1-2. (a) Weche ne chal nade e alwora mar Judea e kinde ma Paulo nondiko ne Jo-Hibrania barua? (b) Ang’o momiyo baruano nobiro e kinde mowinjore?

 JOKRISTO ma Jo-Hibrania ma nodak Jerusalem kod Judea noromo gi pek moko bang’ tho Yesu. Bang’ ka nosechak kanyaklano, Jokristo noromo gi akwede mager ahinya. (Tich 8:1) Bang’ higni 20 kama, Jokristo noromo gi pek mag yuto, ma nenore ni nobiro nikech kech ma nokwako piny. (Tich 11:27-30) Kata kamano, e higni mag 61, Jokristogo nobedo gi kuwe e okang’ moro nikech akwede ma ne gidhi yudo nyime ne ok nyal pim gi ma ne gisegayudo motelo. E kindego, Jehova notiyo gi rohone e tayo Paulo mondo ondik ne Jokristogo barua. To mano kaka baruano nobiro e kinde mowinjore!

² Barua ma nondik ne Jo-Hibrania nobiro e kinde mowinjore nikech kuwe ma ne gin-go ne ok dhi siko. Paulo nonyisogi paro moko ma ne dhi konyogi nano e masira ma ne gidhi romogo e kinde mabiro. Giko mar loch Jo-Yahudi ma Yesu nokoro nokayo machiegni. (Luka 21:20) Onge Jakristo moro amora ma nodak Judea moriwo nyaka Paulo, ma nong’eyo ni gikono ne dhi biro karang’o. Jokristogo ne nyalo tiyo gi thuolo ma ne gin-go e kindego e tego yiegi kendo bedo gi kido mar nano.—Hib. 10:25; 12:1, 2.

3. Ang’o momiyo nono bug Jo-Hibrania nyalo konyo Jokristo e kindegi?

³ Wachiegni romo gi masira maduong’ ma ok nyal pim gi ma Jokristo ma nodak Hibrania noromogo. (Mat.  24:21; Fwe. 16:14, 16) We wanon ane paro moko ma Jehova nomiyo Jokristogo ma nyalo konyowa e kindegi.

“WAKEDURU MATEK MONDO WABED JO MOTEGNO”

4. Gin pek mage ma Jokristo ma Jo-Yahudi noromogo? (Ne picha bende.)

⁴ Jo-Yahudi ma nobedo Jokristo ne nyaka tim lokruoge moko. Timo lokruogego ne ok yot. Nitie kinde ma Jo-Yahudi ne gin oganda ma Nyasaye noyiero. Kuom higni mang’eny, ruodhi ma ne locho Jerusalem, ne locho e lo Jehova kendo kanyo e kama hekalu ma ne ilamoe Jehova ne nitie. Jo-Yahudi duto ne luwo Chike Musa kendo ne giluwo kaka nileronegi chikego gi jotend din. Chikego noriwo kit chiemo ma nonego gicham, paro ma nonego gibedgo e wi tero ji nyangu, kod kaka nonego gine joma ok ne gin Jo-Yahudi. Kata kamano, bang’ tho Yesu, ne ok ochuno ni Jo-Yahudi koro ochiw misengni kata luwo chike kaka mago. Yie gi lokruogego ne ok yot ne Jo-Yahudi ma nosebedo Jokristo nikech ne ging’iyo gi luwo Chike Musa. (Hib. 10:1, 4, 10) Nobedo matek kata mana ne Jokristo motegno kaka jaote Petro yie gi lokruoge ma nosetimgo. (Tich 10:9-14; Gal. 2:11-14) Lokruogego nomiyo jotend din mag Jo-Yahudi ochako kwedo Jokristo.

5. En ang’o ma Jokristo nonego otang’go?

⁵ Jokristo ma ne wuok Hibrania ne ikwedo gi grube moko ariyo. Mokwongo, nitie jotend din mag Jo-Yahudi ma ne nenogi kaka joma nong’anyo ne din mar Jo-Yahudi. Bende, ne nitie jomoko ei kanyakla ma ne wacho ni Jokristo nyaka dhi nyime luwo Chike Musa. Samoro ne giwacho kamano mondo kik giyud sand. (Gal. 6:12) En ang’o ma ne dhi konyo Jokristo mondo gimakre gi adiera?

