Josom sulwe wacho ni sulwe, dwe, kod gik mamoko ma ni e kor lwasi tayo ngima ji e piny ka. Giwacho ni kuonde ma gik ma ni e kor lwasigo ochung’ie sama onyuol ng’ato e ma nyiso kaka kite kod ngimane biro chalo.

Kata obedo ni somo sulwe nochakore e Babilon machon, ji pod ohero timno nyaka sani. Ka luwore gi nonro moro ma notim e piny Amerka e higa mar 2012, ji ma romo pasent 30 nowacho ni nono sulwe “en aena sayans” to ji ma romo pasent 10 nowacho ni timno “en sayans maber chuth.” Be mano en adier? Ooyo. Ne ane weche ma luwogi.

• Onge teko moro amora ma sulwe nigo ma nyalo chiko ngima dhano kaka josom sulwe paro.

• Gik ma gikorogo ok gin gik malich ahinya nikech ginyalo timore ne ng’ato ang’ata.

• Josom sulwe ma kindegi temoga koro gik ma biro timore ka gitiyo gi paro moro ma nyachon ni planet duto lworoga piny. Adiera en ni planet duto lworoga chieng’.

• Ka ng’ato dwaro ng’eyo wach moro to odhi ir josom sulwe mopogore opogore, josom sulwego ok bi miye dwoko machal.

• Josom sulwe keto ji e grube 12 mag sulwe ka luwore gi tarik ma ne onyuolgie. Kata kamano, nikech piny sudoga, tarige moket e grube mag sulwego sani opogore ahinya gi kaka ne gin ka ne ohang ketgi.

Wachore ni grup mar sulwe ma luwore gi tarik ma ne onyuolie ng’ato e ma chiko kaka timbene biro chalo. Adiera en ni joma ne onyuol e tarik machal ok bedga gi timbe machal; tarik ma onyuolie ng’ato ok nyal chiko timbene. Kar neno ng’ato ka ng’ato kaka en, josom sulwe tiyo gi gik ma giparo apara e nyiso ni ng’ato nigi timbe ma beyo kata ooyo. Donge mano achaya?

Chakre kinde machon, ji osebedo ka dhiga ir jokor wach mondo okonygi ng’eyo gik ma biro timorenegi. Jokor wach moko nonoga i le kod dhano kata kaka thwon-gweno somo cham mondo ginyis ng’ato kaka ngimane biro chalo. Moko bende nonoga kaka it chai ogorore kata kaka duch kahawa modong’ e pier okombe obet. Jokor wach moko ma ndalogi tiyo gi gagi, somo lwedo, nyakalondo, kod gik mamoko ma kamago. To be koro wach nyalo konyo ng’ato adier mondo ong’e gik ma biro timorene? Onge ndi. Wanon ane wachno e yo matut.

Yore mopogore opogore ma jokor wach tiyogo tuomorega. To kata ka jokor wach mopogore otiyo gi yo machal e nono wach achiel, dwoko ma gichiwo ok chalrega. Kuom ranyisi, ka ng’ato openjo jokoro ariyo penjo machal kendo jokorogo tiyo gi yo machal e nyiso gik ma biro timore, donge onego giduto gimi ng’atno dwoko machal? To ok timrega kamano.

Tinde ji osechako chich gi yore ma jokor wach tiyogo. Ji wacho ni gik ma jokorogo tiyogo gin agina gik miwuondogo wang’ ji. Jakor wach nonoga gik ma ng’ato timo sama okorone wach, to ok ni okoro wach ka otiyo gi gik ma en-go. Kuom ranyisi, jakor wach molony e miriambo biro penjo ng’ato penjo moko ma ong’eyo ni obiro yudo dwokogi achiel ka achiel kae to otiyo gi dwokogo e nyiso ng’ano gik ma biro timorene kowuondore ni osekoro. Ka osewuondo ng’atno kamano, koro oyudo ayuda pesa mang’eny.

Paro ma josom sulwe kod jokor wach nigo nyiso ni gik ma timorenwa e ngimawa nosechan chon. To be en kamano adier? Muma wacho ni dhano nigi nyalo mar yiero gima odwaro yiego kata timo, kendo yierowa chiko kaka ngimawa biro chalo e kinde ma biro.​—Joshua 24:15.

Gima chielo momiyo joma lamo Nyasaye nyaka bed mabor gi gimoro amora motudore gi josom sulwe kata jokor wach en ni Nyasaye kwedo timbego. Onyisowa kama e Muma: “Kik yud ng’ato moro e kindu . . . [ma] jakor, kata jambofwa, kata jadil, kata jandagla, kata ajuok nyakolondo, kata japenj jochiende, kata jajuok, kata jadwar wich mar jo motho. Nikech ng’ato manade matimo magi obedo ng’a mikwedo e wang’ Jehova.” a​—Rapar mar Chik 18:10-12.