Yud Mor Kod Kuwe mar Chuny e Tije Nyasaye
Yud Mor Kod Kuwe mar Chuny e Tije Nyasaye
“Rwakuru lota kuomu, . . . to unubed gi kuwe e chunyu.”—MATH. 11:29.
1. Nyasaye nochiwo chik mane e Got Sinai, to nikech ang’o?
KANE singruok mar Chik ochako tiyo e Got Sinai, chikno bende noting’o chik mar rito Sabato juma ka juma. Kokalo kuom Musa jal ma ne wuoyo e loye, Jehova nochiko oganda mar Jo-Israel niya: “Initi tichni ndalo auchiel to ndalo mar abiriyo inidir sabato; mondo dheri gi kanji giyud yuweyo, kendo wuod jatichni madhako, kod jamwa, giyud mijing’o.” (Wuok 23:12) Ee, nikech nodewo jogo ma ne nie bwo Chik, Jehova nonyiso hera kuom keto odiechieng yueyo tenge mondo omi joge ‘oyud mijing’o.’
2. Ere kaka rito Sabato ne konyo Jo-Israel?
2 Be Sabato ne en aena odiechieng yueyo? Ooyo, ne en odiechieng Jo-Israel mar lamo Jehova. Rito Sabato nomiyo jogo ma gin wiye udi thuolo mar puonjo joodgi ‘mako yor Jehova mondo gitim kare.’ (Chak. 18:19) Chikno bende nomiyo joot koda osiepe thuolo mar bedo kanyachiel mondo gipar matut tije Jehova kendo bedo gi tudruok makelonegi mor. (Isa. 58:13, 14) Maduong’ moloyo, weche mokor nyiso ni Sabato ne en tipo mar kinde mabiro ma mor koda kuwe madier mar chuny, ne dhi biro kokalo kuom Loch Kristo mar Higini Gana Achiel. (Rumi 8:21) To nade e ndalowa? Jokristo madier mohero yore mag Jehova nyalo yudo mor gi kuwe ma kamano kune, to e yo mane?
Yud Mor gi Kuwe mar Chuny Kuom Riwori gi Jokristo Weteni
3. Jokristo mokwongo ne sirore nade ng’ato gi nyawadgi, to mano nomiyo ang’o otimore?
3 Jaote Paulo nowuoyo kanyiso ni kanyakla mar Jokristo en kaka “siro kod mise mar adiera.” (1 Tim. 3:15) Jokristo mokwongo ne sirore ahinya kokalo kuom jiwruok ng’ato gi nyawadgi kendo ka gigerore e hera ng’ato gi ng’ato. (Efe. 4:11, 12, 16) Kane en Efeso, jokanyo mag kanyakla man Korintho nolimo Paulo mondo gijiwe. Ne ane gima Paulo wacho kuom limbeno: ‘Amor ka Stefano gi Fortunato gi Akaiko obiro nikech giseduogo chunya.’ (1 Kor. 16:17, 18) Kamano bende, kane Tito odhi Korintho mondo okony owete kuno, Paulo nondiko ne kanyaklano kowacho niya: “Uduto nuduogo chunye.” (2 Kor. 7:13) E ndalogi bende, Joneno mag Jehova yudo mor gi kuwe mar chuny gadier kokalo kuom riwruok kanyachiel gi Jokristo wetegi.
4. Ere kaka chokruoge mag kanyakla miyowa mor kod kuwe mar chuny?
4 Iseng’eyo iwuon ni chokruoge mag kanyakla kelo mor maduong’ ahinya. E romogo, ‘wajiwore e yiewa ng’ato gi ng’ato.’ (Rumi 1:12) Owete koda nyiminewa ma Jokristo ok gin mana osiepe asiepa. Gin osiepe madier, mwahero kendo mwamiyo luor. Wayudo mor kod hoch mogundho kuom bedo kodgi e chokruogewa maok wabare.—File. 7.
5. Ere kaka wanyalo yudo mor koda kuwe mar chuny e chokruoge distrikt koda mag alwora?
5 Gimachielo mamiyowa mor kod kuwe mar chuny, en chokruoge distrikt kod mag alwora mitimo higa ka higa. Kaachiel gi konyowa yudo pi ngima mag adiera moa e Wach Nyasaye ma en Muma, chokruoge madongogi bende miyowa thuolo mar ‘yawruok’ e osiepe ma wan-go. (2 Kor. 6:12, 13) To nade kapo ni in ng’ama luor kendo iyudo ka tekni bedo gi osiepe? Yo achiel mar ng’eyo owete koda nyiminewa en chiwruok wan wawegi e chokruog-distrikt. Bang’ konyo migepe e chokruok maduong’ mariwo pinje, nyaminwa moro nowacho kama: “Ne ok ang’eyo ji mang’eny kuno, mak mana joodwa gi osiepe manok. Kata kamano, sama ne akonyo e migawo mar rito ler, ne aromo gi owete koda nyimine mang’eny! Ne en thuolo majaber ndi!”
