Jehova Dwaro ni Warit Ngimawa Maber

CHIENG’ ma masira malichie moloyo e ngima dhano nochakre apoya nono, Nyasaye Manyalo Duto biro neno ni joge duto moyiego ‘otony.’ (Joel 2:32) Kata kamano, en adier ni, kinde duto Jehova osebedo ka dwaro rito ji kik hinyre. Nikech ‘soko mar ngima ni kode,’ okwano dhano duto kaka chwech mohero, mowinjore oriti.—Zab. 36:9.

Jotich Nyasaye machon ma ne ochung’ motegno ne nigi paro kaka mare e wi ngima. Kaluwore gi Chakruok 33:18, Jakobo kod joode ne otieko wuodhgi matek gi “kuwe.” Jakobo ne ogeno ni Jehova ne dhi rite, kata kamano, en bende ne okawo okang’ mag rito jogo duto ma ne ni kode e wuoth. (Chak. 32:7, 8; 33:14, 15) Kuom tiyo gi puonj manie Muma, inyalo medo rito ngimani koda mar jomamoko. We wanon ane kaka wachni konyo jogo matiyo e gero Ute Romo koda e tije mamoko machalo gi mago chiwo kony kuonde masira.

Wach Rito Ngima e Bwo Chik Musa

Chik Musa ne dwaro ni oganda Nyasaye oluw chenro mag rito ngima. Kuom ranyisi, Ja-Israel ma ne gero ot, ne dwarore ni oger rageng’ e wi tate. Nikech ji nohero dhi e wi tat utegi, rageng’ ne konyogi mondo kik gilwar. (1 Sam. 9:26; Math. 24:17) Kapo ni masira moro notimore nikech ng’ato ne ok oluwo chikno, Jehova ne keto bura kuom wuon odno.—Rapar 22:8.

Chikno bende ne itiyogo kuom wuon jamni mohinyo ng’ato. Kapo ni dhiang’ ne ochwowo ng’ato mi onege, ne dwarore ni wuon-go oneg dheno mondo orit ngima jomoko. Nikech ne ok onyal chamo ring dheno kata use ne jomoko, nego dheno ne dhi miyo olal mwandune. To bang’ ka dhiang’ osehinyo ng’ato to wuon dheno ok otweye mogeng’e kik ohiny ng’ato kendo, ang’o ma ne dhi timore? Kapo ni bang’e dheno onego ng’ato, dheno kaachiel gi wuon-go, ne onego onegi. Chikno ne miyo ng’ato opar matut kapo ni ne en gi tim mar weyo aweya jamni mage.—Wuok 21:28, 29.

Chik bende ne dwaro ni ji oti maber gi gige tich. Thoth Jo-Israel ne tiyo gi le e tong’o yien. Kapo ni wi le ne opusore a e loge mi ogoyo ng’ato ma nochung’ machiegni, ne dwarore ni jatong’ yien oring odhi e dala mar ringoe. Ne dwarore ni obed kuno nyaka tho mar jadolo maduong’, ma ne dhi miyo jal moneko kobothne, odag mopogore gi joode koda dalane kuom higini mang’eny. Chenrono ne dhi puonjo ogandano ni ngima en gima ler e nyim Jehova. Ng’at ma ne neno ngima kaka  Nyasaye, ne rito kendo tiyo gi gigene mag tich e yo maber.—Kwan 35:25; Rapar 19:4-6.

Kokalo kuom chike kaka mago, Jehova ne onyiso maler ni nodwaro ni joge oluw chike ma ne dhi miyo girit ngimagi e pacho kata kamoro amora. Jogo ma ne omiyo jomoko ohinyore kata otho, kata mana kobothnegi, ne nyaka bed gi bura e nyim Jehova. Paro ma Jehova nigo kuom wach rito ngima ji pok olokore. (Mal. 3:6) Pod odwaro ni ji otim gik mamiyo kik gihinyre gin giwegi koda jomamoko. Mani en adier moloyo seche ma wagero kendo rito kata huro kuonde moyang ne lamo madier.

