SULA MAR PUONJRUOK 36
WER 89 Chik Iti, Iwinj, Mondo Oguedhi
‘Timuru Kaka Wach Nyasaye Dwaro’
“Kik ubed jo ma winjo awinja wach kende, to utim kaka wach Nyasaye dwaro.”—JAK. 1:22.
GIMA SULANI WUOYE
Sulani biro konyowa bedo gi gombo mar somo Wach Nyasaye pile, paro matut kuom gik ma wasomo, kendo tiyo gi gik ma wapuonjore e ngimawa.
1-2. Ang’o momiyo jotich Jehova morga? (Jakobo 1:22-25)
JEHOVA gi Wuode dwaro ni wabed mamor. Jandik Zaburi 119:2 nowacho kama: “Jo mamor gin jo ma luwo weche moparonegi, ma manye gi chunygi duto.” Yesu bende nowacho kama: “Jo mamor gin jogo ma winjo wach Nyasaye kendo timo!”—Luka 11:28.
2 Wan kaka jotich Jehova, wamorga. Nikech ang’o? Gima duong’ momiyo wamorga en nikech wasomo Muma pile kendo watiyo gi gik ma wapuonjore e ngimawa.—Som Jakobo 1:22-25.
3. Gin ber mage ma wayudo ka watiyo gi gik ma wasomo e Wach Nyasaye?
3 Nitie ber mathoth ma wanyalo yudo “ka watimo kaka wach Nyasaye dwaro.” Kuom ranyisi, sama watimo kamano, wamoro Jehova kendo wan bende wabedo mamor. (Ekl. 12:13) Ka watiyo gi gik ma wapuonjre e Wach Nyasaye e ngimawa, wabedo gi winjruok maber gi joodwa kod Jokristo wetewa. Be kamano e kaka in bende ineno? E wi mano, wageng’o chandruoge ma jomamoko yudoga nikech ok gitim dwach Jehova. Mano e momiyo wayie gi weche ma Ruoth Daudi nowacho. Bang’ wuoyo e wi chike kod buche mag Jehova, notieko kama: “Ng’at ma ritogi yudo pok maduong’.”—Zab. 19:7-11.
4. Ang’o momiyo ok en-ga gima yot tiyo gi gik ma wapuonjore e Muma e ngimawa?
4 Kuom adier, ok en-ga gima yot kinde duto tiyo gi gik ma wapuonjore e Wach Nyasaye. Nyaka waket thuolo tenge mar somo Muma kendo none mondo wang’e gima Jehova dwaro ni watim. Kuom mano, we wanon ane paro moko ma nyalo konyowa somo Muma pile. Wabiro puonjore kaka wanyalo paro matut e wi gik ma wasomo, kendo neno kaka wanyalo tiyo gi gik ma wapuonjore e ngimawa.
KET THUOLO TENGE MAR SOMO WACH NYASAYE
5. Gin migepe mage ma wan-go ma kawoga thuolowa mang’eny?
5 Thoth jotich Jehova odichga ahinya. Watiyoga gi thuolo mang’eny e migepe ma Jehova omiyowa. Kuom ranyisi, thothwa tiyoga tije mag andika mondo wasirgo ngimawa kod ngima joodwa. (1 Tim. 5:8) Jokristo mang’eny rito wedegi ma tuore kata ma hikgi oniang’. To wan bende dwarore ni warit ngimawa, to mano en gima kawo thuolo. Mopogore gi migepe ma wasewuoyego, wan gi migepe mamoko bende e kanyakla. Migawo maduong’ ma wan-go en mar lando wach maber gi kinda. Nikech wan-gi migepe mang’eny monego watim, ere kaka wanyalo yudo thuolo mar somo Muma pile, paro matut kuom gik ma wasomo, kendo tiyo gi gik ma wasomogo e ngimawa?