6. Yo achiel mwanyalo yudogo mor e kinde ma wan e rusa en mane?
6 Jo-Israel ne hinyo dhi lemo Jerusalem e nyasi adek ma ne itimo higa ka higa. (Wuok 34:23) Kinde mang’eny, ne chuno ni giwe ohala koda puothegi, mi giwuoth kuom ndalo mogwaro e apaya motimo buru. Kata kamano, dhi nyaka e hekalu ne kelo “mor maduong’,” nimar ‘ne gipako Jehova.’ (2 Weche 30:21) Kamano bende, jotich Jehova mang’eny ndalogi, nwang’o ni dhi kanyachiel gi joodgi mondo gitim limbe e Bethel machiegni kodgi, kelonegi mor maduong’. Donge unyalo keto chenro mar timo kamano kaka joot e ndalo rusa mabiro?
7. (a) Ere kaka bedo gi kinde mag yueyo mariwo joot kanyachiel gi osiepe nyalo konyo? (b) En ang’o manyalo miyo kinde ma kamago obed makende kendo magero jomoko?
7 Bedo gi kinde mag yueyo kuriwowu kanyachiel kaka joot kod osiepe bende nyalo kelo mor gi jip ahinya. Suleman ruoth mariek nowacho ayanga: “Dhano oonge gi wach moro moloyo ma gi ber, mondo ochiem, omadh, kendo omi chunye bedo mamor kuom tichne.” (Ekl. 2:24) Bedo gi kinde kaka mago ok duog mana chunywa ka gimiyowa mor kende, to bende gimiyo watego hera mariwowa gi Jokristo wetewa sama wamedo ng’eyogi. Mondo wami kindego obed makende kendo magero jomoko, ber bedo gi ji manok e romogo mondo tayogi obed mayot, to moloyo kapo ni nitie divai kata kong’o mibiro madh kuno.
Tij Lendo Kelo Mor Koda Kuwe mar Chuny
8, 9. (a) Nyis ane pogruok e kind weche Yesu kod mag jondiko gi jo Farisai. (b) Ere kaka lando adiera mag Muma konyowa?
8 Yesu ne en jakinda e tij lendo, kendo ne ojiwo jopuonjrene mondo obed kamano. Wanyalo ng’eyo mano kuom weche ma nowacho niya: “Keyo duong’ adier, to jotich ema nok. E momiyo kwauru Wuon keyo, mondo oor jotich odhi e keyone.” (Math. 9:37, 38) Weche ma Yesu nopuonjo ne kelo mor ka duogo chuny gadier; ne gin ‘weche mabeyo.’ (Math. 4:23; 24:14) Mano ne opogore ndi gi chike mapek ma jo Farisai ne keto kuom ji.—Som Mathayo 23:4, 23, 24.
9 Sama walando ne jomoko wach Pinyruoth, wamiyogi mor kod kuwe mar chuny ka gie kindeno bende, wajiwo adiera mag Muma e pachwa koda e chunywa wawegi. Jandik-zaburi nowacho adier niya: “Pakuru Jehova; wero pak ni Nyasachwa ber; olong’o.” (Zab. 147:1) Donge inyalo medo mor mari e pako Jehova kuom lando ne jomoko wachne?
10. Be okang’ ma ji rwakogo wach ema nyiso ni koro tijwa mar lendo dhi maber? Ler ane.
10 En adier ni nitie kuonde ma ji rwakoe wach ahinya maloyo kuonde mamoko. (Som Tich Joote 18:1, 5-8.) Kapo ni idak kama thoth ji ok rwakie wach Pinyruoth, tem keto pachi kuom ber ma tiji mar lendo chopo. Ng’e ni kinda mitimo e lando nying’ Jehova ok en kanono. (1 Kor. 15:58) E wi mano, okang’ ma ji rwakogo wach, ok ema nyis ni koro tijwa mar lendo dhi maber. Wanyalo bedo gadier ni Jehova biro neno ni jogo ma chunygi tir oyudo thuolo mar rwako wach Pinyruoth.—Joh. 6:44.
