Dhiuru Nyime Tego Kanyakla
Dhiuru Nyime Tego Kanyakla
“Horeuru ng’ato gi ng’ato, kendo tegreuru.”—1 THES. 5:11.
1. Gin gweth mage mabedoe nikech bedo jakanyo mar kanyakla mar Jokristo, to kata kamano pek mage mapod nyalo bedoe?
BEDO jakanyo mar kanyakla mar Jokristo en gweth maduong’ ahinya. In gi winjruok maber gi Jehova. Tenruok kuom Wachne mondo otayi geng’i kuom gik maricho mayudo jogo modak e ngima maok mar Jokristo. Joma olwori gin osiepe madier madwaroni ngima maber. Ee, gwethgo ng’eny. Kata kamano, thoth Jokristo nyagore gi chandruok mopogore opogore. Nyalo dwarore ni okony moko kuomgi korka winjo tiend weche matut manie Wach Nyasaye. Jomoko tuore kata chunygi onyosore, kata nyalo bedo ni gichandore nikech ne ging’ado paro kuom weche moko e yo marach. Kendo chunowa ni waduto wadag e piny ma ji ok oheroe Nyasaye.
2. Ere kaka wanyalo timo sama owetewa ni e bwo chandruok kata pek moko, to nikech ang’o?
2 Onge ng’ato kuomwa mohero neno ka Jakristo wadwa hinyore kata chandore. Jaote Paulo noporo kanyakla gi del, kendo nowacho ni “ka fuoni achiel neno masira, fuonde duto neno masira kode.” (1 Kor. 12:12, 26) E chal ma kamago, onego watim matek e konyo owete gi nyiminewa. Nitiere Ndiko mogwaro manyiso kaka jo kanyakla nokonyo jomoko kedo gi tembe kendo loyo pek. Kaka koro wadwa nono wechego, par ane kaka inyalo chiwo kony e yore machalo gi mago ma iwuoyoe. Ere kaka inyalo konyo oweteni mondo gidhi nyime tiyo ne Jehova, ka mano miyo itego kanyakla mare?
“Ne Gikawe”
3, 4. Akula gi Priskilla nokonyo Apollo nade?
3 Kane Apollo ochako dak e piny Efeso, noyudo osebedo jalendo ma jakinda. Bug Tich Joote wacho kama: “Nopong’ gi chuny ma jakinda. Nowacho, kendo nopuonjo kare, weche ma kuom Yesu, to nong’eyo batiso mar Johana kende.” Bedo ni Apollo ne ok ong’eyo batiso mitimo ‘e nying Wuoro gi Wuowi kod roho maler,’ nyiso ni samoro ne olendne gi jopuonjre Johana Jabatiso kata gi jolup Yesu kane pok ochopo Pentekost 33 E Ndalowa. Kata obedo ni Apollo ne nigi kinda, nitiere puonj ma ne ok ong’eyo tiendgi. Ere kaka riwruok gi Jokristo wetene ne okonye?—Tich 1:4, 5; 18:25; Math. 28:19.
4 Ka Akula kod Priskilla nowinjo Apollo kawuoyo gi chir e sunagogi, ne gikawe kendo ne gipuonje moloyo. (Som Tich Joote 18:24-26.) Gima ne gitimono ema ne en tim mowinjore manyiso hera. En adier ni nyaka bed ni Akula kod Priskilla nokonyo Apollo e yo manyiso rieko, maok gimi one ni ijare. En mana ni Apollo ne ok ong’eyo kaka kanyakla mar Jokristo mokwongo nochakore. Kendo nyaka bed ni Apollo ne mor ahinya gi osiepene manyien kuom wuoyo kode e wi weche momedore ma ne dwarorego. Ka koro en gi weche momedoregi, Apollo “nokonyo ahinya” owetene ma ne ni Akaya kendo nolendo gi chir.—Tich 18:27, 28.
5. En kony mane manyiso hera ma gana mang’eny mag jolendo mag Pinyruoth chiwo, to mano osekelo nyak mage?
5 Thoth joma nie kanyakla mar Jokristo masani, mor ahinya gi jogo ma nokonyogi ng’eyo Muma. Jopuonjre Muma mogwaro kaachiel gi joma nopuonjogi oseloso osiep masiko e kindgi. Kinde mang’eny, konyo ji mondo ong’e adiera dwaro chano puonjruok kodgi maok bare kuom dweche mogwaro. Kata kamano, jolendo mag Pinyruoth oikore mar chiwore nikech ging’eyo ni mano en gima nyalo miyo ng’ato otho kata oyud ngima. (Joh. 17:3) Mano doko mor manade neno ka ji rwako adiera, dak kaluwore gi adierano, kendo tiyo gi ngimagi e timo dwaro mar Jehova!
