Hera Oriwogi Ripod Romo mar Higa ka Higa

JI NOMOR ahinya bedo e romo mitimo higa ka higa, ma ne otim e Od Chokruoge Alwora mar Joneno mag Jehova e dala mar Jersey City, New Jersey, e piny Amerka. E okinyi mar Oktoba 3, 2009, ji mokalo 5,000 ne ochokore ne romo mar nyadi 125 mitimo higa ka higa mar riwruok mar Watch Tower Bible and Tract Society of Pennsylvania nyaka ne chake. Gana mang’eny mag jomamoko ne otudi mondo owinj kata neno programno ka gin e ute mamoko adek mag Bethel e piny Amerka koda gi mano manie piny Kanada. Kuondego duto, ji 13,235 ma ne oriwore e hera ma giherogo Jehova, ne omor gi chokruogno ma nokawo seche adek.

Geoffrey Jackson ma en achiel kuom jokanyo mag Bura Maduong’ ema ne en jakom. Ne ochako program gi rwako jower ma gin jood Bethel ma nowero wende manie buk manyien mar wer. Jal miluongo ni David Splane mabende en achiel kuom jokanyo mag Bura Maduong’ ema notayo jowergo, kendo nowuoyo machuok kuom ber mar wer e lamo maler. Ne ogwel jowinjo mondo ower wende adek manyien e romono; mokwongo jower ma Bethel ema nochako, kae to jowergo kaachiel gi jowinjo nower kanyachiel. Tiyo gi jowergo ne en mana mar romo makendeno; ok onego okawe kaka ranyisi monego oluw sama iwer ei kanyakla, chokruoge mag alwora, kata mag distrikt.

Ripode Moa e Ofise Manie Pinje Mamoko

Jokanyo mag Komiti mag Ofise moa e pinje abich ne ochiwo ripode mag ofise ma giaye. Kenneth Little nowacho ni, Kanada biro chako goyo thoth gasede ne piny Amerka koda Kanada, omiyo mano dhi kelo medruok mar gocho nyadipar ne ofisno. Mondo mano onyalre, giseng’iewo masin manyien mar goyo gasede mabiro tiyo odiechieng’ gotieno kuom seche 16 e odiechieng’ achiel.

Reiner Thompson nowuoyo kuom tij Pinyruoth madhi nyime e piny Dominican Republic, to Albert Olih nowuoyo kuom tijwa e piny Nigeria. Emile Kritzinger moa e piny Mozambique nolero ni bang’ higini pieche ma gisebedo e bwo sand, e higa 1992 ne oyang Joneno mag Jehova kaka riwruok ma sirkal oyiego. E pinje adekgi duto, kwan mar jolendo osemedore ahinya. Viv Mouritz moa e ofis manie piny Australia, ne owuoyo kuom dongruok matimore e piny East Timor, manie e bwo ofis mar Australia.

Komiti mag Bura Maduong’

E higa 1976, tije duto mag Joneno mag Jehova ne oketi e bwo komiti auchiel mag Bura Maduong’. Bang’e, jokanyo mag kweth mar rombe mamoko ne oket kaka jokony mag komitigo. Sani koro nitie owete 23 makonyo e tije mitimo. Ne owuo gi auchiel kuomgi. Ka oriw karachiel higini ma gisetiyogo kuom thuologi duto e tij Nyasaye, gin higini 341 tiendeni higini 57 kama kuom ng’ato ka ng’ato.

Don Adams, ma ne obedo jaod Bethel e higa 1943, ne olero ni Komiti mar Jocheno oting’o jogo ma gin jochan komiti abich mamokogo, kendo gin ema gineno ni komiti abichgo duto tiyo kanyachiel e yo maber. Komitino ema kawo okang’ ka chandruoge madongo, sand, kes mag kot, masiche, kata ka weche mamoko oyudo Joneno mag Jehova e piny mangima.

