Bedo mag Jehova—Ng’wono Maok Wawinjore Yudo
Bedo mag Jehova—Ng’wono Maok Wawinjore Yudo
‘Wan mag Jehova.’—RUMI 14:8.
1, 2. (a) Wan gi thuolo mane makende? (b) Gin penjo mage ma wabiro nono?
JEHOVA nomiyo oganda mar Israel thuolo makende kane owachonegi niya: “Unubedna libamba moyier e kind libembini duto.” (Wuok 19:5) E kindegi, jokanyo mag kanyakla mar Jokristo bende nigi thuolo makende mar bedo mag Jehova. (1 Pet. 2:9; Fwe. 7:9, 14, 15) Thuolono nyalo kelonwa ber manyaka chieng’.
2 Kaachiel gi bedo ni en thuolo makende, bedo mag Jehova en ting’ bende. Jomoko nyalo penjore niya: ‘Be abiro timo gigo ma Jehova dwaro ni atim? Kapo ni adonjo e richo, be obiro kweda? Be bedo mar Jehova biro maya thuolona?’ Ber paro penjo kaka mago. Kata kamano, mokwongo, nitie penjo moro monego wanon ahinya: Bedo mag Jehova kelo ber mage?
Bedo mag Jehova Kelo Mor
3. Ere kaka yiero ma Rahab notimo mar tiyo ne Jehova nokelone ber?
3 Be jogo mabedo mag Jehova neno ber mar timo kamano? Kaw ane ranyisi mar Rahab, jachode ma ne odak Jeriko machon. Nenore ni en bende ne en achiel kuom jogo ma ne lamo nyiseche mag piny Kanaan. Kata kamano, kane owinjo kaka Jehova nomiyo Jo-Israel oloyo lwenje, ne ofwenyo ni Jehova e Nyasaye madier. Omiyo, noikore kata mana mar tho mondo ogeng’ masira kik yud jogo ma ne Nyasaye oseyiero, kuom mano noketo ngimane e lwetgi. Muma wacho niya: ‘Kamano bende Rahab ma jachode ok ne oket kare kuom tim koso, ka norwako joote, kendo noorogi e yo machielo?’ (Jak. 2:25) Par ane ber ma Rahab noyudo kane obedo achiel kuom oganda maler mar Nyasaye, oganda mopuonji yore mag hera kod buche Nyasaye kaluwore gi Chik. Mano kaka nyaka bed ni nomor nikech noweyo kit ngimane machon! Ne okende gi Ja-Israel moro mi onyuolo kode wuowi miluongo ni Boaz, ma ne obedo jal ma Nyasaye notiyogo e yo makende.—Josh. 6:25; Ruth 2:4-12; Math. 1:5, 6.
4. Ere kaka Ruth noyudo ber kuom yiero mare mar tiyo ne Jehova?
4 Ruth nya piny Moab bende nong’ado mar tiyo ne Jehova. Kane en nyako, nyaka bed ni ne olamo Chemosh kod nyiseche moko mag Moab, to bang’e nong’eyo Jehova Nyasaye madier, mi ne okende gi Ja-Israel ma nobiro odak e pinygi. (Som Ruth 1:1-6.) Bang’e, ka Ruth kod Orpa nyieke ne ni e wuoth ka gidhi Bethlehem, Naomi min odgi nojiwo mon ariyogi mondo gidogi thuchegi. Dak ei Israel ne biro bedonegi matek. Adier Orpa ‘nodok ir jogi, kendo ne nyasache,’ to Ruth ne ok otimo kamano. Notimo kaluwore gi yie ma ne en-go, kendo nong’eyo ni nodwaro bedo mar ng’awa. Nowacho ne Naomi niya: “Kik ichuna mondo apogra kodi, ni mondo adogi mak aluwi: nikech ku midhiye in, e ma nadhiye an: kendo ka ma nidagie in, e ma nadagie an: jogi nobed joga kendo Nyasachi nobed Nyasacha.” (Ruth 1:15, 16) Nikech yiero mare mar tiyo ne Jehova, Chik Nyasaye nokelo ne Ruth ber nimar Chikno noting’o chike makonyo e yo makende jogo ma mond liete kod jochan koda joma onge lowo. E bwo buombe Jehova, noyudo mor, rit, kod kuwe.
5. Ang’o miseneno kuom jogo mosebedo ka tiyo ne Jehova ka gichung’ motegno?
5 Nyalo bedo ni ing’eyo jomoko ma bang’ chiwruok giwegi ne Jehova, gisebet ka gichung’ motegno e tiyone kuom higini pieche. Inyalo penjogi ber ma giseyudo kuom tiyone. Kata obedo ni ji duto nigi chandruok, nitiere gik mogundho manyiso kaka weche jandik-zaburi gin adier niya: “Jogo gimor, ma Nyasachgi en Jehova!”—Zab. 144:15.
