E PINY mangima, jodong-kanyakla ogeno ahinya migepe ma gin-go e riwruok mar oganda Jehova. Owetego konyowa ahinya! Kata kamano, nyoro-nyoro kae, yande otim lokruok moro. Ne okwa jodong-kanyakla ma koro hikgi oseniang’ ni giwe migepe mapek ne jodongo ma pod tindo. Migepe kaka mage?

Jorit-alwora kod owete ma puonjo e skunde mag tij Nyasaye koro weyo migepego ka hikgi oseromo 70. Bende jodongo moseromo higni 80 koro weyo migepe moko ne jodongo ma pod tindo, kuom ranyisi bedo jachan Komiti mar Bad Ofis kata jachan buch jodongo e kanyakla. Jodongo ma hikgi oseniang’go neno nade lokruogno? Gimorgo kendo gidhi nyime makore gi Jehova kod riwruok mare!

Ken ma ne osebedo jachan Komiti mar Bad Ofis kuom higni ma dirom 49 wacho niya: “Nariwo lokruogno lwedo gi chunya duto. Gimiwuoro en ni chieng’ ma nawinjoe wachno, noyudo ka aselemo gokinyi ka akwayo Jehova mondo koyie to owadwa moro ma pod tin okaw migapa.” Weche ma Ken nowachogo chal achala gi paro ma jodong-kanyakla mang’eny ma hikgi oseniang’  nigo. To nikech ne gihero migepego ahinya, nitie moko kuomgi ma chunygi nokwongo onyosore matin.

Esperandio ma ne en jachan buch jodongo e kanyaklagi wacho kama: “Nakwongo akuyo matin.” Kata kamano, omedo niya: “Ne oyudo atuoraga kendo ne ber ka ayudo thuolo momedore mar manyo thieth.” Gima morowa en ni Esperandio pod dhi nyime tiyo ne Jehova gi chunye duto kendo okonyo kanyakla ma entieree.

To nade owete ma nosebedo jorit malworo kuom higni mang’eny to bang’e koro ne nyaka we migepego? Allan ma nosebedo jarit malworo kuom higni 38 wacho kama: “Ka nonyisa ni migawono koro orumo, wachno nobwoga.” Kata kamano, Allan pod noneno ni ber mondo tieg owete ma pod tindo ne migawono, kendo pod odhi nyime tiyo ne Jehova e yore mamoko.

Russell ma ne osebedo jarit malworo kendo puonjo e skunde mag tij Nyasaye kuom higni 40 koriw wacho ni lokruogno nokwongo onyoso chunygi gi chiege. Owacho kama: “Ne wahero migapwa ahinya, kendo ne waneno ni pod watek ma wanyalo dhi adhiya nyime.” Sani Russell gi chiege dhi nyime tiyo gi lony ma gin-go e siro kanyakla ma gintieree, kendo jolendo ma ni kanyo yudo ber mathoth kuomgi.

Kata ka po ni pok iwinjoga e chunyi kaka owetego nowinjo, nitie weche ma ni e bug 2 Samuel ma nyalo konyi ng’eyo gimomiyo jogo nowinjo kamano.

Par ane kinde ma Absalom wuod Ruoth Daudi nong’anyone. Daudi nowuok Jerusalem mi oringo odhi Mahanaim ma ne ni e bath Aora Jordan yo ugwe. Ka ne en kuno gi joge, ne gichando gik ma ne ginyalo konyorego. Be inyalo paro gima notimore?

Chwo moko adek ma ne ni e alworano nokelonegi gige nindo, chiemo mopogore opogore, kod gige tedo. Achiel kuom chwo adekgo ne en Barzillai. (2 Sa. 17:27-29) Ka ne osetiek ng’anyo mar Absalom, Daudi nowuok mondo odog Jerusalem, kendo Barzillai nokowe nyaka e dho Jordan. Daudi nokwayo Barzillai mondo odhi kode Jerusalem. Daudi ne oikore rite maber kendo pidhe kata obedo ni Barzillai ne en jamoko ma ne ok ochuno ni omi chiemo. (2 Sa. 19:31-33) Nenore ni Daudi ne mor gi kido mabeyo ma Barzillai ne nigo kod rieko ma nong’adoga. Dak e od ruoth kendo tiyo kanyo ne en migawo ma nigi nyadhi ahinya!

Nikech Barzillai nong’eyo gik ma nonyalo kod ma ne ok onyal, nonyiso Daudi ni koro hike nosechopo 80. Kae to nomedo kama: “Anyalo nade pogo gi maber kod gi marach?” Ang’o ma notemo wacho? Onge kiawa ni dak aming’a nosemiyo Barzillai obedo gi rieko mang’eny. To bende pod nonyalo ng’ado ne Daudi rieko mana kaka “jodongo” moko bang’e notimo ne Ruoth Rehoboam. (1 Ru. 12:6, 7; Zab. 92:12-14; Nge. 16:31) Omiyo, sama nowacho ni ok nonyal pogo gi maber kod gi  marach, nenore ni nowuoyo kuom gik ma koro ne ok onyal nikech bedo ng’ama oti. Nowacho bende ni hike moniang’ ne miyo koro ok nonyal winjo mit chiemo ahinya, to ite bende koro nosechako bedo ma nok. (Ekl. 12:4, 5) Kuom mano, Barzillai nokwayo Daudi mondo okaw Chimham odhigo Jerusalem. Nenore ni Chimham ne en wuod Barzillai.​—2 Sa. 19:35-40.