6. En ang’o ma Paulo nojiwo Jokristo wetene ni otim? (Jo-Hibrania 5:14–6:1)

 ⁶ E barua ma Paulo nondiko ne Jo-Hibrania, nojiwogi mondo ginon Wach Nyasaye e yo matut. (Som Jo-Hibrania 5:14–6:1.) Notiyo gi weche moko ma yudore e Ndiko mag Dho-Hibrania e lero ni yo manyien ma Jokristo ne lamogo Jehova, ne ber moloyo yo ma Jo-Yahudi ne lamego. a Paulo nong’eyo ni ka Jokristogo onono Wach Nyasaye e yo matut, ne gidhi fwenyo adiera kendo kwedo puonj ma ne nyalo gologi e yo.

7. Gin pek mage ma waromogo e kindegi?

⁷ Mana kaka Jokristo ma Jo-Hibrania, waromoga gi puonj kod weche moko ma kwedo adiera mowuok e Muma. Joma kwedowa wuoyoga marach e wi yo ma waluwogo puonj mag Muma e weche mag nindruok. Yo ma ji nenogo gik moko opogore ahinya gi yo ma Jehova nenogigo. (Nge. 17:15) Omiyo, dwarore ni wafweny paro maricho ma joma kwedowa tiyogo mondo gimi wawe Jehova kendo wakwed parogo.​—Hib. 13:9.

8. En ang’o ma nyalo konyowa bedo Jokristo motegno?

⁸ Onego waluw paro ma Paulo nondiko ne Jokristo ma Jo-Hibrania ni giked matek mondo gibed Jokristo motegno. Mano oriwo nono Wach Nyasaye e yo matut mondo wang’e Jehova e yo maber kod kaka oneno gik moko. Mano en gima onego wadhi nyime timo kata mana bang’ chiwore ne Jehova kendo chopo e batiso. Waduto nyaka wadhi nyime puonjore Muma kendo some, bed ni nyocha e ka wapuonjore adiera kata ne wapuonjore adiera chon. (Zab. 1:2) Bedo gi chenro maber mar puonjruok ma ok wabare biro konyowa mondo wabed gi yie, ma en kido ma Paulo nojiwo ni Jokristo onego bedgo e barua ma nondiko ne Jo-Hibrania.—Hib. 11:1, 6.

“WAN JOGO MA NIGI YIE MA BIRO MIYO ORES NGIMAWA”

9. Ang’o momiyo ne dwarore ni Jokristo ma Jo-Hibrania obed gi yie motegno?

⁹ Ne dwarore ni Jokristo ma Jo-Hibrania obed gi yie motegno mondo okonygi tony e masira maduong’ ma ne dhi yudo Judea. (Hib. 10:37-39) Yesu nochiwo siem ne jolupne ni ka gineno ka jolweny ogoyo kambi kendo olworo Jerusalem, to giring gidhi e gode. Mano ne en siem ne Jokristo duto, bed ni ne gidak e taon mar Jerusalem kata e gwenge mamoko ma nokiewo kode. (Luka 21:20-24) Ka ne jolweny omonjo joma nodak e gwenge, ne giringoga mondo gidhi gipond e taon mar Jerusalem nikech ne en gi ohinga motegno ma ne nyalo miyogi arita maber. Ne dwarore ni gibed gi yie motegno mondo giring gidhi e gode, kar ringo ka gidhi Jerusalem.

10. Bedo gi yie motegno ne dhi chwalo Jokristo mondo otim ang’o? (Jo-Hibrania 13:17)

¹⁰ Ne dwarore ni Jokristo ma Jo-Hibrania ogen joma Yesu ne tiyogo e tayo kanyakla. Nenore ni joma ne tayo kanyakla nomiyogi chik ma achiel kachiel ma ne nyiso kinde ma nonego giringie kod kaka nonego gitim kamano. (Som Jo-Hibrania 13:17.) E dho Grik, wach  molok ni ‘luwo kaka itayi’ e Jo-Hibrania 13:17, nyiso ni ng’ato oyie luwo ng’ama taye nikech ogeno ng’at ma tayeno. Omiyo, ne dwarore ni Jokristo ma Jo-Hibrania ogen joma ne tayogi ka masira pok ochopo. Ka ne ginyalo luwo kaka itayogi e kinde ma ne gin gi kuwe, ne dhi bedonegi mayot luwo kaka ne idhi tagi e kinde ma weche ne dhi bedo matek.

