Yesu noleronwa gima biro miyo wang’e ni “Pinyruodh Nyasaye chiegni.” (Luka 21:31) Moko kuom gik ma nokoro ni ne dhi timore ne gin: Lwenje madongo, yiengni mag piny, kech, kod tuoche. Magi e gik ma waneno ka timore sani.​—Luka 21:10-17.

Muma bende nokoro ni e “ndalo mag giko” ka koro loch dhano chiegni rumo, timbe ji ne dhi bedo maricho ahinya. Inyalo somo wechego e 2 Timotheo 3:1-5. Sama ineno ka ji timo gik ma owach e ndikono e kindewagi, donge ineno kaka gik ma Muma nokoro chopo adier?

Mano nyiso ang’o? Ni kinde okayo machiegni ma Pinyruodh Nyasaye biro kelo lokruoge madongo ma biro miyo ngima obed maber e piny ka. (Luka 21:36) E Muma, Nyasaye osingo gik mabeyo ma biro timore ne pinyni kod joma biro dak e iye. We wane ane moko kuomgi.

“[Nomi Yesu] loch, gi duong’, gi pinyruoth mondo ji duto, bed ni giwuok e dhoot mane kata giwacho dhok mane, gitine. Lochne en loch ma nyaka chieng’ ma ok norum, kendo pinyruodhe ok noketh ngang’.”​—DANIEL 7:14.

Gima mano nyiso: Ji biro dak maber e bwo loch Nyasaye ma biro kwako piny ngima kendo ma Wuode e ma lochoe kaka Ruoth.

“Onge japiny ma nowachi niya: ‘Atuo.’”​—ISAYA 33:24.

Gima mano nyiso: Ji biro dak ma ok gituore kata bedo mong’ol, kendo ma onge tho.

“Otieko lwenje e piny duto.”​—ZABURI 46:9.

Gima mano nyiso: Ji ok bi bedo maluor ni lweny moro nyalo muoch mi kelnegi chandruok.

“Joricho ok nobedie . . . Jo mamuol nobed weg piny.”​—ZABURI 37:10, 11.

Gima mano nyiso: Joma timo gik maricho ok nobedie kendo; joma oluoro Nyasaye kende e ma nobedie.

“Gibiro gero ute kendo ginidagie, gibiro pidho puothe mzabibu kendo chamo olembegi.”​—ISAYA 65:21, 22.

Gima mano nyiso: Piny duto biro bedo maber. Nyasaye biro dwoko lamo ma wasebedo ka walamo mondo dwache otimre “e piny.” ​—Mathayo 6:10.