E SULA duto ma wasenono e gasedni, waseneno kaka gik malit ma timore ne ji nyalo miyo gijog gi ngima mi gigomb mana tho. Sama inyagori gi chandruok, samoro inyalo penjori ka be ochuno ni idhi nyime bedo mangima kata ka be nitie ng’at ma dewi. Bed gadier ni Nyasaye dewi sama in gi chandruok. Oheri ahinya.

Jandik Zaburi sula mar 86 nonyiso ni ne ogeno Nyasaye ka ne owacho niya: “Chieng’ chandrwokna naluong nyingi; nimar inidwokna wach.” (Zaburi 86:7) Kata kamano, inyalo penjori niya: ‘Ere kaka Nyasaye biro dwokona wach “chieng’ chandrwokna”?’

Kata obedo ni samoro Nyasaye ok bi tiekoni chandruokni sani, Muma ma en Wachne singo ni obiro miyi chuny mokuwe mondo inyagri gi chandruogno. Muma wacho niya: “Kik ubed gi parruok e wi gimoro amora, to kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayou; eka kuwe mar Nyasaye ma loyo ng’eyo duto biro rito chunyu kod pachu.” (Jo-Filipi 4:6, 7) Ne ane kaka Ndiko ma luwogi nyalo miyo ibed gadier ni Nyasaye dewowa.

“Onge [kata oyundi] achiel ma wi Nyasaye wilgo. . . . Nengou duong’ ahinya moloyo oyundi mang’eny.”​—Luka 12:6, 7.

PAR ANE: Winy ma tindo tindo kaka oyundi nyalo nenore ka gima ok gin gik malich ahinya e wang’ dhano, kata kamano, Nyasaye to dewogi. Nyasaye ong’eyo oyundi duto kendo onenogi kaka chuech ma nengogi duong’. Kata kamano, Nyasaye dewo dhano ahinya moloyo kata kaka odewo oyundigo. Kuom gik moko duto ma Nyasaye nochueyo e piny ka, dhano e ma gin chuech makende. Nyasaye nochueyogi e kite owuon kendo nomiyogi nyalo mar bedo gi kido mabeyo kaka meke.​—Chakruok 1:26, 27.

“A Jehova, iserango chunya, kendo iseng’eya. . . . Wach maparo donjoni . . . Ranga, ing’e chunya: Tema, ing’e weche maparo.”​—Zaburi 139:1, 2, 23.

PAR ANE: Nyasaye ong’eyi maber. Ong’eyo gik ma chando chunyi. Kata obedo ni jomoko ok nyal ng’eyo kaka iwinjo e chunyi, Nyasaye to dewi kendo oikore konyi. Mano e momiyo ok onego ijog gi ngima kata weche tek manade.

“A Ruoth Nyasaye, chik iti ni lemona, kendo winj ywakna mondo ikonya. . . . Chik iti mondo iyie idwoka piyo ka aluongi. . . . Enowinj ywak joge mosejwang’.”​—Zaburi 102:1, 2, 17, Luo, 1976.

PAR ANE: Nenore ni nyaka ne dhano donj e chandruok, Jehova osebedo ka neno pi wang’ ma dhano chuero nikech chandruokgo. (Zaburi 56:8) Mano oriwo nyaka pi wang’ ma ichuero. Bedo ni Nyasaye ong’eyo tembe duto miyudo kaachiel gi pi wang’ ma ichuero nyiso kaka oheri ahinya.

“We ng’eng’, ni kech an Nyasachi: anamii teko; ee, nakonyi . . . An Jehova Nyasachi namak lueti marachwich, kawachoni, ni, We luoro nakonyi.”​—Isaiah 41:10, 13.

PAR ANE: Nyasaye oikore konyi. Ka ipodho, obiro chungi.

“Nyasaye nohero piny ahinya mi nochiwo Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.”​—Johana 3:16.

PAR ANE: Ng’e ni Nyasaye oheri ahinya, to mano e momiyo nooro Wuode ma en Yesu mondo otho nikech in. Tho mar Yesu noyawo yo mondo iyud thuolo mar dak gi mor nyaka chieng’. a