Jehova Ok Gen Kuomwa Gigo Maok Wanyal
6. Ang’o momiyo onego kik wabed maluor ni ok wanyal timo gik ma Jehova dwaro ni watim?
6 Nyalo bedo ni isepenjori kabe in gi nyalo mar timo gik ma Jehova dwaro ni mondo itim. Yot paro ni ok wanyal bedo jotich Nyasaye, mi waluw chikene, kendo wawuo kuom nyinge. Kuom ranyisi, Musa noneno ni ok oromo kane oore mondo owuo gi Jo-Israel kendo gi ruodh Misri. To kata kamano, Nyasaye ne ok ogeno ni Musa ne dhi timo gik ma ne ok onyal. Jehova ‘ne opuonje gima nonego otim.’ (Som Wuok 3:11; 4:1, 10, 13-15.) Nikech Musa norwako kony ma ne omiye, noyudo mor mar chopo dwach Nyasaye. Kamano bende e kaka Jehova chalo kaluwore gi gigo modwaro kuomwa. Ong’eyo ni wan joricho, kendo odwaro konyowa. (Zab. 103:14) Tiyo ne Nyasaye kaka jalup Yesu en gima moro chuny, to ok ni en gima tek, nikech kit ngima ma kamano kelo ber ne jomoko kendo miyo chuny Jehova mor. Yesu nowacho niya: “Biuru ira, . . . to anamiu yueyo. Rwakuru lota kuomu, kendo puonjreuru kuoma, nikech amuol, kendo adembora e chuny.”—Math. 11:28, 29.
7. Ang’o momiyo inyalo bedo gadier ni Jehova biro konyi chopo gigo modwaro mondo itim?
7 Ndalo duto Jehova biro chiwo jip ma wadwaro, tekni wageno kuome mondo omiwa teko. Kuom ranyisi, nenore ni Jeremia ne ok en ng’at ma jachir e wuoyo. Omiyo, kane Jehova okete obed janabine, Jeremia nowacho kama: ‘A, Ruoth Nyasaye! Ne, ok anyal wuoyo, nikech an nyathi.’ Bang’e nowacho koda niya: “Anawe lando weche e nyinge.” (Yer. 1:6; 20:9) Kata kamano, kane Jehova osejiwe, Jeremia nolando wach ma ne ji ok ohero kuom higini 40. Jehova nosingorene nyadinwoya gi wechegi: “An kodi mondo aresi, agoli e chandruok.”—Yer. 1:8, 19; 15:20.
8. Ere kaka wanyiso ni wageno kuom Jehova?
8 Mana kaka Jehova notego Musa kod Jeremia, onyalo konyowa timo gigo modwaro ni Jokristo otim e kindegi. Gima duong’ madwarore en geno kuom Nyasaye. Muma wacho kama: “Gen Jehova gi chunyi duto, kendo kik iketri kuom lony gi weche mayoreyore ma ingo iwuon. Yie kuome e yoreni duto, mi nomi yoreni bedo mochikore tir.” (Nge. 3:5, 6) Wanyiso ni wageno kuom Jehova ka waikore tiyo gi kony mochiwo koa e Wachne koda kokalo e kanyakla. Ka wayie ne Jehova mondo ota yorewa e ngima, onge gima biro monowa chung’ motegno e timo dwache.
Jehova Dewo Ng’ato ka Ng’ato Kuom Joge
9, 10. En kit rit mane ma Zaburi sula mar 91 singo?
9 E kinde ma jomoko ne paro wach chiwruokgi giwegi ne Jehova, nyalo bet ni moko noluor ni ginyalo donjo e richo, bedo mochido, kendo ni Jehova ne nyalo kwedogi. Gima ber en ni, Jehova miyowa rit duto ma wadwaro mondo omi wasiki e winjruok majaber ma wan-go kode. We wane ane kaka ilero mano e Zaburi sula mar 91.
