Siko Kaka Ng’at ma Nyasaye Oyiego Kata ka Lokruok Obetie

BE NITIE lokruok mosetimore e ngimani? Be iyudo ka tekni rwako lokruok ma kamago? Thothwa osebet, kata biro bedo e bwo chal ma kamago. Ngima jomoko ma ne odak e kinde machon nyalo konyowa fwenyo kido moko manyalo konyowa.

Kuom ranyisi, wanon ane Daudi koda lokruok mang’eny ma ne okadhoe. Ne en mana wuowi ma jakwath sama Samuel ne owire gi mo mondo obi obed ruoth e kinde mabiro. Kane pod otin, nochiwore kedo gi Ja-Filistia mogangore miluongo ni Goliath. (1 Sam. 17:26-32, 42) Nogwel Daudi mondo obi odag e laru mar Ruoth Saulo, kendo noyiere kaka jatend jolweny. Daudi dine ok oparo ni lokruokgo duto ne nyalo timore e ngimane; kata mana ng’eyo gima ne dhi timore bang’e.

Daudi kod Saulo nobiro mobedo gi ywaruok ahinya e kindgi. (1 Sam. 18:8, 9; 19:9, 10) Mondo okwo ngimane, nochuno Daudi ringo kuom higini mogwaro. Kata mana diere ma ne en ruodh Israel, weche nolokorene mapiyo ahinya, to moloyo bang’ kane oterore, kendo kuom temo umo timno, nochako oneko. Nikech richo ma ne otimo owuon, nobet gi masiche e ode. Kuom ranyisi, wuod Daudi ma Absalom nong’anjone. (2 Sam. 12:10-12; 15:1-14) Kata kamano, bang’ ka Daudi noloko chunye kuom richone mar terruok kod nek, Jehova nong’wonone mi Daudi nodoko ng’at ma Jehova oyiego kendo.

In bende chal mari nyalo lokore. Tuoche, pek mag yuto, kata weche matek mag joot—kata mana timbewa wawegi—kelo lokruok e ngimawa. Gin kido mage manyalo konyowa ikore maber e nyagruok kod chandruok ma kamago?

Bolruok Konyowa

Bolruok en kido madwaro ni ng’ato obed gi paro mar duokore piny. Bolruok madier miyo wanenore wawegi kaka wan gadier, kendo neno jomoko kaka gin. Ka waneno kido mag jomoko kata gik ma gisetimoe maber, wabiro ng’eyo malong’o kaka gin koda gik ma gitimo. Kamano bende, bolruok nyalo konyowa ng’eyo gimomiyo  gimoro otimorenwa gi kaka wanyalo kedo kod gino.

Jonathan, wuod Saulo, en ranyisi maber. Chal mare nolokore e yo maonge gima nonyalo timo. Kane Samuel onyiso Saulo ni Jehova ne dhi maye pinyruoth, ne ok owacho ni koro Jonathan ne dhi kawo kare kaka ruoth. (1 Sam. 15:28; 16:1, 12, 13) Yiero ma Nyasaye notimo e kawo Daudi kaka ruoth maluwo mar Israel, ne oweyo Jonathan oko. Inyalo wach ni, ng’anjo mar Saulo notimo ne Jonathan marach. Kata obedo ni ne oonge ketho kuom gik ma wuon-gi notimo, Jonathan ne ok dhi kawo kar loch mar wuon mare. (1 Sam. 20:30, 31) Jonathan notimo nang’o nikech mano? Be nomako sadha nikech loch nobaye, ka iye bet malit gi Daudi? Ooyo. Kata obedo ni Jonathan ne hike ng’eny kendo ne en gi lony, nomakore chuth gi Daudi. (1 Sam. 23:16-18) Bolruok nokonye ng’eyo ng’ama ne nigi gweth mar Nyasaye, kendo ‘ne ok obedo gi paro moting’ore moloyo kaka nowinjore obedgo.’ (Rumi 12:3) Jonathan nong’eyo gima Jehova ne dwaro, kendo ne oyie gi yiero ma ne Jehova osetimo.

