LUZIA ONG’OL GI E TIENDE MA KORACHAM. Polio nogoye ka ne pod otin. Ka ne en jahigni 16, miyo moro ma nondike tich nonyise kama: “Nyasaye nomiyo ing’ol nikech wiyi ne tek kendo ne ithagoga minu.” Wachno nochando Luzia kuom higni mang’eny.

KA NE DAMARIS OFWENYO NI EN GI KANSA MAR OBWONGO, wuon-gi nopenje kama: “En richo mane mitimo momiyo tuoni omaki? Nyaka bed ni nitie gima rach ma itimo momiyo Nyasaye kumi.” Wechego nonyoso chuny Damaris ahinya.

Paro ma jomoko nigo ni tuo en kum mowuok ka Nyasaye en gima nochakore chon. Buk miluongo ni Manners and Customs of Bible Lands ma lero kido kod timbe ma ji ne nigo e kinde ma ne indiko Muma wacho ni ji mang’eny e ndalo Kristo ne wacho ni “ng’ato ne nyalo bedo matuo nikech richone kata richo wedene, kendo ni tuo en kum.” Buk miluongo ni Medieval Medicine and the Plague bende wacho ni e kinde machon, “nitie joma ne paro ni Nyasaye kelo masiche mondo okum joma timo richo.” Omiyo, ka ne tuo moro onego ji mathoth Europe e higni mag 1300, be dibed ni Nyasaye ne kumo joma richo? Koso nitie kute moko ma nokelo tuono mana kaka lakteche ma sani osefwenyo? Jomoko nyalo penjore ni, ‘Dibed ni Nyasaye miyo ji bedo ma tuo mondo okumgi nikech richogi?’ *

PAR ANE: Ka dabed ni Nyasaye kumowa gi tuoche kod chandruok, kare ang’o momiyo Yesu Wuode ne ochango joma ne tuore? Donge chango tuoche ma Nyasaye e mokelo di ne onyiso ni Yesu ochayo chenro mar Nyasaye? (Mathayo 4:23, 24) To mano gima Yesu ok nyal timo kata matin! En owuon nowacho niya: “Kinde duto atimo gik ma [moro Wuora],” kendo “atimo mana kaka . . . osechika ni atim.”—Johana 8:29; 14:31.

Muma wacho maler ni Jehova Nyasaye ok nyal timo gik maricho. (Rapar mar Chik 32:4) Kuom ranyisi, Nyasaye ok nyal goyo ndege piny gi dhano turi e iye mana nikech ohimo ng’ato achiel e igi kanyo mondo okum! Ibrahim nowuoyo kuom Nyasaye kowacho ni Nyasaye ok nyal ‘tieko joma kare kanyachiel gi joma richo.’ (Chakruok 18:23, 25) Mano gima Jehova Nyasaye ok nyal timo! Muma wacho bende ni ‘Nyasaye ok tim marach’ kendo ‘ok onyal timo tim mamono ngang’.’—Ayub 34:10-12.

Chandruok ma wayudo ok gin kum mowuok kuom Nyasaye. Yesu noketo wachno maler ka ne oromo gi ng’at moro ma ne onyuol muofu. “Jopuonjrene nopenje niya: ‘Rabi, en ng’a ma notimo richo momiyo ne onyuol ng’atni muofu? En ng’atni koso jonyuolne?’ Yesu nodwokogi kama: ‘Ng’atni kata jonyuolne ok notimo richo.’”—Johana 9:1-3.

Nikech paro mobam ma ji ne nigo e kindego, nyaka bed ni jopuonjre Yesu nohum gi dwoko ma Yesu nomiyogino. Yesu nochango muofuno. Mano norucho paro ma ji ne nigo ni chandruok en kum mowuok kuom Nyasaye. (Johana 9:6, 7) Joma tuore e kindewagi nyalo yudo hoch kuom ng’eyo ni Nyasaye ok e ma kelnegi chandruok.

Ndiko miyo wabedo gadier ni Nyasaye ok nyal kelonwa chandruok mondo okumwa

• “Gik maricho ok nyal temgo Nyasaye, to en owuon bende ok otem ng’ato ang’ata.” (JAKOBO 1:13) Kuom adier, machiegnini, “gik maricho” moriwo tuoche, rem, kod tho mosekelo ne dhano chandruok kuom higni gi higni ibiro tiek te.

• Yesu Kristo ‘nochango jogo duto ma ne chandore.’ (MATHAYO 8:16) Bedo ni nochango ji duto ma ne odhi ire nyiso gik ma Pinyruodh Nyasaye biro timo e piny ngima.

• “[Nyasaye biro] yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.”—FWENY 21:3-5.

Ka Nyasaye ok e ma kelnwa chandruok, kare ang’o momiyo ji chandore malich kama? Mano penjo mosechando ji kuom higni mathoth. En ng’a ma kelo chandruok? Sula ma luwo biro dwoko penjogo.