Gimomiyo itimo lokruok ma wasewuoye ma otudore gi jodongo ma hikgi oseniang’ odwa chalre achala gi gimomiyo Barzillai ne ok oyie gi migawo ma Daudi nomiye. En mana ni kindewagi, lokruok ma notimno ne ok otim mana nikech chal mar jaduong’ moro achiel kaka notim ne Barzillai. Kar mano, ne opar kaka ne inyalo kony jodongo duto mosetiyo kuom higni mang’eny e piny ngima odhi nyime tiyo ne Jehova ka gimor.

Jodong-kanyakla ma hikgi oseniang’go oseneno nyime ma gifwenyo ni mondo riwruok mar oganda Jehova omed bedo gi nyak e kinde mabiro, ber ka giweyo migepe moko ne jodongo ma pod tindo. Thothne, jodongo ma hikgi oniang’go e ma notiego owete ma nokawo kargi. Mano e gima nenore ni Barzillai notimo ne Chimham, to be e ma jaote Paulo notimo ne Timotheo. (1 Ko. 4:17; Fil. 2:20-22) Nyaka ne jodongo ma pod tindogo chak timo migepego, osenenore ayanga ni gin be gin “kaka mich” kendo ni gin gi nyalo mar konyo e ‘gero ringruok mar Kristo.’​—Efe. 4:8-12; pim gi Kwan 11:16, 17, 29.

E piny ngima, jodongo mang’eny ma hikgi oniang’ ma oseweyo migepegi ne jodongo ma pod tindo oseyudo thuolo mamoko mag tiyo ne Jehova.

Marco ma ne obedo jarit malworo kuom higni 19 wacho kama: “Lokruogno osemiyo ayudo thuolo momedore mar temo pidho kodhi mag adiera e chuny chwo ma mondegi gin Joneno.”

Geraldo ma nosebedo jarit malworo kuom higni 28 wacho kama: “Chenro ma wan-go sani oriwo temo chiero jolendo modok chien to kod puonjo ji mang’eny Muma kaka nyalore.” Owacho ni nyaka ne gichak luwo chenrono, sani en gi jaode gipuonjo ji 15 Muma kendo moko kuom jolendo modok chien ma gisetemo konyo osechako biro e chokruok.

Allan ma ne osewuo kuome motelo wacho kama: “Sani koro wan gi thuolo mar lendo e yo ma thiring’inyi moloyo. Walendo gi troli kod mesa. Bende, walendoga kuonde ohala, kendo watemo matek mondo walend ne jirendewa bende. Jirendewa ariyo osebiro e Od Romo.”

Ka po ni in owadwa mochwiny kendo momakore gi Jehova to yande iweyo migepe moko ne owete ma pod tindo, nitie yo machielo makende minyalo konyogo tij Jehova. Inyalo pogo lony ma in-go ne owete ma pod tindo ma un-go e kanyaklau. Russell ma bende ne osewuo kuome motelo wacho niya: “Jehova tiego owete ma pod tindo kendo otiyo kodgi e okang’ malach. Jo Jehova e piny ngima yudo ber mathoth sama owete ma pod tindogo tiyo gi kinda e puonjo kod e kwath!”​—Ne sanduk ma wiye wacho ni “ Kony Owete ma Pod Tindo Mondo Giti Maber gi Nyalo ma Gin-go.”

Ka yande olokni migawo, sik asika kimakori gi Jehova. Kinda misebedo kitimo kuom higni mang’eny osekonyo ji modhuro, kendo pod in gi thuolo mar dhi nyime timo kamano. Oweteni osebedo koheri, kendo gibiro dhi nyime heri.

To maduong’ moloyo, isebedo kimoro chuny Jehova kendo obiro pari nyaka chieng’. Mana kaka osingo e Muma, ‘wiye ok bi wil gi gik ma isetimo kod hera ma isenyiso ne nyinge kuom tiyo ka ikonyo joma ler kendo idhi nyime tiyonegi.’ (Hib. 6:10) Wechego miyo wabedo gadier ni gik ma Jehova osingonwa biro morowa kuom kinde malach moloyo kinde ma wasetiyonee. Jehova oheri gi  hera ma malo ma ok doyie mondo wiye owil gi gik misebedo kitimo kaachiel gi ma idhi nyime timo!

To nade ka in pok iromo gi lokruok ma chal gi ma wasewuoye kae? Nitie kaka wechegi pod muli. E yo mane?

Ka po ni in machiegni gi owadwa moro mosetiyo ne Jehova e migawo moro kuom higni modhuro to lokruok ma wawuoye kaeni nomule, ng’e ni lony ma en-go nyalo konyi ahinya. Sum rieko kuome, kwaye okonyi gi paro, kendo tem rango mos yo motimogo gik moko e migawo ma en-go sani.

Bed ni hiki oseniang’ kendo iseweyo migepe moko, kata in owadwa kata nyaminwa ma yudo ber nikech bedo machiegni gi owete ma hikgi oniang’, par kinde duto ni Jehova ogeno ahinya owete mosetiyone kuom higni mang’eny komakore kode, kendo ma dhi nyime timo kamano.