Dan Molchan nolero tij Komiti mar Jotich, ma gin ji 19,851 e piny mangima. David  Sinclair nowuoyo kuom kaka Komiti mar Gocho rito tij ng’iewo masinde koda gik mitiyogo e ofise manie pinje mamoko. Kae to, Robert Wallen, ma osetiyo kaka jaod Bethel kuom higini madirom 60, nowuoyo kuom kaka Komiti mar Lendo tayo tij oganda Jehova e lendo koda ei kanyakla. William Malenfant nowuoyo machuok kuom tich matek ma Komiti mar Puonjo timo e loso program mar chokruog-distrikt. Mogik, John Wischuk nolero kaka Komiti mar Ndiko rito tij iko adimba puonj migoyo e bugewa. *

Ndiko mar Higa 2010 Wuoyo Kuom Hera

Twege adek ma ne oluwo ne ogol gi jokanyo mag Bura Maduong’. Gerrit Lösch ema nochako kopenjo ni, “Be idwaro ni jomoko oheri?” Ne owacho ni dhano duto dwaro ni ohergi kendo waduto wawinjo maber konyiswa hera. Jehova ne ochweyowa nikech hera, omiyo wangima nikech herane maonge guondo. Gima duong’ mamiyo walendo kendo puonjo ji en nikech wahero Jehova.

Wanyiso hera maluwore gi kaka Nyasaye dwaro ok mana ne jowadwa, to ne wasikwa bende. (Math. 5:43-45) Ne ojiw jowinjo mondo opar kuom gik ma ne otimne Yesu nikech wan, kuom ranyisi, ne ochwade, ne ojare, ne ong’ul olawo kuome, kendo ne ochwowe. Kata obedo ni ne otimne mago, ne olemo ne askeche ma nogure. Donge ng’eyo mano miyo wahere kata moloyo? Bang’e, Owadwa Lösch nolando ni ndiko mar higa 2010 en 1 Jo Korintho 13:7, 8: ‘Hera timo kinda e weche duto. Hera ok rem.’ Ok wan mana gi thuolo mar dak nyaka chieng’ kende, to bende mar hero kendo mondo oherwa nyaka chieng’.

Be Iriembo Maonge Mafuta Moromo?

Samuel Herd nochako twak mare gi ranyisi. Wawach ni osiepni moro ogweli mondo udhi kode e wuoth moro mar kilomita 50 gi mtoke. Ka in e mtoka, ifwenyo gima nyiso ni mafuta odong’ matin to rumo. Iwacho ne osiepnino ni mafuta chiegni rumo. Onyisi ni kik idew; pod odong’ lita ang’wen e tangi. Kata kamano, mapiyo nono mafuta rumo. Be en gima ber ‘riembo maonge mafuta moromo’ king’eyo ni mafuta nyalo rumoni? Mano kaka neno ni iriembo mtoka ma nigi mafuta moromo en gima ber! E yor ranyisi, wan bende dwarore ni wabed gi mafuta moromo, matiende ni ng’eyo ma wan-go kuom Jehova.

Mondo wachop okang’ ma kamano, dwarore ni wasiki ka wamedo mafuta kendo timo kamano pile. Nitie yore ang’wen mag timo kamano. Mokwongo, bedo gi puonjruok Muma ma marwa wawegi, kendo ng’eyo weche manie Muma kuom somogi odiechieng’ kodiechieng’. Onego wawinj tiend weche mwasomo, maok  mana some asoma kende. Mar ariyo, dwarore ni wati maber gi kinde mag Lamo mar Joot. Be wakawo thuolo juma ka juma mar medo mafuta koso waketo mana mafuta matin maok oromo? Mar adek, puonjruok mar kanyakla kod dhiyo e chokruoge. Mar ang’wen, bedo gi kinde mag paro matut kuom yore mag Jehova. Zaburi 143:5 wacho niya: “Aparo ndalo machon; abudho gi paro kuom timni duto.”

