1. Jomoko winjoga nade e chunygi sama ogol achiel kuom joodgi e kanyakla?

BE ACHIEL kuom joodu osegagol e kanyakla? Mano en-ga wach malit ahinya! Hilda * wacho kama: “Ka ne jaoda ma nomakore gi Jehova ahinya otho bang’ dak kode kuom higni 41, naparo ni mano e gima litie mogik ma notimorena. To ka wuoda noweyo Jehova, chiege, kod nyithinde, wachno nokelona lit moloyo lit moro amora ma nasegabedogo.”

2-3. Ka luwore gi Zaburi 78:40, 41, Jehova winjoga nade sama jotichne oweyo lame?

² Par ane kaka Jehova nowinjo malit ahinya ka ne malaike ma ne gin joode oweye! (Juda 6) Par ane bende kaka nowinjoga malit ka Jo-Israel ma ne gin jotichne ma nohero ne siko ng’anyone. (Som Zaburi 78:40, 41.) Bed gadier ni sani bende Wuonwa manie polo winjo malit ahinya sama achiel kuom joodu oweyo tiyone. Ong’eyo maber lit ma wachno keloni. Obiro jiwi kendo hoyi.

³ E sulani, wadwaro neno gik ma wanyalo timo mondo Jehova okonywa sama ogol achiel kuom joodwa e kanyakla. Wabiro neno bende yore ma wanyalo konyogo jomamoko e kanyakla ma joodgi oweyo adiera. Mokwongo, we wane ane paro moro marach ma ok onego wabedgo sama gima kamano otimore.

4. Jonyuol mang’eny winjoga nade sama nyathigi oweyo Jehova?

⁴ Sama nyathi oweyo Jehova, yot ahinya mondo jonyuolne odong’ ka parore ni, ‘En ang’o ma ne ok watimo ma ne nyalo konye siko e adiera?’ Owadwa miluongo ni Luke ne owacho  kama bang’ ka ne osegol wuode e kanyakla: “Naketo ketho kuoma. Wachno ne miyo asiko aleko lek maricho. Seche moko naywakga ahinya kendo nawinjo ka chunya lit.” Elizabeth ma bende nogol wuode e kanyakla noywak kama: “En ang’o marach ma natimo kaka janyuol? Dibed ni ne ok atimo duto ma ne dwarore mondo apidh adiera e chuny wuoda?”

5. Sama ng’ato oweyo Jehova, en ng’a monego oket ketho kuome?

⁵ Ber mondo wapar kinde duto ni Jehova omiyo ng’ato ka ng’ato kuomwa thuolo mar timo yiero. Mano nyiso ni wanyalo yiero ka be wabiro winje kata ooyo. Nitie rowere moko ma jonyuolgi ok noketonegi ranyisi maber ka ne gidongo, to pod ne giyiero tiyo ne Jehova kendo gidhi maber. To rowere moko ma jonyuolgi noketonegi ranyisi maber mopuonjogi adiera, pod ne oweyo adiera bang’ ka gisebedo joma dongo. Chopoga kama ng’ato ka ng’ato nyaka yier owuon ka be obiro tiyo ne Jehova kata ooyo. (Jos. 24:15) Omiyo, un jonyuol ma nyithindu oweyo adiera, temuru ahinya mondo kik uket ketho kuomu!

6. Sama janyuol oweyo adiera, nyathine nyalo winjo nade?

⁶ Nitie seche ma janyuol e ma nyaloga weyo adiera mojwang’ nyaka joode bende. (Zab. 27:10) Mano nyalo nyoso chuny nyithindo mosebedo ka neno jonyuolgi kaka joma ketonegi ranyisi maber. Esther ma ne ogol wuon-gi e kanyakla wacho kama: “Ne ajaywakga ahinya bang’ fwenyo ni wuonwa nosechako weyo Jehova mosmos, kendo ni noseng’ado ni ok odwar tiyo ne Jehova. Nikech nahero wuonwa ahinya, ka nogole e kanyakla, nasiko aparora ni to weche dhine nade. Seche moko wachno ne miyoga ang’eng’ ma pacha lal.”

