Rose wacho niya: “An gi tuo moro ma nonyuolago ma miyo abedo gi rem ma ok rum. Ngimana osebedo marach.” Gima ne chande ahinya en ni nitie seche ma ne ok onyal keto pache kuom puonjruok Muma kod weche mamoko motudore gi lamo Nyasaye. Kata kamano, gima nokonye gin weche ma Yesu nowacho e Mathayo 19:26 niya: “Kuom Nyasaye gik moko duto nyalore.” Rose nofwenyo ni nitie yore mang’eny mag puonjruok. Nikech seche moko rem ne rame ahinya ma ne ok onyal kata somo, nochako winjo Muma momaki kod buge momaki miwinjo. * Owacho niya: “Ka dine bed ni onge gik miwinjogo, akiya ni sani dikoro atimora nade mondo asik ka an gi winjruok maber gi Nyasaye.”

Sama Rose winjoga malit ni ok onyal timo gik ma notimoga chon, weche ma yudore e 2 Jo-Korintho 8:12 e ma hoyo chunye. Ndikono wacho niya: “Nimar ka chuny moikore nitie mokwongo, mano bedo gima owinjore moloyo, ka ng’ato chiwo ka luwore gi gima en-go, to ok ka luwore gi gima oongego.” Wechego paro ne Rose ni Nyasaye mor gi gima otimo nikech otimo kaluwore gi nyalone.

Delphine, ma nosewuo kuome motelo wacho niya: “Ka ne nyara ma jahigni 18 otho, nawinjo malit ahinya ma ne ok apar ni anyalo dhi nyime bedo mangima. Ngimana ne dhi lokore ahinya.” Weche ma nohoye ahinya yudore e Zaburi 94:19, kama jandik zaburi nowachee kama kuom Nyasaye: “Kuom weche mang’eny maparo e iya hochni omiyo chunya mor.” Delphine wacho niya: “Nalamo Jehova ka akwaye mondo okonya ng’eyo gik ma ne anyalo timo mondo odwok litno chien.”

Nochiwore gi chunye te mondo otim tich moro ma ok chulee osara. Nochako pimore gi kalam ma nyithindo bukogo gik ma gigoro ma kata kotur to pod tiyo atiya. E yo machalo kamano, kata obedo ni en bende chunye nonyosore, nofwenyo ni pod nonyalo konyo jomoko. Owacho niya: “Nafwenyo ni sama atiyo gi puonj mag Muma mondo ahogo joma apuonjo Muma, mano ne en yo maber ma Jehova ne tiyogo mondo ohoya kendo okuwe chunya.” Nondiko nyinge joma Muma wuoyo kuomgi ma bende nokuyo. Omedo wacho niya: “Jogo duto nohero wuoyo gi Nyasaye e lamo.” Nofwenyo bende ni ok onyal yudo dwoko mag penjo ma chande ka ok osom Muma.

Puonjruok Muma osekonyo Delphine mondo oket pache e gik man nyime to ok gik mosekalo. Geno miwuoye e Tich Joote 24:15 bende hoye. Ndikono wacho niya: “Chier nobedie mar joma kare gi joma ok kare.” Be en gadier ni Jehova biro chiero nyare? Delphine dwoko niya: “An gadier ni nyara biro chier e kinde ma biro. Wuonwa manie polo osechano chieng’ ma wabiro romee gi nyarano. Aneno mana ka gima wabedo kode piny kanyachiel kendo ka ahere mana kaka nahere chieng’ ma nanyuolee.”