Yud Ritruok e Kind Oganda Nyasaye
Yud Ritruok e Kind Oganda Nyasaye
“Nagoni erokamano e i chokrwok maduong’.”—ZAB. 35:18.
1-3. (a) Ang’o manyalo miyo Jokristo moko oketh winjruok margi gi Jehova? (b) Oganda Nyasaye nyalo yudo ritruok kanye?
KANE gin e rusa, Joe kaachiel gi chiege ne odhi goyo abal e nam kama nitie rech ma nigi kido mopogore opogore madongo gi matindo. Ne gidhi iye matin mondo gine gik malombo wang’ manie bwo nam. Kane gichopo kama tut ahinya, chi Joe nowachone kama: “Aneno ni wasedhi iye ahinya.” Joe ne odwoke ni, “Wek luor. Ang’eyo gima atimo.” Joe paro kaka matin nono bang’ mano, ne openjore niya: ‘To kare rech duto olal kanye?’ Ne obwok ahinya kane ofwenyo gimomiyo. Rech miluongo ni papa ne biro kochome tir. Ne omoko kanyo maonge kaka dokonyre. Kane rechno chiegni chopo kuome, rechno nobaro modhi molal.
2 Gik malombo wang’ manie piny ma Satan oteloeni, kaka yore mag manyo mor koda yweyo, tich, mwandu, nyalo galo Jakristo mi chop kama ok ofweny ni ochomo kama rach ahinya. Joe ma en jaduong’-kanyakla wacho niya: “Gima ne otimorena ne omiyo aparo kuom osiepe mwariworego. Ber goyo abal kama ok inyal hinyorie kendo kama ritruok nitie, tiende ni ei kanyakla!” Kik idhi kama tut ahinya, kama nyalo keloni hinyruok nikech in kendi kendo ipogori gi Jokristo weteni. Kapo ni ifwenyo ni in kama chalo kamano, duog mapiyo kama nitie ritruok. Nono to winjruok mari gi Jehova nyalo kethore.
3 Kindegi, pinyni opong’ gi gik mamiyo chung’ kaka Jakristo bedo matek. (2 Tim. 3:1-5) Satan ong’eyo ni kindene nok, omiyo omanyo ng’ama ok otang’ ma dongam. (1 Pet. 5:8; Fwe. 12:12, 17) Kata kamano, wan-gi yo ma wanyalo ritorego. Jehova osemiyo ogandane kama ginyalo ritoe winjruok margi kode—kanyakla mar Jokristo.
4, 5. Ere kaka ji mang’eny neno kinde mabiro, to nikech ang’o?
4 Oganda mar jopiny ok nyal miyowa ritruok madier chuth—obed e yor ringruok kata e miyo kik wabed gi parruok. Thoth ji nigi luoro nikech mahundu, gero, ngima matek korka yuto, kata nikech kethruok mar alwora ma gidakie. Waduto wakedo gi chandruoge ma bedo moti koda tuoche kelo. To jomoko ma nigi tich, kuonde dak, pesa moromogi, kendo modak e ngima maonge tuoche ahinya, pod parore ni gik moko biro dhi nyime kama nyaka karang’o.
5 Ji mang’eny bende ok nigi ritruok korka bedo gi paro mokuwe e chunygi. Gima lit en ni, ji mang’eny ma ne geno yudo kuwe koda mor e ngima mar kend koda mar joot, osenwang’o ni geno ma ne gin-go en ka nono. Thoth joma dhi e kanise ma manyo yudo ritruok kuom bedo gi winjruok maber gi Nyasaye, ok oseyudo kony makoro gidong’ ka gin gi kiawa kabe weche mosepuonjgi nyalo konyogi. To en kamano moloyo nikech timbe koda puonj maok otenore kuom Ndiko ma jotendgi mag din puonjo. Omiyo, thoth ji neno ni kama ginyalo ketoe geno margi en kuom rieko mag josayans koda kuom dhano wetegi ma chuny maler. Kuom mano, ok kawwa gi wuoro ni joma odak e alworawa winjo ka gionge ritruok moro amora kata gineno ni onge tiende paro matut kuom kinde mabiro.
6, 7. (a) Ang’o momiyo nitie pogruok e kind jogo matiyo ne Nyasaye koda jogo maok tine korka kaka gineno gik moko? (b) Ang’o mwabiro nono?
