Ee, nitie malaike maricho. Ne gia kanye? Nyasaye nochueyo malaike ka gin gi thuolo mar timo yiero. Ka ne osechue dhako gi dichwo mokwongo ma gin Adam gi Hawa, malaika moro makare notiyo gi thuolone mar timo yiero e yo marach mokelo chuny mar ng’anyo e piny. Nomiyo Adam gi Hawa ong’anyo ne Nyasaye. (Chakruok 3:1-7; Fweny 12:9) Muma ok nyiswa nying malaikano kata tich ma ne en-go e polo ka ne pok ong’anyo. Kata kamano, bang’ ng’anyo, nying mowinjore kode ma yudore e Muma en Satan, ma tiende ni “Jakwede”, to bende iluonge ni Jachien ma tiende ni “Jaketh Nying.”—Mathayo 4:8-11.

Gima lit en ni ng’anyono ne ok ogik mana gi kanyo. E kinde Noa, malaike mang’eny ma kwan-gi ok ong’ere “nojwang’o kar dakgi mowinjore kodgi” e polo. Ne gibiro e piny ma girwako del mar dhano mondo gitim timbe mag terruok ma en gima Nyasaye ne ok ochueyogi mondo gitim.—Juda 6; Chakruok 6:1-4; 1 Petro 3:19, 20.

Ang’o ma notimore ne malaike marichogo bang’ mano? Ka ne Nyasaye oketho piny kotiyo gi ataro mar pi, ne gilonyo del mar dhano ma gibedo malaike kendo kae to ne gidok e polo. Kata kamano, Nyasaye ne ok oyie ne malaikego mondo odog e “migawo ma ne gin-go chon.” Kar mano, osejwang’ogi koweyogi e “mudho mandiwa” miluongo ni Tataro, tiende ni koro ok ginyal ng’eyo chenro mag Nyasaye. (Juda 6; 2 Petro 2:4) Jochiendego nobedo e bwo teko mar Satan Jachien ma en “jatelo mar jochiende,” kendo ma “siko ka loko kite mondo onenre kaka malaika mar ler.”—Mathayo 12:24; 2 Jo-Korintho 11:14.

Muma puonjo ni Pinyruodh Mesia, ma en sirkal manie polo, nochako locho e higa mar 1914. * Ka ne Pinyruodhno osechako locho, Satan gi jochiendene noriemb e polo chuth kendo nowitgi e piny. Gik maricho kod anjawo ma sani okwako piny nyiso maler mirima mager ma gin-go.—Fweny 12:9-12.

Kata kamano, timbe maricho kod mag gero ma siko ka medore nyiso ni gik maricho ma gitimogo chiegni chopo e giko. Machiegnini, malaike marichogo ibiro lornegi. Bang’ ka Pinyruodh Nyasaye oselocho kuom higni 1,000 e paradiso ma nobed e piny, malaike marichogo ibiro mi thuolo moro machuok mogik mondo gitem dhano kendo. Bang’ mano, ibiro kethgi chuth.—Mathayo 25:41; Fweny 20:1-3, 7-10.