“Jo Makare Norieny”

John Barr ema nogolo twak mar adek kendo mogik, ma ne olero ngero mar ngano kod ogolo. (Math. 13:24-30, 38, 43) Ngerono wuoyo kuom “keyo” ma en kinde ma ichokoe “nyithind pinyruoth,” to ogolo iketo tenge mondo odhi owang’gi.

Owadwa Barr nonyiso maler ni tij chokono ok bi dhi nyime mochwere. Nowuoyo kuom Mathayo 24:34, mawacho kama: “Tieng’ni ok norum ngang’ kapok magi duto otimore.” Nyadiriyo ne osomo wachni: “Nenore ni tiend gima Yesu ne wacho ne en ni ngima Jokristo mowal kuom roho ma ne nitiere kane ranyisi ochako nenore ayanga e higa 1914, ne dhi makore gi ngima Jokristo mowal mamoko ma ne dhi neno chakruok mar masira maduong’.” Ok wang’eyo chutho bor mar “tieng’ni,” to kata kamano oting’o grube ariyo ma kinde mar ngimagi ne dhi makore. Kata obedo ni Jokristo mowal hikgi opogore opogre, jogo manie grube ariyo maloso tieng’no, gin joma ngima e kinde moro achiel e ndalo mag giko. Mano kaka en gima morowa ng’eyo ni Jokristo mowal ma gin joma ngima e kinde moro achiel to hikgi tin ne mago ma hikgi ng’eny ma nofwenyo ranyisino e kinde ma ne oyangore maler e higa 1914, ok bi tho kapok masira maduong’ ochakore!

“Nyithind pinyruoth” rito gi ilo gweth margi mar polo, kata kamano waduto nyaka wadhi nyime chung’ motegno, ka warieny nyaka giko. Mano kaka en thuolo majaber neno kaka ichoko “ngano” e kindewagi.

Bang’ wer mogik, Theodore Jaracz ma en achiel kuom jokanyo mag Bura Maduong’ notieko gi lamo. Mano kaka romo mitimo higa ka higa nojiwo ji ndi!

[Weche moler piny]

[Sanduk manie ite mar 5]

SKUL MAR JODONGO

E romo mitimo higa ka higa, Anthony Morris, achiel kuom jokanyo mag Bura Maduong’, nolando ni tiegruok madhi nyime biro bedoe ne jodong-kanyakla. E piny Amerka, skul mar tiego jodongo ne ochakore e chak higa 2008 e dala mar Patterson, New York. Mano noyudo ka klas mar 72 eka oa rumo, kendo nyaka chop sani, osetieg jodongo 6,720. Pod odong’ jodongo mathoth monego otiegi. E piny Amerka kende, nitie jodongo 86,000. Omiyo, Bura Maduong’ ne oyie mondo otim skunde mamoko e Brooklyn, New York, chakre Desemba 7, 2009.

Kuom dweche ariyo, ne idhi tieg jorit malworo ang’wen mondo obed jopuonj mar skul mitimo Patterson. Jorit ang’wen-gi ne ibiro ter mondo gidhi gipuonj e skul mitimo Brooklyn, kae to ne idhi tieg ang’wen mamoko bende. Bang’e, ang’wen ma achien-gi ne dhi puonjo Brooklyn, to ang’wen mokwongoka ne dhi puonjo e skunde ma ne idhi tim e Ute Chokruoge Alwora koda e Ute Romo. Ne idhi nwo timo kamano nyaka chop kama nitie jopuonj 12 mapuonjo skunde auchiel juma ka juma e dho Ingresa e piny Amerka. Bang’e, ne idhi tieg jopuonj ang’wen mabiro puonjo e dho Spain. Skundno ok bi kawo kar Skul mar Pinyruoth; to gimomiyo itime en ni mondo okony jodongo omed timo dongruok e yie. Ofise manie pinje mamoko biro chako timo skunde maggi e Ute Chokruoge Alwora koda e Ute Romo chakre Septemba 1, 2010.

[Picha manie ite mar 4]

Ne ochak romoni mitimo higa ka higa gi wer moa e bugwa manyien mar wer, “Mwimbieni Yehova”