10 Zaburino chako kama: “Ng’a modak e ka mopondo mar Ng’a Ma Malo Chutho nosiki e bwo tipo mar Ng’a Manyalo Duto. Natwag kuom Jehova niya, En e kar geng’ruokna, gi dalana mar ohinga; Nyasacha ma an ageno. Nimar nogoli kuom obadho mar jachik winy.” (Zab. 91:1-3) Ne ni Nyasaye singo ni obiro rito joma ohere kendo ogene. (Som Zaburi 91:9, 14.) En kit rit mane miwacho ka? Jehova norito moko kuom jotichne machon e yor ringruok—kinde moko notimo kamano mondo orit anyuola ma ne owinjore Mesia owuogie. Kata kamano, jotichne mamoko mang’eny ne otwe e jela, ne osandi, kendo ne onegi e yore maricho ahinya kidwaro mondo giwe chung’ motegno korka Nyasaye. (Hib. 11:34-39) Ne giyudo jip ma ne dwarore mondo omi ginan nikech Jehova noritogi mondo kik giwe chung’ motegno. Omiyo, inyalo kaw Zaburi sula mar 91 kaka singo ni Nyasaye biro rito joge mondo gichung’ motegno.
11. “Ka mopondo mar Ng’a Ma Malo Chutho” ochung’ne ang’o, to ng’a gini ma Nyasaye rito e iye kanyo?
11 “Ka mopondo mar Ng’a Ma Malo Chutho” ma jandik-zaburi wuoyoe, en kar rit mar ranyisi ma Nyasaye miyo joge. Jogo mobet e iye kanyo kaka wend Nyasaye, ogeng’ kuom gimoro amora kata ng’ato ang’ata manyalo ketho yiegi koda hera margi ne Nyasaye. (Zab. 15:1, 2; 121:5) En kama opondo nikech jogo ma onge yie ok nyal ng’eye. Kanyo, Jehova rito jogo mawacho ni: ‘In e Nyasacha ma an ageno.’ Ka wasiko e kar geng’ruokno, ok onego wabed gi luoro manono ka waparo ni Nyasaye nyalo kwedowa ka walwar e obadho mar Satan, ma en kaka “jachik winy.”
12. Gin gik mage manyalo ketho winjruokwa gi Nyasaye?
12 Gin gik mage manyalo ketho winjruokwa majaber gi Nyasaye? Jandik-zaburi hulonwa moko, kendo moko kuomgi gin kaka “tuwo mar yamo ma wuotho e mudho, . . . [kod] nek ma ketho godiechieng’.” (Zab. 91:5, 6) ‘Jachik-winyno’ osemako ji mang’eny kuom miyogi gombo mar tamruok luwo chik Nyasaye. (2 Kor. 11:3) Omako jomoko kojiwo tim wuoro, ng’ayi, kod hero mwandu. To jomoko owuondo gi riekni mag dhano kaka hero pinjegi, puonj mar ni gik moko ne osieko kendgi maok ochwegi, kendo owuondogi bende gi dinde mag miriambo. (Kol. 2:8) To jo mang’eny osedonjo e obadho mar tim terruok. Gik ma kamago maketho winjruok ng’ato gi Nyasaye, osemiyo ji mang’eny oweyo hero Nyasaye.—Som Zaburi 91:7-10; Math. 24:12.
Rito Hera Miherogo Nyasaye
13. Ere kaka Jehova ritowa kik wadonj e gigo manyalo ketho winjruokwa kode?
13 Ere kaka Jehova rito joge kuom gik manyalo ketho winjruokgi kode? Zaburino wacho niya: “Nomi jomalaika mage chik kuomi, mondo giriti e yoreni duto.” (Zab. 91:11) Malaike me polo tayo kendo ritowa mondo waland wach maber. (Fwe. 14:6) Kaachiel gi malaike, Jehova tiyo bende gi jodong-kanyakla e ritowa kik wuondwa gi riekni mag miriambo, kendo jodongo timo kamano ka gimakore motegno gi Ndiko. Ginyalo chiwo kony ne ng’ato ang’ata makedo mondo olo paro mag piny. (Tito 1:9; 1 Pet. 5:2) Bende, “jatichno mogen, kendo mariek” chiwonwa chiemb chuny maritowa mondo kik wuondwa gi puonj mar ni gik moko nosieko kendgi maok ochwegi, gombo mag terruok, lawo mwandu koda huma, kod gombo mamoko mang’eny manyalo kelo hinyruok. (Math. 24:45) Ang’o ma osekonyi mondo itamri donjo e gik marichogo?
14. Ere kaka wanyalo tiyo maber gi rit ma Nyasaye chiwo?
14 Ang’o ma nyaka watim mondo wasiki ka wan “ka mopondo” mar Nyasaye mar ritowa? Mana kaka wasiko ka waritore kuom gik manyalo hinyowa e yor ringruok, kaka masiche, jo mahundu, kata tuoche ma landore, e kaka nyaka wasiki ka warito winjruokwa gi Nyasaye kik kethre. Omiyo, onego pile wati maber gi yore ma Jehova tayowago e bugewa kendo e chokruogewa mag kanyakla koda mag alwora. Kendo wamany paro ma jodongo nyalo konyowago. Donge waneno ber kuom kido mopogore opogore ma owete gi nyiminewa ma Jokristo nyiso? Kuom adier, riwruokwa e kanyakla konyowa bedo joma riek.—Nge. 13:20; som 1 Petro 4:10.
