Siki Kitegno Kaka Jakristo Sama Irito Watni Matuwo

BANG’ yudo ni bur ne okuodo but lumbrune, ne opim Kim ma en Janeno, ma oyud ni en gi tuwo mar kansa. * Steve chwore wacho niya: “Kane oyang’e mogol burno, ne otimne Kim thieth miluongo ni, radiotherapy kod chemotherapy. Nikech thieth ma kamano, ne onyosore ahinya. Kata mana tekone mar wuotho nodok chien ahinya.”

Be inyalo paro lit ma Steve nowinjo kuom neno ka jaode mohero chandore gi tuwo manyoso delno? Nyalo bedo ni in gi jatuwo e odi ma nigi tuwo moro marach ahinya, kata ma nigi chandruok nikech bedo ng’at moti. (Ekl. 12:1-7) Ka en kamano, ing’eyo ni mondo omi irit jal mihero e yo maber, nyaka iritri in iwuon. Ka ibedo Jakristo mayomyom, teko mar pachi koda dendi bende nyalo chako dok chien, kendo chiwo ne jatuwo kony mowinjore nyalo tami. Ere kaka inyalo chopo ting’ magi kaka Jakristo maok ikal tong’, sama irito watni matuwo kata moti? Be nitie gima jomamoko e kanyakla mar Jokristo nyalo timo mondo ginyis ni gidewo jomatuwo kaka mago?

Kik Ikal Tong’—e Yo Mane?

Mondo ichop ting’ magi kaka Jakristo maok ikal tong’ kendo mondo ibed gi ngima maber mar del sama irito watni matuwo, dwarore ni iikri mar timo lokruok kendo ichan kaka itiyo gi secheni kod tekoni. Kaluwore gi Ngeche 11:2, loko mar New World Translation of the Holy Scriptures, wacho niya: “Rieko nigi joma obidhore.” E ndikoni, tiend bidhruok en bedo ng’ama ong’eyo tong’ mare owuon. Mondo ine ni ok itim gik mamiyo ikalo tong’ mar nyalo mari, nyalo dwarore ni inon chenro mari kod ting’ ma in-go.

 Steve nonyiso rieko kod bidhruok kuom nono adimba tije ma ne en-go. E wi tij andika ma notimo, bende ne en jachan bura mar jodongo kendo jarit tij lendo e kanyaklagi mar Joneno mag Jehova e piny Ireland. Bende ne en jakanyo mar Komiti Matudore gi Osiptende e gweng’gi. Steve wacho niya: “Kim ne ok ong’ur ni ne atiyo gi thuolo mang’eny e timo migepego. Kata kamano, ne ang’eyo ni natimo mang’eny mokalo nyalona.” Steve notimo nang’o nikech mano? Owacho kama: “Bang’ nono gik moko e yor lamo, nakwayo mondo ogonya kuom bedo jachan bura mar jodongo. Ne adhi nyime tiyo kaka jaduong’-kanyakla, to nikech namiyo jomamoko tije moko mag kanyakla, ne abedo gi thuolo mar rito Kim kaka ne dwarore.”

Bang’ kinde, ngima Kim nochako bedo maber. Steve kod Kim nonono chalgi e yo manyien, kendo nikech chiege noriwe lwedo, Steve nochako odok e migepe ma ne en-go e kanyakla. Steve lero niya: “Waduto ji ariyo wasepuonjore timo gik moko kaluwore gi nyalo marwa nikech tuwono. Agoyo erokamano maduong’ ne Jehova kuom konya kendo ne chiega nikech oseriwa lwedo maonge ng’ur kata obedo ni ngimane ok ber ruok.”

 Non ane bende gima notimore ne Jerry, ma en jarit malworo, kod chiege, Maria. Nochunogi loko chenrogi mondo girit jonyuolgi moseti. Maria wacho niya: “An kod chwora ne wadwaro tiyo kaka jomisonari e pinje mamoko. Kata kamano, Jerry en nyathi achiel kende e odgi, kendo ne dwarore ni orit jonyuolne. Omiyo, ne wayiero mar dak Ireland mondo waritgi. Kuom timo kamano, ne wabedo gi thuolo mar rito wuon Jerry kinde duto ma ne en e osiptal kane pok otho. Sani wan-gi tudruok gi min Jerry odiechieng’ kodiechieng’, kendo wanyalo yudore mapiyo kodwaro kony. Kanyakla ma min Jerry riworego osebedo ka konyowa kendo riwowa lwedo ahinya, ka mano miyo wasiko e tijwa mar lworo.”

