Orwaki e Yor Ngima Maber Moloyo!
Orwaki e Yor Ngima Maber Moloyo!
“Kwangima, kata kwatho, wan mag Ruoth.”—RUMI 14:8.
1. Yesu nopuonjo ang’o kuom wach yor ngima maber moloyo?
JEHOVA dwaro ni waluw yor ngima maber moloyo. Ji nyalo dak e yore mopogore opogore, to kata kamano mana yo achiel kende ema ber moloyo. Onge yo maber ahinya mwanyalo tiyogo gi ngimawa maloyo dak kaluwore gi Wach Nyasaye, kendo kuom luwo ranyisi mar Wuode, Yesu Kristo. Yesu nopuonjo jolupne mondo olam Nyasaye gi chuny kendo e adiera, kendo nomiyogi tij timo ji jopuonjre. (Math. 28:19, 20; Joh. 4:24) Kuom dak kaluwore gi weche ma Yesu nochiko, wamoro Jehova kendo wayudo gweth mage.
2. Ere kaka ji mang’eny notimo bang’ winjo wach Pinyruoth e kinde Jokristo mokwongo, to tiend bedo mag “Yorno” ne en ang’o?
2 Sama jogo ma ‘chunygi oikore ne ngima mochwere’ obedo gi yie kendo obatisgi, wanyalo wachonegi maonge kiawa ni, ‘Orwaku e yor ngima maber moloyo!’ (Tich 13:48, New World Translation of the Holy Scriptures) E kinde Jokristo mokwongo, gana mang’eny mag ji moa ogendini mopogore opogore norwako adiera, mi ginyiso e lela chiwruokgi ne Nyasaye kokalo kuom batiso. (Tich 2:41) Jopuonjre motelogo ne iluongo ni mag “Yorno.” (Tich 9:2; 19:23) Luongogi kamano nowinjore nimar jogo ma nobiro mobedo jolup Kristo nomakore chuth gi kit ngima manyiso ni ne gin gi yie kuom Yesu Kristo kendo ne giluwo ranyisi ma noketo.—1 Pet. 2:21.
3. Ang’o momiyo ibatiso jo Jehova, to ji adi mosebatis kuom higini apar mosekalo?
3 Tij timo ji jopuonjre osemedore e ndalogi mag giko, kendo sani itime e pinje mokalo 230. Kuom higini apar mosekalo, ji mokalo 2,700,000 osetimo yiero mar tiyo ne Jehova mi osebatisgi kaka ranyisi mar chiwruok margi ne Jehova. Ka opog kwanno, to giromo ji makalo 5,000 juma ka juma! Giseyiero ni mondo obatisgi nikech hera ma giherogo Nyasaye, ng’eyo ma gisebedogo kuom Ndiko, koda yie ma gin-go kuom gik ma gipuonjo. Batiso en okang’ maduong’ ahinya e ngimawa nimar en e chakruok mar osiep machiegni gi Jehova. Batiso bende en ranyisi ni wan gadier ni Jehova biro konyowa mondo wachung’ motegno e tiyone, mana kaka nokonyo jotichne machon wuotho e yore.—Isa. 30:21.
Ang’o Momiyo Batiso Dwarore?
4, 5. Hul ane moko kuom gweth koda ber ma ng’ato bedogo ka obatise.
4 Nyalo bedo ni iselony gi Nyasaye, isetimo lokruok e ngimani, kendo sani in jalendo mapok obatisi. Wapuoyi kuom timo dongruok ma kamano. Kata kamano, be isechiwori ne Nyasaye e lamo, to be iikori mar mondo obi obatisi? Kokalo kuom puonjruokni mar Muma, nyalo bedo ni koro ing’eyo ni onego iti gi ngimani ahinya e pako Jehova, to ok mana e manyo gigo mamori kende, kata manyo mwandu. (Som Zaburi 148:11-13; Luka 12:15) Omiyo, moko kuom gweth koda ber mabedoe ka obatis ng’ato gin mage?
5 Kaka Jakristo mosechiwore mi obatisi, ibiro tiyo gi ngimani e yo maber moloyo. Ibiro bedo mamor nimar itimo dwaro mar Nyasaye. (Rumi 12:1, 2) Roho maler mar Jehova biro nyago kuomi kido mag Nyasaye kaka kuwe kod bedo adiera, ma en yie. (Gal. 5:22, 23) Nyasaye biro dwoko lamo magi kendo obiro gwedho kinda mitimo e dak e ngima maluwore gi Wachne. Ibiro bedo gi ilo kuom tiji mar lendo, kendo dak e yo ma Nyasaye oyiego biro tego geno ma in-go kuom ngima mochwere. E wi mano, chiwruok kod batiso biro nyiso ni kuom adier idwaro bedo achiel kuom Joneno mag Jehova.—Isa. 43:10-12.
