“Roho gi Miaha Wacho ni, ‘Bi!’”
“Roho gi Miaha Wacho ni, ‘Bi!’”
“Roho gi miaha wacho ni, ‘Bi!’ . . . Ng’a ma riyo omako, obi, mondo oyud pi mar ngima nono.”—FWE. 22:17.
1, 2. Weche mag Pinyruoth onego okaw thuolo mane e ngimawa, to nikech ang’o?
WECHE mag Pinyruoth onego okaw thuolo mane e ngimawa? Yesu nojiwo jolupne ni ‘gidwar mokwongo pinyruoth,’ kosingonegi ni ka gitimo kamano, Nyasaye ne dhi miyogi gigo ma gichando. (Math. 6:25-33) Noporo Pinyruodh Nyasaye kod lulu ma nengone tek, ma ka jahono nosenwang’o, ne ‘oloko gik moko duto ma ne en go, mong’iewe.’ (Math. 13:45, 46) Donge onego wakaw tij lando Pinyruoth kod timo ji jopuonjre gi pek maduong’ ahinya?
2 Mana kaka ne waneno e sula ariyo mosekalo, wuoyo gi chir koda tiyo gi Wach Nyasaye e yo molony e tij lendo, nyiso ni roho mar Nyasaye tayowa. Rohono bende konyowa ahinya e tiyo tij lando wach Pinyruoth maok wabare. We wane ane ni en kamano nade.
Ogwel Ji Duto!
3. En pi machalo nade migwelone ji ni ‘bi’?
3 Roho maler gwelo dhano duto. (Som Fweny 22:17.) Ogwelo ji mondo “obi” kendo gilo riyo gi pi moro makende. Ok en pi apia masie. Kata obedo ni pi ma pi en gima dwarore e siro ngima gik manie piny, Yesu ne wuoyo kuom pi moro machielo sama nowacho ne dhako ma Nya-Samaria moro kar soko mar pi niya: “Ng’ato momodho pi ma an namiye, riyo ok nomake nyaka chieng’; to pi ma an namiye nodok soko mar pi e iye, mabubni e ngima mochwere.” (Joh. 4:14) Pi makende migwelo ne ji mondo obi omodhino, kelo ngima mochwere.
4. Ere kaka dwaro mar pi ngima nochakore, to pigno ochung’ ne ang’o?
4 Dwaro mar pi ma kamano mar ngima nochakore kane Adam, oriwore gi Hawa chiege e ng’anjo ne jal ma ne ochweyogi—Jehova Nyasaye. (Chak. 2:16, 17; 3:1-6) Dichwo gi dhako mokwongo ne oriembi oko mar puodho ma ne gidakie, mondo kik ‘Adam rie luete, kendo kaw kuom yadh ngima, mi docham kendo dobedi mangima nyaka chieng’.’ (Chak. 3:22) Omiyo, kaka wuon oganda duto mar dhano, Adam nokelo tho ne dhano duto. (Rumi 5:12) Pi ngima ochung’ ne chenro duto ma Nyasaye oseketo mondo ores dhano a e richo kod tho, kendo omigi ngima maok rum e Paradis e piny. Gigo duto nyalore mana kuom misango mar rawar mar Yesu Kristo.—Math. 20:28; Joh. 3:16; 1 Joh. 4:9, 10.
5. Gwel mimiyo ji mondo obi “oyud pi mar ngima nono” wuok kuom ng’ano sie? Ler ane.
5 Gwel mimiyo ji mondo obi “oyud pi mar ngima nono” wuok kuom ng’ano sie? Sama chenro duto mag ngima kokalo kuom Yesu biro chopo chuth ne dhano e bwo Loch Kristo mar Higini Gana Achiel, iwuoyo kuom chenrogo kaka “aora mar pi mar ngima, pi maler” marieny ahinya. Aorano nenore “ka mol a e kom duong’ mar Nyasaye gi mar Nyarombo.” (Fwe. 22:1) Omiyo, Jehova Jachiw-Ngima, e Soko mar pi makelo ngima. (Zab. 36:9) En e Jalo mamiyo pigno yudore kokalo kuom “Nyarombo,” ma en Yesu Kristo. (Joh. 1:29) Aora mar ranyisini, e yo ma Jehova oseketo mobiro gologo chandruok ma dhano oseyudo nikech ng’anjo mar Adam. Ee, gwel mimiyo ji ni “bi” wuok kuom Jehova Nyasaye owuon, ma e Jachak chenrono.
6. “Aora mar pi mar ngima” nochako mol karang’o?