Kaka Jomoko Nyalo Konyo

Kane owuoyo kuom gik ma ne inyalo konygo mond liete moseti e kanyakla, jaote Paulo nondiko kama: “Ka ng’ato ok rit wedene, to moloyo ka ok orito joode, ng’atno osekwero yie, kendo orach moloyo ng’at ma ok oyie.” Paulo noparo ne Jokristo wetene ni kane gidhi timo ‘malong’o ne Nyasaye,’ nyaka ne girit jonyuolgi moti kod kweregi giwegi e yor ringruok. (1 Tim. 5:4, 8) Kata kamano, jomoko manie kanyakla nyalo kendo onego ochiw kony madwarore.

Ne ane ranyisi mar Hakan gi Inger chiege, modak e piny Sweden. Hakan wacho kama: “Kane oyud ni chiega nigi kansa, waduto ne wabuok. Kinde duto Inger nosebedo ka nigi ngima maber kendo notegno. Koro nyaka ne wadhi manyo thieth e osiptal pile ka pile, kendo yedhe ma ne otiyogo ne nyoso dende. Inger nosiko e pacho kuom kindeno, kendo ne dwarore ni abed kode ka arite.” Ere kaka jo kanyakla nokonyo Hakan kod Inger?

Jodong-kanyakla nochano mondo otud Hakan kod Inger e yor simo mondo giwinj chokruoge mag Jokristo. E wi mano, owete gi nyimine nosiko ka limogi kendo goyonegi simo. Bende ne gioronegi barupe koda kad. Hakan wacho niya: “Ne waneno kaka owete ne riwowa lwedo koda kony ma Jehova nomiyowa. Rit ma kamano nokonyowa siko ka wategno e chopo ting’ ma wan-go kaka Jokristo. En gima ber ni Inger osewinjo maber, kendo koro wanyalo chopo e chokruoge mag kanyakla e Od Romo.” Ka jo kanyakla otimo kar ma ginyalo e konyo joma tuwo koda joma oti e kanyaklagi, ginyiso ni gin ‘osiep mohero ji ndalo duto kendo omine monyuol mondo okony chieng’ chandruok.’—Nge. 17:17.

Jehova Mor gi Kinda Munyiso

Rito wat matuwo nyalo olo ng’ato gadier. Kata kamano, Ruoth Daudi nondiko kama: “Ojahawi jalo ma keto chunye koparo jo modhier,” kaka ng’ama dwaro kony nikech tuwo.—Zab. 41:1.

Ang’o momiyo joma rito kata makonyo jo matuwo kata machandore nyalo bedo mamor? Ngeche 19:17 wacho kama: “Ng’a makecho jochan oholo ni Jehova; kendo nochulne gi mosetimo maber.” Nyasaye madier dewo ahinya jotichne matuwo momakore kode chuth, kendo ogwedho jalo matimonegi gimaber. Daudi jandik-zaburi, nowero kama: “Jehova notege [jal ma kamano] e kitanda mar midekrene: ipedho kar nindone duto kotuwo.” (Zab. 41:3) Wanyalo bedo gadier ni kapo ni jal machiwo kony oyudo pek kata masira en owuon, Jehova biro konye.

Mano kaka en gima ber ng’eyo ni Jehova Nyasaye neno kendo oyie gi gik mwatimo e rito wedewa matuwo! Kata obedo ni chiwo kony ma kamano nyalo dwaro kinda korka korwa, Ndiko singonwa ni “mago e misengini ma Nyasaye morgo.”—Hib. 13:16.

[Weche moler piny]

[Picha manie ite mar 18]

Chop ting’ magi kaka Jakristo kendo yie gi kony ma jomoko chiwo