Pogo Ber gi Rach: Yiero ma Nyaka Itim
Chike ma wayiero luwo biro miyo wabed mamor kata ooyo. Jehova Nyasaye ong’eyo wachno maler, to mano e momiyo odwaro ni waluw chikene.
Jehova dwaro ni wadag e ngima mopong’ gi mor kod kuwe.
“An Jehova Nyasachi ma puonji mondo iyud ber, ma tayi e yo monego iwuothie. Mad niwinjie chikna! Dine ibedo gi kuwe kaka aora kendo timni makare dobedo kaka apaka manie nam.”—Isaya 48:17, 18.
Nikech Nyasaye e ma nochueyowa, ong’eyo gik ma nyalo miyo wadag gi mor. Ojiwowa ni waluw kaka otayowa nikech wan e ma wabiro yudo ber. Sama waluwo chike mag Nyasaye, wabedo gadier ni yiero ma watimo biro kelonwa ber. Kinde duto wabiro timo yiero mabeyo, kendo wabiro bedo gi kuwe kod mor.
Jehova ok dwar ni watim gik mohingo tekowa.
“Chik ma amiyou kawuononi ok en chik matek, bende ok en chik man mabor kodu ma ok unyal chopoe.”—Rapar mar Chik 30:11.
Mondo waluw chike makare mag Nyasaye, nyalo dwarore ni watim lokruok e pachwa kod e timbewa. Kata kamano, Jehova ok dwar ni watim gik mohingo tekowa. Nikech en Jachuechwa, ong’eyo nyalowa. Kaka wamedo ng’eyo Jehova, e kaka wabiro medo fwenyo ni “chikene ok tek luwo.”—1 Johana 5:3.
Jehova singo ni obiro konyo joma luwo chikene.
“An Jehova Nyasachi, amako lweti ma korachwich, an e ma awachoni niya, ‘Kik iluor. Abiro konyi.’”—Isaya 41:13.
Wanyalo luwo chike makare mag Nyasaye nikech osingo ni obiro konyowa. Onyalo konyowa kotiyo gi Wachne ma en Muma, ma miyowa jip kod hoch.
Ji tara gi tara e piny ngima osefwenyo ni luwo chike mag Nyasaye osekonyogi ahinya. Donge in bende inyalo puonjori paro mabeyo ma Muma chiwo? Inyalo chako timo mano kuom somo brosua miluongo ni Inyalo Dak gi Mor Nyaka Chieng’! ma yudore nono e jw.org/luo. En gi sula ma luwogi:
-
Ere Kaka Muma Nyalo Konyi?
-
Muma Miyowa Geno Maber mar Kinde Mabiro
-
Be Inyalo Geno Weche Manie Muma?
Sama isomo Wach Nyasaye ma en Muma, ibiro fwenyo ni en buk ma konyo kinde duto, moriwo nyaka kindewagi, kendo ‘inyalo gene kinde duto nyaka chieng’.’ (Zaburi 111:8) Luwo chike makare mag Muma e ma kelo mor kod kuwe madier. Kata kamano, Nyasaye ok chunwa ni waluw chikene. (Rapar mar Chik 30:19, 20; Joshua 24:15) Mano yiero ma ng’ato ka ng’ato kuomwa nyaka tim.
