Chieng’ Jumapil moro godiechieng’, Kenneth gi Filomena modak e piny Curaçao nodhi limo joot moro ma gipuonjorego Muma.

Kenneth wacho niya: “Ka ne wachopo, ne wayudo ka olor dhoot, to mtoka bende ne onge kama ojachungee. Kata kamano, gimoro ne onyisa ni ago simb chiege.”

Dhakono nomako simo mowacho ni chwore osedhi e tich. Kata kamano, ka nofwenyo ni Kenneth gi Filomena ne ni e dhoot, nobiro moyawonegi.

Ne gifwenyo ni dhakono ne ywak. Ka ne Kenneth lemo mondo gichak puonjore, dhakono nochako ywak kendo. Omiyo, ne gipenje gima ne timore.

Dhakono nonyisogi ni nodwa dere chieng’no kendo noyudo ondiko ne chwore barua seche ma Kenneth nogochone. Nonyisogi ni en gi tuwo mar depression, omiyo ne gijiwe ka gisomone ndiko moko. Yo ma ne gijiwego noreso ngimane.

Kenneth wacho kama: “Wagoyo ne Jehova erokamano kuom tiyo kodwa e konyo dhakono kendo kuom chwalowa kotiyo gi malaika kata rohone maler mondo wago ne dhakono simo! ” *

Be Kenneth gi Filomena ni kare paro ni Nyasaye e ma notayogi kotiyo gi malaika kata roho maler, ma en tekone? Koso simo ma Kenneth nogoyo ne dhakono en gima nopore apoya?

Ok wang’eyo. Kata kamano, gima wang’eyo en ni Nyasaye tiyo gi malaike mondo okony ji ong’eye. Kuom ranyisi, Muma wacho ni Nyasaye notiyo gi malaika mondo ota Jakristo miluongo ni Filipo mondo odhi okony Ja-Ethiopia moro ma ne gombo ng’eyo Nyasaye.—Tich Joote 8:26-31.

Dinde mang’eny oyie ni nitie chuech mag roho ma nigi teko ahinya ma moko kuomgi ineno kaka chuech mabeyo ma konyo e chopo tije Nyasaye kata ma rito ng’ato ka ng’ato. Ji mang’eny oyie ni malaike nitie kendo ni malaikego konyogi e yo moro. Kata kamano, pod nitie ji mathoth ma ok oyie ni malaike nitie.

Be malaike nitie adier? Ka en kamano, ne gia kanye? Ang’o ma Muma wacho e wi malaike? Be malaike nyalo konyi kata hinyi? We wanon ane wechego.