Nitie mich moko ma wageno nikech jatelo moro kata ng’at ma wamiyo luor ahinya e ma nomiyowa michno. Kata obedo ni mich moko gin mich ma nengogi ni piny, wageno michgo ahinya nikech achiel kuom joodwa kata osiepwa moro ma wageno e ma nomiyowa michgo. Mano e gima notimore gi Jordan ka ne Russell omiye mich. Mano otudore nade gi mich mar misango?

Mokwongo, Muma wacho ni “Nyasaye nooro Wuode ma miderma e piny mondo wayud ngima kokalo kuome.” (1 Johana 4:9) Ng’eyo wachno miyo wageno ahinya mich mar misango. Onge ng’at moro amora ma nigi teko maloyo Nyasaye. Jandik zaburi moro nowacho kama e wi Nyasaye: “In, ma nyingi Jehova, in kendi e ng’a Ma Malo Chutho e piny ngima.” (Zaburi 83:18) Onge ng’ato ang’ata ma ne nyalo miyowa mich ma jaber mopogore gi Nyasaye.

Mar ariyo, Nyasaye en “wuonwa.” (Isaiah 63:16) E yo mane? Ne omiyowa ngima. E wi mano, opidhowa gi gik ma beyo duto mana kaka wuoro maber pidho nyithinde. Ka ne Nyasaye wuoyo e wi joge ma ne oluongo ni Efraim, nopenjo kama: ‘Efraim en wuoda mahero, koso? Chunya lit nikech en; adier, anakeche.’ (Yeremia 31:20) Mano e kaka Nyasaye pod ohero jotichne e kindegi. Nyasaye en Jachuechwa, Wuonwa, kendo Osiepwa. Donge mano miyo mich moro amora momiyowa bedo maberie mogik?

Nitie mich moko ma wageno nikech ng’at mochiwe otimo kamano ma ok ochune. Ng’at machiwo gi chunye duto ok onego ogen ni ibiro chule bang’e nikech ng’wono motimo.

Nyasaye nochiwonwa wuode nikech noherowa. Muma wacho niya: “Hera ma Nyasaye oherowago ne onenore ayanga, ni Nyasaye nooro Wuode ma miderma e piny.” To noore nikech ang’o? “Mondo wayud ngima kokalo kuome.” (1 Johana 4:9) Be nochuno ni nyaka Nyasaye tim kamano? Ooyo. “Rawar ma Kristo Yesu nochulo” nonyiso ‘ng’wono mogundho’ mar Nyasaye.—Jo-Rumi 3:24.

Ang’o momiyo mich ma Nyasaye nochiwo nyiso “ng’wonone mogundho”? Muma lero kama : “Nyasaye nyiso hera moherowago kama: ni kane pod wan joricho, Kristo ne othonwa.” (Jo-Rumi 5:8) Nikech hera ma Nyasaye oherogo dhano morem kendo ma joricho, mano e momiyo nochiwonegi misango. Ne ok ochuno ni Nyasaye nyaka herwa, to be onge gima wanyalo chulego. Michno nyiso kaka Nyasaye ohero dhano ahinya.

Nitie mich moko ma wageno nikech ginyiso kaka ng’ato notuonore gimoro mondo ochiw michno. Ka ng’ato ochiwore mondo omiwa mich moro ma ogeno ahinya, ok onego wakaw michno ka gir tugo. Kar mano, onego wagen michno ahinya.

Nyasaye “nochiwo Wuode ma miderma.” (Johana 3:16) Kata obedo ni Nyasaye nohero wuode ma midermano ahinya, pod noyie chiwonwago. Kuom higni mang’eny ma Nyasaye notiyogo kanyachiel gi Yesu ka gichueyo polo gi piny ‘ne omor kode pile.’ (Ngeche 8:30) Yesu en ‘Wuod Nyasaye mohero’ kendo “en kido mineno mar Nyasaye ma ok ne.” (Jo-Kolosai 1:13-15) Nyasaye gi Yesu kende e ma osebedo gi osiep machiegni kamano e kindgi.

To e ma Nyasaye “ok noweyo ma ok ochiwo kata mana Wuode owuon.” (Jo-Rumi 8:32) Jehova nomiyowa mich maberie moloyo. Ne en mich ma nengone tek.

Nitie mich moko ma wageno nikech gipong’onwa gik ma waremo. Kuom ranyisi, donge inyalo bedo mamor ahinya ka ng’ato ochiwore mondo okonyi chulo gowi mar thieth ma ne ok inyal chulo? Mano nyalo bedo mich maduong’ ahinya.

“Mana kaka kuom Adam dhano duto tho, e kaka bende kuom Kristo dhano duto biro bedo mangima.” (1 Jo-Korintho 15:22) Nikech wan nyithind Adam, waduto wabedo matuo kendo watho, to bende onge gima ne wanyalo timo mondo walos winjruok maber gi Nyasaye. E wi mano, waonge gi nyalo mar reso ng’ato ang’ata mondo kik tho. Muma wacho kama: “Onge ng’ato kuomgi ma nyalo waro owadgi, kata matin, kata chiwo ni Nyasaye gi ma diwargo owadgi . . . Nimar . . . chunygi ni gi nengo matek.” (Zaburi 49:7, 8) Dwarore ni okonywa ahinya nikech wan wawegi ok wanyal chulo nengo mar misango. Ok wanyal resore wawegi.

Nikech hera ma Jehova noherowago, noyie mondo Yesu othonwa mondo kokalo kuome ‘dhano duto obed mangima.’ Mano nyalore nade? Mano nyalore nikech “remb Yesu Wuode pwodhowa a e richo duto.” Adier, keto yie kuom remb Yesu  ma nochuer miyo iweyo ne ng’ato richone kendo obedo gi thuolo mar yudo ngima ma nyaka chieng’. (1 Johana 1:7; 5:13) Kata kamano, misango mar Yesu biro konyo nade joma osetho? Muma wacho niya: “Nimar ka tho nobiro kokalo kuom ng’ato achiel, joma otho bende ibiro chier kokalo kuom ng’ato achiel,” ma en Yesu.—1 Jo-Korintho 15:21. *

Misango mar Yesu e mich maberie mogik ma Nyasaye nochiwo ne dhano nikech oherogi. Jehova Nyasaye e ma osenyisowa ng’wono e okang’ ma malo kamano. Onge mich moro amora ma inyalo pim gi misango mar Yesu ma resowa e richo kod tho. Ee, misango mar Yesu e mich maberie mogik.