1-2. Weche ma ni e Eklesiastes 11:6 otudore nade gi tijwa mar yalo wach Pinyruoth?

NITIE pinje moko ma ji rwakoga wach maber gi ilo. Chaloga mana ka gima mano e ma gisebedo ka girito! E pinje moko to ji ok odich ahinya gi weche Nyasaye kata Muma. In to alworau chalo nade? Bed ni ji rwako wach maber kata ooyo, Jehova pod dwaro ni wadhi nyime yalo wach maber nyaka chop kinde ma obiro wachoe ni oromo.

² E kinde ma Jehova oseketo, tij yalo wach maber biro rumo kendo “giko nobi.” (Mat. 24:14, 36) Sama pok mano otimore, ere kaka wanyalo luwo gima Muma nyisowa ni ‘kik lwetwa yue’? *​—Som Eklesiastes 11:6.

3. Ang’o ma wadwaro nono e sulani?

³ Sula mokalo noleronwa gik moko ang’wen monego watim mondo wabed jolupo molony.” (Mat. 4:19) Sulani biro leronwa yore adek ma wanyalo dhi nyime tegogo yiero ma wasetimo mar yalo wach maber, bed ni weche beyo kata weche richo. Wabiro puonjore gimomiyo dwarore ni (1) waket tij lendo obed motelo e ngimawa, (2) wahore, kendo (3) wasik ka wan gi yie motegno.

4. Ang’o momiyo tich ma Jehova omiyowa e ma onego waket motelo e ngimawa?

⁴ Yesu nowacho gik ma ne dhi nyiso ni wadak e ndalo mag giko, kendo gin gik ma ne nyalo chocho jolupne ma giwe keto pachgi e tij yalo wach maber. Nonyiso jopuonjrene  ni ‘gisik ka gineno.’ (Mat. 24:42) E ndalowagi, nitie gik mang’eny ma nyalo chochowa mana kaka notimore ne joma nodak e ndalo mag Noa. (Mat. 24:37-39; 2 Pet. 2:5) Omiyo, dwaher keto tich ma Jehova omiyowa e ma obed tich motelo e ngimawa.

5. Tich Joote 1:6-8 nyiso nade okang’ ma ne idhi yalie wach maber?

⁵ E kindewagi e ma dwarore moloyo ni waket pachwa duto e tij yalo wach Pinyruoth. Yesu nowacho ni tijno ne dhi timore e okang’ malach bang’ thone. (Joh. 14:12) Bang’ ka Yesu nosetho, jolupne moko nodok e tij lupo. Bang’ chierne, ne omiyo jopuonjrene moko omako rech mang’eny e yor hono. Notiyo gi thuolono e nyisogi ni migawo ma nosemiyogi mar lupo, tiende ni, yalo wach maber, ne duong’ moloyo tich moro amora ma ne ginyalo timo. (Joh. 21:15-17) Kinde machuok ka Yesu pok nodok e polo, nonyiso jolupne ni tij yalo wach maber ma nosechako ne idhi tim nyaka kuonde maboyo mogik e tung’ piny. (Som Tich Joote 1:6-8.) Higni moko bang’e, Yesu nomiyo jaote Johana fweny ma nyiso gik ma ne dhi timore e “odiechieng Ruoth.” * Achiel kuom gik ma Johana noneno en mae: Noneno ka malaika tayo tij yalo “wach maber ma nyaka chieng’” ne “ogendni duto, gi dhoudi duto, gi dhok duto, kod pinje duto.” (Fwe. 1:10; 14:6) Nenore maler ni Jehova dwaro ni wachiw neno e kindegi nyaka chop kama obiro wachoe ni tijno orumo.