6 Kata obedo ni “aora mar pi mar ngima” biro mol e yo mowinjorego chuth e ndalo Loch Kristo mar Higini Gana Achiel, molne ne ochakore “chieng’ Ruoth,” ma nochopo kane omi “Nyarombo” loch e polo e higa mar 1914. (Fwe. 1:10) Omiyo, moko kuom chenro mabiro miyo ji oyud ngima nochakore bang’ mano. Gin kaka Wach Nyasaye, ma en Muma, nimar iwuoyo kuom otene kaka “pi.” (Efe. 5:26) Gwel mimiyo ji mondo ‘obi oyud pi mar ngima’ kuom winjo koda rwako wach maber mar Pinyruoth, en mar ji duto. Kata kamano, ng’a gini matimo tij gwelo ji e kinde chieng’ Ruoth?
“Miaha Wacho ni, ‘Bi!’”
7. Gin jomage ma nokwongo gwelo ji mondo “obi” e kinde “chieng’ Ruoth,” to ne gigwelo ng’a gini?
7 Jogo manie kweth mar miaha—ma gin Jokristo mowal kuom roho—ema kwongo chiwo gwel ni ‘bi.’ Miaha gwelo ng’a gini? Ok ogwelre kende ni, “Bi!” Ochiwo wechenego ne joma nigi geno mar yudo ngima mochwere e piny bang’ “lweny mar chieng’ maduong’no mar Nyasaye Manyalo Duto.”—Som Fweny 16:14, 16.
8. Ang’o manyiso ni Jokristo mowal osebedo ka chiwo ne ji gwel mar Jehova chakre higa mar 1918?
8 Jolup Kristo mowal kuom roho osebedo ka gwelo ji chakre chon e higa mar 1918. E higano, twak mar ji duto ma wiye wacho ni “Ji Tara gi Tara Mangima Sani, Ok Bi Tho,” nochiwo geno ni ji mang’eny biro yudo ngima e paradis e piny bang’ lweny mar Har-Magedon. Twak ma ne ogol e chokruok maduong’ e Cedar Point, Ohio, e piny Amerka e higa mar 1922, nokwayo jowinjo mondo ‘oland Ruoth gi pinyruodhe.’ Kwayono nokonyo jogo modong’ manie kweth mar miaha mondo ogwel ji mang’eny moloyo. Higa mar 1929, gocho mar The Watchtower mar Mach 15, ne nigi sula mawacho ni, “Gwel Mang’won” ka Fweny 22:17 ema ne en ndiko moting’o thuon wach. Kamoro e sulano nowacho kama: “Kweth mowal mapod odong’ e piny riwore gi [Ng’a Ma Malo Chutho] e gwelo ji e yo mang’won ka giwacho ni, ‘Bi.’ Oteni onego olandi ne joma nigi gombo mar tim makare kod adiera. Nyaka lande mana sani.” Jogo manie kweth mar miaha dhi nyime gi gwelo ji nyaka chil kawuono.
“Ng’a Mowinjo, Mondo Owach ni, ‘Bi!’”
9, 10. Ere kaka jogo mawinjo kigwelogi bende osekwa mondo ochiw gwel ni, “Bi!”?
9 To nade jogo mawinjo kigwelogi ni “bi”? Igwelogi mondo gin bende giwach ni, “Bi!” Kuom ranyisi, gocho mar Agost 1, 1932, mar The Watchtower nowacho kama e ite mar 232: “We Jokristo mowal ojiw jogo duto mabiro lando wach maber mar pinyruoth. Ok ochuno ni nyaka gibed jo mowal mag Ruoth eka mondo giland ote Ruoth. En gima hoyo chuny joneno mag Jehova ahinya sani, kuom ng’eyo ni oyienegi tero pi mar ngima ne kweth mar jogo manyalo kadho Har-Magedon, mi kendo migi ngima mochwere e piny.”
10 Kolero ting’ ma joma winjo gwel mawacho ni, “Bi!” nigo, The Watchtower mar Agost 15, 1934, ite mar 249, nowacho kama: “Jogo manie kweth mar Jonadab nyaka ti kanyachiel kod jogo manie kweth mar Jehu, tiende ni Jokristo mowal, mondo giland ote mar pinyruoth, kata obedo ni ok gin joneno mowal mag Jehova.” E higa mar 1935, ne ofweny ayanga jogo ma gin “oganda mang’ongo” ma Fweny 7:9-17 wuoyo kuomgi. Ng’eyo mano nomiyo otim tij gwel ma Nyasaye gwelogo ji e okang’ momedore moloyo. A kanyo, kwan ma medore mar oganda mang’ongo mar jolemo madier—makoro sani okadho milion abiriyo—oserwako gwelno. Bang’ rwako oteno gi mor, gisechiwore ne Nyasaye, mi obatisgi gi pi, kendo giseriwo kweth mar miaha lwedo e gwelo jomoko “mondo oyud pi mar ngima nono.”
