Nyis ni In Jalup Madier mar Kristo

“Yien mabeyo duto nyago mana olemo mabeyo, to yien maricho nyago mana olemo maricho.”—MATH. 7:17.

1, 2. Ere kaka Jokristo madier opogore gi mago ma miriambo, to moloyo, e ndalogi mag giko?

YESU nowacho ni ne idhi fweny jogo mawuondore ni tiyone kokalo kuom olembgi—tiende ni puonjgi koda timbegi. (Math. 7:15-17, 20) Kuom adier, gik ma ji rwako e pachgi koda e chunygi nyalo kethogi, kata konyogi. (Math. 15:18, 19) Jogo mipidho gi miriambo nyago “olemo maricho,” to jogo mipuonjo adiera mar wach Nyasaye nyago “olemo mabeyo.”

² Kit olemo ariyogi osefwenyore maler e ndalogi mag giko. (Som Daniel 12:3, 10.) Jokristo ma miriambo ok ong’eyo Nyasaye e yo malong’o, kendo kinde mang’eny chiwruokgi en mana mar wuondruok, to jogo ma nigi ng’eyo matut lamo Nyasaye gi “chuny kendo e adiera.” (Joh. 4:24; 2 Tim. 3:1-5) Gitemo matek mondo ginyis kido kaka mag Kristo. To nade wan wawegi ng’ato ka ng’ato? Sama wanono yore abich mifwenyogo Jokristo madier, penjri ane niya: ‘Be timbena kod puonjga luwore chuth gi Wach Nyasaye? Be amiyo adiera nenore maber e wang’ jogo ma manye?’

Dag Kaluwore gi Wach Nyasaye

3. En ang’o mamoro Jehova, to kuom Jokristo madier, mano oriwo gik mage?

³ Yesu nowacho niya: “Ok ni ji duto ma luonga ni, ‘Ruoth, Ruoth,’ e ma nodonji e pinyruodh polo; to mana ng’atno ma timo gi ma Wuora me polo dwaro.” (Math. 7:21) Ee, wacho awacha ni ng’ato en Jakristo ok ema mi Jehova mor, to timo gigo ma dwarore ni Jakristo otim. Kuom jolup madier mag Kristo, mano mulo kit ngimagi duto, moriwo koda paro ma gin-go kuom pesa, tije ma gitiyo, yore mag manyo mor koda yueyo, tim anyuola koda nyasi mag jopiny, kend koda tudruok mamoko gi jowetegi. Kata kamano, Jokristo ma miriambo to rwako kendo yie gi paro kod yore mag jopiny, mosemedo bet maok mi Nyasaye luor e ndalo mag gikogi.—Zab. 92:7.

4, 5. Ere kaka wanyalo tiyo gi weche Jehova mayudore e Malaki 3:18 e ngimawa?

⁴ Janabi Malaki nondiko kare niya: ‘Unuduogi kendo unupog kind jo makare gi jo maricho, kind jalo matiyo ne Nyasaye gi jalo ma ok tine.’ (Mal. 3:18) Sama iparo matut kuom weche janabigo, penjri ane niya: ‘Be timbena chalo gi mag jopiny, koso apogora? Be kinde duto atemo matek mondo abed machal gi joma atiyogo kata joskul wetena, koso asiko kachung’ motegno e mako chike koda puonj mag Muma, kata mana wuoyo kuom puonjgo ka thuolo oyudore?’ (Som 1 Petro 3:16.) En adier ni ok wadwar nyisore kaka joma kare e wang’wa wawegi, kata kamano onego wabed mopogore gi jogo maok ohero Jehova kendo maok tine.

⁵ Kapo ni ineno ni nitie kuonde madwarore ni itimie lokruok, donge inyalo wuoyo gi Nyasaye e lamo mondo omiyi teko kokalo kuom puonjruok Muma, lamo, kendo bedo e chokruok? Kaka ibiro medo tiyo gi Wach Nyasaye e ngimani, e kaka ibiro medo bedo gi “olemo mabeyo,” moriwo koda ‘olemo mar dhok ma hulo nying’ Nyasaye.’—Hib. 13:15.

Land Pinyruodh Nyasaye

6, 7. Kuom wach Pinyruoth, en pogruok mane manyalo nenore kuom Jokristo madier gi ma miriambo?

