“Ne aneno kom-loch moro moket e polo, kendo ne nitie ng’at mobet e kom-lojno. To Jal ma ne obetieno ne chalo gi kidi mar jaspa kod kidi mar sardias, kendo ne nitie lihudu ma olworo kom-lojno koni gi koni, kendo lihuduno ne chalo gi kidi mar zumaridi.”—Fweny 4:2, 3.

“Kendo ler malang’ini nokwake. Kaka kit lihudu mobet e kor polo ka koth chwe, e kaka ler malang’ini nobet mokiewore kode. Kit duong’ mar Jehova nonenore kama.”—Ezekiel 1:27, 28.

Fweny ma nomi jaote Johana kod janabi Ezekiel nyiso kaka Jehova Nyasaye e Ng’ama Malo Chutho e wi piny gi polo. Fwenygo tiyo gi weche ma wang’eyo kaka kite ma milni ma nengogi tek, lihudu, kod loch maduong’ie mogik. Gikonyowa ng’eyo duong’ ma Jehova nigo.

Fwenygo otudore gi weche ma jandik Zaburi nondiko ka nowacho niya: ‘Nimar Jehova duong’, owinjore gi pak ahinya: Onego luore moloyo nyiseche duto. Nimar nyiseche duto mag ji gin sanamu; to Jehova nochweyo polo. Luor gi duong’ motelo gin e nyime: tekre gi ber maler gin e i sang’tuari mare.’—Zaburi 96:4-6.

Kata bed ni Jehova e Ng’ama Malo Chutho, ogwelowa ni wasud ire kokalo kuom lamo kendo onyisowa ni owinjo lamowa. (Zaburi 65:2) Nyasaye oherowa kendo odewowa gadier, to mano emomiyo jaote Johana ne nyalo ndiko maonge kiawa niya: “Nyasaye en hera.”—1 Johana 4:8.

“To en [Stefano jalup Kristo], kopong’ gi roho maler, nochomo wang’e e polo mi noneno duong’ mar Nyasaye kod mar Yesu kochung’ e bad Nyasaye korachwich, kendo nowacho kama: ‘Neuru! Aneno polo koyawore kendo Wuod dhano kochung’ e bad Nyasaye korachwich.’”—Tich Joote 7:55, 56.

Matin nono kapok Stefano oneno fwenyni, jotend Jo-Yahudi ma Stefano ne wuoyogogi bende ema ne onego Yesu. Fweny ma nomi Stefano nonyiso maler ni Yesu nosechier, ne ongima kendo koro nosemiye duong’. Kowuoyo e wi wachni,  jaote Paulo nondiko kama: “[Jehova] nochiero Kristo a kuom joma otho, mi okete e bade korachwich e polo malo e wi sirkande duto, gi loje duto, gi teko, kod telo duto, gi nying moro amora minyalo hul, ok mana e ndaloni, to bende e ndalo ma biro.”—Jo-Efeso 1:20, 21.

Ndiko bende wacho maler ni Yesu dewo dhano ahinya mana kaka Jehova. Ka Yesu ne nie piny, nochango joma tuwo gi joma nigi midekre, kendo nochiero joma otho. Kokalo kuom ngimane ma nochiwo kaka misango, Yesu nonyiso ni ohero Jehova gi chunye duto kod dhano be. (Jo-Efeso 2:4, 5) Ka en e bad Jehova korachwich, Yesu biro tiyo gi teko ma en-go e kelo gueth mogundho ne dhano duto moluoro Nyasaye.

‘Nang’iyo [janabi Daniel] nyaka noket kombe mag ruodhi, kendo ng’ato ma hike ng’eny [Jehova] nobet piny; . . . Ji gana gi gana ne tiyone, kendo gana apar ndalo gana apar nochung’ nyime.’—Daniel 7:9, 10.

E fwenyni, Daniel ok noneno mana malaika achiel to noneno malaike gana gi gana. Mano doko fweny mamorowa! Malaike gin chuech makende, mariek kendo ma nigi teko. Opoggi e grube mag joserafi kod jokerubi. Muma wuoyo kuom malaike nyadi 250 kama.

Jomoko paroga ni nitie dhano moko ma ka otho to gilokore malaike e polo. Kata kamano, mano ok en adier. Nyasaye nochueyo malaike higni mang’eny motelo kapok ochueyo dhano. Ka ne iketo mise mag piny, noyudo osechue malaike kendo ne gikok gi mor.—Ayub 38:4-7.