11. Ang’o momiyo dwarore ni Jokristo obed gi yie motegno e kindegi?

¹¹ Dwarore ni wabed gi yie e kindegi mana kaka Jokristo ma Paulo nondikonegi barua. Wadak e ndalo ma ng’eny ji ok dew gik ma timore ma Muma nokoro kendo ma nyiso ni wadak e ndalo mag giko. (2 Pet. 3:3, 4) Kata obedo ni Muma nyisowa gik ma biro timore e kinde masira maduong’, pod nitie gik mang’eny ma ok wang’eyo. Dwarore ni wabed gi yie motegno ni giko mar piny marachni biro chopo e kinde mowinjore kendo ni Jehova biro ritowa.—Hib. 2:3.

12. En ang’o ma biro konyowa tony e kinde masira maduong’?

¹² Nyaka wabed gi yie motegno ni Jehova tiyo gi “jatich mogen kendo mariek” e tayowa. (Mat. 24:45) E kinde ma masira maduong’ biro chakore, samoro ibiro miwa chike moko ma biro dwarore ni waluw mondo wares ngimawa, mana kaka nomi Jokristo ma Jo-Hibrania e kinde ma jolweny mag Rumi nomonjo Jerusalem. Magi e kinde monego wamed genoe joma Jehova tiyogo e tayo riwruok mar ogandane kendo luwo paro ma gichiwo. Ka ok waluwo paro ma gimiyowa e kindegi, biro bedonwa matek luwo paro ma gibiro miyowa e kinde masira maduong’.

13. Ang’o momiyo siem ma yudore e Jo-Hibrania 13:5 en siemo mowinjore?

¹³ E kinde ma Jokristo ma Jo-Hibrania ne rito neno ranyisi mondo giring gidhi e gode, nonego gidag e ngima mayot kendo ne ok onego gibed “jo mohero pesa.” (Som Jo-Hibrania 13:5.) Moko kuomgi noromo gi chandruoge mager kaka nok mar chiemo kod dhier. (Hib. 10:32-34) Kata obedo ni kinde moko ne gitemo matek mondo ginan e chandruoge ma ne giromogo nikech wach maber, nyalo bedo ni moko kuomgi nochako manyo mwandu ka giparo ni mwandugo ne nyalo konyogi. Kata kamano, mwandugo ne ok nyal ritogi e kinde ma nidhi keth Jerusalem. (Jak. 5:3) En adier ni ne dhi bedo matek ne joma nohero mwandu weyo mwandugi kod utegi chien mondo giring gidhi e gode.

14. Ere kaka yie motegno nyalo konyowa bedo gi paro mowinjore e wi mwandu?

¹⁴ Ka wan gi yie motegno ni machiegnini Jehova biro tieko piny marachni, mano biro konyowa mondo kik waket pachwa e manyo mwandu mag pinyni. E kinde masira maduong’, ji “biro wito fedha maggi e nderni” nikech gibiro fwenyo ni “dhahabu kod fedha maggi ok bi resogi e odiechieng mirimb Jehova.” (Eze. 7:19) Kar keto pachwa e manyo mwandu mang’eny, onego wang’ad mar dak e ngima mayot ma biro konyowa rito joodwa to e sechego bende, watiyo ne Jehova. Mano oriwo weyo ma ok wadonjo e gope ma ok ochuno kata tiyo gi thuolo mang’eny e rito mwandu ma wan-go. Bende, dwarore ni watang’ mondo mwanduwa kik bed gima duong’ e ngimawa. (Mat. 6:19, 24) Kaka giko mar  pinyni medo sudo machiegni, biro dwarore ni wanyis ni wageno kuome ng’a, ka en Jehova koso mwandu?

“DWARORE NI UBED GI SINANI”

15. Ang’o momiyo ne dwarore ni Jokristo ma Jo-Hibrania onyis kido mar nano?

¹⁵ Ne dwarore ni Jokristo ma Jo-Hibrania onan e tembe sama ne gitiyo ne Jehova nikech nitie chandruoge ma ne gidhi romogo. (Hib. 10:36) Kata obedo ni moko kuom Jokristo ma Jo-Hibrania noromo gi akwede mager, ng’enygi nolokore mobedo Jokristo e kinde ma kuwe ne nitie Jerusalem. Paulo noparo ne Jokristogo ni kata obedo ni ne gisenano e tembe moko, ne ok nyal pim tembego gi ma Yesu noyudo nikech Yesu nonano nyaka thone. (Hib. 12:4) Kaka din mar Jokristo ne medo landore, e kaka Jo-Yahudi nomedo kwedo Jokristo malit ahinya. Nitie kinde ma jo akwede nomonjo Paulo ka noyalo Jerusalem. Jo-Yahudi mokalo 40 nowacho kama: “Wasekuong’ore ni ok wadhi chamo gimoro amora ngang’ nyaka waneg Paulo.” (Tich 22:22; 23:12-14) Kata obedo ni Jokristogo ne romo gi akwede mager, pod ne dwarore ni gidhi e chokruoge, giyal wach maber, kendo gi dhi nyime tego yiegi.