6. Ang’o ma wanyalo timo mondo waket tij yalo wach Pinyruoth obed motelo e ngimawa?

⁶ Ka waparo matut kaka Jehova konyowa e tij yalo wach maber, wabiro keto tijno obed motelo e ngimawa. Kuom  ranyisi, Jehova miyowa chiemb chuny modhuro mogo e otas, ma dijitol, dwol momak miwinjo, vidio, kod mamoko ma yudore e intanet. Par ane: Websait marwa oting’o weche e dhok mokalo 1,000! (Mat. 24:45-47) Kata obedo ni jopinyni opogore nikech weche siasa, din, gi weche yuto, jotich Nyasaye milion aboro gi wiye to nigi winjruok maber e kindgi kaka owete gi nyimine e piny ngima. Kuom ranyisi, chieng’ Tich Abich, April 19, 2019, Joneno mag Jehova e piny ngima noriwore ka ginono Ndiko modiechieng’ kanyachiel. Chieng’no godhiambo ji 20,919,041 nobiro e chokruok mar paro tho Yesu. Mano chalo mana hono! Sama waparo matut kuom thuolo makende ma wan-go mar bedo e kind joma winjore kamano, mano chwalowa mondo waket tij yalo wach Pinyruoth e mobed motelo e ngimawa.

7. Ere kaka ranyisi mar Yesu konyowa keto pachwa duto e tij lendo?

⁷ Gimachielo ma nyalo konyowa keto pachwa e tij lendo en luwo ranyisi mar Yesu. Ne ok oyie mondo gimoro amora ochoche kata gale mondo owe chiwo neno e wi adiera. (Joh. 18:37) Ka ne Satan otemo miye “pinjeruodhi duto mag piny kod duong’ ma gin-go,” ne ok oyie; bende, ne otamore ni kik kete ruoth. (Mat. 4:8, 9; Joh. 6:15) Ne ok ogomb bedo gi mwandu, to bende akwede mager ne ok omone timo tich ma nokele. (Luka 9:58; Joh. 8:59) Sama waromo gi gik ma temo yiewa, pod wanyalo keto pachwa duto e tij lendo ka waparo siem moro ma Paulo nochiwo. Nowacho ni Jokristo onego oluw ranyisi mar Yesu mondo kik ‘giol kendo chunygi a.’​—Hib. 12:3.

8. Horuok en ang’o, to ang’o momiyo en kido ma dwarore ahinya e kindewagi?

⁸ Horuok en nyalo mar bedo gi chuny mokue mos ka wageno ni weche biro lokore ma bed maber. Bed ni warito mondo gimoro ma chandowa olokre kata warito mondo gimoro ma wasegombo ahinya ochopi, pod nyaka wasik ka wahore. Janabi Habakuk ne gombo ahinya kinde ma timbe mag mahundu ne dhi rumo e piny Juda. (Hab. 1:2) Jopuonjre Yesu to ne geno ni Pinyruoth “ne dhi fwenyore” e kindego mondo ogolgi e bwo loch mar Jo-Rumi. (Luka 19:11) Wan bende warito ahinya kinde ma Pinyruodh Nyasaye biro golo gik maricho e pinyni mi okelonwa piny manyien kama tim makare e ma biro pong’ie. (2 Pet. 3:13) Kata kamano, sama warito mondo kinde sie ma Jehova oketo ochopi, pod nyaka wahore. Ne ane yore moko ma Jehova puonjowago kido mar horuok.

9. Gin ranyisi mage ma nyiso kaka Jehova hore?

⁹ Jehova e ma ketonwa ranyisi maber mogik mar horuok. Nomiyo Noa thuolo moromo mondo oger yie, kendo ‘oyal wach makare.’ (2 Pet. 2:5; 1 Pet. 3:20) Jehova nochiko ite kohore ahinya sama ne Ibrahim penje penjo mang’eny e wi wach ma noseng’ado mar dhi ketho joricho e Sodom gi Gomora. (Cha. 18:20-33) Kuom higni modhuro, Jehova nohore gi oganda mar Israel ma ne siko chwanye sa ka sa. (Neh. 9:30, 31) E kindewagi bende waneno kaka Jehova hore ahinya komiyo ji mang’eny thuolo mondo gichop “kama gilokoe chunygi gia e richo.” (2 Pet. 3:9; Joh. 6:44; 1 Tim. 2:3, 4) Ranyisi mar Jehova jiwowa mondo wan bende wahore sama wadhi nyime yalo kod  puonjo. Bende, Jehova puonjowa horuok kokalo kuom ranyisi moro ma yudore e Wachne.

