Ikruok ne Thuolo Mopoyore Nyalo Kelo Nyak Maber

BE IIKORI tiyo gi thuolo manyalo nenore apoya e alwora mar kanyaklau? Owetewa ma Jokristo manie wath mar Turku, me piny Finland, ne otimo kamano, kendo ikruokgi nokelo nyak maber.

Kinde moro mosekalo, owete man Turku nofwenyo ni grup moro mar Jo-Asia nobiro kanyo mondo gitiek loso meli moro maduong’ kama ne ilosoe meli. Bang’e, owadwa moro nofwenyo ute nindo ma ne joma welogo odakie. Bende nofwenyo ni ne isombo jotichgo gi bas okinyi mang’ich a e otel ma ne ginindoe, nyaka e wath kama ne gilose meli. Mapiyo, nonyiso owete manie kanyakla man Turku mawacho dho Ingresa.

Jodongo ma ne nie kanyaklano noneno ni bedo gi welo mang’eny kamano nochiwonegi thuolo ma opoyore mar landonegi wach Pinyruoth, kendo ne gichano mapiyo mar timo kampen makende. Odiechieng Jumapil e jumano sa achiel gokinyi, jolendo apar nochokore kama iritoe bas. Mokwongo, onge jatich ma ne ochopo. Owetego nopenjore kama: ‘Walewo ahinya koso? Koso jogo nosedar oa Turku?’ Kata kamano, jatich achiel morwako habron mar tich ne opowore e kona ka biro. Jatich machielo noluwo, kendo mamoko bende nochako nenore ka biro. Bang’ kinde matin, jotich mang’eny koro ne ochokore kar rito basno. Gikanyono jolendo nochako nyisogi bugewa mogo gi dho Ingresa. Gima ber en ni kinde madirom sa achiel kama nokalo kapok jotichgo oidho bas, kendo mano nochiwo thuolo moromo ne owete mondo owuo kod thothgi. Kane bas owuok, jotichgo nodhi gi buge matindo 126 kod gasede 329!

Nyak maber ma owete nobedogo, nojiwogi nwoyo timo kamano juma ma noluwo, ma bende ne en kinde limbe mar jarit-alwora. Chieng’ ma koth ne chwe, sa apar gariyo gi nus okinyi, jarit-alwora notayo romo mar dhi lendo, kendo jolendo 24 nochomo kar rito bas. E kindeni to koro ne giting’o bende buge mogo e dho Tagalog nikech ne giyudo ni thoth welogo ne oa e piny Philippines. Okinyino, kane bas owuok ka terogi e wath, jotichgo nodhi gi buge 7, buge matindo 69, kod gasede 479. Parie mor kod ilo ma owete gi nyimine ma ne odhi e kampenno nobedogo!

Kane pok jotichgo odok e pinje ma ne giae, owete noyudo thuolo mar limogi e otende ma ne gidakie mondo gilernegi wach Pinyruoth adimba moloyo. Moko kuom jotichgo nowacho ni Joneno noselimogi ka gin e pinje mamoko. Jotichgo nodwoko ne owete erokamano kuom kawo okang’ mar limogi e kinde ma ne gidak Finland.

Be iikori ne thuolo manyalo poyoreni e alwora mar kanyaklau? Be ikawo okang’ mar lendo ne ji moa e dhoudi koda ogendini mopogore opogore? Ka en kamano, in bende inyalo yudo mor gi ilo kaka ma owetewa ma ne ni Turku obedogo.

[Map/​Picha manie ite mar 32]

(Mondo ine weche momedore, ne bugno)

FINLAND

HELSINKI

Turku

[En mar]

STX Europe