“Ratiro mar Nyathi e Dongo e Winjruok gi Nyasaye”

DESEMBA 9, 2008, riwruok mar Swedish Academy for the Rights of the Child nobedo gi semina ma nigi wich ma wacho ni “Ratiro mar Nyathi e Dongo e Winjruok gi Nyasaye.” Thoth paro ma ne ochiw ne oa kuom jo Kanisa mar Sweden, dinde mamoko maluongore ni Jokristo, Islam, kod riwruoge majiwo ratiro mar dhano.

Achiel kuom jogol twak ne en padri moro ma nowacho niya: “Tek lero gadier chuth kaka ranyisi manie Muma konyo ahinya kuom dongo mar nyithindo e winjruok gi Nyasaye.” Ere kaka weche manie Ndiko konyo nyithindo bedo gi winjruok maber gi Nyasaye?

Padrino nowacho kama, “Ndiko kod wechego chiwo ne nyithindo gigo monego ginon kendgi giwegi kendo paro matut kuomgi.” Nowuoyo kuom “sigand Adam gi Hawa, Kain gi Abel, Daudi gi Goliath, nyuol mar Yesu, Zakayo jasol osuru, ngero mar wuowi ma noringo mochako oduogo, Ja-Samaria ma nokonyo nyawadgi.” Magi nochiw kaka ‘moko kuom sigendini manyalo konyo e chiko pach nyithindo e weche mamulo ngima dhano kaka ng’anjo, ng’wono, rawar, ich lit, anjawo, loso winjruok, hera mar owete maonge guondo.’ Nomedo niya: ‘Sigendinigo oting’o puonj manyalo konyo ng’ato timo lokruok e ngimane owuon.’

En adier ni jiwo ji osom Muma en gimaber. Kata kamano, be en adier ni nyithindo nigi nyalo mar bet “kendgi giwegi kendo paro matut” kuom gigo ma gisomo ei Ndiko kendo ng’ado paro makare?

Kata mana joma dongo dwaro ni olernegi weche manie Ndiko. Kuom ranyisi, Muma wuoyo e wi ng’at moro ma ne ok nyal winjo tiend wach Nyasaye kokalo kuom bet ‘kende owuon kendo paro matut.’ Mano ne Ja-Ethiopia moro. Noyudo osomo weche janabi Isaya to ne ok onyal winjo tiend wechego. Nikech nodwaro winjo tiend weche janabino, noyie mondo jaote Filipo olernegi. (Tich 8:26-40) Ji mang’eny dwaro ni olernegi tiend Ndiko, maok mana Ja-Ethiopiano kende. Waduto—to ahinya ahinya nyithindo—dwarore ni olernwa weche manie Ndiko.

Muma siemowa niya: “Kit chuny nyathi en fuwo.” (Nge. 22:15) Dwarore ni ota kendo ochik nyithindo, kendo jonyuolgi nigi ting’ mar puonjogi timbe mabeyo kod miyogi puonj manie Muma kaachiel gi mago mipuonjo e kanyakla mar Jokristo. Nyithindo nigi ratiro mar yudo puonj ma kamago. Chakre a e tin-gi, dwarore ni okonygi gero mise motegno kokalo kuom weche manie Muma mondo gidong e winjruokgi gi Nyasaye, eka gibed “jo madongo, mosepuonjore pogo e kind gik mabeyo kod gik maricho.”—Hib. 5:14.