10. Kaka oler e Jakobo 5:7, 8, en kido mane makende ma wapuonjore kuom jopur?

¹⁰ Som Jakobo 5:7, 8. Ranyisi mar japur puonjowa horuok. En adier ni cham moko ma japur opidho dongoga piyo-piyo. Kata kamano, cham moko to ahinya-ahinya ma nyago olemo, kawoga thuolo malach e ka gitegno maber. E kinde Jo-Israel machon, bang’ ka nosepidh cham, ne kawoga dweche auchiel kama mondo e ka girom keyo. Japur ne chuoyo kodhi e kinde ma koth chako chue, kae to okeyo bang’e ka cham osechiek. (Mar. 4:28) Donge ber ka wan bende wahore mana kaka japurno? Adiera en ni timo kamano ok yotga seche te.

11. Ere kaka horuok nyalo konyowa e tij lendo?

¹¹ Dhano morem dwaroga neno nyak piyo-piyo bang’ ka gisechako timo gimoro. Kata kamano, ka wadwaro mondo puothwa onyag maber nyaka warite maber, wapure, wadoye, kendo olone pi. Tijwa mar loko ji obed jopuonjre Yesu bende dwaro kinda ma dhi nyime. Nyaloga kawo kinde malach ka pok wakonyo joma wapuonjo mondo gigol kido maricho ma gin-go e chunygi, kaka buono ji kod kido mamoko kaka mago. Horuok biro miyo chunywa kik nyosre sama waromo gi pek. To kata sama wayudo nyak maber, pod nyaka wadhi nyime hore. Ok dwachun japuonjre Muma mondo obed gi yie motegno piyo-piyo. Nitie kinde ma kata jopuonjre Yesu ne kawoga kinde malach ka pok giwinjo tiend gima ne opuonjogi. (Joh. 14:9) Wiwa kik wil gi wachni: Wan wapitho kendo waolo pi, to Nyasaye e ma miyo gidongo.​—1 Kor. 3:6.

12. Ere kaka wanyalo nyiso kido mar horuok sama wayalo ne wedewa?

¹² Achiel kuom kinde ma horuok nyalo  bedonwa matek en sama walendo ne wedewa. Puonj ma yudore e Eklesiastes 3:1, 7 nyalo konyowa ahinya. Owacho kama: “Nitie kinde . . . ling’ gi kinde wuoyo.” Wanyalo hore ahoya ka warito mondo ranyisiwa maber e ma olendnegi, ka e sechego bende wamanyo thuolo mag wachonegi gimoro e wi adiera. (1 Pet. 3:1, 2) E tijwa mar yalo kod puonjo, dwarore ni wahore gi ji duto moriwo nyaka wedewa.

13-14. Gin ranyisi mag jomage mosenyiso horuok ma wanyalo luwo?

¹³ Ranyisi mag jotich Nyasaye machon kod ma kindegi nyalo puonjowa kido mar horuok. Kata obedo ni Habakuk ne gombo ahinya kinde ma richo gi mahundu ne dhi rumo, pod nowacho ka en gadiera niya: “Abiro dhi nyime chung’ kara mar rito.” (Hab. 2:1) Jaote Paulo bende nowacho ni nogombo ahinya tieko tije mar lendo. Kata kamano, nohore kodich e chiwo “neno e okang’ malong’o chuth e wi wach maber.”​—Tich 20:24.

¹⁴ Ne ane ranyisi mar owadwa moro gi jaode ma gin jomisonari ma noa e Skul mar Gilead. Notergi e piny moro ma Joneno mag Jehova ne nokie, kendo din ma ji ne ng’enyie e alworano ne ok en mar Jokristo. Ji manok ahinya e ma ne yie puonjore Muma. Jomisonari mamoko ma ne gin-go e klas mar Gilead ne oronegiga barupe ma nyiso kaka gitayo jopuonjre mang’eny e alwora ma gilendoe. Kata obedo ni gin to korgi ne onge gi nyak malich, ne gihore ahoya ka gitimo kinda e tij lendo. Bang’ lendo e alworano kuom higni aboro, ne gibedo ma mor ahinya ka nobatis achiel kuom joma ne gipuonjo Muma. Ang’o ma chalre e ranyisi machon kod ma kindewagi ma wanenogo? Jotich Jehovago ne ok obedo josamuoyo kata weyo mondo lwetgi oyue, kendo Jehova noguedhogi nikech horuokgi. Wan bende wadwaro luwo ranyisi mag joma noyudo “gik ma ne osing nikech ne ginyiso yie kod horuok.”​—Hib. 6:10-12.