Lamo mar Joot Kelo Mor Koda Kuwe mar Chuny
11. Jehova osemiyo jonyuol ting’ mane, to ere kaka ginyalo chopogo?
11 Jonyuol moluoro Nyasaye nigi ting’ mar puonjo nyithindgi ng’eyo Jehova koda yorene. (Rapar 11:18, 19) Ka in janyuol, be iketo kinde tenge mar puonjo nyithindi ng’eyo Wuonwa me polo ma jahera? Mondo omi ichop ting’ madwaroreno e rito joodi, Jehova osechiwo chiemb chuny mogundho kokalo kuom buge, gasede, piche mag vidio, kod weche momak e tep kata CD.
12, 13. (a) Ere kaka Lamo mar Joot nyalo konyo joot? (b) Ere kaka jonyuol nyalo neno ni lamo margi mar joot kelo mor kod kuwe mar chuny?
12 E wi mano, kweth mar jatich mogen kendo mariek oseloso chenro mar bedo gi odiechieng Lamo mar Joot. Mani en odiechieng’ miketo tenge juma ka juma ne puonjruok Muma mar joot. Ji mang’eny oseyudo ni chenrono osesudogi machiegni ng’ato gi nyawadgi, kendo osetego winjruokgi gi Jehova. Kata kamano, ere kaka jonyuol nyalo neno ni lamo margi mar joot jiwo winjruokgi gi Nyasaye kendo kelonegi mor gi kuwe mar chuny?
13 Lamo mar Joot ok onego otim e yo maonge ilo koda mor. Bedo ni walamo “Nyasaye mamor,” odwaro ni wail kendo wamor e lamowa. (1 Tim. 1:11, New World Translation; Fili. 4:4) Bedo gi odiechieng’ momedore mar puonjruok adiera mabeyo manie Muma en gweth ahinya. Jonyuol nyalo timo lokruok madwarore e puonjo, ka gitiyo gi yore makonyo e miyo nyithindo opar matut. Kuom ranyisi, nitie joot ma ne oyie ne wuodgi ma jahigini apar miluongo ni Brandon, mondo ochiwnegi twak ma wiye wacho ni “Ang’o Momiyo Jehova Notiyo gi Thuol Kaka Gima Ochung’ne Satan?” Mani ne en wach ma nosechando Brandon nikech ohero thuonde, kendo kane ji wacho ni thuonde nigi tudruok gi Satan, ne ok more. Nitie joot moko ma osetimo drama mag Muma, ka ng’ato ka ng’ato chung’ne ng’at miwuoyoe ei Muma, somo kar ng’ama iwuoyoe ei Muma, kata joot nyalo nyiso gima ne otimoreno kuom timogo e yo masie. Puonjo e yore kaka magi ok kel mana mor gi ilo kende, to gimiyo nyithindi ok ling’ aling’a e puonjruokno, mondo omi puonj koda chike manie Muma omul chunygi. *
Tang’ gi Gigo Manyalo Nyoso Chunyi
14, 15. (a) Ere kaka chandruok makelo parruok kod luoro, osemedore e ndalo mag giko? (b) Gin chandruoge mage momedore manyalo yudowa?
14 Chandruoge makelo parruok kod luoro, osemedore e ndalogi mag giko piny marachni. Bedo maonge tich koda pek mamoko mag yuto chando ji tara mang’eny. Kata mana jogo ma nigi tich, pile neno ni gidok ot ka giting’o pesa ma giyudo e ofuke motuch, kendo mano ok kony joot ahinya. (Pim gi Haggai 1:4-6.) Josiasa gi jotelo mamoko nyagore gi wach timbe mahundu koda richo mamoko, to nenore ni ok ginyal loyogi. Chuny ji mang’eny nyosore nikech rem ma maggi giwegi.—Zab. 38:4.
15 Jokristo madier bende yudo chandruok koda pek mamoko ma piny ma Satan oteloeni kelo. (1 Joh. 5:19) Nitie kinde ma jopuonjre Kristo nyalo yudo chandruoge momedore, sama gitemo matek chung’ motegno e nyim Jehova. Yesu nowacho niya: “Ka gisesanda, un bende ginisandu.” (Joh. 15:20) Kata kamano, kata ka ‘isandowa, to ok ojwang’wa.’ (2 Kor. 4:9) Ang’o momiyo en kamano?
