KATA obedo ni wich-teko mar Adam gi Hawa nomiyo richo kod tho olandore kuom dhano duto, mano ne ok oloko dwach Nyasaye ne dhano. Nyasaye konyowa bedo gadier gi wachno kokalo kuom Muma ma en Wachne.

• ‘Joma tir nocham piny, mi ginidagie nyaka chieng’.’​—Zaburi 37:29.

• ‘Osegolo tho nyaka chieng’, kendo Ruoth Nyasaye noyue pi wang’ kuom wenge duto.’​—Isaiah 25:8.

• “Jasigu mogik ma en tho, ibiro tiek chuth.”​—1 Jo-Korintho 15:26.

• “Tho ok nobedie kendo, kata kuyo, kata nduru, kata rem ok nobedie kendo.”​—Fweny 21:4.

Ere kaka Nyasaye biro tieko tho? Mana kaka waseneno, Muma wacho ni ‘joma tir nodag nyaka chieng’.’ Kata kamano, Muma bende wacho ni “onge ng’a makare e piny, matimo maber ma ok keth.” (Eklesiastes 7:20) Be mano nyiso ni Nyasaye koro ok bi dwaro ni ji oluw chikene, kendo gidag adaga nyaka chieng’ kata ka gitimo richo? Mano ok nyalre! Ok obi timo kamano nimar “Nyasaye . . . ok riambi.” (Tito 1:2) Kare, Nyasaye biro timo ang’o mondo dhano odag nyaka chieng’ kaka nodwaro?

Jehova Nyasaye noloso chenro mondo ogol dhano duto e tho kuom chulo rawar. Rawar en gima ichulo ma romre gi gima nokethore. To nikech dhano duto gin joricho kendo giduto githo, Muma wacho ayanga niya: “Onge ng’ato kuomgi ma nyalo waro owadgi kata matin, kata chiwo ni Nyasaye gi ma diwargo owadgi; (nimar warruok mar chunygi ni gi nengo matek monego owe nyaka chieng’).”​—Zaburi 49:7, 8.

Ka dhano morem otho, ochulo richone owuon; ok onyal warore owuon kendo ok onyal chulo richo mar ng’at machielo. (Jo-Rumi 6:7) Ne dwarore ni wayud ng’at machielo ma ne onge richo kata matin mondo otho nikech richowa, to ok nikech richone.​—Jo-Hibrania 10:1-4.

To mano e gima Nyasaye notimo. Nooro Yesu Wuode koa e polo mondo onyuole e piny kae kaka dhano ma onge richo. (1 Petro 2:22) Yesu nowacho ni nobiro e piny “mondo ochiw ngimane obed rawar ne ji mang’eny.” (Mariko 10:45) Nochiwo ngimane mondo otieknwa jasigu ma en tho mondo wadag nyaka chieng’.​—Johana 3:16.

Sani wadak e kinde ma Muma nokoro ni ne dhi bedo “kinde matek ahinya,” to mano nyiso ni wadak e “ndalo mag giko.” (2 Timotheo 3:1) Ndalo mag giko ma wadakiegi biro rumo “chieng’ bura” kod “chieng’ mibiro kethie joma ok oluoro Nyasaye.” (2 Petro 3:3, 7) To joma ohero Nyasaye biro tony kendo gibiro yudo “ngima ma nyaka chieng’.”​—Mathayo 25:46.

Ji milionde mosetho biro yudo ngima ma nyaka chieng’ bang’ ka osechiergi. Yesu nochiero ng’ato ka ne odhi e taon miluongo ni Nain. Noromo gi joma ne dhi yiko wuod chi liel moro. Yesu nowinjo malit mi nochiere. (Luka 7:11-15) Jaote Paulo nondiko niya: “An gi geno kuom Nyasaye . . . ni chier nobedie mar joma kare gi joma ok kare.” Ng’eyo ni Nyasaye biro chiero ji en gima nyiso gadier ni ohero dhano.​—Tich Joote 24:15.

 Ji tara gi tara biro dak nyaka chieng’. Muma wacho niya: “Jo matir ginicham piny, mi ginidagie nyaka chieng’.” (Zaburi 37:29) E kindego, gibiro bedo ma mor sama gineno kaka weche ma jaote Paulo nondiko higni 2,000 mosekalo timore. Roho notaye mondiko niya: “In tho, ere lochoni? In tho, lit ma ikelo ni kanye?” (1 Jo-Korintho 15:55) Chop kindeno, biro yudo ka osetiek tho ma en jasik dhano maduong’ mogik!