Nitie jomoko ma paroga ni mita osegueny weche moko e i Wach Nyasaye. Janabi Isaya nowacho ni Wach Nyasaye “siko nyaka chieng’.” (Isaya 40:8) Ere kaka wanyalo bedo gadier ni singo mag Nyasaye ma nondikonwa e Wachne pod gin agina kaka ne gin chakre chon?

Nyasaye nigi nyalo mar rito Wachne mondo kik ng’ato ang’ata oguenye. E ndalo machon, ka ne ikopo Wach Nyasaye jondiko ne kwano nyukta duto mondo gibed gadier ni onge wach momedi, mowil, kata mogol. Kata kamano, nikech dhano orem, jondiko moko ne nyalo po ka weche moko matin ok okoporenegi maber.

Nitie kopi machon mag Ndiko Maler alufe gi alufe. Ka po ni kopi moro nigi kama oguenyore kata mana matin, inyalo pime gi kopi mamoko mondo ong’e ni mane ma wacho adier.​—Mondo ipuonjri weche momedore, ne sula ma yudore e jw.org/luo ma wiye wacho ni “Be Dibed ni Weche Manie Muma Osewil Kata Ogueny?”

Ne ane ranyisi mar Dead Sea Scrolls ma ne Jo-Arabu moko oyudo e rogni moko but nam mong’ere kaka Dead Sea e higa mar 1947. Buge machon-go oting’o moko kuom weche ma ni e Ndiko Maler ma nondik higni 2,000 mokalo. Joma olony e somo kitepe machon-go nopimo weche ma ni e igi gi Ndiko Maler ma wan-go sani. Ang’o ma ne gifwenyo?

Ne gifwenyo ni weche ma ni e Wach Nyasaye ma wan-go sani chalre gi ma ni e kitepe machon-go. * Konon kitepe machon-go e yo matut, ginyiso maler ni weche ma wasomo e Ndiko Maler e weche sie ma ne Nyasaye owacho. Wanyalo bedo gadier chuth ni Nyasaye osetimo duto ma dwarore mondo kik gueny weche ma ni e Ndiko Maler.

Kuom mano, wanyalo somo Wach Nyasaye ka wan gadier chuth ni en kare. Bang’ ng’eyo mano, koro wanon ane gik ma wanyalo puonjore e wi Nyasaye kokalo kuom jonabine.