7. Sama ogol janyuol e kanyakla, Jehova neno nade nyathine modong’ ka ochung’ motegno?

⁷ Un rowerewa, ka po ni achiel kuom jonyuolu ogol e kanyakla, ng’euru ni wan bende waywak kodu! Beduru gadier bende ni Jehova ong’eyo maber lit ma un-go. Oherou kendo omor neno kaka umakoru kode. To wan oweteu gi nyimineu bende waherou ahinya. Paruru bende ni un ok e ma umiyo jonyuolu oweyo adiera. Mana kaka ne waseneno motelo, Jehova omiyo ng’ato ka ng’ato thuolo mar timo yiero. Kendo ng’ato ka ng’ato mosechiwore ne Jehova mobatise nyaka ‘ting ting’ne owuon.’​—Gal. 6:5.

8. Sama ng’ato oweyo Jehova, ang’o ma joodgi modong’ nyalo timo sama girito ka be obiro duogo ir Jehova? (Ne bende sanduk ma wacho ni, “ Duog ir Jehova.”)

⁸ Sama achiel kuom joodu oweyo Jehova, ok rach geno ni chieng’ moro di po ka oduogo. Sama mano pok otimore, ang’o minyalo timo? Tem matek mondo irit winjruokni gi Nyasaye. Kitimo kamano, ibiro keto ranyisi maber ne joodu mamoko, kaachiel gi ng’at mogol okono bende. E wi mano, ibiro yudo teko mar nyagori gi lit ma in-go. Wane ane gik mamoko minyalo timo ma nyalo konyi.

9. Ang’o minyalo timo mondo iteg yieni? (Ne bende sanduk ma wiye wacho ni “ Ndiko Moko ma Nyalo Hoyi Sama Achiel Kuom Joodu Oweyo Jehova.”)

⁹ Makri gi chenro maber ma biro konyi bedo gi yie motegno. Dwarore ahinya ni idhi nyime tego yieni iwuon kod mar joodu mamoko.  Ere kaka inyalo timo mano? En kuom somo Muma pile, paro matut kuom gik misomo, kendo dhi e chokruoge mag Jokristo ma ok ibari. Joanna ma wuon-gi kod nyamin-gi ne oweyo adiera wacho kama: “Sama asomoga sigand Abigail, Esta, Ayub, Josef, kod Yesu, awinjoga ka an gi chuny mokuwe. Ranyisi margi maber pong’oga chunya kod pacha gi weche mabeyo ma dwokonaga lit chien. Wendewa makende mag JW Broadcasting bende jiwaga ahinya.”

10. Zaburi 32:6-8 nigi paro mane ma nyalo konyowa nyagore gi lit kod parruok?

¹⁰ Nyis Jehova weche duto ma chandi. Sama in gi parruok, dhi nyime lamo Jehova. Kwa Nyasachwa ma jahera mondo okonyi neno pek mikaloe kaka en bende onenogi. Kwaye mondo ‘omiyi rieko kendo opuonji yo monego iluw.’ (Som Zaburi 32:6-8.) Adiera en ni seche moko inyalo winjo malit ahinya sama inyiso Jehova kaka iwinjo e chunyi. Kata kamano, ng’e ni Jehova ong’eyo lit duto manie chunyi. Oheri ahinya kendo ojiwi ni iol ne weche duto ma chando chunyi.​—Wuok 34:6; Zab. 62:7, 8.

11. Ka luwore gi Jo-Hibrania 12:11, ang’o momiyo onego wabed gadier ni kum ma Jehova chiwo ni kare? (Ne bende sanduk ma wachoni “ Chenro mar Golo Joricho e Kanyakla Nyiso Hera mar Jehova.”)

¹¹ Riw lwedo bura ma jodongo ong’ado. Jehova e moketo chenro mar golo joricho e kanyakla. Timo kamano konyo ji duto moriwo nyaka jarichono. (Som Jo-Hibrania 12:11.) Nitie jomoko ma nyalo wuoyo marach e yo ma jodongo ong’adogo bura. Kata kamano, ng’e ni joma kamago ketoga pachgi mana kuom bura mong’adno, kar keto pachgi kuom richo ma ng’atno notimo. Adiera makende en ni ok wang’eyo weche duto. Kuom mano, gen jodongo kod bura ma ging’ado ka in gadier ni ne gitimo duto ma dwarore mondo giluw puonj  mag Muma sama ne ging’ado burano “e nying Jehova.”​—2 We. 19:6.

