Ang’o Momiyo Onego Wami Joma Hikgi Ng’eny Luor?

E GWENGE momanyore gi nam e dala mar California, e piny Amerka, nitie kit yath moro ma en achiel kuom kit yedhe mosego picha moloyo e piny. Iluongo yadhno ni, Lone Cypress. Wachore ni yadhno nigi higini makalo 250. Nikech ong’ere kaka yath ma nano, osetem rito yath maberni e yore mopogore opogore. Kuom ranyisi, osesire gi waya mi ogerne kite molworo tiende.

Yadh Lone Cypress nyalo paronwa wach Jokristo man e kindwa ma hikgi ng’eny, manyiso kido mar nano ahinya. Yo achiel ma gitimogo kamano en kuom lando wach maber. Janabi Joel nokoro ni, ‘jodongo’ ne dhi lando wach manie Muma. (Joel 2:28-32; Tich 2:16-21) Par ane kuom seche mang’eny ma gitiyogo gi kinda mondo gikony jomoko ng’eyo ‘wach maber mar pinyruoth’! (Math. 24:14) Moko kuom jolendo mag Pinyruoth ma hikgi ng’eny osenano kuom higini mogwaro e bwo sand kata pek mamoko. Ka yath ayatha mar cypress inyalo land wachne nikech kido mar nano, mi gerne kite koda waya malwore, donge joma hikgi ng’eny man e kindwa dwarore ni odew kendo omigi luor gi duong’ e okang’ moloyo!

Jehova Nyasaye nochiko joge machon niya: “Chungi ni ng’a ma wiye otimo lwar; kendo luor wang’ ng’a moti.” (Lawi 19:32)  E oganda mar jotich Jehova ndalogi, nitie jogo ma gin ranyisi maber mar joma osebedo kochung’ motegno e ‘wuotho kod Nyasaye’ kuom higini pieche. (Mika 6:8) Kaka gimedo tiyo gi puonj koda chike manie Ndiko, yie wigi motimo lwar bedo “osimbo mar duong’” gadier.—Nge. 16:31.

Jaote Paulo nochiko rawera Timotheo niya: “Kik idhaw ni jaduong’ moro.” Kar mano, ne dwarore ni Timotheo ‘onyise mos kaka donyis wuon mare’ to ‘mon madongo obedgo kaka minene.’ (1 Tim. 5:1, 2) Tiende ni ne dwarore ni Timotheo ‘ochungi’ ni ng’ama wiye otimo lwar. Omiyo, kuom adier Jehova dwaro ni yorwa mar wuoyo onyis ni wan-gi luor ma kamano.

Jo Rumi 12:10 wacho ni, “ng’ato ka ng’ato mondo omi owadgi duong’ moloyo en owuon.” Kuom adier, jorit-kanyakla owinjore omi Jokristo ma hikgi ng’eny luor. Kata kamano, waduto onego wami ng’ato ka ng’ato duong’ moloyo wan wawegi.

En adier ni, joot ma gin wede nigi ting’ makende kodok korka jonyuolgi kata kweregi. E wach yadh Lone Cypress, ji osemanyo yore mag ritogo, kendo gidhi nyime timo kamano. Omiyo, kuom adier onego wamany yore mag neno ni kinde duto jonyuolwa moti kaachiel gi kwerewa omi luor mowinjore. Kuom ranyisi, bedo joma winjo wach e yo maber biro konyowa kik wabed joma ramo ni nyaka to tim gik moko mana kaka wan wawegi wadwaro maok wadewo paro manie chunygi.—Nge. 23:22; 1 Tim. 5:4.

Jogo ma hikgi ng’eny manie kindwa gin joma Jehova ohero ahinya. Ok ojwang’gi. (Zab. 71:18) Chutho, Nyasaye madier tegogi mondo gidhi nyime tiyone ka gichung’ motegno. Mad wabende wadhi nyime siro kendo miyo luor jogo ma hikgi ng’eny.

[Picha manie ite mar 7]

Mana kaka dwarore ni osir yadh “Lone Cypress,” jogo ma hikgi ng’eny bende onego omi luor kod duong’ mowinjore

[En mar]

American Spirit Images/age fotostock