6. Ang’o minyalo timo mondo somo Muma obed gima duong’ e ngimani? (Ne picha bende.)
6 Nikech wan Jokristo, somo Muma en achiel kuom “gik ma dwarore moloyo,” kuom mano, dwarore ni obed gima duong’ e ngimawa. (Fil. 1:10) Kowuoyo kuom ng’at mamor, jandik-zaburi nowacho kama e Zaburi sula mokwongo: “Omor gi chik Jehova, osome gi dwol ma piny odiechieng’ gotieno.’’ (Zab. 1:1, 2) Kuom mano, dwarore ni waket thuolo tenge mar somo Muma pile. Gin seche mage maberie moloyo ka ng’ato osomoe Muma? Ng’ato ka ng’ato nyalo dwoko penjono e yo mopogore. Kata kamano, wanyalo wacho ni sama berie moloyo, en sama ng’ato ka ng’ato kuomwa nyalo some pile. Owadwa moro miluongo ni Victor wacho kama: “Aheroga somo Muma gokinyi. Kata obedo ni ok aheroga chiewo gokinyi, gima ber en ni seche kaka mago, ongega gik mang’eny ma chocho pacha. Seche kaka mago yudoga ka pacha okuwe kendo anyalo keto pacha kuom gik ma asomo.” Dibed ni in bende ineno kamano? Penjri ane kama: ‘Gin seche mage maberie moloyo ma anyalo some Muma?’
Gin seche mage ma ng’ato nyalo somoe Muma? Gin seche mage monyalo timoe kamano pile? (Ne paragraf mar 6)
PAR MATUT KUOM GIK MISOMO
7-8. En ang’o ma nyalo monowa yudo ber kuom gik ma wasomo? Chiw ane ranyisi.
7 En adier ni wanyalo yudo ka wasomo gik mang’eny, to ok waparo matut kuomgi. Be isegasomo kamoro kae to machuok bang’ mano, ifwenyo ni inyalo paro mana gik ma nok kuom gik ma nisomogo? Mano gima osetimorenwa waduto. Gima lit en ni mano e gima bende nyalo timorenwa sama wasomo Muma. Samoro wan-ga gi chenro mar somo sula moko e Muma pile pile. Mano en gima ber. Dwarore ni wabed gi chenro mar somo Muma kendo wamakre gi chenrono. (1 Kor. 9:26) Kata kamano, mopogore mana gi somo Muma, wadwaro ni wayud ber kuom gik ma wasomogo.
8 Par ane ranyisini: Wayudoga pi ka koth ochue, kendo pigno miyo cham mopidhi e lowo dongo maber. Kata kamano, ka koth ochue mang’eny ahinya dichiel, to lowo bedoga modhiek. Kendo ka koth omedo chue kamano, to koro obiro mana ketho gik moko. Lowo dwaro thuolo moromo mondo oywa pi mosmos, e ka cham mopidh odong maber. Kamano bende, ok onego wasom Muma ka warikni, ma ok wakawo thuolo mar paro matut kuom gik ma wasomo kendo tiyo kodgi e ngimawa.—Jak. 1:24.
Mana kaka lowo dwaro kinde mondo oywa pi bang’ ka koth osechue kendo konyo cham, e kaka dwarore ni wayud thuolo mar paro matut e wi gik ma wasomo e Muma kendo tiyo kodgi e ngimawa (Ne paragraf mar 8)
9. Ang’o monego watim ka wafwenyo ni wasomoga Muma ka warikni?
9 Be seche moko isegayudo kisomo Muma kirikni? Ang’o monego itim? Dhi mos. Tem matek mondo ipar matut kuom gik misomo kata ma eka ia somo. Mano ok onego obed gima tek timo. Inyalo medo thuolo mipuonjorigo Muma mondo iyud thuolo mar paro matut kuom gik misomo. Kata, inyalo yiero somo mana kamoro matin e Muma, kae to iti gi thuolo modong’ e paro matut kuom gik misomo. Victor ma ne wasewuoyo kuome motelo wacho kama: “Asomoga mana kamoro matin e Muma, samoro sula achiel kama. Nikech asomoga Muma gokinyi, ayudoga thuolo mar paro matut kuom gik ma nasomo odiechieng’ mangima.” Bed ni itiyo gi yo mane, gima duong’ en ni onego iti gi yo ma konyi yudo ber kuom gik mipuonjori.—Zab. 119:97; ne sanduk ma wiye wacho ni “ Penjo Moko Minyalo Nono.”
