ANG’O MINYALO TIMO MONDO KIK IBED GI SIGU GI NG’ATO ANG’ATA?

3 | Gol Sigu e Pachi

TUGE

Puonj ma Muma Chiwo:

“Lokreuru kuom miyo pachu obed manyien, mondo ung’e gadier dwaro maber mar Nyasaye, dwaro mowinjore, kendo malong’o chuth e wang’e.”—JO-RUMI 12:2.

Tiend Puonjno:

Nyasaye dewo gik mwaparo. (Jeremia 17:10) Kata obedo ni dwarore ni mondo watang’ gi wacho kata timo gik ma nyalo kelo sigu, nitie gima chielo ma be dwarore ni watim. Nikech sigu chakorega e pachwa kod chunywa, dwarore ni wapudh gimoro amora e pachwa kod chunywa ma nyalo miyo wabed gi sigu. Mano e ma nyalo miyo walokre mi wawe sigu.

Gik Minyalo Timo:

Nonri mondo item fwenyo paro ma in-go kuom joma a e ogendni mamoko kata ma pien dendgi opogore gi mari. Penjri penjo kaka: ‘Anenogiga nade? Be yo ma anenogigo otenore kuom gik ma an awuon ang’eyo kuomgi? Koso dibed ni abuonogi abuona?’ Ka po ni kuonde mitudorie gi osiepe e intanet, sinembe mineno, kod thumbe miwinjo opong’ gi sigu kod timbe gero, weri kodgi.

Wach Nyasaye nyalo konyowa muko gik mogurore motegno e pachwa kod chunywa, ma gin gik ma nyalo miyo wabed gi sigu

Thothne ok yotga bedo gi paro makare sama wanonore wan wawegi. Kata kamano, Wach Nyasaye to nigi nyalo mar “fwenyo paro kod dwaro mag chuny.” (Jo-Hibrania 4:12) Omiyo, dhi nyime nono weche manie Muma. Tem pimo gik ma Muma puonjo kod paro ma in-go, kae to item matek mondo pachi oluwre gi puonj manie Muma. Wach Nyasaye nyalo konyowa muko “gik mogurore motegno” e pachwa kod chunywa, ma gin gik ma nyalo miyo wabed gi sigu.—2 Jo-Korintho 10:4, 5.

Gima Notimore e Ngima Ng’ato—STEPHEN

Noloko Pache

Stephen gi joodgi nosegakalo e chandruoge moko mang’eny nikech sigu ma wasunge ne nigo kodgi. Nikech mano, nochako hero grup moro mar siasa ma ne kedo e yor agoko ne ratiro mag ji. Mosmos, sigu nomiyo odonjo e timbe mag mahundu. Stephen wacho kama: “Kinde moko an kod osiepena ne wajoneno sinembe ma ne nyiso kaka chon ne Jo-Amerka sando wasumbini moa Afrika. Gik ma ne waneno e sinembego ne wang’o iwa ahinya, kendo mano nomiyo wachako goyo nyithi wasunge ma ne nie od sinembego. Bang’ mano ne wadhi e gwenge mag wasunge ka wamanyogi mondo wagogi.”

Ka ne Stephen ochako puonjore Muma gi Joneno mag Jehova, noloko pache ahinya. Owacho kama: “Nikech ne wadongo ka wachare gi joma wasunge, thoth gik ma naneno e kind Joneno mag Jehova ne mako dhoga ahinya. Kuom ranyisi, ne awuoro ka Janeno moro ma msungu ne oweyo nyithinde ne joot moro ma jorotenge ka ne odhi loka. Bende, ne awuoro ahinya ka joot ma ne gin wasunge noyie dak gi rawera moro ma jarateng’ ma ne onge gi kama dodagie.” Stephen nobedo gadier chuth ni Joneno mag Jehova e Jokristo moherore gadier mana kaka Yesu nowacho ni onego obedi.—Johana 13:35.

Ang’o ma nokonyo Stephen mondo owe timbe maricho ma notimo nikech sigu? Ndiko mar Jo-Rumi 12:2 e ma nokonye. Stephen wacho kama: “Puonjruok Muma nokonya fwenyo ni nonego alok yo ma ne anenogo gik moko. Ne dwarore ni alok pacha obed manyien mondo adag gi ji gi kuwe, kendo neno ni mano e ngima maberie moloyo.” Sani koro osekalo higni 40, kendo Stephen odak e ngima maber, kendo oonge sigu moro amora e chunye.

Samoro Inyalo Hero Magi Bende

MUMA LOKO KIT NGIMA JI

“Tinde Ok An Ng’at Mager”

Ang’o ma nochwalo Sébastien Kayira mondo owe timbe mag gero?

OHINGA MAR JARITO

Ang’o Minyalo Timo Mondo Kik Ibed gi Sigu gi Ng’ato Ang’ata?—Gol Sigu e Pachi

Dholuo

Ang’o Minyalo Timo Mondo Kik Ibed gi Sigu gi Ng’ato Ang’ata?—Gol Sigu e Pachi

https://cms-imgp.jw-cdn.org/img/p/2022013/univ/art/2022013_univ_sqr_xl.jpg

wp22 No. 1 ite mar 10-11

Puonj ma Muma Chiwo:

Tiend Puonjno:

Gik Minyalo Timo:

Samoro Inyalo Hero Magi Bende

YORE MAG GOLO

Yier Dhok Midwaro

Or ne ng'ato