‘Ne En gi Pak’
6, 7. (a) Ang’o momiyo Paulo noyiero Timotheo mondo obed jakonyne e wuoth? (b) En dongruok mane ma ne okony Timotheo timo?
6 Kane jaote Paulo gi Sila olimo Lustra e wuodhgi mar ariyo mar misonari, ne giyudo kuno rawera miluongo ni Timotheo, ma samoro dibed ni ne en jahigini chiegni 20 kata mokalo mano matin. “Jali ne ni gi pak e kind owete man Lustra gi Ikonio.” Yunike min Timotheo, kod Lois dane ne gin Jokristo, mopogore gi wuon mare. (2 Tim. 1:5) Nyalo bedo ni Paulo nong’ere gi joodni e limbene mokwongo e gwengego e higini mogwaro ma nosekalo. To koro jaoteno ne mor gi Timotheo nikech ne nenore ni ne en rawera makende. Omiyo, ka buch jodong-kanyaklagi ne opwodhe, Timotheo nobedo jakony mar Paulo e tij misonari.—Som Tich Joote 16:1-3.
7 Timotheo ne nigi gik mogundho ma ne odhi puonjore kuom nyawadgi ma ne duong’ne. Kendo nopuonjore gadier, e okang’ ma kuom kinde, Paulo ne nyalo oro Timotheo mondo olim kanyakla mopogore opogore e loye. Kuom higini 15 kata mokalo mano, ma Timotheo nobedo jakony Paulo, rawera ma chon ne onge lonyni kendo ma nenore ni ne nigi luoro matin, notimo dongruok nyaka ochopo e okang’ mar bedo jarit mong’ith ahinya.—Fili. 2:19-22; 1 Tim. 1:3.
8, 9. Ang’o ma jo kanyakla nyalo timo e jiwo rowere? Chiw ane ranyisi.
8 Thoth rowere ei kanyakla mar Jokristo masani, nigi thuolo maduong’ mar timo dongruok. Ka ojiwgi kendo oritgi gi joma keto ranyisi maber e tiyo ne Jehova, roweregi nyalo bedo gi chuny mar dwaro kendo yudo migepe momedore e kind oganda Jehova. Ng’i ane ei kanyaklau! Be ineno ka e iye kanyo nitie rawera moro amora manyalo chiwore kaka Timotheo notimo? Kikonyogi kendo ka ijiwogi, ginyalo bedo jopainia, jood Bethel, jomisonari, kata jorit-malworo. Ang’o minyalo timo mondo ikonygi dwaro chopo e migepego?
9 Martin, ma osebedo jaod Bethel kuom higini 20, wuoyo gi mor kuom kaka jarit-alwora moro ne ojiwe higini 30 mosekalo kane gin kanyachiel e tij lendo. Jaritno nowuoyo gi siso kuom kaka en owuon nomor tiyo e Bethel kane en rawera. Nojiwo Martin mondo onon kabe nonyalo tiyo ne riwruok mar oganda Jehova e migawo ma kamano. Martin neno ni gik ma ne giwuoyoe ma wiye ok diwilgo, nomiyo bang’e otimo yiero ma kamano. Donge in iwuon inyalo timo ne rowere maber ka iwuoyo kodgi e wi bedo gi gombo mar dwaro tiyo ne Nyasaye?
“Duoguru Chuny Jo ma Luor”
10. Epafrodito nowinjo nade, to nikech ang’o?
10 Epafrodito ne odhi e wuoth mabor wuok Filipi nyaka Rumi mondo olim jaote Paulo, ma ne ni e twech nikech yie mare. Ne odhi kaka jal ma Jo-Filipi ooro. Ne ok oting’o mana mich kende moa kuom Jo-Filipi ne jaote Paulo, to bende nochano mar dak kode mondo otim duto ma ne onyalo e konyo Paulo e kinde matekno. Kata kamano, kane ne en Rumi, Epafrodito nobedo matuwo “ma both otho.” Nikech noneno ni orem e chopo migawo ma ne en-go, chuny Epafrodito nonyosore ahinya.—Fili. 2:25-27.