16. Ang’o manyalo konyowa siko ka wail gi mor?
16 Yesu nowacho niya: “Biuru ira, un duto mujony kendo mugangoru mapek, to anamiu yueyo.” (Math. 11:28) Kuom bedo gi yie chuth e rawar mar Kristo, mano chalo ka gima waketo ngimawa e lwet Jehova. Kuom timo mano, wayudo “tekono maduong’ ahinya.” (2 Kor. 4:7) ‘Jakonyno’ ma en roho maler mar Nyasaye tego yiewa ahinya mondo omi wanan e bwo tembe gi masiche, to ok mano kende, bende okonyowa siko ka wail gi mor.—Joh. 14:26; Jak. 1:2-4.
17, 18. (a) Onego watang’ kik wabed gi chuny mane? (b) Ang’o manyalo timore ka waketo chunywa kuom luwo mor mag piny?
17 Ndalogi, dwarore ni Jokristo madier otang’ mondo kik chikgi gi chuny mar piny, masani opong’ gi gombo mar lawo morgi giwegi. (Som Jo Efeso 2:2-5.) Ka ok watang’ to wanyalo donjo e obadho mar “gombo mar ringruok, gi gombo mar wang’, gi sunga mar ngima.” (1 Joh. 2:16) Kata wanyalo paro e yo maok kare ni luwo gombo mag ringruok biro kelonwa mor koda kuwe mar chuny. (Rumi 8:6) Kuom ranyisi, jomoko tiyo marach gi yedhe koda kong’o, gidonjo e tim neno ponografi, tuke mokalo tong’, kata timbe mamoko maricho ka gitemo ni mondo gibed moil kendo gibed gi chuny mokuwe. “Wuond mariek” mag Satan olos mondo omi ng’ato opar apara ni en gi mor koda chuny mokuwe.—Efe. 6:11.
18 En adier ni onge gimarach gi chiemo, metho, kata luwo yore moko mowinjore mag manyo mor, to mana ka otimgi e yo maok kal tong’. Kata kamano, ok wawe gik ma kamago mondo obed ni e gik madongo mwaluwo ahinya e ngima. Dwarore ni watim gik moko maok wakal tong’ kendo ka waritore, to moloyo ka waketo ndalo mwadakiegi e paro. Luwo gombowa wawegi nyalo nyoso chunywa mi wachop e okang’ makoro wabedo ‘jo samuoyo maonge nyak mar ng’eyo Ruodhwa Yesu Kristo chuth.’—2 Pet. 1:8.
19, 20. Mor koda kuwe mar chuny nyalo yudore nade?
19 Sama wabedo gi paro kaka mar Jehova, wafwenyo ni mor moro amora ma pinyni nyalo kelo en mana mar kinde manok. Musa nofwenyo mano, to wan bende wanyalo timo kamano. (Hib. 11:25) Adier en ni, timo dwaro mar Wuonwa me polo ema kelo mor madier koda kuwe mar chuny masiko.—Math. 5:6.
20 Mad wadhi nyime yudo mor koda kuwe mar chuny kuom timo tije Nyasaye. Kuom timo kamano, ‘wadagi richo gi gombo mag piny, kendo warito gweth mwageno yudo, ma en fwenyruok mar Nyasachwa maduong’, kendo mar Jawarwa Kristo Yesu.’ (Tito 2:12, 13) Omiyo, weuru wang’ad mar rwako lot Yesu kuom bolruok e bwo lochne koda kaka ochikowa. Kuom timo kamano, wabiro yudo mor koda kuwe mar chuny gadier!
[Weche moler piny]
^ par. 13 Mondo iyud weche momedore kuom kaka inyalo tim puonjruok e yo mamor kendo machiwo jip, ne Huduma ya Ufalme Yetu mar Desemba 1990, ite mag 1-2.
Inyalo Dwoko Nade?
• Ere kaka oganda Jehova yudo mor kod kuwe mar chuny e ndalogi?
• Tij lendo kelonwa mor koda ne jogo mwalendonegi, e yo mane?
• Jogo ma gin wiye udi nyalo timo ang’o mondo gine ni lamo margi mar joot kelonegi mor kod kuwe mar chuny?
• Gin gik mage manyalo nyoso chunywa korka tiyo ne Nyasaye?
[Penjo mag Puonjruok]
[Picha manie ite mar 26]
Kuom rwako lot Yesu kuomwa, wayudo yore mang’eny manyalo miyowa mor kod kuwe mar chuny