10. Chiw ane ranyisi ma nyiso kaka inyalo tiyo gi gik mipuonjori e ngimani. (1 Jo-Thesalonika 5:17, 18)
10 Bed ni isomoga Muma sa adi, kata itiyoga gi thuolo ma rom nade e some, tem matek mondo inon yore minyalo tiyogo gi gik misomo. Sama isomo kamoro e Wach Nyasaye, penjri kama: ‘Ere kaka anyalo tiyo gi wachni sani kata e kinde ma biro? Kuom ranyisi, wawach ni isomo bug 1 Jo-Thesalonika 5:17, 18. (Som.) Bang’ somo ndikono, inyalo chung’ matin kae to ipar ane ni iwuoyoga gi Jehova e lamo nyadidi, to iwuoyoga kode e yo mane? Bende, inyalo paro matut e wi gik mabeyo ma Jehova osetimoni. Inyalo ng’ado ni ibiro goyo ne Jehova erokamano e wi gik moko adek sie. Ka ikawo thuolo matin kamano mar paro matut, mano biro konyi bedo ng’at ma winjo kendo timo kaka Wach Nyasaye dwaro. Inyalo somo Muma e yo ma kamano mondo iyud ber sama isome. Ee, kitimo kamano, ibiro bedo ng’at ma timo kaka Wach Nyasaye dwaro. Kata kamano, ang’o minyalo timo kifwenyo ni nitie gik mang’eny ma dwarore ni itimie dongruok?
KET CHENRO MAG GIK MINYALO CHOPE MAYOT
11. Ang’o momiyo seche moko wanyalo winjo ka chunywa onyosore gi somo Muma? Chiw ane ranyisi.
11 Sama isomo Muma, samoro chunyi nyalo nyosore nikech inyalo fwenyo ni nitie gik mang’eny monego itimie dongruok. Wawach ni chieng’ moro isomo Muma kama kwerowa ni ok onego wabed joma buono ji. (Jak. 2:1-8) Kae to ifwenyo ni nitie kaka onego itim lokruok e yo minenogo jomamoko. Mano en gima ber. Odiechieng’ machielo isomo kama wuoyo e wi gimomiyo onego warit lewwa. (Jak. 3:1-12) Kae to ifwenyo ni seche moko nitie kaka iwuoyoga marach ne jomamoko. Omiyo, ing’ado ni ibiro temo matek mondo irit lewi kendo wacho weche ma jiwo jomamoko. Odiechieng’ machielo kendo isomo kama kwerowa ni ok onego wabed osiepe mag piny. (Jak. 4:4-12) Ifwenyo ni onego imed bedo motang’ gi yiero mitimo e yore mag manyo mor. Chop odiechieng’ mar ang’wen, ibiro yudo ni nitie gik mang’eny monego itimie dongruok kendo mano nyalo nyoso chunyi.
12. Ang’o momiyo chunyi ok onego onyosre kifwenyo ni sama somo Muma, nitie lokruoge mang’eny ma dwarore ni itim? (Ne bende weche moler piny.)
12 Kifwenyo ni dwarore ni itim lokruoge moko, kik chunyi nyosre. Mano nyiso ayanga ni in gi chuny maber, kendo igombo tiyo gi gik mipuonjori e ngimani. Ng’at mobolore somoga Muma ka en gi paro mar fwenyo kuonde monego otimie lokruok. a Par bende ni nyaka wadhi nyime rwako “kit dhano manyien.” (Kol. 3:10; pim gi weche ma lero ndikoni e Study Bible e bwo wich ma wacho ni “is being made new.”) Ang’o ma biro konyi dhi nyime timo kaka Wach Nyasaye dwaro?
