Penjo Moa Kuom Josombwa

Ang’o manyalo miyo obatisi ng’ato mar ariyo?

Nitie gik manyalo miyo ng’ato ma ne osebatisi openjre kabe batiso mare ne owinjore, mi odwar ni obatise mar ariyo. Kuom ranyisi, kane ibatiso ng’ato nyalo bedo ni ne odak e ngima moro maok kare kata timo gik moko maling’ling’, ma kapo ni dine oyudo ni osebatise dine ogole oko mar kanyakla. Be ne onyalo chiwore ne Nyasaye e chalneno? Ng’atno dine obedo thuolo mar timo chiwruok ne Jehova mana kane oyudo oseweyo tim maok owinjore gi ndiko. Kuom mano, nyalo bedo kare ka ng’at ma ne obatisi kapok oweyo timbe maok owinjore gi ndiko, openjore kabe inyalo batise mar ariyo.

To nade ng’at ma ne ok tim richo ma dine omone batiso, to ma bang’e odonjo e richo madwaro ni oyale gi komiti mar ng’ado bura? Kapo ni bang’e oramo ni ne ok ong’eyo malong’o gima ne otimo seche ma ne ibatise kendo owacho ni batiso mare ne ok owinjore. Sama giromo gi ng’at modonjo e richono, jodongo ok onego oket kiawa kuom batiso mare, kendo penje kabe oneno ka chiwruok kod batiso mare ne owinjore. Adier en ni, jalo ne owinjo twak mar Ndiko manyiso kaka batiso en wach monego okaw gi pek. Ne odwoko penjo motudore gi wach chiwruok kod batiso konyiso ni oyie gi gima notimo. Kae to ne oloko lepe mi onyume ei pi. Kuom mano, inyalo wach ni ne ong’eyo malong’o pek motudore gi gima ne otimo. Omiyo, jodongo biro kawe kaka ng’at ma osebatisi.

Kapo ni ng’ato oketo kiawa kabe batiso mare owinjore, jodongo nyalo chike mondo onon The Watchtower mar Mach 1, 1960, ite mag 159 kod160, kod ma Februar 15, 1964, ite mag 123 nyaka 126, kama wach mar batiso mar ariyo iwuoyoe adimba. Wach mar batiso mar ariyo nikech weche moko (kaka bedo ni ng’ato ne ok ong’eyo malong’o tiend weche manie Muma kane ibatise), gikone en yiero mar ng’ato owuon.

Gin gik mage ma Jokristo onego onon mokwongo kapok giparo mar dak e dala kata e ot achiel gi jomamoko?

Kar dak en gima ng’ato ka ng’ato onego obedgo. Kata kamano, e kindegi, ji mang’eny onge gi kuonde dak ma maggi giwegi. Yuto mar ng’ato, tuwo, kod gik mamoko, nyalo miyo anyuola moriwo nyaka wede mogwaro, odag kanyachiel. Kuonde moko e piny, wede nyalo pong’o ot achiel mamiyo ng’ato thung’ ahinya korka thuolo ma mare.

Ok en tij riwruok mar oganda Jehova keto chike ma nyaka luw korka kuonde dak mowinjore ne ji duto e kanyakla me piny mangima. Ijiwo Jokristo mondo oti gi puonj kod chike mag Ndiko e nono ka chenrogi mag dak owinjore e wang’ Nyasaye kata ooyo. Moko kuom puonj kod chikego gin mage?

 Gima duong’ monego wapar en kaka dak gi jomamoko biro chiko kendo mulo kit ngimawa kaachiel gi winjruokwa gi Nyasaye. Ber p enjori ni, jogo gin joma chalo nade? Be gilamo Jehova? Be gidak kaluwore gi kaka Muma dwaro? Paulo nondiko kama: “Kik wuondu; osiepe maricho ketho timbe mabeyo.”—1 Kor. 15:33.

Ndiko lero ni Jehova osin gi chode koda terruok. (Hib. 13:4) Omiyo chenro moro amora mamiyo joma ok okendore nindo kamoro achiel ka gima gin dichwo gi dhako ok en gima Nyasaye oyiego ngang’. Jakristo ok bi dwaro dak kama ji oyie ayiea gi timbe chode.

E wi mano, Muma jiwo jogo duto ma gombo ni Nyasaye oyie kodgi ni, “ringuru terruok.” (1 Kor. 6:18, New World Translation of the Holy Scriptures) Omiyo, Jokristo nyiso rieko ka gitamore dak e chenro moro amora manyalo rwakogi e bwo tem mar terruok. Kuom ranyisi, wawach ni Jokristo mogwaro nindo e ot kata e dala achiel. Be chenro ma kamano nyalo rwako ng’ato e tem? To nade ka ji ariyo maok okendore oyudo ka gidong’ kendgi apoya maok gichano, nikech moko kuom jogo mapile nitiega obet maonge kuom kinde manok? Kamano bende, ok bi bedo gima ber ka joma timo kisera odak e ot achiel nikech mano nyalo rwakogi e tem. En gima nyiso rieko ka watang’ gi gik ma kamago.

Machal gi mano bende en ni, joma oseketho kend margi ok owinjore odhi nyime dak e ot achiel. Nikech ne gisebedo ka gin gi tudruok machiegni ahinya, ginyalo donjo mayot e tim mochido.—Nge. 22:3.

Mogik, mabende dwarore ni wapar, en kaka joma odak e alworawa neno paro mwang’ado. Chenro mar dak ma Jakristo neno ni ber to jo molworowa wuoyoe marach, nyalo dwaro ni walok pachwa. Ok wadwar ni timwa oketh nying’ Jehova. Paulo noketo wachno kama: “Kik ubed jo ma kelo chwanyruok, ni jo Yahudi, kata ni jo Yunani, kata ni kanisa mar Nyasaye; e kaka an bende atemo bedo malong’o ni ji duto e yore duto, ma ok adwar gi ma dikonya, to mano ma dikony ji mang’eny mondo oresgi.”—1 Kor. 10:32, 33.

Yudo kar dak mowinjore nyalo bet matek ahinya ne jogo madwaro chung’ motegno e luwo chike makare mag Jehova. Kata kamano, Jokristo nyaka ne ni ‘giyango gima long’o ni Ruoth.’ Dwarore ni gine ni gimoro amora modwanyore kik timre e odgi. (Efe. 5:5, 10) Mani dwaro ni Jokristo okwa e lamo mondo Nyasaye otagi, kendo gitim duto ma ginyalo mondo gigeng’ gik ma diketh ringruok gi kido mabeyo mag jowetegi, koda nying’ majaber mar Jehova.