Muma wacho ni Goliath “borne ne dirom mita adek.” (1 Samuel 17:4, The Bible in Luo, 1976) Jomoko wacho ni Goliath ne ok nyal bedo ma rabora kamano, kata kamano, par ane wachni: E kindewagi, dhano ma rabora mogik mong’ere e piny borne ne romo mita 2.7. Donge mano nyiso ni ne nyalore mondo Goliath obed mabor mokalo kanyo matin? Goliath ne wuok e oganda mar Jo-Refaim ma ne gin joma robede. Weche moko mag Jo-Misri ma nondik e higni mag 1200 wacho ni ne nitie jolweny moko e piny Kanaan ma ne gin roboche ma nyalo romo mita 2.4. Omiyo, kata obedo ni joma roboche ka Goliath yudo tek, mano ok nyis ni joma kamago onge.

Nitie kinde ma josomo moko ne temo wacho ni sigand Ruoth Daudi en aena sigana moro mochuogi; kata kamano, ji mang’eny odagi yie gi wachno. Jo molony e kunyo gik machon oseyudo gik moko ma ondik ni, “od Daudi.” E wi mano, Yesu Kristo nowuoyo kuom Daudi kaka ng’at ma nodak adier. (Mathayo 12:3; 22:43-45) Muma bende nyiso ni Yesu nowuok e anyuola mar Ruoth Daudi. (Mathayo 1:6-16; Luka 3:23-31) Kuom adier, Daudi ne en ng’at masie.

Muma wacho ni lwenyno notimore e Hoho mar Ela. Kae to olero ni Jo-Filistia nochung’ e bath got e hoho manie kind taonde mag Soko gi Azeka. Jo-Israel to nochung’ e bath hoho komachielo. Be kuonde ma Muma wuoyegi gin kuonde mong’ere?

Ne ane gima ng’at moro ma ne odhi limo alworano machiegnini nowacho: “Jal ma ne tayowa, ma be ne ok odich gi weche Nyasaye, noterowa e Hoho mar Ela. Ne waluwo yo moro ma noterowa nyaka e wi got. Seche ma ne wang’iyo hohono ka wan e wi got, nokwayowa mondo wasom 1 Samuel 17:1-3. Kae to nosiemonwa bath hohono konchiel kowacho niya: ‘Kama uneno koracham kachacha en gunda mar Soko.’ Kae to nosiemo komachielo kowacho ni, ‘Kama uneno korachwich en gunda mar Azeka. Jo-Filitia nogoyo kambi e kind taonde ariyogo e bath got kama omanyore kodwacha. Nyalo bedo ni kama wachung’ieni e kama Jo-Israel ne ogoyoe kambi.’ Ka nawinjo wechego, nachako paro ni samoro Saulo gi Daudi nochung’ kama nachung’ie. Bang’ mano ne walor, kae to ne wakalo e chuny hohono kama ne nitie aora matin ma pi nokie, to kite e ma ng’enyie. Nachako paro kaka Daudi nokwanyo kite abich mapoth, ma achiel kuomgi nonegogo Goliath.” Jalimbeno ne mor ahinya neno kaka Muma wuoyo kuom weche ma notimore gadier kendo kuonde mong’ere. Jomamoko ma bende oselimo alworano be nigi paro ma kamano.

Onge tiende bedo gi kiawa e wi siganani. Siganani wuoyo kuom ji masie ma nodak gadier, kendo gigo notimore kuonde ma ji ong’eyo. To moloyo duto, siganani yudore e Wach Nyasaye, to Nyasaye “ok nyal riambo.”—Tito 1:2; 2 Timotheo 3:16.