En adier ni jopuonjre Yesu 70 ne onge kode ka nochako Chiemb Odhiambo mar Ruoth. Kata kamano, mano ok nyis ni koro ne ok oyie kodgi kata ni ne gijwang’e. Yesu ne dwaro mana ni obed gi jootene e nyasino.

Yesu noyie gi jootene 12 kaachiel gi jopuonjrene 70. Yesu noyiero e kind jopuonjrene, chwo 12 kendo noluongogi ni joote. (Luka 6:12-16) Ka ne en Galili, “noluongo ji Apar Gariyoka mi . . . noorogi mondo giyal wach Pinyruodh Nyasaye kendo gichang ji.” (Luka 9:1-6) Bang’e ka ne en Judea, Yesu “noyiero ji 70 mamoko mi noorogi ji ariyo-ariyo.” (Luka 9:51; 10:1) Mano nyiso ni Yesu ne nigi jolupne kuonde mopogore opogore ma ne iyale wach maber.

Jo-Yahudi ma nobedo jopuonjre Yesu ne timoga Pasaka higa ka higa kendo nenore ni ne gitimo kamano kaachiel gi joutegi. (Wuok 12:6-11, 17-20) Ka ne ochiegni neg Yesu, nodhi Jerusalem kaachiel gi jootene. Kata kamano, Yesu ne ok otimo nyasi maduong’ mar Pasaka kod jopuonjrene duto ma ne wuok Judea, Galili, kod Perea. Nenore maler ni Yesu ne dwaro timo nyasino mana gi jootene kende. Nonyisogi kama: “Asegombo ahinya chamo Pasakani kodu ka pok osanda.”—Luka 22:15.

Nitie gimomiyo nodwaro timo kamano. Yesu ne chiegni tho kaka “Nyarombo mar Nyasaye ma golo richo mar piny.” (Joh. 1:29) Mano ne dhi timore Jerusalem kama nosebed kichiwoe ne Nyasaye misengni. Tho mar Yesu ne dhi yawo thuolo malach mar yudo resruok moloyo thuolo ma ne Jo-Israel ne nigo e otieno ma ne gichamoe nyarombo gi joutegi ka giwuok Misri. (1 Kor. 5:7, 8) Gima Yesu notimono nomiyo jootene Apar Gariyoka obedo mise mar kanyakla mar Jokristo. (Efe. 2:20-22) Ber ng’eyo bende ni Jerusalem ma en dala maler “nigi kite 12 mag mise” ma nondikie “nyinge 12 mag joote 12” mag Nyarombo. (Fwe. 21:10-14) Kuom adier, joote Yesu ma nomakore kode ne nigi migawo maduong’ e chopo dwach Nyasaye. Mano konyowa ng’eyo gimomiyo Yesu ne dwaro bedo gi jootenego e nyasi mogik mar Pasaka kod nyasi ma ne dhi luwo, ma en Chiemb Odhiambo mar Ruoth.

Jopuonjrene 70 kaachiel gi jopuonjrene mamoko ne onge gi Yesu e nyasino. Jopuonjrene ma nomakore kode pod ne nigi thuolo mar yudo ber ma nyasi mar Chiemb Odhiambo mar Ruoth ne dhi kelo. Jopuonjrene duto ma bang’e noduogo obedo Jokristo mowal nodonjo e singruok mar Pinyruoth ma Yesu nonyiso jootene e otieno mogik.—Luka 22:29, 30.