‘Roho Wacho ni, Bi!’
11. E ndalo Jokristo mokwongo, ere kaka roho maler ne konyo e tij lendo?
11 Kane opuonjo e sunagogi ma ne ni Nazareth, Yesu noelo kitap janabi Isaya mosomo kama: ‘Roho mar Ruoth ni kuoma, nikech osewira gi mo mondo ayal wach maber ni jo modhier, ne oora mondo ahul gony ni jo motwe, kendo ahul yepo mar wang’ ni muofni, mondo agony ji misando kendo ahul higa ma Ruoth oyiego.’ Kae to Yesu notiyo gi wechegi kuome kowacho niya: “Tinende eka Ndikoni ochopo.” (Luka 4:17-21) Kane pok odhi e polo, Yesu nong’iso jopuonjrene niya: ‘Unuyud teko ka roho maler obiro kuomu, kendo unudok jonenona nyaka tung’ piny.’ (Tich 1:8) E ndalo Jokristo mokwongo, roho maler nokonyo ahinya e tij lendo.
12. Ere kaka roho mar Nyasaye konyo e tij gwelo ji e ndalowagi?
12 Ere kaka roho maler mar Nyasaye konyo e tij gwelo dhano e ndalowagi? Jehova e Soko mar roho maler. Otiyo gi rohono e yawo chuny koda paro mar jogo manie kweth mar miaha, mondo ging’e tiend Wachne, ma en Muma. Rohono jiwogi gwelo kendo lero adiera mag Ndiko ne jogo ma nigi geno mar dak mochwere e Paradis e piny. To nade kuom jogo morwako gwelno, mobedo jopuonjre Yesu Kristo, mi gin bende gigwelo jomamoko? Rohono tiyo kuomgi gin bende. Bang’ kosebatisgi ‘e nying roho maler,’ giluwo kaka roho chiko kendo gigeno ni rohono biro konyogi. (Math. 28:19) Par ane bende kuom ote ma Jokristo mowal kod oganda mang’ongo ma kwan-gi medore, lando. Oteno wuok ei Muma—buk ma nondiki e bwo teko mar roho mar Nyasaye. Omiyo, gwelno ichiwo kokalo kuom roho maler. Kuom adier, rohono ema tayowa. Ere kaka mano onego omul okang’ ma watimogo tij gwelo ji?
Gidhi Nyime “Wacho ni, ‘Bi!’”
13. Wacho ni “roho gi miaha dhi nyime gi wacho ni: ‘Bi!’” nyiso ang’o?
13 “Roho gi miaha” ok wach awacha ni, “Bi!” Dhok machon ma ne ondikgo wachno mokwongo, nyiso ni wacho ni “bi” en tim madhi nyime. Mano emomiyo, loko mar New World Translation wacho kama: “Roho gi miaha dhi nyime gi wacho ni: ‘Bi!’” Mano nyiso ni onego wachiw gwel mar Nyasaye ne ji maok wabare. To nade jogo mawinjo kendo rwako gwelno? Gin bende giwacho ni, “Bi!” Iwuoyo kuom oganda mang’ongo ma lamo Nyasaye gadier kinyiso ni ‘gitiyone odiechieng’ gotieno e i hekalune.’ (Fwe. 7:9, 15) ‘Gitiyone odiechieng’ gotieno’ e yo mane? (Som Luka 2:36, 37; Tich Joote 20:31; 2 Jo Thessalonika 3:8.) Ranyisi mar Anna, dhako ma jakor wach ma hike ne ng’eny, kod ranyisi jaote Paulo, nyiso ni ‘tiyone odiechieng’ gotieno’ en nano kod timo kinda pile e tij lendo.
14, 15. Ere kaka Daniel nonyiso ni lamo mapile maok wabare e gima duong’?
14 Janabi Daniel bende noketo ranyisi mar gimomiyo timo lamo maok wabare en gimaber. (Som Daniel 6:4-10, 16.) Ne ok oloko chenro mare mar lamo—tim ma ne en-go mar kwayo Nyasaye e lamo ‘nyadidek e odiechieng’ achiel kaka yandi otimoga’—ne ok oweyo kata mana kuom dwe achiel, kata obedo ni mano ne dhi miyo owite e bur ma ne okuny ne sibuoche. Mano kaka timbene nonyiso maler ne joma ne nene ni, lamo Jehova maok wabare, e gima duong’ moloyo gimoro amora!—Math. 5:16.