⁶ Yesu nowacho kama: ‘Onego ayal wach  maber mar pinyruodh Nyasaye e mier moko bende, nikech ma e momiyo noora.’ (Luka 4:43) Ang’o momiyo Pinyruodh Nyasaye ema ne en wach maduong’ ma Yesu ne lando? Nong’eyo ni en owuon kaka Ruodh Pinyruodhno, kaachiel gi owetene mowal kuom roho, ne gidhi tieko gino sie makelo chandruok mag dhano—tiendeni richo kod Jachien. (Rumi 5:12; Fwe. 20:10) Omiyo, nochiko jolupne mondo oland wach Pinyruodhno nyaka giko mar pinyni chopi. (Math. 24:14) Joma wacho awacha gi dhogi ni gin jolup Kristo ok ti tijni—kuom adier ok ginyal. Nikech ang’o? En nikech weche moko adek: Mokwongo, ok ginyal lando wach maok ging’eyo tiende. Mar ariyo, thothgi ok nigi kido mar bolruok koda chir madwarore mondo eka ng’ato okedi gi jaro koda akwede manyalo bedoe nikech lando wach Pinyruoth ne jowetegi. (Math. 24:9; 1 Pet. 2:23) To mar adek, Jokristo ma miriambo onge gi roho mar Nyasaye.—Joh. 14:16, 17.

⁷ Mopogore kodgi, jolup Kristo madier ong’eyo gima Pinyruodh Nyasaye en koda gigo mobiro chopo. E wi mano, giketo weche modok korka Pinyruodhno obed motelo e ngimagi, ka gilande e piny mangima kokalo kuom roho mar Jehova. (Zek. 4:6) Be in bende itimo tijni maok ibari? Be itemo matek mondo imed lony kaka jaland wach Pinyruoth, wawach ni kuom tiyo gi thuolo momedore e tij lendo, kata kuom medo lony e yoreni mag lendo? Jomoko osetemo medo lony margi e tijgi mar lendo kuom tiyo gi Muma e yo maber moloyo. Jaote Paulo ma ne nigi tim mar goyo mbaka gi ji kotiyo gi Ndiko, nondiko konyiso ni ‘wach Nyasaye ngima, kendo otiyo.’—Hib. 4:12; Tich 17:2, 3.

8, 9. (a) Gin weche mage mosene manyiso ber mar tiyo gi Muma e tijwa mar lendo? (b) Ere kaka wanyalo medo lony e tiyo gi Wach Nyasaye?

⁸ Kane en e tij lendo mar ot ka ot, owadwa moro nosomo ne ja Katholik moro Daniel 2:44, mi olerone kaka Pinyruodh Nyasaye biro kelo kuwe madier koda ngima maber. Jalo nowacho kama: “Amor ahinya ni ielo Muma kendo inyisa gima ni ei ndiko, kar wachona awacha.” Kane owadwa moro osomo ndiko ne dhako manie din mar Grik Othodoks, dhakono nobedo gi penjo moko mabeyo. Kaendi bende, owadwano kaachiel gi chiege, nodwoko penjogo ka gitiyo gi Muma. Bang’e dhakono nowacho kama: “Be ing’eyo gimomiyo chunya ne oyie wuoyo kodu? Un nubiro e oda gi Muma, mi usomo weche man e iye.”

⁹ En adier ni bugewa konyo ahinya kendo onego ochiwgi e tij lendo. Kata kamano, Muma e buk ma watiyogo moloyo. Omiyo, kapok ibedo gi tim mar tiyo kode ahinya, donge inyalo timo kinda e tiyo kode moloyo? Inyalo yiero ndiko manok mowinjore malero gima Pinyruodh Nyasaye en, koda kaka obiro tieko gigo machando ji e alworau. Kae to iikri mar somo ndikogo sama ilendo ot ka ot.

Bed Mamor Kuom Ting’o Nying’ Nyasaye

10, 11. Kuom wach tiyo gi nying’ Nyasaye, en pogruok mane mantie e kind Yesu kod thoth jogo mawacho ni luwe?

¹⁰ “Un ubedo jonenona, Jehova owacho,  kendo An ie Nyasaye.” (Isa. 43:12) Yesu Kristo, Janeno maduong’ mar Jehova, nokawo wach ting’o nying’ Nyasaye kendo lande ne jomoko kaka migawo moyiedhi. (Som Wuok 3:15; Johana 17:6; Jo Hibrania 2:12.) Kuom adier, nikech Yesu ne lando nying’ Wuon mare, ne oluonge ni ‘Janeno Maradier.’—Fwe. 1:5; Math. 6:9.

¹¹ Mopogore gi mano, thoth jogo maketore ni giwuoyo e lo Nyasaye koda Wuode, osebedo kanyiso kido makelo ne nying’ Nyasaye wichkuot, ka gigolo nying’no koda ei loko maggi mag Muma. E nyiso chuny ma kamano, chik ma nyocha omi bisop mag Katholik nowacho ni, “nying’ Nyasaye kokete e yor tetragrammaton, tiende ni YHWH, ok onego otigo kata ohul” e seche mag lamo. * Mano kaka parono en paro marach ndi!