6 Mano kaka nitie pogruok maduong’ e kind jogo manie kanyakla mar Jokristo kod jogo maok nie iye korka kaka gineno gik moko! Kata obedo ni wan kaka oganda Jehova, nyaka waked gi weche koda chandruoge ma jomamoko neno, yo ma wakedogo opogore ahinya. (Som Isaiah 65:13, 14; Malaki 3:18.) Nikech ang’o? Nikech wayudo ei Muma weche maleronwa adimba chal mar dhano, kendo wang’eyo yore mwanyalo kedogo gi chandruoge mwaromogo e ngima. Kuom mano, ok waparre ahinya kuom kinde mabiro. Bedo oganda malamo Jehova miyo wayudo ritruok mondo kik wabed gi paro maok kare, maok otenore kuom Ndiko, timbe mochido, koda hinyruok mayudo ji nikech mago. Kuom mano, jokanyo mag kanyakla mar Jokristo bedo gi paro mokuwe e chunygi ma jomamoko ongego.—Isa. 48:17, 18; Fili. 4:6, 7.
7 Nitie ranyisi moko manyalo konyowa paro kuom ritruok ma jogo matiyo ne Jehova nigo, mopogore gi jogo maok ti ne Jehova. Ranyisigi nyalo jiwowa nono paro ma wan-go koda gik mwatimo, kendo nono kabe nitie yore mwanyalo tiyogo gi puonj mag Nyasaye e okang’ moloyo, ma gin puonj molos mondo omiwa ritruok.—Isa. 30:21.
“Tienda ne Both Obaro Tenge”
8. Osechuno jotich Jehova timo ang’o kinde duto?
8 Chakre chon e ngima dhano, jogo ma ne oyiero tiyo kendo winjo Jehova ne ok mak osiep gi jogo ma ne ok tim kamano. Kuom adier, Jehova nonyiso ni sigu ne dhi bedoe e kind jogo malame koda jogo maluwo Satan. (Chak. 3:15) Nikech chung’gi motegno e mako puonj koda chike mag Nyasaye, oganda Nyasaye osebedo katimo gik moko e yo mopogore gi joma odak e alworagi. (Joh. 17:15, 16; 1 Joh. 2:15-17) Kawo okang’ ma kamano ok osebedo mayot kinde duto. Kuom adier, nitie kinde ma moko kuom jotich Jehova osebedo gi kiawa kabe nitie ber mar luwo yor ngima mar chiwruok chuth ne Nyasaye.
9. Ler ane parruok ma jal ma nondiko Zaburi 73 nokedogo.
9 Achiel kuom jotich Jehova ma noparore kabe ne otimo yiero makare, ne en jal ma nondiko Zaburi 73, ma nenore ni ne en koth anyuola mar Asaf. Jalo nopenjore gimomiyo ne nenore ni jomaricho ne mor, ne omewo kendo wechegi ne dhi maber, to joma ne timo matek e tiyo ne Nyasaye ne chandore.—Som Zaburi 73:1-13.
10. Ang’o momiyo weche ma jandik-zaburi nopenjo gin weche monego ipar ahinya?
10 Be isepenjori penjo kaka mago ma jandik-zaburi nondiko? Ka en kamano, kik iwe mondo chunyi ochandre ahinya kiparo ni koro ok itegno e yie. Adier en ni, jotich Jehova mogwaro, moriwo koda jogo ma Jehova notiyogo e ndiko Muma, ne nigi paro kaka mago. (Ayub 21:7-13; Zab. 37:1; Yer. 12:1; Hab. 1:1-4, 13) Kuom adier, jogo duto magombo tiyo ne Jehova nyaka par matut kendo yie gi dwoko mar penjo maluwoni: Be tiyo ne Nyasaye kendo luwo chikene e gima ber moloyo? Penjono otudore gi wach ma Satan ne ochako e puodho mar Eden. Otudore ahinya gi wach jal ma nigi ratiro mar bedo jaloch e wi gik moko duto. (Chak. 3:4, 5) Omiyo ber ka waduto waparo matut kuom wach jandik-zaburino. Be onego wagomb sunga mar joma richo ma ngimagi nenore ni dhi maber? Be onego ‘wabar tenge’ ka waweyo tiyo ne Jehova mondo waluw yore mag joma richo? Kuom adier, mano e gima Satan diher mondo watim.
11, 12. (a) Ere kaka jandik-zaburi noloyo kiawa ma ne en-go, to mano puonjowa ang’o? (b) Ang’o mosekonyi ng’ado paro machalo gi mar jandik-zaburi?