16. Ere kaka barua ma nondik ne Jo-Hibrania nyalo konyowa bedo gi paro mowinjore e wi akwede ma waromogo e kindegi? (Jo-Hibrania 12:7)

¹⁶ Ang’o ma ne dhi konyo Jokristo ma Jo-Hibrania nano e bwo akwede? Paulo nong’eyo ni ne dwarore ni Jokristogo obed gi paro mowinjore e wi akwede ma ne giromogo. Noleronegi ni Nyasaye ne nyalo weyo mondo girom gi tembe nikech tembego ne dhi tego yiegi. (Som Jo-Hibrania 12:7.) Mano ne dhi konyogi nyago kido moko ma ne dwarore ni Jakristo obedgo. Ka Jokristogo noketo pachgi kuom ber ma ne gidhi yudo  bang’e, ne dhi bedonegi mayot nano e tembe ma ne giromogo e kindego.—Hib. 12:11.

17. Ang’o ma Paulo nopuonjore e wi nano e bwo akwede?

¹⁷ Paulo nojiwo Jokristo ma Jo-Hibrania mondo gidhi nyime nano ka gin gi yie motegno. Paulo ne nyalo chiwo paro ma ne dhi konyo Jokristogo e yo maber. Kinde moko ka ne pok obedo Jakristo, en bende nosandoga Jokristo. Nong’eyo gima Jokristo ne nyalo timo mondo ginan e bwo akwede nikech en bende nosande bang’ bedo Jakristo. (2 Kor. 11:23-25) Omiyo, Paulo ne nyalo wuoyo ka en gadier nikech nong’eyo gima ne dwarore mondo ng’ato onan. Noparo ne Jokristogo ni nonego gigen Jehova to ok tekogi giwegi e kinde ma gikalo e tem. Mano e momiyo Paulo ne nyalo wacho gi chir niya: “Jehova e jakonyna; ok abi luor.”—Hib. 13:6.

18. En ang’o monego wang’e e wi kinde ma biro, to mano biro konyowa nade?

¹⁸ Moko kuom owetewa nano e bwo akwede e kindewagi. Achiel kuom gima wanyalo timo mondo wanyis ni waherogi en parogi e lamo kendo miyogi gik ma gichando. (Hib. 10:33) Muma wacho maler ni “ji duto ma dwaro chiwore chuth ne Nyasaye gi ngimagi ka gin e winjruok achiel gi Kristo Yesu, bende ibiro sand.” (2 Tim. 3:12) Omiyo, waduto onego waikre ne akwede. Mad wadhi nyime geno Jehova gi chunywa duto, kendo bedo gadier ni obiro konyowa nano e tem moro amora ma wanyalo romogo. Gikone, obiro miyo jotichne duto momakore kode yueyo.—2 The. 1:7, 8.

19. Gin okenge mage ma ka wakawo, to biro konyowa ikore ne masira maduong’? (Ne picha bende.)

¹⁹ En adier ni barua ma Paulo nondiko ne Jo-Hibrania nokonyo Jokristo mokwongo mondo giikre ne masira ma ne gidhi romogo. Paulo nojiwo owetene mondo ging’e Ndiko kendo ginone e yo matut. Timo kamano ne dhi konyogi fwenyo puonj mag miriambo ma ne nyalo dwoko yiegi chien kendo konyogi kwedo puonjgo. Nojiwogi ni giteg yiegi nikech timo kamano ne dhi konyogi luwo kaka Yesu kod jodong-kanyakla ne tayogi. Bende, nokonyo Jokristo mondo onan ka gin gi paro mowinjore, ka gineno tembe kaka yo ma Wuon-gi ma jahera ne tiegogigo. Mad waduto waluw siem ma Paulo nochiwono. Timo mano biro konyowa nano ka wamakore gi Jehova nyaka giko.—Hib. 3:14.