15 Bang’ ka Daniel nosebet e bur sibuoche kuom otieno achiel, ruoth owuon nodhi kanyo mi okok niya: “A Daniel, ma jatich Nyasaye mangima, Nyasachi mitiyone pile, onyalo goli kuom sibuoche koso?” Daniel nodwoko niya: “A ruoth, bedi mangima nyaka chieng’. Nyasacha oseoro malaikane, kendo omiyo dho sibuoche, ok gisetimona gimoro malit: ni kech noyuda ka chunya ler e nyime; kendo ok asetimo gimoro marach e nyimi, A ruoth.” Jehova nogwedho Daniel kuom ‘tiyone pile’ gi kinda.—Dan. 6:19-22
16. Ranyisi mar Daniel onego omi wapenjre penjo mage kuom okang’ mwatimogo tij lendo?
16 Daniel noikore ne tho kar mondo owe chenro ma ne en-go motudore gi lamo. To nade wan? Gin gik mage mwaseweyo kata mwaikore weyo mondo waland wach maber mar Pinyruodh Nyasaye pile gi kinda? Ee, ok onego wawe ngang’ dwe okadhi maok wawuoyo gi jomoko kuom Jehova! Ka nyalore, donge wanyalo timo matek mondo wayud thuolo mar lendo juma ka juma? Kata kapo ni wan jo midekre kendo wanyalo mana lendo kuom dakika 15 kende e dwe, onego wachiw ripodno. Nikech ang’o? Nikech, kaachiel kod roho gi miaha, wagombo dhi nyime gi wacho ni, “Bi!” Ee, wadwaro ni watim duto mwanyalo mondo wabed jolendo mag Pinyruoth maok wabare.
17. Gin thuolo mage maok onego wawe obawa maok watiyogo kuom chiwo gwel mar Jehova?
17 Onego wamany thuolo mar chiwo gwel mar Jehova samoro amora, maok warito timo kamano mana e sa mwasechano mar dhi lendo. Mano kaka wan gi thuolo makende mar gwelo jogo ma riyo omako “obi, mondo oyud pi mar ngima nono,” kaka e seche mwadhi e chiro, wan e wuoth, wayueyo, watiyo, kata kwadhi skul! Kata ka sirkal geng’o tijwa mar lendo, pod wadhi nyime gi lendo e yo mopondo—nyalo bedo ni kuom dhi kamoro to walendo mana e ot achiel ka wakadho mamoko, kata kuom lendo e yo maok ochan kaka pile.
Dhi Nyime gi Wacho ni, “Bi!”
18, 19. Ere kaka inyiso ni ikawo thuolo mar bedo jatich kaachiel gi Nyasaye kaka gima duong’?
18 Kuom higini masani koro okadho piero ochiko, roho gi miaha osebedo kawacho ne ng’ato ang’ata ma riyo mar pi mar ngima omako niya, “Bi!” Be isewinjo gwelgi ma jaberno? Ka en kamano, to ijiwi ni mondo igwel jomamoko.
19 Ok wang’eyo ni nyaka karang’o ma gwel mar Jehova biro dhi nyime, to kata kamano ka warwako gwelno kuom wacho ni, “Bi!” mano miyo wabet jotich kaachiel kod Nyasaye. (1 Kor. 3:6, 9) Mano kaka wan gi thuolo makende ndi! Weuru wanyis ni wakawo thuolono kaka gima duong’, kendo “wachiwuru pile ni Nyasaye misango ma en pak mawuok kaka olemo e dhok ma hulo nyinge,” ka walendo maok wabare. (Hib. 13:15) Kaachiel gi kweth mar miaha, we wan joma nigi geno mar dak e piny wadhi nyime gi wacho ni, “Bi!” Kendo mad ji mathoth omed ‘yudo pi mar ngima nono’!
Ang’o Misepuonjori?
• Gin ng’a gini mabende igwelo ni ‘bi’?
• Ang’o momiyo wanyalo wacho ni gwel mar ‘bi’ wuok kuom Jehova owuon?
• Roho maler konyo nade e chiwo gwel mawacho ni ‘bi’?
• Ang’o momiyo onego watim matek kik wabare e tij lendo?
[Penjo mag Puonjruok]
[Chart/Picha manie ite mar 16]
(Mondo ine weche momedore, ne bugno)
Dhi Nyime gi Wacho ni, “Bi!”
1914
5,100 jolendo
1918
Thoth ji biro yudo ngima e Paradis e piny
1922
“Landuru, landuru, landuru, Ruoth gi pinyrudhe”
1929
Kweth mogen modong’ wacho ni, “Bi!”
1932
Gwel mawacho ni, “Bi!” en gwel mimiyo ji duto maok mana Jokristo mowal kende
1934
Ogwel kweth mar Jonadab e tij lendo
1935
Ofweny “oganda mang’ongo”
2009
7,313,173 jolendo