Kaka Inyalo Nyagori Kapo ni Jaodi Ondhogi

NOYUDO Margarita gi Raúl chwore osetiyo kanyachiel ne Jehova higini mang’eny kuom thuologi duto. * Kata kamano, matin nono bang’ nyuol nyathigi mokwongo, Raúl nochako weyo winjruokne gi Jehova obed mayomyom. Gikone, Raúl nochako dak e ngima mar anjawo, mi nogole e kanyakla mar Jokristo. Margarita wacho ni: “Kane magi duto otimore, ne chalna mana ni ne adhi tho. Chunya nonyosore kendo ne ok ang’eyo gima ne onego atim.”

Mapiyo bang’ Jane donjo e ngima mar kend, chwore notimone tim andhoga e yo mopogore. Chwore nochako bedo gi tim mar

goye. Jane wacho ni: “Chieng’ ma ne ogoya mokwongo, ne abuok, kendo wichkuot ne omaka. Mae nobedo timne mapile, kendo ne ohinyo saya ni mondo awene. Ne aparo ni kaka Jakristo, ne an gi ting’ mar ng’wonone kendo weyone chuth kinde duto. Ne aparo bende ni hulo chandruokwano ne ng’at machielo, kata mana ne jodong-kanyaklawa, ne dhi nenore ka tim andhoga. Timne mar goya to aweyone, ne odhi nyime kuom higini mogwaro. Kuom kindeno duto, ne aparo ni nitie gima ne anyalo timo mondo ami chwora ohera. Ka gikone ne oweya mi ojwang’a kaachiel gi nyarwa, naneno ni an jaketho, kaparo ni ne onego obed ni atimo kata wacho weche moko mondo eka kend marwa osiki.”

 Mana kaka Margarita kod Jane, nyalo bedo ni in gi parruok e chunyi, chandruok mar pesa, kendo winjruok mari gi Nyasaye ok ber ahinya, nikech chwori ma ne ondhogi. Kata nyalo bedo ni in dichwo masani nie chandruok nikech chiegi ok osebedo jaadier kodi. Onge kiawa ni wadak e “kinde mag chandruok,” mana kaka Muma nokoro. Wach mokorno nyiso ni e “ndalo mag giko,” riwruok mar joot ne dhi bedo gi chandruok, ka hera monego obedie e kind wede bedo maonge kuom ji mang’eny. Jomoko ma ne dhi wacho ni gitiyo ne Nyasaye ne dhi bedo mana joma wuondore. (2 Tim. 3:1-5) Chandruogegi yudo koda Jokristo madier; omiyo, en ang’o manyalo konyi mondo inyagri maber kapo ni ondhogi?

Nenri Iwuon Kaka Jehova Neni

Motelo, gima nyalo bedoni matek en yie ni ng’at mihero nyalo timoni gima chwanyi ahinya kamano. Inyalo kata mana chako keto ketho kuomi kiparo ni in ema imiyo otimo tim marachno.

Kata kamano, ng’e ni jal moro ma Yesu nogeno kendo nohero, ne ondhoge kata obedo ni Yesu ne en ng’at makare chuth maonge richo. Yesu noyiero jootene ma ne gin joma ne chiegni kode moloyo, bang’ lamo kod paro matut. Gie kindeno, giduto ji 12 ne gin jotich Jehova minyalo gen. Kuom mano, onge kiawa ni chuny Yesu nobedo malit ahinya kane Judas olokore mobedo “jandhokne.” (Luka 6:12-16) Kata kamano, Jehova ne ok oketo ketho mag Judas kuom Yesu.

En adier ni e kend, onge jaot makare chuth. Giduto ji ariyo gibiro both mi gitim gima ok kare. Ka otelne gi roho mar Nyasaye, jandik-zaburi nondiko gadier kama: “A Jehova, ka da irango tim mamono, A Ruoth, ng’a ma dibedi maler e nyimi?” (Zab. 130:3) E luwo ranyisi mar Jehova, joma nie kend onego obed gi chuny mar weyore richo e kindgi ng’ato gi nyawadgi.—1 Pet. 4:8.

Kata kamano, “ng’ato ka ng’ato kuomwa nowach wach man kuome owuon ni Nyasaye.” (Rumi 14:12) Kapo ni jaot osebedo gi tim mar yenyo kata timo gik mahinyo nyawadgi, jaot ma jakethono ema nyaka bed gi bura e nyim Jehova. Jehova kwedo gero kod ayany, omiyo onge gimoro ngang’ manyalo miyo ng’ato ratiro mar timo ne jaode tim marach kamano maok nyis hera koda luor. (Zab. 11:5; Efe. 5:33; Kol. 3:6-8) Kuom adier, kapo ni Jakristo nigi tim mar bedo gi mirima kod ich wang’ ma nyadinwoya, to otamore lokore, nyaka gole oko mar kanyakla mar Jokristo. (Gal. 5:19-21; 2 Joh. 9, 10) Jaot ok onego opar ni otimo marach ka otero wachno ne jodongo kuom tim ma kamano maok owinjore gi Jokristo. Kuom adier, Jehova kecho jogo ma itimonegi marach kamano.