15. Ere kaka yiewa tego yiero ma wasetimo mar dhi nyime lendo?

¹⁵ Wan gi yie kuom wach ma walando, omiyo, wan gi siso mar nyiso jomamoko bende wachno. Wageno kuom gik ma Nyasaye osingonwa e Wachne. (Zab. 119:42; Isa. 40:8) Waseneno kaka moko kuom gik ma nokor e Muma chopo e kindewagi. Waseneno gi wang’wa kaka Muma loko kit ngima ji sama gitiyo gi puonj ma ni e iye. Wechego miyo wabedo gadier ni wach maber ma walando mar Pinyruoth en wach ma ji duto onego owinj.

16. Ka luwore Zaburi 46:1-3, ere kaka yie ma wan-go kuom Jehova gi Yesu tego yiero ma wasetimo mar dhi nyime yalo wach maber?

¹⁶ Wan gi yie bende kuom Jehova ma e Wuon wach maber mwalando, kendo wan gi yie kuom Yesu Kristo ma oseketo kaka Ruoth e Pinyruodh Nyasaye. (Joh. 14:1) Kata ang’o e ma timre, Jehova biro dhi nyime ritowa kendo miyowa teko. (Som Zaburi 46:1-3.) E wi mago, wan gadier ni Yesu tayo tijwa mar lendo ka en e polo, kotiyo gi teko ma Jehova omiye.​—Mat. 28:18-20.

17. Chiw ane ranyisi ma nyiso gimomiyo onego wadhi nyime lendo.

¹⁷ Yie miyo wabedo gadier ni Jehova biro guedho kindawa kata mana e yore ma ok wapar. (Ekl. 11:6) Kuom ranyisi, pile ka pile dhano alufe gi alufe kaloga kuonde ma wachungoe troli sama walendo. Be lendo gi troli kata mesa osekelo  nyak? Ee! Tijwa mar Pinyruoth ma Novemba 2014 nowuoyo kuom nyako moro ma rawera ma ni e yunivasiti ma ne dwaro ndiko ripot moro e wi Joneno mag Jehova. Ne ok oyudo Od Romo machiegni, kata kamano, noyudo buge e mesa ma noket machiegni gi yunivasiti ma nosomoe. E bugego, noyudo weche ma nokonye ndiko ripot ma nodwarono. Gikone nobatise mobedo Janeno, kendo en painia mapile. Ripode kaka mago jiwowa mondo wadhi nyime timo kinda e tij lendo nikech ginyiso ni pod nitie ji mang’eny ma nyalo rwako wach Pinyruoth.

18. Ang’o momiyo wan gadier ni tij yalo wach Pinyruoth biro chopo e gikone ma ok odeko?

¹⁸ Wan gadier ni tij yalo wach Pinyruoth biro chopo e gikone ma ok odeko. Par ane gima notimore e ndalo Noa. Jehova nonyiso ni ong’eyo rito sa. Nowacho higni 120 motelo kinde sie ma ne Ataro dhi chakoree. Higni mang’eny nokalo e ka nonyiso Noa ni ochak gero yie. Kuom higni 40 kata 50 ka ne Ataro pok ochakore, Noa nodhi nyime gero yie. Bende, nodhi nyime yalo wach mar siem kata obedo ni ji ne ok oikore winje. Notimo kamano nyaka chieng’ ma Jehova nonyise ni ochak rwako le e yie. Kae to e wang’ sa kak, “Jehova ne oloro dhoot.”​—Cha. 6:3; 7:1, 2, 16.

19. Gin gueth mage moritowa nyime ka ok wayie mondo lwetwa oyue?

¹⁹ Machiegnini, Jehova biro neno ni tij yalo wach Pinyruoth ochopo e gikone, kendo obiro chalo ng’at ‘moloro dhoot’ ne piny Satanni, kae to okelo piny manyien. Sama pod warito kindego, wadhiuru nyime luwo ranyisi mar Noa, Habakuk, kod jotich Jehova mamoko ma ne ok oyie mondo lwetgi oyue. Wadhiuru nyime keto tij lendo obed motelo e ngimawa, wahore, kendo wasik ka wan gi yie motegno kuom Jehova kod singoge.