 Rito Ngima Ji Kuonde Gedo

Wakawo tij gero koda rito Ute Romo, ute mitimoe chokruoge mag alwora, koda ofise mag sosaiti kaka migawo makende. Mano bende e kaka wakawo tich mwatimo kuonde ma masira owuokie. Kinde duto, wadwaro ni watim tijewa e yo maber, nikech tich maok otim gi lony maber, kata gibed mana tije matindo, nyalo kelonwa hinyruok koda jomamoko. (Ekl. 10:9) Kuom adier, ka wabedo gi tim mar tiyo ka waritore maber, wanyalo geng’o hinyruok.

Muma wacho kama: ‘Teko mar ringregi e ma yawuowi sungorego; kendo ber mar jo madongo moseti en wich motimo luar.’ (Nge. 20:29) Teko kaka mar rowere dwarore mondo tije mapek otire. To jotich ma wigi otimo luar—jogo molony e tij gedo—timo tije modong’ matindo tindo madwaro lony ka gitiyo gi lwetgi koda gige gedo. Nitie kinde ma jogo makoro hikgi ng’eny, ne tiyo gi teko mar ringregi ka gin rowere e timo tije mapek. Kapo ni in jalo ma eka nyocha ochiwore, rang kaka joma olony e tijno tiyo, kendo luw kaka gichiki. Kapo ni in gi chuny mar puonjruok, owete molony e tij gedo biro puonji gik mathoth. Mago oriwo yo maber minyalo tiyogo gi gik madwaro ni  ng’ato obed motang’ ahinya, koda kaka inyalo ting’o gik mapek. Kuom mano, ibiro tiyo e yo makelo nyak maber, ka irito ngimani, kendo gi mor.

Joma tiyo kuonde gedo nyaka bed motang’ kinde duto. Gik moko nyalo lokore mapiyo. Kama noyudo opie maber motegno, koro nyalo bedo gi bur. Jomoko mitiyogo nyalo bedo ni osechwalo ngas, bao, kata ndowo moting’o rangi. Kapo ni gimoro ogali, inyalo hinyori mayot. Chike moket mag rito ngima dwaro ni jatich matiyo kuonde gedo orwak gigene mag ritruok. Angolo, ogudu matek, koda wuoche mowinjore nyalo geng’i kuom gik mang’eny manyalo hinyo ng’ato e kar gedo. Kata kamano, gigi biro konyi mana ka iritogi maber, kendo irwakogi seche ma itiyo.

Kata obedo ni gige tich mang’eny nyalo nenore ka gima giyot tiyogo, tiyo kodgi maber kendo gi lony dwaro ni otieg ng’ato kendo ong’i gi tiyo kodgi. Kapo ni ionge lony gi gir tich moro midwaro tiyogo, wuo gi owadwa matayo tich. Obiro neno ni iyudo tiegruok madwarore. Bidhruok, tiende ni ng’eyo tong’ mar nyalo ma in-go, en gima ber. Kuom adier, en gima dwarore ahinya mondo kik ihinyri iwuon koda jomamoko e kar gedo.—Nge. 11:2, New World Translation of the Holy Scriptures.

Ji mang’eny hinyore kuonde gedo nikech gihinyo gore piny. Kapok iidho ngas, kata kuonde molos gi bao ma ng’ato nyono, ne ni gitegno maber. Kapo ni ibiro tiyo kuonde minyono molos gi bao kata e wi tado, nyalo dwarore ni itweri gi gik machalo misip motud mamako ng’ato mondo kik olwar kata neno ni nitie rageng’. Kapo ni in gi penjo kuom wach tiyo kuonde man malo, wuo kod jal matayo tich. *