Ka jaot odonjo e terruok, otimo richo, ok mana ne jaode kende, to bende ne Jehova. (Math. 19:4-9; Hib. 13:4) Ka jaot machielono osebedo ka timo kinda mar dak kaluwore gi puonj koda chike manie Muma, onge tiende mar mondo opar ni en gi ketho kuom tim andhoga mar jaterruokno.

Ng’e ni Jehova ong’eyo kaka iwinjo. Owuoyo kuome owuon konyiso ni en chwor oganda mar Jo-Israel, kendo Wachne oting’o weche mamulo chuny manyiso lit ma ne owinjo nikech tim andhoga mar terruok ma ogandano notimo e lamo margi. (Isa. 54:5, 6; Yer. 3:1, 6-10) Bed gadier ni Jehova ong’eyo adimba lit ma in-go kuom pi wang’ michwero kapo ni jaodi mukendorugo ondhogi e yo moro amora. (Mal. 2:13, 14) Ong’eyo ni owinjore iyud hoch koda jip.

Kaka Jehova Chiwo Hoch

Yo achiel ma Jehova chiwogo hoch en kokalo kuom kanyakla mar Jokristo. Jane noyudo kony ma kamano. Jane paro kama: “Limbe mar jarit-alwora nobiro e kinde ma chunya nonyosore ahinya. Nong’eyo kaka chunya ne opong’ gi parruok nikech chwora noyudo osedhi e od  bura mar kot, kodwaro ketho kend marwa. Jarit-alwora nokawo kinde mar konya bedo gi paro mowinjore kotiyo gi ndiko kaka 1 Jo Korintho 7:15. Ndiko mogol e Muma kaachiel gi wechene mang’won, ne okonya neno ni aonge gi ketho kuom wachno kendo nabedo gi paro mokuwe.” *

Margarita, ma ne owuo kuome motelo, bende ne opuonjore ni Jehova chiwo kony madier kokalo kuom kanyakla mar Jokristo. Margarita wacho ni: “Kane ochopo kama osenenore maler ni chwora ne ok dwar loko chunye, ne akawo nyithindo mi adargo e taon machielo. Ka nachopo kuno, ne ayudo ot ma nigi rum ariyo mi apango. Odiechieng’ ma noluwo, ng’ato noduong’o dhoot sama ne apango gik moko e ot, ka bende ne apong’ gi kuyo ahinya. Ne aparo ni en dhako ma wuon ot, ma nodak mana machiegni. Kare ne en nyaminwa moro ma nopuonjo minwa Muma kendo noyudo osekonyo joodwa ng’eyo adiera. An ok ema ne obiro nena, to noyudo obiro nikech ne opuonjo wuon odno Muma. Nawinjo ka chunya ogonyore ahinya. Ne alerone chal mara, kendo ne waywak kanyachiel. Gikanyono, nolosonwa chenro ma ne dhi konyowa chopo e chokruok mar odiechieng’no. Jo kanyakla norwakowa, kendo jodongo noloso chenro mowinjore ma ne dhi konya rito joodwa korka winjruokwa gi Nyasaye.”

Kaka Jomoko Nyalo Konyo

Kuom adier, jokanyo mag kanyakla mar Jokristo nyalo chiwo kony madwarore e yore mang’eny. Kuom ranyisi, koro Margarita ne nyaka many tich. Joot moro manie kanyaklano nochiwore mar rito nyithinde bang’ skul e kinde ma mano ne dwarore.

Margarita wacho kama: “Gima amorgo ahinya, en sama owete gi nyimine chiwore mar dhi koda kaachiel gi nyithinda e tij lendo.” Kokalo kuom timo kamano, jokanyo mag kanyakla konyo e ‘kawo ting’ mar ng’ato ka ng’ato,’ kendo kuom timo kamano gichopo “chik mar Kristo.”—Gal. 6:2.

Kuom adier, jogo machandore nikech richo mag jomoko, mor ahinya gi kony kaka mago. Monique, ma chwore nojwang’o moweye gi nyithindo ang’wen kaachiel gi gowi mar dola 15,000 mar Amerka wacho kama: “Owete koda nyimine ma Jokristo ne onyisa hera ahinya. Awuoro ahinya kaka dine atimo dine bed ni ok gikonya. Aneno ni Jehova nochiwona owete mabeyo miwuoro, ma ne ochiwore konyo nyithinda. Asebedo gi mor mar neno nyithinda ka odongo mi gibedo Jokristo motegno kokalo kuom kony ma kamano. Kane adwaro mondo okonya e ng’ado paro, jodongo ne timona  kamano. Kane adwaro ng’ama dawachne gik machanda, ne gichiko itgi.”—Mari. 10:29, 30.

