Be Ineno Jehova Kaka Wuoru?

“RUOTH, puonjwa lemo.” Kane achiel kuom jopuonjrene ochiwo kwayono, Yesu nodwoko kama: “Kulemo wachuru ni, ‘Wuonwa, nyingi mondo obed maler.’” (Luka 11:1, 2) Yesu ne nyalo wuoyo kuom Jehova kotiyo gi nyinge mag telo kaka, ‘Manyalo Duto,’ ‘Japuonj,’ “Jachwech,” ‘Ng’at ma Hike Ng’eny,’ kata “Ruoth mochwere.” (Chak. 49:25; Isa. 30:20; 40:28; Dan. 7:9; 1 Tim. 1:17) Kar mano, Yesu ne oluonge ni, “Wuonwa.” Nikech ang’o? Nyalo bedo ni en nikech odwaro ni wasud ir Jal maduong’ moloyo e piny gi polo, mana kaka nyathi nyalo sudo ir wuon mare mohere.

Kata kamano, jomoko neno ka teknegi neno Nyasaye kaka Wuon-gi. Jakristo moro miluongo ni Atsuko * wacho ni, “Kuom higini mang’eny bang’ batiso, ne tekna sudo ir Jehova kendo wuoyo kode e lamo kaka Wuoro.” Konyiso gimomiyo ne tekne timo kamano, owacho ni, “Ok anyal paro kinde moro amora ma wuonwa monywola ne onyisae hera.”

Gima lit en ni, e ndalogi mag giko mopong’ gi chandruok, ‘hera’ ma ng’ato geno neno kuom wuon mare onge. (2 Tim. 3:1, 3) Omiyo ok kawwa gi wuoro ni jomoko winjo e chunygi kaka Atsuko. Kata kamano, wamor ng’eyo ni nitie gik mang’eny mamiyo onego wane Jehova kaka Wuonwa moherowa.

Jehova—Jachiwo ma Jahera

Mondo omi wane Jehova kaka Wuonwa, dwarore ni wang’eye maber. Yesu nowacho kama: “Onge ng’a mong’eyo Wuowi, mak mana Wuoro; kata Wuoro bende onge ng’ato mong’eyo, mak mana Wuowi, kod ng’atno ma Wuowi oyie elone.” (Math. 11:27) Yo maber moloyo manyalo konyowa ng’eyo Jehova kaka Wuoro, en paro matut kuom gima Yesu ne oelonwa e wi Nyasaye madier. Kuom mano, ang’o ma Yesu nofwenyonwa kuom Wuoro?

Konyiso ni Jehova e Soko mar ngimane, Yesu nowacho niya: “Angima kuom Wuoro.” (Joh. 6:57) Wan bende wangima nikech Wuoro. (Zab. 36:9; Tich 17:28) Ang’o ma ne omiyo Jehova ochiwo ngima? Donge notimo kamano nikech hera? Kuom adier, nikech michno dwarore ni wabende waher Wuonwa me polo.

Yo maduong’ moloyo ma Nyasaye nonyisogo hera ne dhano ne en kuom chiwo Yesu kaka misango mar rawar. Rawarno ema miyo dhano ma joricho bedo gi winjruok machiegni gi Jehova kokalo kuom Wuode mohero. (Rumi 5:12; 1 Joh. 4:9, 10) To nikech Wuonwa me polo en Jachop singone, wanyalo bedo gadier ni jogo duto mohere kendo maluwo chikene, gikone biro neno ber mar ‘yudo thuolo gi duong’ mar nyithind Nyasaye.’—Rumi 8:21.

Wuonwa me polo bende ‘miyo wang’ chieng’ mare wuoknwa’ pile ka pile. (Math. 5:45) Nyalo bedo ni pile ok wakwa Nyasaye mondo chieng’ owuogi. Kata kamano, ngimawa otenore ahinya kuom liet koda ler mogolo! E wi mano, Wuonwa e Jachiwo maok nyal pim gi ng’a machielo, mong’eyo dwachwa mag ringruok kata kapok wakwaye. Kuom mano, donge dwarore ni wakaw kinde mar paro matut kuom kaka  Wuonwa me polo rito chwechne?—Math. 6:8, 26.

Wuonwa En “Jarit Mang’won”

Weche ma Isaya nokoro nojiwo oganda Nyasaye machon niya: “Gode nosudi, kendo pidhe noyiengini, kata kamano osiep ma an-go kodu ok norum ngang’, kata singruokna mar kuwe ok noyiengini, Jehova jarit mang’won owacho.” (Isa. 54:10, The Bible in Living English) Kojiwo wachni, kwayo ma ne Yesu ochiwo e otieno mogik kane en e piny, nyiso ni kuom adier Jehova en “jarit mang’won.” Kowuoyo kuom jopuonjrene, Yesu nokwayo kama: “Gin e piny ka, kendo an abiro iri. Wuoro maler, iritgi gi nyingi ma nimiya, mondo gibed achiel kaka wan achiel.” (Joh. 17:11, 14) Jehova osebedo ka rito jolup Yesu.