En adier ni, lokruok mang’eny kelo pek moko. Jonathan ne nigi osiep machiegni ahinya gi ji ariyo. Achiel ne en Daudi osiepne ma bang’e ne dhi bedo ruoth, ma Jehova noseyiero. Machielo ne en Saulo, wuon mare, ma Jehova nosekwedo to ne pod en e loch kaka ruoth. Nyaka bed ni mano nokelo ne Jonathan parruok ahinya kotemo siko kaka ng’at ma Jehova oyiego. Lokruok matimorenwa nyalo miyo wabed gi parruok kod luoro. To ka watemo ng’eyo kaka Jehova neno gik moko, wabiro dhi nyime tiyone ka wanyagore gi lokruogego.

Ber mar Bidhruok

Bidhruok en kido mamiyo ng’ato ng’eyo tong’ mare owuon. Ber ng’eyo ni bidhruok opogore gi bolruok. Ng’at mabolore samoro ok ong’eyo chuth tong’ mare owuon.

Daudi ne en ng’ama obidhore. Kata obedo ni Jehova noseyiere ni mondo obed ruoth, higini mang’eny nokalo kapok Daudi okawo loch. Onge kama wasomoe ni Daudi noyudo wach koa kuom Jehova kanyise ni orit mondi. Kata obedo ni mano nyalo nyoso chuny ng’ato, en to mano ne ok ochande. Nong’eyo tong’ mare, kendo nong’eyo ni Jehova, ma noweyo mano otimore, ema ne tayo gik moko. Omiyo, kata mana ka nodwaro reso ngimane owuon, Daudi ne ok onego Saulo, kendo nogeng’o Abishai kik tim kamano.—1 Sam. 26:6-9.

Seche moko gimoro nyalo timore ei kanyaklawa maok wawinj tiende, kata ma kaluwore gi pachwa, ok otime e yo makare kata mochan maber. Be wabiro nyiso ni wang’eyo tong’ marwa kuom ng’eyo ni Yesu e Wi kanyakla, kendo ni otiyo gi bura mar jodongo moseketi e tayowa? Be wabiro nyiso bidhruok, kwang’eyo ni mondo wasiki kaka joma Jehova oyiego, dwarore ni wawe weche  e lwete mondo otawa kokalo kuom Yesu Kristo? Be wabiro nyiso bidhruok kuom weyo weche e lwet Jehova, kata ka timo kamano ok yot?—Nge. 11:2, New World Translation of the Holy Scriptures.

Muolo Konyowa Bedo gi Paro Makare

Muolo en bedo ng’at ma iye ok wang’ piyo. Ka ochwanywa, okonyowa nano maok iwa wang’, ok wamak sadha, kata chulo kuor. Muolo en kido ma nyago tek. Ber ng’eyo ni, ndiko moro ei Muma gwelo “jo mamuol duto mag piny” ni ‘dwaruru muolo.’ (Zef. 2:3) Muolo otudore gi bolruok kod bidhruok, to oriwo koda kido mamoko bende, kaka ber kod ng’wono. Ng’at mamuol nyalo dongo e weche mag chuny nikech oyie mondo opuonje kendo otiege.

Ere kaka muolo nyalo konyowa e nyagruok gi lokruok manyien e ngimawa? Nyalo bedo ni iseneno ji mathoth ka kawo lokruok e yo marach. Adier en ni, lokruogego nyalo miyowa thuolo mondo Jehova omed tiegowa. Ngima mar Musa lero mano.

