“Kukwayo Wuoro gimoro amora, obiro miyougo e nyinga.”​—Johana 16:23.

Weche ma ne Yesu owachogo nyiso maler ni Jehova dwaro ni walame e nying Yesu, to ok kokalo kuom sanamu, jo takatifu, malaike, kata kwerewa mosetho. Sama walamo Nyasaye e nying Yesu, wanyiso ni wachiwo luor ne migawo ma Yesu nigo. Yesu owuon nowacho niya: “Onge ng’at ma biro ir Wuora mak mana kokalo kuoma.”​—Johana 14:6.

“Olneuru gik manie chunyu.”​—Zaburi 62:8.

Seche ma walemo, onego wawuo gi Jehova mana kaka nyathi nyalo wuoyo gi wuon-gi. Ok onego wanwone gik ma wasomo e buk moro kata ma wamako e wiwa. Kar mano, onego wawuo kode kowuok e chunywa kendo gi luor.

“Gimoro amora ma wakwaye kaluwore gi dwache, owinjowa.”​—1 Johana 5:14.

E Muma, Jehova Nyasaye nyisowa gik modwaro ni otimnwa kod modwaro ni wan be watim. Mondo Nyasaye owinj lembwa, dwarore ni walem “kaluwore gi dwache.” Mano dwaro ni wapuonjre Muma e ka wang’eye e yo makare, kae to obiro winjo lamowa.

Kwa Gik ma Dwarore e Ngima. Wanyalo kwayo Nyasaye mondo omiwa gik ma dwarore e ngimawa pile ka pile, kaka chiemo, lewni, kod kar dak. Bende, wanyalo kwayo rieko ma nyalo konyowa timo yiero makare, kata teko mar nano e tembe. E wi mago, wanyalo kwayo Nyasaye mondo omiwa yie momedore, owenwa richowa, kendo okonywa e yo moro.​—Luka 11:3, 4, 13; Jakobo 1:5, 17.

Lem ne Jomamoko. Jonyuol morga ahinya ka nyithindgi oherore. Jehova be dwaro ni nyithinde ma ni e piny ka oherre. Nikech mano, en gima owinjore mondo ng’ato olem ne jaode, nyithinde, wedene, kod osiepene. Jakobo nondiko ni ‘walam ne jowetewa.’​—Jakobo 5:16.

Go Erokamano. Muma nyisowa niya e wi Jachuechwa: “Notimo maber kuom miyou koth koa e polo kod kinde mag nyak mogundho, ka oyieng’ou gi chiemo kendo ka opong’o chunyu gi mor.” (Tich Joote 14:17) Ka waparo apara gik moko duto ma Nyasaye osetimonwa, chunywa biro chwalowa mondo wagone erokamano. Ber ng’eyo ni yo machielo ma wanyisogo Nyasaye ni wagone erokamano en dak ka luwore gi dwache.​—Jo-Kolosai 3:15.

Ka walemo to ok wayud dwoko mapiyo, chunywa nyaloga nyosore. Be mano onego omi wapar ni Nyasaye ok dewwa? Ooyo! Ne ane ranyisi moko ma nyiso ni e seche kaka mago, ber mondo wadhi adhiya nyime lemo.

Steve ma ne wawuoyo kuome e sula mokwongo wacho kama: “Ka di ne awe dhi nyime lemo, di ne ajok gi ngima chon.” Ang’o momiyo noloko paro ma ne en-go e wach lamo? Nochako puonjore Muma mi ofwenyo gimomiyo ber lemo kendo nano e timo kamano. Owacho kama: “Alamoga ka agoyo ne Nyasaye erokamano kuom yo ma osebedo kotiyogo gi osiepena e jiwa. Tinde amor moloyo chon.”

To nade Jenny ma ne paro ni ne en ng’ama nono ma Nyasaye dak winj lamo mage? Owacho kama: “Seche ma nawinjoga ka chunya onyosore ahinya, nakwayoga Nyasaye mondo okonya ng’eyo gimomiyo naparo ni an ng’ama nono e nyime.” Mano nokonye nade? Owacho niya: “Wuoyo gi Nyasaye nokonya nenora kaka Nyasaye nena, kendo fwenyo ni kata obedo ni achayora e chunya, Nyasaye to ok ochaya. Bende, lamo osekonya mondo adhi nyime nano kata weche tek manade.” Mano osekelone ber mane? Odhi nyime wacho kama: “Lamo osemiyo tinde aneno Jehova kaka Nyasaye ma nitie adier, Wuora mohera, ma dewa, kendo ma Osiepna, kendo ni oikore konya kinde duto, tek mana ni adhi nyime temo matek mondo atim dwache.”

Ne ane bende ranyisi mar Isabel. Ka nomako ich, lakteche ma ne range nonyise ni nodhi nyuolo nyathi mong’ol marach. Norumo! Jomoko nonyise ni ogol ich. Owacho kama: “Naneno ni parruok ne dhi nega.” Nokawo okang’ mane? Owacho niya: “Nakwayo Nyasaye nyadinwoya mondo okonya.” Bang’ kinde, nonyuolo nyathi ma wuoyi mochake ni Gerard, to nong’ol mana kaka lakteche nosenyise. Be Isabel neno ni Nyasaye nodwoko lamo mage? En kamano! Nade? Olero kama: “Wuodano sani jahigni 14, kendo sama arange kaka omor kata obedo ni ong’ol kamano, aneno ni Jehova Nyasaye nodwoko lamo maga kuom miya wuodano, kendo anene kaka gueth maduong’ ahinya.”

Ranyisigo miyo waparo weche ma jandik-zaburi moro nowacho niya: “A Jehova, iniwinj kwayo mag jo mamuol, initeg chunygi kendo inichiknegi iti.” (Zaburi 10:17) To mano kaka wan gi gik mang’eny momiyo onego wadhi nyime lemo!

Muma oting’o lamo mang’eny ma Yesu nolamo. To mong’ere ahinya en lamo ma nopuonjo jopuonjrene. Lamono nyalo puonjowa ang’o?