Rosie wacho niya, “Ne achako parora ahinya kendo ne aneno ni gik moko medo bedo maricho kuom paro gik ma ne pok otimore.” Gin ndiko mage ma ne okonye? Achiel kuomgi en Mathayo 6:34 ma wacho niya: “Kik uparru kuom kiny, nikech kiny nobed gi parruokne owuon. Odiechieng’ kodiechieng’ nigi chandruokne morome.” Rosie wacho ni weche ma Yesu nowachogo nokonye mondo kik oparre e wi gik ma kiny. Omedo wacho niya: “Ne an gi chandruok moroma ma ne onge tiende medo parruok mamoko e wi gik ma ne pok otimore, ma bende samoro ne ok dhi timore.”

Yasmine bende ne ofwenyo ni parruok mang’eny ma en go ne chako hinye. Owacho niya: “Ne anyalo ywak kuom odiechienge mang’eny juma ka juma kendo ne ok anindi. Parruok mang’eny ne hinya to aneno.” En ndiko mane ma ne okonye? Owacho ni ndiko mar 1 Petro 5:7 ma wacho ni ‘Keturu parruoku duto kuom Nyasaye, nikech odewou’ nokonye ahinya. Yasmine wacho niya: “Kaka kinde ne medo kalo ne asiko ka alemo, kendo Jehova ne dwoko lamona. Ne awinjo ka gima ogolna osigo moro mapek ma ne tura. Pod abedoga gi paro moko maricho, en mana ni sani koro ang’eyo kaka anyalo loyogi.”

Nyako moro miluongo ni Isabella wacho niya: “Aparo ni deko timo gik moko goyiem en gima nie rembwa nikech babawa be nigi timno. Achoroga nyime gik monego atim mana ni mondo ayue ayuea kata ang’i TV. Mano en tim marach nikech omiyo ng’ato bedo gi parruok mang’eny kendo otimo tich ma outhore.” Puonj ma ne okonye yudore e 2 Timotheo 2:15, ma wacho niya: “Tim duto kar nyaloni mondo inyis ni in ng’at malong’o e wang’ Nyasaye, jatich ma onge gima kuodo wiye.” Isabella wacho niya: “Ne ok adwar ni wi Jehova okuodi gi tijena mana nikech ne ahero gik ma ichoro nyime.” Osetimo lokruok e okang’ malach.

Kelsey bende wacho niya: “Ne anyalo bedo gi tich monego atiek timo, to ne achoro nyime nyaka dakika mogik. Mano ne miyo aywak, nindo ok tera, kendo ne asiko aparora ahinya. Timno ne hinyo ngimana adier.” Ndiko ma ne okonyo Kelsey en Ngeche 13:16, (Luo, 1976) ma wacho niya: “Ng’at mariek paro matut kapok otimo gimoro. Ng’at mofuwo to nyiso mana fupe.” Kelsey lero kaka paro matut kuom ndikono ne okonye kowacho niya: “En gima ber tiyo gi rieko kendo chano gik moko chon. Sani an gi buk moro e mesana ma achanee gik ma onego obed ni atimo to mano osekonya mondo kik arit nyaka dakika mogik.”

Kirsten wacho niya: “Chwora ne oringo oweya gi nyithindo ang’wen matindo.” En ndiko mane ma ne okonye? En Ngeche 17:17 ma wacho niya: “Osiep ng’ato ohere ndalo duto; kendo omin ng’ato nonyuole mondo okonye chieng’ chandruok.” Kirsten nomanyo kony kuom jotich Jehova wetene. Ne gikonye e yo mane? Owacho niya: “Osiepena ne okonya e yore mang’eny! Nitie joma ne kelona alode, olembe, kod maua. Osiepewa moko ne okonyowa nyadidek e kinde ma ne wasiko wadar. Nitie osiepna moro ma ne omanyona tich. Adier, osiepena ne oikore konya kinde duto.”

Delphine ma ne osewuo kuome motelo bende ne nyagore gi kuyo kinde mang’eny. Oparo kaka ne owinjo bang’ yudo chandruoge mang’eny. Owacho niya: “Ne aneno ka gima ngima oridorena moloyo jomamoko. Ne akuyo ahinya.” Ndiko ma ne okonye ne en Zaburi 68:6, (Luo, 1976). Ndikono wacho niya: “En ema omiyo joma piny ochamo mier mondo odagie.” Delphine wacho niya: “Nang’eyo ni ndikono ne ok wuo kuom ot masie e kindegi. Kar mano, nang’eyo ni Jehova miyowa owete gi nyimine moherowa gadier nikech giduto gihero Jehova, to onge gima berie moloyo mano. Kata kamano, nang’eyo ni ne ok anyal mako osiep gi jomamoko kapok amako osiep gi Jehova. Omiyo, Zaburi 37:4 nokonya: ‘Chunyi mondo omor kod Jehova; kendo nomiyi gima chunyi dwaro.’”

Otieko kowacho kama: “Nafwenyo ni onego amed sudo machiegni ahinya gi Jehova. En e osiep maber moloyo osiepe duto. Kae to nandiko gik ma nanyalo timo kanyachiel gi joma ohero Jehova mondo amed mako osiep kodgi. Napuonjora keto pacha kuom kido mabeyo ma jomoko ne nigo kendo timonegi gik mabeyo.”

En adier ni jotich Nyasaye pod nigi richo ma ne giyudo kuom Adam. Joneno mag Jehova bende nigi chandruoge mana kaka jomamoko. Muma jiwo ji mondo giikre konyo jowetegi ka mano nyalore. Omiyo, en gima ber bedo gi osiepe ma luwo puonj mag Muma. Kata kamano, be puonj mag Muma nyalo konyowa mondo wanyagre gi chandruoge moko ma ok nyal rumo e kindegi kaka midekre kod kuyo?