12. Gin ber mage ma joot moko oseyudo nikech ne ging’ado tudruok gi joma ogol e kanyakla?

¹² Kiriwo lwedo bura ma jodongo ong’ado mar golo achiel kuom joodu e kanyakla, inyalo konyo ng’atno mondo oduog ir Jehova. Elizabeth ma ne osewuo kuome motelo wacho kama: “Ne ok yotnwa weyo tudruok gi wuodwa. Kata kamano, ka noduogo ir Jehova, wuodwano nowacho gi dhoge owuon ni nowinjore ogole e kanyakla. Nomor gi gik ma nopuonjore kokalo kuom kum ma nomiyeno.” Elizabeth medo kama: “Nabedo gadier ni kum ma Jehova chiwo ni kare.” Mark jaod Elizabeth to wacho kama: “Higni moko bang’e, wuodwano nonyisa ni achiel kuom gik ma nomiyo odwaro duogo ir Jehova en ni ne wang’ado tudruok kode. Amor ahinya ni Jehova nokonyowa mondo wamakre gi yorene.”

13. Ang’o ma nyalo konyi mondo inyagri gi lit ma iwinjo e chunyi?

¹³ Wuo gi osiepeni mong’eyo kaka wachno chando chunyi. Mak osiep gi Jokristo motegno ma nyalo konyi siko ka in gi paro makare. (Nge. 12:25; 17:17) Joanna ma ne wasewuoyo kuome motelo wacho kama: “E chunya ma iye, nawinjo ka adong’ kenda. To ka ne awuoyo gi osiepena mogena, mano nokonya nyagora maber.” To nade ka jomoko e kanyakla wacho weche moko ma miyo imedo winjo marach moloyo?

14. Ang’o momiyo dwarore ni ‘wadhi nyime nano gi jowetewa kendo weyonegi kethogi gi chuny man thuolo’?

¹⁴ Hori gi oweteni gi nyimineni. Ok onego wagen ni Jokristo wetewa biro wacho weche makare kinde duto. (Jak. 3:2) Waduto warem. Omiyo, kik ihum ahinya kifwenyo ni jomoko onge gi gima long’o ma ginyalo jiwigo, kata kifwenyo ni moko kuomgi wacho weche ma medoni mana lit. Par puonj ma jaote Paulo nochiwo niya: “Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo kata ka ng’ato nigi wach moro gi nyawadgi.” (Kol. 3:13) Nyaminwa moro ma nogol watne e kanyakla wacho kama: “Jehova osekonya ng’wono ne owete gi nyimine ma nowacho weche moko ka giparo ni gijiwa to kara wechegigo ne medona mana lit.” Ang’o ma jo kanyakla nyalo timo mondo gikony joot modong’ komakore gi Jehova?

15. Ang’o ma nyalo konyo joma yande ogol watgi moro e kanyakla?

¹⁵ Rwakuru joot mosiko komakore gi Jehova. Nyaminwa moro miluongo ni Miriam wacho ni noluor luor ka nodhi e chokruok bang’ ka ne osegol owadgi e kanyakla. Owacho kama: “Naparora e wi gima jomoko ne dhi wacho. Kata kamano, nafwenyo ni ne nitie owete gi nyimine mang’eny ma bende ne winjo malit kaka nawinjo nikech gima notimoreno. Yo ma ne gikechago nomiyo ok awinjo ni an kenda e chandruokna.” Nyaminwa  moro bende wacho kama: “Bang’ ka nosegol wuodwa e kanyakla, owete gi nyimine moko nobiro hoyowa. Moko kuomgi nowacho ni ne ok ging’eyo weche ma ne ginyalo tiyogo mondo gihoya. Ne giywak koda, kendo ne gindikona barupe. Gik ma ne gitimogo nokonya ahinya!”