6. Batiso marwa en gima nyiso ang’o?
6 Kuom chiwruok ne Nyasaye kendo dhi e batiso, wanyiso e lela ni wan mag Jehova. Jaote Paulo nondiko niya: “Onge ng’ato kuomwa ma bedo mangima nikech en owuon, kata ma tho nikech en owuon. Nikech kwangima, wangima kwamiyogo Ruoth duong’; kata kwatho watho kwamiyogo Ruoth duong’. E momiyo kwangima, kata kwatho, wan mag Ruoth.” (Rumi 14:7, 8) Nyasaye osemiyowa duong’ kuom miyowa thuolo mar timo yiero. Sama wang’ado ni wadwaro luwo yor ngimani nikech wahero Nyasaye, wamiyo chunye mor. (Nge. 27:11) Batiso marwa en gima nyiso ni wasechiwore ne Nyasaye, kendo onyiso e lela ni Jehova e Jalochwa. Batiso nyiso ni wasekawo okang’ mar riwo Jehova lwedo kaka jal mowinjore bedo gi loch e wi gik moko duto e piny gi polo. (Tich 5:29, 32) To mano bende miyo Jehova bedo korka korwa. (Som Zaburi 118:6.) Batiso bende yawonwa yo mar yudo gweth mamoko mang’eny gie sani, koda e kinde mabiro.
Ibedo e Riwruok mar Owete Manyiso Hera
7-9. (a) En ang’o ma Yesu nosingo ne jogo ma noweyo gik moko duto moluwe? (b) Ere kaka singo mayudore e Mariko 10:29, 30 chopo e ndalogi?
7 Jaote Petro nowacho ne Yesu niya: “Ne! wan ne waweyo duto, mwaluwi. To ang’o ma wanabedgo?” (Math. 19:27) Petro ne dwaro ng’eyo gima en koda jopuonjre mamoko mag Yesu ne dhi yudo e kinde mabiro. Mondo gichiwre chuth ne tij lando wach Pinyruoth, noyudo gisewere gi gik mang’eny. (Math. 4:18-22) Yesu nosingonegi ang’o?
8 Kaluwore gi weche ma Mariko nondiko kuom wachno, Yesu nonyiso ni jopuonjrene ne dhi bedo jokanyo mag riwruok achiel mar owete matiyo ne Nyasaye. Nowacho niya: ‘Ng’ato moseweyo ode, kata owetene kata nyiminene, kata min, kata wuon, kata nyithinde, kata puothe, nikech an, kendo nikech wach maber, noyud nyadipiero apar achiel koro e ndalogi, udi, gi owete, gi nyimine, gi mine, gi nyithindo, gi puothe, kaachiel kod sand, kendo e piny mabiro ngima mochwere.’ (Mari. 10:29, 30) Jokristo mokwongo kaka Ludia, Akula, Priskilla, kod Gayo, ne gin moko kuom jogo ma nochiwo ‘ute,’ kendo ne gibedo ne Jokristo wetegi kaka “owete, gi nyimine, gi mine” mana kaka Yesu nosingo.—Tich 16:14, 15; 18:2-4; 3 Joh. 1, 5-8.
9 Gima Yesu nowachono chopo e okang’ malach ndalogi. “Puothe” ma jolupne weyo chien, ochung’ne kit ngima ma thoth ji weyo, moriwo koda jo misonari, jo Bethel, jokony tije gedo e pinje mopogore opogore, gi jomamoko, mondo gimi tij Pinyruoth olandre e pinje mopogore opogore. Owete gi nyimine mang’eny oseweyo miechgi mondo omi gidag e ngima mayot, kendo en gima miyo chunywa ilo sama wawinjo wechegi manyiso kaka Jehova osebedo ka ritogi koda kaka tiyo ne Jehova osemiyogi mor. (Tich 20:35) E wi mano, jotich Jehova duto mosebatisi nigi thuolo majaber mar ‘dwaro mokwongo pinyruodh Nyasaye, gi wachne makare,’ mamiyo gibedo e riwruok mar owete ma Jokristo e piny mangima.—Math. 6:33.
Gin “Ka Mopondo”
10, 11. “Ka mopondo mar Ng’a Ma Malo Chutho” en kama nade, to ere kaka wanyalo donjoe?
10 Chiwruok kod batiso kelonwa gweth machielo majaber—thuolo makende mar dak “ka mopondo mar Ng’a Ma Malo Chutho.” (Som Zaburi 91:1.) Kama opondo miwuoyoeni en kama ji yudoe ritruok kuom gik manyalo ketho winjruokgi gi Nyasaye. En “ka mopondo” nikech ok ong’eye gi joma ok ne gik moko kaka Nyasaye neno, kendo maok ogene. Kuom dak kaluwore gi chiwruokwa, kendo kuom keto genowa chutho kuom Jehova, mano chalo ka gima wawachone ni: ‘In e kar geng’ruokna, gi dalana mar ohinga, Nyasacha ma an ageno.’ (Zab. 91:2) Jehova Nyasaye bedonwa kar dak motegno. (Zab. 91:9) Be wanyalo yudo kar geng’ruok maber maloyo mano?