En adier ni osiep ma jahera biro fwenyo kinde maok owinjore ochakie mbaka e wi chandruok ma noyudo ng’ato. (Ekl. 3:7) Margarita wacho kama: “Kinde mang’eny, nahero goyo mbaka gi nyimine manie kanyaklawa manyien e wi tij lendo, jopuonjrewa mag Muma, nyithindwa—gimoro amora mak mana chandruogega. Ne amor ahinya ni ne gikonya weyo gik mosekalo obed mosekalo mondo omi achak ngimana e yo manyien.”

Kik Ibed gi Chuny mar Chulo Kuor

Nitie kinde ma kata kapo ni itimo maber kuom weyo maok iket ketho mar jaodi kuomi iwuon, pod inyalo bedo gi chuny mar mako sadha kuom bedo ni ichandori ahinya nikech ketho mage. Ka iweyo chuny ma kamano mi odongi, mako sadha nyalo moni siko kimakori motegno gi Jehova. Kuom ranyisi, inyalo manyo yore mag chulo kuor ne jaodi mondhogi.

Kapo ni ifwenyo ni paro ma kamago pong’o chunyi, nyalo bedo maber kiketo e paro ranyisi mar Joshua gi Kaleb. Ji ariyogi ma noluoro Nyasaye, noketo ngimagi machiegni gi tho kane gidhi nono Piny Manosingi. Jowetegi ma ne gidhigo ne onge gi yie, kendo ne gimiyo ji otamore winjo Jehova. Kata mana moko kuom Jo-Israel ne dwaro goyo Joshua kod Kaleb gi kite kane gitemo jiwo ogandano mondo owinj Nyasaye. (Kwan 13:25–14:10) Nikech timbe Jo-Israel, nochuno Joshua kod Kaleb wuotho e thim kuom higini 40, to ok nikwop richo margi, to nikech richo mar jomoko.

Kata ka nyalo bedo ni chuny Joshua kod Kaleb ne onyosore, ne ok giweyo richo mar owetegi omi gibed gi mirima kata mako sadha. Ne giketo pachgi mana kuom tijgi ne Nyasaye. E giko higini 40 e thim, Joshua kod Kaleb kaachiel gi Jo-Lawi noyudo gweth mar bedo jogo ma ne otony kuom tieng’no, kendo ne oyienegi donjo e Piny Manosingi.—Kwan 14:28-30; Josh. 14:6-12.

Timbe maricho mag jaodi mondhogi, nyalo miyo ichandri kuom kinde mogwaro. Kend maru nyalo rumo, to pod inyalo dong’ kichandori e paro kata e yor pesa bang’e. Kata kamano, kar weyo gik makelo kuyo mondo opong’ pachi, ng’e ni Jehova ong’eyo chuth kaka obiro timo ne jogo maketho puonj koda chikene goyiem, mana kaka gima ne otimore ne Jo-Israel ma ne ok owinje e thim, nyiso.—Hib. 10:30, 31; 13:4.

Inyalo Nyagori Maber!

Kar weyo paro maricho mondo onyos chunyi, pong’ pachi gi paro mag Jehova. Jane wacho niya: “Ne afwenyo ni winjo tep mag Ohinga mar Jarito kod Amkeni! ne okonya ahinya e kedo gi paro ma ne chanda. Chokruoge bende ne okonya ahinya e bedo gi teko. Dhi e chokruoge kendo chiko ita ka aikora mar chiwo paro ne okonya e miyo agol pacha kuom chandruoge ma ne an-go. Tij lendo bende ne okonya e yo ma kamano. Kuom konyo jomoko mondo obed gi yie kuom Jehova, ne atego yiena awuon. Kendo puonjo jogo ma ne apuonjorago Muma, ne okonya keto pacha kuom gik madwarore ahinya moloyo.”

Monique, ma ne owuo kuome motelo wacho kama: “Kuom dhi e chokruoge maok abara, kendo kuom tiyo tij lendo nyading’eny kaka nyalore, asebedo gi nyalo mar nano. Wasesudo machiegni e kindwa ng’ato gi ng’ato kaka joot, kaachiel gi kanyakla. Gima ne otimorenano osekonya fwenyo nyawo ma maga awuon. Oseketa e bwo tem, kata kamano kokalo kuom kony mar Jehova, anyagora maber.”

In bende inyalo nyagori maber e bwo tem ma kamago. Kata obedo ni tim andhoga nyalo kelo lit ahinya, tim matek mondo iluw puonj ma Paulo nochiwo kotelne gi roho mar Nyasaye kama: “Kik waol gi timo maber, nikech wanake ka ndalo ogik, ka ok wanyosore.”—Gal. 6:9.

[Weche moler piny]

[Picha manie ite mar 31]

Jogo ma chwogi kata mondegi ojwang’o, mor ahinya gi jogo makonyogi e tij lendo