11 Ang’o ma nokonyo jandik-zaburi loyo kiawa ma ne en-go? Kata obedo ni ne oyie ni ne both kobaro tenge, paro ma ne en-go nolokore kane odonjo e “sang’tuari mar Nyasaye”—tiendeni sama noriwore gi joma noketo lamo Nyasaye motelo e hekalu mar Nyasaye kendo paro matut kuom dwaro mag Nyasaye. Mano nomiyo jandik-zaburi ofwenyo ni ne ok odwar ni gima ne dhi timore ne joricho otimrene obende. Nonyalo neno ni yor ngima ma giluwo koda yiero ma gitimo e ngima ketogi “kuonde mapoth mikierie.” Jandik-zaburi noyango ni jogo duto maweyo Jehova kuom luwo yore maricho, ibiro tiek “dichiel apoya,” to jogo matiyo ne Jehova ibiro mi ritruok. (Som Zaburi 73:16-19, 27, 28.) Onge kiawa ni iseneno adiera mag wechego. Ji mang’eny nyalo neno ni dak e ngima mar luwo gombowa wawegi maok wadew chike koda puonj mag Nyasaye en gimaber, kata kamano, nitie gigo mwabiro kayo nikech mano.—Gal. 6:7-9.
12 Wach machielo mwapuonjore kuom ranyisi mar jandik-zaburi en mane? Noyudo ritruok kod rieko e kind oganda Nyasaye. Nochako neno gik moko e yo makare kendo malong’o kane en kama ilamoe Jehova. E kindegi bende, wanyalo yudo jopuonj manyiso rieko koda puonj magerowa e chokruogewa mag kanyakla. Nikech mano, Jehova nyiso jotichne mondo obed joma dhi e chokruoge mag Jokristo. Kuno e kama gibiro yudoe jip mar timo gik moko e yo manyiso rieko.—Isa. 32:1, 2; Hib. 10:24, 25.
Yier Osiepeni gi Rieko
13-15. (a) Ang’o ma notimore ne Dina, to mano nyiso ang’o? (b) Ang’o momiyo timo osiep gi Jokristo weteni biro miyi ritruok?
13 Dina nyar Jakobo en achiel kuom joma nodonjo e chandruok maduong’ nikech timo osiep gi joma ne ok oluoro Nyasaye. Bug Chakruok nyisowa ni ne en gi tim mar dhi neno nyi Kanaan ma ne odak machiegni gi kama ne gidakie. Jo-Kanaan ne ok nigi timbe maler kaka jogo ma ne lamo Jehova. Mopogore gi mano, gik ma josayans manono gik mokuny oseyudo, nyiso ni kit ngima Jo-Kanaan, ne omiyo piny ma ne gidakie opong’ gi lamo nyiseche manono, terruok, timbe nindruok modwanyore motudore gi lamo, koda gero. (Wuok 23:23; Lawi 18:2-25; Rapar 18:9-12) Par ane gima ne otimore ne Dina nikech osiep ma ne otimo gi jogo.
14 Shekem ma ne en Ja-Kanaan, ma iwacho ni ne en jal ma ‘ne imiyo duong’ moloyo ji duto mag od wuon mare,’ noneno Dina ‘mi nokawe, mi nobedo kode, mi nomiye wichkuot.’ (Chak. 34:1, 2, 19) Mano kaka wachno nokelo masira! Be ineno ni Dina ne nyalo paro ni gima kamano ne dhi timorene? Nyalo bedo ni ne omanyo mana osiep gi rowere ma Jo-Kanaan ma ne oneno kaka joma onge rach moro. Kata kamano, paro ma Dina ne nigo ne owuonde sidang’.
15 Siganano puonjowa ang’o? Opuonjowa ni ok wanyal timo osiep gi joma ok lam Jehova ka waparo ni onge rach moro mabiro timorenwa. Ndiko wachonwa ni “osiepe maricho ketho timbe mabeyo.” (1 Kor. 15:33) To mopogore gi mano, mako osiep gi joma luwo puonj, timbe makare, kendo mohero Jehova kaka in, biro miyi ritruok. Osiep maber kamano biro jiwi timo gik moko e yor rieko.—Nge. 13:20.
‘Oselwoku’
16. Ang’o ma jaote Paulo nowacho kuom kit timbe jomoko ma ne nie kanyakla mar Korintho?
16 Kanyakla mar Jokristo osekonyo ji mang’eny weyo timbe mochido kendo keto ngimagi obed maler. Kane jaote Paulo ondiko barupe mokwongo ne kanyakla ma ne ni Korintho, nowuoyo kuom lokruok ma Jokristo ma kuno nosetimo mondo gidag kaluwore gi chike mag Nyasaye. Moko kuomgi ne gin jochode, jolam nyiseche manono, joma terore, chwo ma terore gi chwo, jokuo, jomer, koda timbe mamoko. Paulo nowachonegi kama: ‘To oselwoku.’—Som 1 Jo Korintho 6:9-11.