11 Donjo “ka mopondo” mar Jehova en gima nyiso bende ni osegwedhwa gi thuolo makende mar bedo gi winjruok kode waduto ng’ato ka ng’ato. Mano chakore gie kinde ma wachiwore mi obatiswa. Bang’ mano, wagero winjruokwa gi Nyasaye kuom sudo machiegni kode kokalo kuom puonjruok Muma, wuoyo kode e lamo moa e chunywa, kendo kuom luwo chikene chutho. (Jak. 4:8) Onge ng’at mosebedo machiegni gi Jehova maloyo Yesu, ma geno ma ne en-go kuom Jachwech ne ok oyiengini ngang’. (Joh. 8:29) Kuom mano, kik wabed gi kiawa ngang’ kuom Jehova kata kuom dwarone, kata nyalo ma en-go mar konyowa chopo singowa mar chiwruok. (Ekl. 5:4) Gik ma Nyasaye osechiwo mondo okonywa rito winjruokwa kode, nyiso gadier chuth ni oherowa kendo odwaronwa ngima maber e tiyone.
Kaw Paradis mar Roho Kaka Gima Duong’
12, 13. (a) Paradis mar roho en ang’o? (b) Ere kaka wanyalo konyo joma pod nyien?
12 Chiwruok kod batiso bende yawonwa yo mar dak e paradis mar roho. Mani en paradis makende ma wantierego gi Jokristo wetewa, ma nigi kuwe e kindgi gi Jehova Nyasaye koda ng’ato gi nyawadgi. (Zab. 29:11; Isa. 54:13) Winjruok gi kuwe ma wan-go ok nyal yudore kama chielo e pinyni. Mani en gima hinyo nenore moloyo, e chokruoge madongo mariwo pinje, kama owete gi nyimine moa e ogendini, dhok, koda pinje mang’eny romo kanyachiel gi kuwe, winjruok, koda hera mar owete.
13 Paradis mar roho ma wantiereni, opogore ahinya gi gik maricho manie piny masani. (Som Isaiah 65:13, 14.) Kuom lando wach Pinyruoth, wabedo gi thuolo mar gwelo jomoko mondo gibi e paradis mar roho. Bende, en gweth konyo jogo ma eka nyocha obedo jo kanyakla mondo giyud tiegruok e tij lendo. Kaluwore gi kaka jodongo chikowa, wanyalo yudo thuolo makende mar konyo jomoko mapod nyien, mana kaka Akula gi Priskilla nolero ne Apollo ‘yor Nyasaye ka gipuonje kare moloyo.’—Tich 18:24-26.
Dhi Nyime Puonjori Kuom Ranyisi mar Yesu
14, 15. Gin weche mage mowinjore momiyo onego wadhi nyime puonjore kuom ranyisi mar Yesu?
14 Wan gi gik mamiyo onego wadhi nyime puonjore kuom ranyisi mar Yesu. Kane pod en e polo, Yesu nodak kuno kotiyo kaachiel gi Wuon mare kuom higini tara mang’eny. (Nge. 8:22, 30) Nong’eyo ni yor ngima maber moloyo en tiyo ne Nyasaye kendo bedo janeno kuom adiera. (Joh. 18:37) Yesu nong’eyo maler ni luwo yor ngima moro amora machielo ne dhi nyiso kido mar guondo, kendo ni ng’ato ok ne mabor. Nong’eyo ni ne idhi kete e bwo tem mager, mi nege. (Math. 20:18, 19; Hib. 4:15) Kaka Jaketnwa ranyisi, nopuonjowa kaka wanyalo chung’ motegno e bwo tem.
15 Mapiyo bang’ kane osebatis Yesu, Satan nokelone tem mondo ojwang’ yor ngima maber moloyo—kata kamano Yesu notamore. (Math. 4:1-11) Mani puonjowa ni kata Satan timnwa ang’o, wanyalo chung’ motegno e rito yiewa. Nenore ni obiro keto ahinya jogo machiegni dhi e batiso e bwo tem, kaachiel gi jogo ma eka nyocha obatisi. (1 Pet. 5:8) Nikech ok osewachnegi adiera e wi Joneno mag Jehova, joodwa nyalo kwedowa ka giparo ni gikonyowa. Kata kamano, tembe ma kamago miyowa thuolo mar nyiso kido mabeyo mag Jokristo, kaka luor kod rieko sama wadwoko penjo koda sama wachiwo neno. (1 Pet. 3:15, 16) Kuom mano, kalo e gik ma kamago nyalo mulo chuny jogo ma winjowa.—1 Tim. 4:16.