Yo achiel ma malaike tiyogo ne Nyasaye en kuom konyo e tich makende mitimo e piny sani, tiende ni lando wach maber mar Pinyruodh Nyasaye. (Mathayo 24:14) Jaote Johana nonyiso kaka malaike riwo lwedo tijni ka nondiko niya: “Ne aneno malaika machielo ka huyo e kor polo ka en gi wach maber ma nyaka chieng’ molando ne joma odak e piny, ne ogendni duto, gi dhoudi duto, gi dhok duto, kod ji mopogore opogore duto.” (Fweny 14:6) Kata obedo ni tinde malaike ok wuo gi dhano achiel kachiel kaka ne gijatimo e kinde machon, pod gitayo joma lando wach maber sama gimanyo ji moyie rwako wach.

“Lweny ne omuoch e polo: Mikael [Yesu Kristo] gi malaikene ne okedo gi thuol mang’ongono, to thuol mang’ongono gi malaikene bende ne okedo kodgi, to thuondno ne ok olocho ngang’, kendo kargi koro ne onge kendo e polo. Mi ne owit thuol mang’ongono mwalo, ma en thuol machon, miluongo ni Jachien kendo Satan, ma wuondo piny mangima; ne owite e piny, kendo malaikene bende ne owit kode.”—Fweny 12:7-9.

Nitie kinde moko ma kuwe ne onge e polo. Bang’ ka ne osechue dhano, achiel kuom malaike ma ne gombo ni olame, nong’anyo ne Jehova, kendo nobedo Satan, tiende ni “Ja akwede.” Bang’e, malaike mamoko noriwe lwedo e ng’anyono mi gibedo jochiende. Nikech giricho ahinya, ne gikwedo Jehova kendo gisemiyo ji mang’eny oweyo luwo chikene.

Satan gi jochiendene gin joma richo kendo makwiny. Gin wasik dhano kendo gikelo ne dhano chandruoge mang’eny. Kuom ranyisi, Satan nonego jamni kod jotich mag Ayub ma ne en jatich Nyasaye. Bang’e, nokelo “yamo maduong’” ma nomuko ot mi onego nyithind Ayub apar. Kae to, Satan nogoyo Ayub gi “buche malit nyaka a e mor tiende nyaka chopi e pat wiye.”—Ayub 1:7-19; 2:7.

Machiegnini, ibiro keth Satan chuth. Chakre wite e piny kae, ong’eyo ni “odong’ mana gi kinde manok.” (Fweny 12:12) Nyasaye chiegni tieko Satan chuth, to mano en wach maber gadier!

‘Yesu ne ong’iewo ne Nyasaye ji koa e dhoudi duto, gi dhok duto, gi dhano mopogore opogore duto, kod ogendni duto, mi ne omiyo gibedo pinyruoth gi jodolo ne Nyasachwa, kendo giniloch kaka ruodhi e wi piny.’—Fweny 5:9, 10.

Mana kaka Yesu ne ochier mi odhi e polo e kaka jomoko be biro chier ma dhi e polo. Yesu nowacho kama ne jootene ma nomakore kode: “Adhi mondo aiknu kar dak. Bende, . . . abiro duogo kendo, mi anarwaku e dala kama antie, mondo kama antieree un bende ubedie.”—Johana 14:2, 3.

 Nitie tich ma joma dhi e polo dhi timo kuno. Ka gin gi Yesu e polo, gibiro loso sirkal mabiro locho e wi piny duto kendo biro kelo gueth mang’eny ne dhano. Ma e Pinyruoth ma Yesu nopuonjo jopuonjrene ni gikwa e lamo, ka nonyisogi kama: “Wuonwa manie polo, nyingi mondo obed maler. Pinyruodhi mondo obi. Dwaroni mondo otimre bende e piny, kaka e polo.”—Mathayo 6:9, 10.

Jaote Johana nowacho niya: “Ne awinjo dwol moro maduong’ moa e kom-lojno ka wacho niya: ‘Neuru! Hema mar Nyasaye koro nigi dhano, . . . kendo obiro yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.’”—Fweny 21:3, 4.

Weche mokorgi wuoyo kuom kinde ma Pinyruodh Nyasaye mibiro telne gi Yesu kod joma ochier koa e piny biro tieko loch marach mar Satan kendo loso piny obed paradiso. Gik mosebedo kakelo lit kod kuyo mang’eny ne dhano biro rumo chuth. Kata mana tho ok nobedie.

To nade dhano mamoko bilionde mosetho ma ok bi dhi e polo? E kinde mabiro, ibiro chiergi kendo gibiro yudo ngima ma nyakachieng’ e paradiso e pinyka.—Luka 23:43.