15. Ang’o momiyo inyalo bet gadier ni Jehova nyalo riti kuom gimoro amora ma diketh winjruokni kode?
15 Onge gimomiyo wanyalo bet gi kiawa ni Jehova biro ritowa kuom gik manyalo ketho winjruokwa kode. (Rumi 8:38, 39) Oserito kanyakla kuom josigu madongo mag jodin kod josiasa ma dwachgi maduong’ ok osebedo mar negowa, to mondo gipogwa gi hera mar Nyasachwa maler. Singo mar Jehova osebet adier niya: “Onge gir lueny mothedh mar kedo kodi ma dinyal timo gi moro.”—Isa. 54:17.
En Ng’ano Mamiyowa Thuolo?
16. Ang’o momiyo piny ok nyal miyowa thuolo?
16 Be bedo mag Jehova mayowa thuolo? Ooyo, mopogore gi mano, bedo mag piny nyalo mayowa thuolo. Piny osepogore gi Jehova kendo otelne gi nyasaye makwiny matimo ji obed wasumbini. (Joh. 14:30) Kuom ranyisi, piny mar Satan tiyo gi chandruok mag yuto mondo oma godo ji thuologi. (Pim gi Fweny 13:16, 17.) Richo bende nigi teko mar timo ji wasumbini. (Joh. 8:34; Hib. 3:13) Omiyo, kata obedo ni joma onge yie nyalo singo ne ji thuolo sama gijiwo kit ngima maok luwre gi puonj mag Jehova, ng’ato ang’ata mawinjogi biro yudo ni mapiyo gisebet wasumbini mag richo kod kit ngima monjawni.—Rumi 1:24-32.
17. En thuolo mane ma Jehova miyowa?
17 Mopogore gi mano, Jehova biro ketowa thuolo kuom gimoro amora manyalo hinyowa ka waketo genowa kuome. E yore moko, wachalo gi jal maketo ngimane e lwet jayeng’o molony manyalo gonye kuom gima nyalo kelone tho. Waduto wan gi gimoro manyalo kelonwa tho—richo monyuolwago. Mana ka waketo ngimawa e lwet Jehova kokalo kuom misango mar Kristo, eka wanyalo tony kuom gik ma richo kelo kendo wadag mochwere. (Joh. 3:36) Mana kaka geno ma wan-go kuom jayeng’o nyalo medore kaluwore gi weche mwamedo ng’eyo kuome, e kaka geno ma wan-go kuom Jehova biro medore kaka wadhi nyime gi puonjruok kuome. Omiyo, wadhi nyime puonjruok adimba Wach Nyasaye nimar mano biro konyowa golo luoro manyalo monowa bedo joge.—1 Joh. 4:18.
18. Ang’o ma biro timore ne jogo ma gin mag Jehova?
18 Jehova miyo ji duto thuolo mar timo yiero. Wachne luwo niya: ‘Yier ngima, ibedi mangima, in kod kothi, kuom hero Jehova Nyasachi.’ (Rapar 30:19, 20) Odwaro ni wanyis ni wahere ka wayiero wawegi mar tiyone. Kuom adier, kar mayowa thuolo, bedo mag Nyasaye mwahero biro miyo wabedi kendo wasiki ka wamor.
19. Ang’o momiyo bet mag Jehova en ng’wono maok wawinjore yudo?
19 Kaka joricho, ok wawinjore bedo mag Nyasaye maler. Mano nyalore mana kokalo kuom ng’wono mar Nyasaye maok wawinjore yudo. (2 Tim. 1:9) Omiyo, Paulo nondiko niya: “Kwangima, wangima kwamiyogo Ruoth duong’; kata kwatho watho kwamiyogo Ruoth duong’. E momiyo kwangima kata kwatho, wan mag Ruoth.” (Rumi 14:8) Kuom adier, ok wabi yuago ang’e ngang’ kuom yiero bet mag Jehova.
Inyalo Dwoko Nade?
• Bedo mag Jehova kelo ber mage?
• Ang’o momiyo timo gigo ma Nyasaye dwaro ni mondo watim nyalorenwa?
• Ere kaka Jehova rito jotichne?
[Penjo mag Puonjruok]
[Picha manie ite mar 8]
Penj jomoko ber ma giseyudo kuom bedo mag Jehova
[Picha manie ite mar 10]
Moko kuom yore ma Jehova ritogo joge gin mage?