13. Ere kaka inyalo keto chenro ma biro konyi tiyo gi gik mipuonjori e Muma? (Ne picha bende.)
13 Kar temo tiyo gi gik mipuonjori dichiel, inyalo chako gi keto chenro mag gik minyalo chopo mayot. (Nge. 11:2) Inyalo temo timo kama: Ndik list mag gik monego itimie lokruok, kae to iyier wach achiel kata weche ariyo minyalo chakogo, kae to mamoko modong’ inyalo timo bang’e. En wach mane minyalo chakogo?
Kar timo gik moko duto mipuonjori e Muma dichiel, donge inyalo ndiko list mag gik ma diher timoe lokruok, kae to itim-gi mosmos kichako gi minyalo chope mayot kata midwaro ni itimie lokruok ma piyo? (Ne paragraf mar 13-14)
14. Gin chenro mage minyalo bedogo ma nyalo konyi timo lokruok ka luwore gi gik misomo e Muma?
14 Inyalo yiero chako gi gima yotni chopo. Kata, inyalo yiero chako gi gima ineno ni dwarore ni itimie lokruok ma piyo. Bang’ fwenyo wach monego ichakgo, ti gi bugewa e timo nonro, kuom ranyisi, Buk Makonyo Joneno mag Jehova e Timo Nonro kata bug Fahirisi. Nyis Jehova wachno e lamo kikwaye mondo omiyi “teko kod gombo mar timo duto mohero.” (Fil. 2:13) Tem matek mondo iti gi gik mipuonjori. Kisetimo lokruok e wach mokwongo, mano biro jiwi mondo itim lokruoge ma dwarore e weche mamoko modong’, kendo timo lokruogego biro bedoni mayot moloyo.
WE MONDO WACH NYASAYE ‘OTI KUOMI’
15. Ere kaka jotich Jehova opogore gi ji mang’eny ma somoga Muma? (1 Jo-Thesalonika 2:13)
15 Jomoko wachoga ni gisesomo Muma nyading’eny. Kata kamano, be giyie gi Muma? Be giyie mondo puonj mag Muma ota ngimagi? Gima lit en ni kinde mang’eny, dwoko mag penjogo en mana, ‘ooyo.’ To mano kaka jotich Jehova to opogore! Mana kaka Jokristo mokwongo, wan bende wayie ni Muma en “wach Nyasaye mana kaka en gadier.” E wi mano, watemo matek mondo wanyis kokalo kuom timbewa ni Muma tiyo e ngimawa.—Som 1 Jo-Thesalonika 2:13.
16. Ang’o ma nyalo konyowa bedo joma timo kaka Wach Nyasaye dwaro?
16 Ok en-ga gima yot kinde duto somo Wach Nyasaye kendo tiyo gi gik ma wapuonjore e ngimawa. Samoro nyaloga bedonwa matek yudo thuolo mar somo Muma. Kata, samoro wanyalo yudo ka wasomo Muma ka warikni kendo ok wayud thuolo mar paro matut kuom gik ma wasomo. Kata, chunywa nyalo nyosore ka wafwenyo ni nitie lokruoge mang’eny ma dwarore ni watim. Bed ni iromo gi pek mane, bed gadier ni inyalo loyogi. Nikech ang’o? En nikech Jehova oikore konyi. Mad wayie mondo Nyasaye okonywa timo kaka Wachne dwaro, kendo wiwa kik wil gi gik ma gisomo. Wan gadier ni kaka wamedo somo Wach Nyasaye kendo tiyo kode e ngimawa, e kaka wabiro medo bedo mamor.—Jak. 1:25.
WER 94 Wamor gi Wach Nyasaye
a Ne vidio ma yudore e jw.org/luo ma wiye wacho ni Gik ma Mbeseni Wacho—Somo Muma.
