Janabi Musa nowacho ni ka wamako chike Nyasaye, obiro guedhowa. (Rapar mar Chik 10:13; 11:27) Ok waluw chike Nyasaye mana nikech waluoro kum. Kido mabeyo mag Nyasaye e ma chwalowa mondo wamak chikene nikech wahere kendo ok wadwar timo gimoro amora ma nyalo chwanye. Ndiko Maler nyisowa kama: “Tiend hero Nyasaye e ma, ni waluw chikene.”​—1 Johana 5:3.

Kata kamano, ere kaka winjo Nyasaye kelo gueth? Ne ane yore ariyo.

“An Jehova Nyasachi ma puonji mondo iyud ber, ma tayi e yo monego iwuothie.”​—ISAYA 48:17.

Jehova Nyasaye ma en Jachuechwa ong’eyowa kendo onyisowa yo monego waluw. Ka wadwaro ni puonjge okonywa ng’ado paro e yo mariek, nyaka wapuonjre weche ma ni e Ndiko Maler mondo wang’e gik ma Nyasaye dwaro ni watim, kae to watim gigo.

“Jo mamor gin jogo ma winjo wach Nyasaye kendo timo!”​—LUKA 11:28.

E kindewagi, ji tara gi tara ma luwo puonj ma ni e Wach Nyasaye nigi mor madier. Ne ane ranyisi mar dichwo moro ma a e piny Spain ma iye ne wang’ga matek ahinya, kendo ma ne ger gi ji duto, moriwo nyaka chiege. Chieng’ moro nosomo weche janabi Musa ma wuoyo kuom Josef wuod Jakobo. Kata obedo ni ne ous Josef kaka misumba kendo notimne gik ma ok kare, nosiko komuol, kohero kue, kendo noweyo ne jogo kethogi. (Chakruok, sula mar 37-45) Dichwo ma a Spain-no wacho kama: “Ka naparo ranyisi mar Josef, naneno gimomiyo dwarore ni abed ng’at ma muol, ma ng’won, kendo ma hore kata sama iya owang’. Mano osemiyo tinde awinjo ka amor ahinya.”

Ndiko maler nyisowa gik mamoko momedore ma dwarore ni watim ne dhano wetewa. Wanon ane gigo e sula ma luwo.