge jakwath’  nikech jo ohala, josiasa, kod jotend dinde ma gigeno ni otagi opong’ mana gi mibadhi. (Mat. 9:36) Nikech mano, ji mang’eny onge gi geno moro amora. Donge ber ka wakechogi kuom wuoyo kodgi e yo mang’won? Nitie ji mang’eny ma rwakoga wach maber ma walando, ok mana nikech kaka waleronegi Muma, to nikech gifwenyo ni wadewogi gadier kendo wang’won kodgi.

15. Gin yore mage ma wanyalo nyisogo ni wadewo joma walendonegi?

¹⁵ Nitie yore mathoth ma wanyalo nyisogo ni wadewo joma walendonegi. Kuom ranyisi, achiel kuom yore ma wachopogo e chuny ji kata ng’eyo gik ma giparo en tiyo gi penjo. Kata kamano, nyaka wapenj penjogo e yo mang’won kendo ma ok kuod wigi. Nitie painia moro ma lendoga e alwora ma ji tang’-tang’ kendo giluoro wang’ ji, omiyo, otemoga mondo kik openj penjo ma kuodo wigi. Mago oriwo penjo ma ng’ato ok nyal dwoko mayot kata ma ng’ato nyalo dwoko e yo mobam. Kuom ranyisi, ok openjga penjo kaka, ‘Be ing’eyo nying Nyasaye?’ kata, ‘Be ing’eyo ni Pinyruodh Nyasaye en ang’o?’ Kar mano, ojawachoga ni, “Asesomo e Muma ni Nyasaye nigi nyinge. Anyisiego?” Wang’eyo ni ji opon mopogore opogore, omiyo, ok wanyal keto chike ma tayo kaka onego wawuo gi ng’ato ka ng’ato. Kata kamano, kinde duto onego wabed mang’won gi ji kendo wamigi luor. Mano oriwo nyaka temo ng’eyo joma nie alworawa e yo maber.

16, 17. Ere kaka wanyalo nyiso ni wadewo joma walendonegi sama wayiero (a) seche ma walendonegie? (b) thuolo ma wakawo kodgi?

¹⁶ Onego walend ne ji seche mage? Seche ma walendoga ot ka ot, joma wadhi irgi ok ong’eyoga ni wachano limogi. Mano e momiyo ber ka wadhi seche ma thothgi ni thuolo kendo ginyalo goyo mbaka. (Mat. 7:12) Kuom ranyisi, nyalo bedo ni e alworau ji ohero chiewo modeko Ngeso gi Jumapil. Ka en kamano, unyalo chako gi lendo e ndara, e troli, kata unyalo dok limo joma norwako wach ma un gadier ni chiewoga chon e odiechiengego, kae to ulend e ot ka ot bang’e.

¹⁷ Onego wawuo gi ji kuom thuolo ma romo nade? Ji mang’eny odichga ahinya, omiyo, nyalo bedo maber ka wawuoyo kodgi kuom thuolo machuok, to ahinya-ahinya e limbe mokwongo. Ok onego wabudh gi wuon ot ahinya. (1 Kor. 9:20-23) Sama ji ofwenyo ni wadewogi e yo ma kamano, yot mondo giyienwa limogi kendo. Kuom adier, sama walendo, onego onenre ayanga ni wan gi olembe ma roho maler nyago. Mano miyo wabedo “jotich ma tiyo kanyachiel gi Nyasaye,” kendo onyalo tiyo kodwa e ywayo jomamoko e adiera.​—1 Kor. 3:6, 7, 9.

18. Sama wabedo mang’won gi jomamoko, wayudo gueth mage?

¹⁸ Ka luwore gi gik ma wasenonogi, onego watem matek mondo wabed mang’won gi jomamoko e ngimawa mar joot, e kanyakla, kod e tij lendo. Ka watimo kamano, wabiro yudo gueth mathoth sani kod e kinde mabiro. Muma wacho niya: “Ng’at mamor en ng’at ma dewo jachan; Jehova biro rese ka chandruok omake. . . . Nodag gi mor e piny.”​—Zab. 41:1, 2, NW.