17. Ere kaka dak kaluwore gi chike manie Muma oseloko ngima ji mang’eny?
17 Ji maonge yie ok nigi puonj manyalo tayogi e yo malong’o. Giluwo yoregi giwegi, kata giluwo aluwa timbe mochido mag ji, mana kaka jomoko ne timo e Korintho machon kane pok gibedo Jokristo. (Efe. 4:14) Kata kamano, ng’eyo makare mar Wach Nyasaye, nigi teko mar loko kendo miyo kit ngima jogo duto matiyo gi puonj manie Ndiko obed maber moloyo. (Kol. 3:5-10; Hib. 4:12) E kindegi ng’eny jokanyo mag kanyakla mar Jokristo nyalo nyisi ni kapok ne gipuonjore adiera kendo tiyo gi puonj makare mag Jehova e ngimagi, ne oyudo gidak e kit ngima ma gihero giwegi. Kata kamano, kit ngima ma ne gidakieno ne ok omiyogi mor. Ne giyudo kuwe mana kane gichako riwore kanyachiel gi oganda Nyasaye kendo dak kaluwore gi puonj manie Muma.
18. Ang’o ma notimore ne rawera moro, to mano nyiso ang’o?
18 Mopogore gi mano, moko kuom joma ne oyiero weyo kanyakla mar Jokristo gie sani yuago ang’e kuom gima ne gitimo. Nyaminwa moro mwabiro luongo ni Tanya, wacho ni “ne odongo ei adiera,” kata kamano kane en jahigini 16, ne oweyo kanyakla mondo “olaw mor mag piny.” Achiel kuom gik ma ne otimorene ne en mako ich, mogolo. Koro owacho niya: “Higini adekgo ma ne an oko mar kanyakla, ne oweya gi mbala e paro koda e chunya, mabiro siko. Wach masiko ka chando pacha en ni ne anego nyathina ma ne pok anyuolo. . . . Adwaro wacho ne rowere duto magombo ‘bilo’ piny kata mana matin ni: ‘Kik utem!’ Onyalo nenore motelo ka gima mit, to bang’e oweyi ka iwinjo kechne. Piny ok nyal miyowa gimoro maber, mak mana chandruoge gi lit. An ang’eyo. Ne abile. Siki ei riwruok mar oganda Jehova! Mano kende e yo mabiro miyi idag e ngima mamor.”
19, 20. En ritruok mane ma kanyakla mar Jokristo miyowa, to e yo mane?
19 Par ane gima nyalo timoreni kapo ni diwe ritruok manie kanyakla mar Jokristo. Kodok korka ngima manono ma ne giluwo kapok girwako adiera, ji mang’eny ok diher kata paro wachno. (Joh. 6:68, 69) Chandruoge koda lit mopong’o piny manie bwo teko mar Satan, ok nyal yudi ka idhi nyime yudo ritruok kuom bedo machiegni gi owete koda nyimineni ma Jokristo. Riwruok kanyachiel kodgi koda dhi e chokruoge maok wabare biro siko ka paronwa rieko mar tiyo gi chike koda puonj makare mag Jehova, kendo jiwowa dak kaluwore kodgi. In gi gik mang’eny momiyo onego ‘ipak Jehova e i chokruok,’ mana kaka jandik-zaburi notimo.—Zab. 35:18.
20 En adier ni nitie gik mamoko manyalo miyo Jokristo duto obed e bwo tem mar chung’ motegno kaka Jokristo. Nyalo mana dwarore ni ng’ato okonygi neno gik moko e yo makare. Ang’o ma in inyalo timo—to ka gadier kanyakla duto—mondo wakony Jokristo wetewa e kinde ma kamago? Sula maluwo biro nono kaka inyalo dhi nyime ‘hoyo kendo tego’ oweteni.—1 Thes. 5:11.
Inyalo Dwoko Nade?
• Wapuonjore ang’o kuom gima notimore ne jal ma nondiko Zaburi 73?
• Gima notimore ne Dina puonjowa ang’o?
• Ang’o momiyo inyalo yudo ritruok e kanyakla mar Jokristo?
[Penjo mag Puonjruok]
[Picha manie ite mar 7]
Go abal kama nitie ritruok; siki ei kanyakla!