16. Ere kaka kanyakla nyalo dhi nyime siro joot modong’ komakore gi Jehova?

¹⁶ Dhi nyime siro joot modong’ e adiera. Sama ogol ng’ato e kanyakla, dwarore ni ojiw joot modong’ kendo ohergi moloyo kinde moro amora mosekalo. (Hib. 10:24, 25) Nitiega kinde ma jomoko ma ogol wedegi e kanyakla osegawinjo e chunygi ni nitie jomoko e kanyakla ma bet ojwang’ogi matin. Kik imi ng’ato owinj kamano! To ahinya-ahinya, rowere ma jonyuolgi oweyo adiera dwaro pwoch kod jip mathoth. Maria ma nogol jaode e kanyakla mi jaodeno ojwang’ogi wacho kama: “Moko kuom osiepena nobiro e oda mi gitedonwa kendo gitimo kodwa lamo mar joot. Ne ginenona lit kendo ne giywak koda. Ka ne jomoko otemo wacho weche ma ok kare kuoma, ne giwuoyo e loya. Ne gitega ahinya!”​—Rumi 12:13, 15.

17. Gin ang’o ma jodongo nyalo timo mondo giho joma nigi lit e chunygi?

¹⁷ Un jodong-kanyakla, tiuru gi thuolo moro amora moneno e tego jo modong’ ka omakore gi Jehova bang’ ka osegol achiel kuom joodgi e kanyakla. Un gi ting’ makende mar hoyo Jokristo ma joodgi oweyo Jehova. (1 The. 5:14) Jiwgiuru ka pok chokruok ochakore kod bang’ chokruok. Limgiuru kendo ulem kodgi. Lenduru kodgi, kendo kinde ka kinde rwakgiuru e lamou mar joot. Jodong-kanyakla onego oher rombe mag Jehova ma nigi lit e chunygi kendo gikechgi.​—1 The. 2:7, 8.

18. Ka luwore gi 2 Petro 3:9, en ang’o ma Nyasaye dwaro ni joma oweyo tiyone otim?

¹⁸ Jehova ‘ok dwar ni oketh ng’ato ang’ata to odwaro ni ji duto ochop kama gilokoe chunygi gia e richo.’ (Som 2 Petro 3:9.) Kata ka ng’ato otimo richo maduong’ ma romo  nade, Jehova pod neno ngima ng’atno kaka gima duong’ ahinya. Par ane nengo maduong’ ma nochulo​—ngima Wuode owuon​—mondo owar joricho. Nikech ng’wonone, oikore konyo joma kamago mondo oduog ire. En gi geno ni jogo biro kawo okang’ mar duogo ire, mana kaka wanyalo neno e ngero ma Yesu nogoyo e wi wuoyi ma ne olal. (Luka 15:11-32) Nitie ji mang’eny ma noseweyo adiera to bang’e ne giduogo ir Wuon-gi me polo ma jahera. Kendo jo kanyakla norwakogi gi mor ahinya. Elizabeth ma ne wasewuoyo kuome ne mor ahinya ka ne wuode oduogo e kanyakla. Oparo chien kowacho kama: “Amor ahinya gi jogo duto ma nojiwowa mondo kik chunywa ol.”

19. Ang’o momiyo onego wagen kuom Jehova kinde duto?

¹⁹ Onego wagen kuom Jehova kinde duto. Onge chieng’ ma obiro nyisowa ni watim gimoro ma nyalo hinyowa. En Wuoro ma ng’won, ma jachiwo, kendo mohero jogo duto ma lame. Bed gadier chuth ni ok obi jwang’i sama in gi gik ma keloni lit e chunyi. (Hib. 13:5, 6) Mark ma be ne wasewuoyo kuome motelo wacho kama: “Jehova ok nyal jwang’owa ngang’. Oikore konyowa kinde duto ma wakaloe chandruok moro amora.” Jehova biro dhi nyime miyi “teko mokalo ma pile.” (2 Kor. 4:7) Kuom mano, ka achiel kuom joodu oweyo Jehova, inyalo dhi nyime makori gi Jehova ka konchiel bende igeno ni ng’atno nyalo duogo ire.