Kane en jahigini 40, Musa noyudo osebedo gi kido mabeyo ndi. Nosebedo ng’ama ong’eyo dwaro mag jo Nyasaye kendo nonyiso chuny mar chiwruok. (Hib. 11:24-26) Kata kamano, kane pok Jehova oore mondo otel ne Jo-Israel ka gia Misri, nitie lokruok ma Musa ne nyaka kadhie mondo kite mar muolo omed bedo maber. Nochune ni oa Misri mondo odhi odagi e piny Midian kuom higini 40, kotiyo kaka jakwath maonge gi nyadhi. Mano nomiyo ang’o otimore? Lokruokno nomiyo obedo ng’at maber moloyo. (Kwan 12:3) Nopuonjore keto dwaro mar Jehova motelo ne meke owuon.

Mondo wane kaka Musa ne en ng’ama muol, we wanon ane gima notimore ka Jehova nowacho ni nodwaro kwedo oganda ma nochaye, mondo omi koth Musa obed oganda maduong’. (Kwan 14:11-20) Musa nokwayo ne ogandano ng’wono. Wechene nyiso ni dwache ne en ber mar nying’ Nyasaye koda ber mar owetene, to ok ber mare owuon. Migawo mar Musa ne dwaro ng’a mamuol, mondo obed jatelo kendo jagach mar oganda. Miriam kod Harun ne ong’ur ne Musa, kata kamano Muma wacho ni “ne en ng’at mamuol ahinya maloyo ji duto.” (Kwan 12:1-3, 9-15) Nenore ni Musa nonano e bwo akwedego gi muolo. Gik moko dine obet nade kapo ni Musa ne ok en ng’at mamuol?

E kinde moro, roho mar Jehova nopong’o jomoko, momiyo gichako koro wach. Joshua, ma ne en jatich Musa, noneno ni jogo ne donjo e migawo maok margi. Mopogore gi mano, e yor muolo, Musa to noneno gik moko kaka Jehova ne nenogi kendo ne ok  oparre ni ne idhi maye duong’ ma ne en-go. (Kwan 11:26-29) Ka dine Musa ok muol, be dine orwako lokruokno, ma notimore e chenro mar Jehova?

Muolo nomiyo Musa otiyo maber gi teko maduong’ ma nomiye koda migawo ma ne Nyasaye omiye. Jehova nogwele mondo oidh e wi Got Horeb kendo ochung’ e nyim oganda. Nyasaye nowuoyo gi Musa kokalo kuom malaika kendo noyiere kaka jagach mar singruok. Muolo mar Musa nomiyo orwako lokruok maduong’no, ka pod osiko kaka ng’at ma Nyasaye oyiego.

To nade wan? Muolo en gima nyaka wabedgo mondo watim dongruok ng’ato ka ng’ato. Jogo duto ma omi migepe makende mar bedo gi loch e wi oganda Nyasaye dwarore ni obed mamuol. Muolo monowa timo gik moko e yor ng’awruok sama lokruok otimore e ngimawa, kendo okonyowa kedo kodgi ka wan gi paro makare. Ng’eyo kaka wanyalo timo en gima dwarore. Be wabiro rwako lokruok? Be wabiro kawe kaka thuolo mar timo dongruok? Mano nyalo bedo thuolo makende mar nyago kido mar muolo!

Kinde duto wabiro yudo ni lokruok timore e ngimawa. Seche moko ok yot ng’eyo gimomiyo gik moko timore. Rem ma wan-go ng’ato ka ng’ato koda parruok nyalo miyo neno gik moko kaka Jehova nenogi obednwa matek. Kata kamano, kido kaka mag bolruok, bidhruok, kod muolo biro konyowa rwako lokruok motimore kendo siko ka wan joma Nyasaye oyiego.

[Weche manie ite mar 4]

Bolruok madier miyo wanenore wawegi kaka wan gadier

[Weche manie ite mar 5]

Muolo en gima nyaka wabedgo mondo watim dongruok ng’ato ka ng’ato

[Picha manie ite mar 5]

Nitie lokruok ma Musa ne nyaka kadhie mondo kite mar muolo omed bedo maber