12. Ere kaka jotich Jehova nomedo fwenyore ahinya kaka oganda mar Jehova e higa 1931?

¹² Ka giluwo ranyisi mar Kristo koda mar “oganda mang’ongo mar joneno” ma notelo ne Yesu, Jokristo madier mor gi tiyo kod nying’ Nyasaye. (Hib. 12:1) Kuom adier, e higa 1931, jotich Nyasaye nomedo fwenyore ahinya kaka oganda mar Jehova kane girwako nying’ mar Joneno mag Jehova. (Som Isaiah 43:10-12.) Omiyo, e yo makende ahinya, jolup Kristo madier nobedo ‘oganda miluongo gi nying’ Nyasaye.’—Tich 15:14, 17.

13. Ere kaka wanyalo dak kaluwore gi nying’ momiwa mar Nyasaye?

¹³ Ere kaka ng’ato ka ng’ato kuomwa nyalo dak kaluwore gi nying’ makende momiwani? Mokwongo, nyaka wachung’ motegno e konyo ji ng’eyo Nyasaye. Paulo nondiko kama: “‘Ng’ato ka ng’ato ma luongo nying Ruoth, norese.’ To ji diluong nadi jal ma pok giyie kuome? Kendo digiyie nadi jal ma pok giwinjo kuome? Kendo digiwinj nadi ka onge jayal wach? Kendo ji digiyal nadi ka ok oorgi?” (Rumi 10:13-15) Bende, kwanyiso rieko maok wachwany ng’ato, onego wael miriambo mag dinde maketho nying’ Jachwechwa, kaka puonj mar ni nitie kar mach miwang’oe ji, ma kuom adier en puonj mamiyo Nyasaye ma jahera nenore ka gima en gi kido maricho mag Jachien.—Yer. 7:31; 1 Joh. 4:8; pim gi Mariko 9:17-27.

14. Jomoko osetimo nade bang’ ng’eyo nying’ Nyasaye owuon?

¹⁴ Be imor kuom ting’o nying’ Wuoru me polo? Be ikonyo jomoko ng’eyo nying’ malerno? Dhako moro e dala mar Paris e piny France, nowinjo ni Joneno mag Jehova ong’eyo nying’ Nyasaye, omiyo nopenjo Janeno ma bang’e noromogo mondo onyise nying’no ei Muma ma mare. Kane osomo Zaburi 83:18, ng’eyo nying’no nomulo chunye ahinya. Nochako puonjore Muma, kendo sani en nyaminwa motegno matiyo ne Nyasaye e piny machielo. Kane dhako moro ma ja Katholik modak e piny Australia eka nohango neno nying’ Nyasaye ei Muma, pi wang’e ne ochwer nikech ilo. Kuom higini mang’eny sani, osebedo ka en japainia mapile. E kinde mokalo machiegni, kane Joneno e piny Jamaica onyiso dhako moro kuno nying’ Nyasaye ei Mumbe owuon, en bende pi wang’e ne ochwer nikech ilo. Omiyo, bed mamor kuom ting’o nying’ Nyasaye, kendo kuom luwo ranyisi mar Yesu, land ne ji duto nying’ majaberni.

‘Kik Iher Piny’

15, 16. Jokristo madier nigi paro mane kuom piny, to gin penjo mage monego wapenjre wawegi?

¹⁵ “Kik uher piny, kata gik manie piny. Ka ng’ato ohero piny, hera mar Wuoro ok ni e iye.” (1 Joh. 2:15) Piny kaachiel gi chuny mar luwo gik ringruok man e iye, gin gik maok winjre gi Jehova koda roho mare maler. Omiyo, jolup madier mag Kristo ok we aweya bedo mag piny. Gikwedo piny koa e chunygi, ka ging’eyo ni japuonjre Jakobo nondiko ni, ‘mako osiep gi piny en timo sigu gi Nyasaye.’—Jak. 4:4.

 ¹⁶ Luwo weche ma Jakobo nondikogo nyalo bedo gima tek e piny mopong’ gi tembe modhuro. (2 Tim. 4:10) Kuom mano, Yesu nolamo kokwayo e lo jolupne niya: “Ok akwayo ni igolgi e piny, to ni iritgi kuom Ng’a Marachno. Ok gin mag piny, kaka an ok an mar piny.” (Joh. 17:15, 16) Penjri ane niya: ‘Be atemo matek mondo kik abed mar piny? Be jomoko ong’eyo kuma achung’ie kodok korka nyasi koda timbe anyuola ma Ndiko kwedo, koda timbe mago ma kata obedo ni ne ok ochakore gi dinde mag miriambo, to gadier ginyiso chuny mar piny?’—2 Kor. 6:17; 1 Pet. 4:3, 4.