11. (a) Ang’o momiyo ok onego wawuor ka jomoko ei kanyaklawa obedo gi nyosruok mar chuny? (b) Ang’o ma Paulo nochiko mondo otim kuom wach Epafrodito?
11 Chandruok mopogore opogore tinde miyo ji bedo gi parruok mamiyo chunygi nyosore. Nonro mar World Health Organization wacho ni ji madirom 1 kuom 5 nyalo bedo gi nyosruok mar chuny e kinde moro e ngimagi. Ma en gima timore ne oganda Jehova bende. Chandruok mag rito joot, tuoche, gi mamoko, nyalo miyo chuny ng’ato onyosre. Ang’o ma Jo-Filipi ne nyalo timo mondo gikony Epafrodito? Paulo nondiko kama: “Rwakeuru kuom Ruoth gi mor maduong’, kendo jo ma kamagi miuru duong’, nimar ne both otho kotiyo ni Ruoth, ka ok odewo ngimane mondo ochop gi ma norem kuom gik ma nuorona.”—Fili. 2:29, 30.
12. Ere kama joma chunygi onyosore nyalo yudoe hoch?
12 Wan bende onego wajiw owetewa ma chunygi ool kendo onyosore. Onge kiawa ni nitie gik mabeyo mwanyalo jiwogie kuom tijgi ne Jehova. Samoro gin joma osetimo lokruok madongo e ngimagi mondo gibed Jokristo kata mondo giti ne Nyasaye kuom thuologi duto. Wamor gi kinda ma kamago kendo wang’eyo ni Jehova bende timo kamano. Ka bedo moti kata tuoche geng’o jomoko kuom timo duto ma chon ne ginyalo, pod dwarore ni wamigi luor kuom higini duto ma gisetiyogo ne Nyasaye. Kata bed ni en chandruok mane, puonj ma Jehova chiwo ne joge duto moluore en niya: “Duoguru chuny jo ma luor, siruru jo mayomyom, kendo uter mos ni ji duto.”—1 Thes. 5:14.
“Uwene Kendo Uhoye”
13, 14. (a) En okang’ mane maduong’ ma kanyakla mar Jo-Korintho nokawo, to nikech ang’o? (b) Okang’ mar golo jalo oko mar kanyakla nobedo gi nyak mane?
13 Kanyakla Jo-Korintho e kinde Jokristo mokwongo, noyudo wach ni jal moro ne terore maok olok chunye a e richone. Timne ne nyalo ketho ler mar kanyakla kendo ne en gima lich kata mana ne jopiny. Omiyo, Paulo nochiko kare ni mondo ogole e kanyakla.—1 Kor. 5:1, 7, 11-13.
14 Okang’ ma ne okawno ne obedo gi nyak maber. Kanyaklano noyudo rit kuom gik ma ne nyalo kethe, kendo jal ma ne odonjo e richono noduogo moloko chunye gadier. Nikech jalo nosetimo gik manyiso ni oseweyo richone, Paulo nonyiso e barupe mar ariyo ne kanyaklano ni jalo onego oduoki. Kata kamano, ok mano kende ema ne dwarore. Paulo nochiko kanyaklano bende ni mondo ‘giwene kendo giho [jaricho molokoreno], mondo kik kuyo maduong’ ohewe.’—Som 2 Jo Korintho 2:5-8.
15. Ere kaka onego wane joricho molokore kendo ma oduoki e kanyakla?
15 En ang’o mwapuonjore kuom wachno? En gima kelonwa kuyo neno ni jomoko nyaka gol oko mar kanyakla. Nyalo bedo ni gisekelo nying marach ne Nyasaye koda ne kanyakla. Nyalo bedo ni gisetimo richo kata mana ne wan wawegi. Kata kamano, ka jodongo moketi mondo onon wachno oneno ni, kaluwore gi kaka Jehova chiko, onego oduok jaricho molokore ei kanyakla, mano nyiso ni Jehova osewene. (Math. 18:17-20) Donge onego waluw ranyisi mare? Kuom adier, bedo gi chuny mager kendo maok wang’won ne jomoko nyalo chalo ka gima wakwedo Jehova. Mondo omi wajiw kuwe kod winjruok e kanyakla mar Nyasaye kendo mondo Jehova oyie kodwa, donge onego wami joricho moloko chunygi gadier kendo ma oduoki ei kanyakla ‘ng’eyo ni waherogi’?—Math. 6:14, 15; Luka 15:7.