Yo achiel ma Nyasaye ritowago kuom obadho mag Satan e kindegi, en kuom chiwonwa chiemb chuny e kinde mowinjore kokalo kuom “jatichno mogen, kendo mariek.” (Math. 24:45) Mondo omi ‘warwak gi lwenje duto mag Nyasaye,’ dwarore ni wati gi chiemb chuny ma tegowa. Kuom ranyisi, wan gi ‘okumba mar yie,’ ma wanyalo ‘negogo aserini makakni mag ng’a marachno.’ (Efe. 6:11, 16) Yie ma wan-go ritowa kuom gik manyalo ketho winjruokwa gi Nyasaye, kendo mano nyiso ni en gi teko mar ritowa.

Wanyalo puonjore mathoth kuom ng’wono mar Wuonwa me polo, kuom nono adimba kaka Wuod Nyasaye ne timo ne ji kane en e piny. Non ane weche manie Mariko 10:13-16. E ndikogo Yesu wacho ne jopuonjrene kama: “Yieuru ni nyithindo matindo gibi ira.” Kane nyithindogo obiro ire, Yesu nokwakogi e yo mang’won, mi ogwedhogi. Mano kaka nyaka bed ni ne gimor ahinya! To nikech Yesu nowacho ni: “Ng’a mosenena, oseneno Wuoro,” wang’eyo ni Nyasaye madier dwaro ni wadhi ire.—Joh. 14:9.

Jehova Nyasaye e Soko mar hera maok rum. En e Jachiwo kendo Jarit maok nyal pim gi machielo, madwaro ni wasud ire. (Jak. 4:8) Onge kiawa ni Jehova e Wuoro maber moloyo duto!

Kaka Wayudo Ber!

Wayudo ber mogundho kuom keto genowa kuom Jehova ma en Wuoro me polo ma jahera kendo mang’won. (Nge. 3:5, 6) Yesu noyudo ber kuom geno Wuon mare chuth. Kristo nowachone jopuonjrene kama: “Ok an kenda, to an gi Wuoro ma noora.” (Joh. 8:16) Kinde duto Yesu ne nigi adiera ni Jehova ne dhi konye. Kuom ranyisi sama ne ibatise, Wuon mare ne onyiso kaka nohere kane owacho kama: “Jali en Wuoda mahero, chunya mor kode.” (Math. 3:15-17) Kendo matin nono kane Yesu pok otho, nowacho kama: “Wuora, aketo chunya e lweti.” (Luka 23:46) Geno ma Yesu ne nigo kuom Wuon mare ne pod osiko kotegno kaka pile.

Kamano e kaka nyalo timorenwa. Ka Jehova ni korwa, be nitie tiend bedo maluor? (Zab. 118:6) Atsuko, mowuo kuome motelo, nohero geno kuom tekone owuon kane en e bwo chandruok. Kata kamano, nochako puonjore e wi ngima Yesu koda tijene ne Nyasaye, to moloyo kuom winjruok machiegni ma ne ni e kind Yesu gi Wuon mare me polo. Ang’o ma ne otimore nikech timo kamano? Atsuko wacho niya: “Ne apuonjora tiend bedo gi Wuoro kendo gene.” Omedo wacho kama: “Ne awinjo ka an gi kuwe kod mor madier. Kuom adier, onge tiend bedo gi parruok kuom wach moro amora.”

Gin gweth mage mamoko mwayudo kuom neno Jehova kaka Wuoro? Pile nyithindo ohero jonyuolgi kendo gidwaro morogi. Nikech hera, Wuod Nyasaye ‘ne timone Wuon mare malong’o ndalo duto.’ (Joh. 8:29) Kamano bende, hera ma waherogo Wuonwa me polo nyalo konyowa timo gik  moko e yo manyiso rieko kendo ‘pake e lela.’—Math. 11:25, New World Translation of the Holy Scriptures; Joh. 5:19.

Wuonwa ‘Mako Lwetwa Marachwich’

Wuonwa me polo bende osemiyowa ‘jakony’—roho mare maler. Yesu nowacho ni obiro ‘telonu e adiera duto.’ (Joh. 14:15-17; 16:12, 13) Roho maler mar Nyasaye nyalo konyowa ng’eyo Wuonwa e yo maber moloyo. Onyalo konyowa muko ‘gik mogurore motegno,’ tiende ni, puonj mosegurore e pach ng’ato, maok kare, kendo mobam, mondo ‘okel paro duto e tuech mondo owinj Kristo.’ (2 Kor. 10:4, 5, NW) Kuom mano, weuru wakwa Jehova e lamo mondo omiwa ‘jakony’ ma ne osingi, ka wageno ni ‘Wuoro me polo nochiw roho maler ni joma kwaye.’ (Luka 11:13) En gima owinjore bende kwayo e lamo mondo roho maler okonywa medo sudo ir Jehova.

Nyathi matin winjo maber kendo ka oonge luor sama owuotho komako lwet wuon mare. Ka kuom adier ineno Jehova kaka Wuoru, inyalo yudo hoch kuom weche mawacho niya: “An Jehova Nyasachi namak lueti marachwich, kawachoni, ni, We luoro nakonyi.” (Isa. 41:13) Inyalo bedo gi thuolo makende mar ‘wuotho’ gi Nyasaye nyaka chieng’. (Mika 6:8) Dhi nyime timo dwache, to ibiro bedo mamor, ibiro bedo gi chuny mokuwe, kendo ibiro winjo hera mayudore kuom neno Jehova kaka Wuoru.

[Weche moler piny]