17. Ang’o manyalo miyo jogo ma chunygi tir okaw okang’ mar tiyo ne Jehova?

¹⁷ En adier ni chung’wa motegno e luwo kaka Muma chiko ok bi miyo jopiny oherwa, to kata kamano onyalo miyo joma chunygi tir obed gi gombo mar dwaro ng’eyo. Kuom adier, sama joma kamago neno ni yiewa ogurore motegno ei Ndiko kendo ni yiewa mulo kit ngimawa duto, mano nyalo miyo gichal ka gima giwacho ne Jokristo mowal niya: “Wanadhi kodu, nikech wasewinjo ka Nyasaye ni kodu.”—Zek. 8:23.

Nyis Hera Madier mar Jokristo

18. Nyiso ni wahero Jehova koda jowetewa oriwo gik mage?

¹⁸ Yesu nowacho kama: “Her Ruoth Nyasachi gi iyi duto, kendo gi chunyi duto, kendo gi riekoni duto” kendo “her wadu kaka iherori iwuon.” (Math. 22:37, 39) Herano (a·gaʹpe e dho Grik) en hera manyiso ting’, ma makore gi puonj koda chike, kendo pile oriwo koda paro manie chunywa ma iye. Herano nyalo nyiso ilo, kendo onyalo medore. (1 Pet. 1:22) Opogore chuth gi guondo, nimar en hera minyiso gi wach koda tim.—Som 1 Jo Korintho 13:4-7.

19, 20. Hul ane moko kuom gik mosene manyiso teko ma hera mar Jokristo nigo.

¹⁹ Nikech hera en nyak mar roho maler mar Nyasaye, herano miyo Jokristo madier timo gigo ma jomoko ok nyal timo, kaka loyo akwede mabedoe nikech kit anyuola kata oganda ma ng’ato wuokie, kaachiel gi weche siasa ma pogo ji. (Som Johana 13:34, 35; Gal. 5:22) Hera ma kamano ywayo jogo manyiso kido kaka mag rombe. Kuom ranyisi, ka  rawera moro ma Ja-Yahudi e piny Israel nohango dhi e chokruok mar Jokristo, ne owuoro ahinya kuom neno kaka owete ma Jo-Yahudi gi Jo-Arab ne lamo Jehova kanyachiel. Nikech mano, nochako dhi e chokruoge maok obare, kendo ne oyie puonjruok mar Muma. Be inyiso hera matut kamano ne oweteni? To be itemo ahinya mondo irwak jogo mobiro manyien e Od Romo gi mor, maok idewo ni giwuok e oganda mane, kata dewo chal margi e ngima?

²⁰ Kaka Jokristo madier, watemo matek nyiso ji duto hera. E piny El Salvador, ne nitie jalendo moro ma rawera ma ne puonjore Muma gi dhako moro ma jahigini 87 ma ja Katholik, kendo ma nomakore ahinya gi kanisane. Chieng’ moro, dhakono nobedo matuwo ahinya, kendo ne otere e osiptal mi orwake e wod. Kane oduogo pacho, Joneno ne odhi lime kendo ne giterone chiemo. Mani ne odhi nyime kuom chiegni dwe mangima. Onge ja kanisagi kata achiel ma ne olime. Ang’o ma ne otimore bang’e? Ne owito kido koda gik mopa ma notiyogo e lamo, moweyo kanisano, mi nochako puonjore Muma kendo. Ee, hera mar Jokristo nigi teko adier! Onyalo mulo chuny ji e yo ma kata weche miwacho gi dhok ok nyal.

21. Ere kaka wanyalo miyo kindewa mabiro obed maber chuth?

²¹ E kinde mokayo machiegni, Yesu biro wacho ne jogo duto mawuondore ni tiyone kama: “Ok nang’eyou ngang’: auru kuoma, un jo ma timo richo.” (Math. 7:23) Kuom mano, we mondo wanyaguru kido mamiyo Wuoro koda Wuowi duong’. Yesu nowacho niya: “Ng’ato ka ng’ato ma winjo wechenagi, kendo timo, enochal gi ng’at mariek mogero ode e wi lwanda.” (Math. 7:24) Ee, ka wanyiso ni wan jolup madier mag Kristo, wanabed jogo ma Nyasaye oyiego, kendo kindewa mabiro nobed maber chuth, mana ka gima ogure e wi lwanda!

[Weche moler piny]

Be Inyalo Paro?

• Ere pogruok mantie e kind jolup madier mag Kristo gi ma miriambo?

• Hul ane moko kuom ‘olembe’ mifwenyogo Jokristo madier.

• Kuom wach nyago kido mag Jokristo, inyalo ng’ado mar chopo weche mage?

[Penjo mag Puonjruok]

[Picha manie ite mar 13]

Be in ng’a mohero tiyo gi Muma e tiji mar lendo?

[Picha manie ite mar 15]

Be jomoko ong’eyo kuma ichung’ie korka nyasi ma Ndiko ok osiro miparogo odiechienge?