Kaka kwan mar jogo matiyo ne Jehova dhi kamedore e piny mangima, e kaka gero Ute romo koda ute mamoko mitiyogo e lamo madier dwarore ahinya. Jogo matayo tij gero Ute Romo koda tije mamoko ma kamago, nigi ting’ mar rito rombe Jehova ma ohero, matiyo e bwogi. (Isa. 32:1, 2) Kapo ni in gi migawo mar tayo oweteni koda nyimineni e tij gedo, wiyi kik wil ni rito ngima ji en wach maduong’ ahinya. Ne ni kama ugedoe ler kendo ok opong’ gi gik moko maok tigo. E yo mamuol kendo maratiro, par ne jogo mapod onge lony gimomiyo dwarore ni giti ka giritore maber. Kik iyie ne jatich ma rawera kata maok olony, odhi kuonde manyalo miyo gihinyre mayot. Par motelo kuom gik manyalo hinyo jotich, mondo iikgi tiyo ka giritore maber. Ng’e ni, dwarowa maduong’ en tieko tich mwatimo maonge hinyruok.

Kaka Hera Konyo

Gero Ute Romo koda ute mamoko mitiyogo e lamo madier, oriwo timo tich manyalo kelo hinyruok. Kuom mano, jogo matimo tijego nyaka bed motang’. Kuom rito puonj manie Muma, luwo chike moket mag tich, kendo tiyo gi paro maber, ibiro geng’o masira kendo rito jotich weteni kuom hinyruok.

Ang’o momiyo wakawo wach rito ngima ji gi pek maduong’? En hera. Ee, hera ma waherogo Jehova jiwowa kawo ngima kaka gima duong’. Kendo hera ma waherogo ji miyo ok watim atima gik moko e yo manyalo kelonegi hinyruok. (Math. 22:37-39) Kuom mano, weuru mondo watim kar nyalowa mondo wane ni jogo mwatiyogo kuonde gedo omi ritruok maber.

[Weche moler piny]

[Sanduk/Picha manie ite mar 30]

Kaka Inyalo Tiyo Maber gi Ngas

E higa moro mokalo machiegni e piny Amerka, jotich mokalo 160,000 nohinyore nikech goruok piny gi ngas. E wi mano, ji madirom 150 ne otho kuom lwar kamano. Kamoro amora midakie kata itiyoe, kaendi nitie yore manyalo konyi tiyo maber gi ngas mondo iritri kuom gori piny gi ngas.

◇ Kik iti gi ngas ma yiengni kata mokethore, kendo kik item loso ngas ma kamano. Kethe chuth.

◇ Ngas ka ngas nigi pek monyalo ting’o. Ne ni pek mari ka oriw gi mar gigo mitiyogo, ok kal mano ma ngas mitiyogo nyalo ting’o.

◇ Chung ngas kama opie maber. Kik ikete e wi kama yiengni, kaka e wi sanduk.

◇ Pile idh ngas king’iyori kode, kendo itim kamano koda sama ilor.

◇ Kik ibed kata chung’ e okenge ariyo mogik e wi ngas.

◇ Ti gi ngas moluow e wi machielo mana kapo ni borne kalo fut adek e wi tado kata sisi modhi yiengore. Geng’ ngas kuom kier kuom tweye piny kata kuom guro bao moro piny e nyime. Kapo ni ok inyal chungo ngas kitiyo gi yorego, ne ni nitie ng’ama makonigo. Twe ngas gi korka malone mondo igeng’e kuom kier konchiel.

◇ Kik iti gi kuonde ma inyono mag ngas kaka kar sirruok sama itiyo e ndiri mar tich molos gi bao.

◇ Ka itero lweteni koda tiendeni mabor sama itiyo malo mar ngas, inyalo miyo ngas oyiengini. Bed motang’ gi tim kamano. Bed kisudo ngas matin tin kaka dwarore mondo obed machiegni gi kama idwaro chopoe.

◇ Kapo ni itiyo gi ngas e nyim dhoot molor, ket gima nyiso ji ni nitie ng’ama tiyo kanyo, kae to ilore. Kapo ni ok inyal loro dhoodno, ket jal mabiro nyiso ji ni nitie ng’a matiyo kanyo.

◇ Ng’at achiel kende ema onego oidh ngas mana kapo ni olose e yo ma ji ariyo nyalo idhe ka tiyo. *

[Weche moler piny]

[Picha manie ite mar 29]

Chik Musa ne dwaro ni oket rageng’ e wi tado mondo ng’ato kik lwar