Makri gi Yor Ngima Maber Moloyo!
16, 17. (a) Gin gik moko adek mage madwarore mondo ng’ato oyud ngima, kaluwore gi Rapar mar Chik 30:19, 20? (b) Ere kaka Yesu, Johana, koda Paulo noriwo lwedo weche ma Musa nondiko?
16 Higini madirom 1,500 kane Yesu pok obiro e piny, Musa nojiwo Jo-Israel mondo oyier yor ngima maber moloyo. Nowacho kama: “Aluongo polo gi piny mondo gibedi joneno kuomu kawuono, ni aseketo e nyimi ngima gi tho, gweth kod kwet: e momiyo mondo iyier ngima, ibedi mangima, in kod kothi: mar hero Jehova Nyasachi, mar winjo dwonde, kendo mar padore kuome.” (Rapar 30:19, 20) Israel ne ok omakore gi Nyasaye, to kata kamano gik moko adek ma Musa nowacho ni dwarore, pok olokore. Yesu koda jomamoko nochako onwoyo wechego kendo.
17 Mokwongo, nyaka ‘waher Jehova Nyasachwa.’ Wanyiso ni wahero Nyasaye kuom timo gik moko kaluwore gi yorene makare. (Math. 22:37) Mar ariyo, nyaka ‘wawinj dwond Jehova’ kokalo kuom puonjruok Wach Nyasaye kendo mako chikene. (1 Joh. 5:3) Mano dwaro ni wabedi e chokruoge mag Jokristo maok wabare, kama inonoe weche manie Muma. (Hib. 10:23-25) Mar adek, nyaka ‘wapadre kuom Jehova.’ Kata bed mana ni waromo gi wach mane, weuru mondo kinde duto waket yie kuom Nyasaye kendo waluw Wuode.—2 Kor. 4:16-18.
18. (a) Ere kaka gaset mar The Watch Tower nolero wach adiera chon e higa 1914? (b) Onego wabed gi paro mane kuom ler mar adiera ma wan-go sani?
18 Mano kaka dak kaluwore gi adiera manie Muma en gweth maduong’! E higa 1914, weche maluwogi ne ogo e gaset mar The Watch Tower: “Donge wan joma ogwedhi kendo mamor? Donge Nyasachwa en jadiera? Kapo ni nitie ng’ama ong’eyo gima chielo maber moloyo, we mondo oluw mano. Kapo ni ng’ato kuomu onwang’o gima ber moloyo, wageno ni ubiro wachonwa. Wang’eyo ni onge gima diromre gi gigo mwaseyudo, kata mana nus, ei Wach Nyasaye. . . . Kuwe, ilo koda gweth mosebiro ei chunywa koda e ngimawa nikech ng’eyo Nyasaye madier, en gima tek lero. Ng’eyo Wach Rieko mar Nyasaye, kite mar Ng’ado Bura Kare, Teko, kod Hera, tieko chuth riyo manie e pachwa koda chunywa. Ok wabi manye kama chielo. Onge gima chielo mwanyalo medo gombo maloyo medo rwako Wachni mondo omed bedo maliw e pachwa.” (The Watch Tower, Desemba 15, 1914, ite mag 377-378) Chuny mar nyiso ni wamor kuom fwenyo kendo ng’eyo adierano pok olokore. Kuom adier, wan gi gik mang’eny moloyo mamiyo onego wail kuom ‘wuotho e ler mar Jehova.’—Isa. 2:5; Zab. 43:3; Nge. 4:18.
19. Ang’o momiyo jogo mowinjore obatisi kawo okang’ mar timo kamano maok odeko?
19 Kapo ni idwaro ‘wuotho e ler mar Jehova’ to pok ichiwori mi obatisi, kik ideki. Tim gimoro amora madwarore mondo omi ichop weche ma Muma dwaro eka obatisi—ma e yo makende mar nyiso erokamano kuom gima Nyasaye kod Kristo osetimonwa. Mi Jehova mwanduni maduong’ moloyo—ma en ngimani. Nyis ni iikori mar timo dwach Nyasaye kiluwo ranyisi mar Wuode. (2 Kor. 5:14, 15) Onge kiawa ni mano e yor ngima maber moloyo!
Inyalo Dwoko Nade?
• Batiso marwa en gima nyiso ang’o?
• Chiwruok ne Nyasaye kod batiso kelo gweth mage?
• Ang’o momiyo dwarore ahinya ni wapuonjre kuom ranyisi mar Yesu?
• Ang’o mabiro konyowa makruok gi yor ngima maber moloyo?
[Penjo mag Puonjruok]
[Picha manie ite mar 25]
Batiso mari nyiso ni iseyiero yor ngima maber moloyo
[Picha manie ite mar 26]
Be in “ka mopondo”?