“Okonya e Tich”
16. Ang’o momiyo chuny Paulo nochwanyore nikech Mariko?
16 Ndiko machielo nyisowa ni ok onego wamak sadha ne joma osechwanyowa. Kuom ranyisi, Johana Mariko nochwanyo jaote Paulo ahinya. E yo mane? Kane Paulo gi Barnaba ochako wuodhgi mar misonari, Mariko nodhi kodgi mondo okonygi. Kata kamano, kane gichopo kamoro e kor wuodhgi, Johana Mariko noweyo jowadgi mi nodok pacho, to ok nyiswa gimomiyo. Wachno nochwanyo chuny Paulo ahinya ma kane gichano wuodhgi mar ariyo, ywaruok nobedo e kinde gi Barnaba kuom kabe nowinjore Mariko odhi kodgi kendo. Nikech gima nosetimore e wuodhgi mokwongo, Paulo ne ok dwar ni Mariko odhi kodgi.—Som Tich Joote 13:1-5, 13; 15:37, 38.
17, 18. Ere kaka wanyalo ng’eyo ni ywaruok ma ne nitie e kind Paulo gi Mariko ne olosi, to en ang’o mwanyalo puonjore kuom wachni?
17 Nenore maler ni Mariko ne ok oweyo okang’ ma Paulo nokawono onyos chunye, nikech ne odhi nyime gi tije mar misonari e alwora machielo kaachiel gi Barnaba. (Tich 15:39) Gima nyiso ni nosiko kochung’ motegno kendo migeno, nenore e weche ma Paulo nondiko kuome higini moko bang’e. Paulo, ma koro ne nie twech Rumi, noluongo Timotheo kuom ndikone barua. E barua nogono, Paulo nowacho niya: “Kaw Mariko ubigo, nikech okonya e tich.” (2 Tim. 4:11) Ee, Paulo koro ne neno ni Mariko nosetimo dongruok.
18 Nitie gima wanyalo puonjore kae. Mariko nonyago kido mag bedo jamisonari maber. Ne ok ochwanyore nikech okang’ ma Paulo nokawone motelo. En koda Paulo, giduto ne gin chwo ma nigi winjruok maber gi Jehova, kendo ne ok gibedo gi sigu masiko e kindgi. Kar mano, bang’e Paulo noyango Mariko kaka jakonyne e tich. Omiyo, ka owete oloyo ywaruok manie kindgi mi wachno okalo, gima ber timo en weyo mako sadha kendo dhi nyime konyo jomoko otim dongruok e adiera. Bedo gi paro maber e wi jomoko tego winjruok ei kanyakla.
Kanyakla Kaachiel gi In, Tegreuru
19. En kony mane ma jokanyo duto mag kanyakla mar Jokristo nyalo chiwo, ng’ato ne nyawadgi?
19 E ‘kinde mag chandruokgi,’ dwarore ni owete koda nyimine manie kanyakla okonyi, kendo gin bende gidwaro kony mari. (2 Tim. 3:1) Kata obedo ni Jakristo ka Jakristo ok nyal ng’eyo kinde duto gima onego otim e kedo gi pek mag ngima, Jehova to ong’eyo. Kendo onyalo tiyo gi joma opogore opogre ei kanyakla—moriwo nyaka in—e konyo jomoko luwo yo mowinjore. (Isa. 30:20, 21; 32:1, 2) Omiyo, tem matek iluw puonj koda jip ma jaote Paulo chiwo! “Horeuru ng’ato gi ng’ato, kendo tegreuru mana kaka utimo koroni.”—1 Thes. 5:11.
Inyalo Dwoko Nade?
• Ang’o momiyo tego jomoko e kanyakla mar Jokristo en gima dwarore?
• Gin pek machal nade ma inyalo konyoe jomoko loyo?
• Ang’o momiyo kony ma jomamoko chiwonwa ei kanyakla dwarore?
[Penjo mag Puonjruok]
[Picha manie ite mar 11]
Ka nyawadwa ma Jakristo kedo gi chal moro matek, wanyalo tege
[Picha manie ite mar 12]
Thoth rowere manie kanyakla mar Jokristo masani nigi thuolo maduong’ mar timo dongruok