Tim Duto Minyalo e Tich Maduong’ mar Keyo

‘Ti matek e tich Ruoth.’—1 KOR. 15:58.

1. Yesu nogwelo jopuonjrene ne tich mane?

KANE owuotho kokalo e gweng’ mar Samaria e giko higa 30 E Ndalowa, Yesu nochung’ mondo oyue matin but soko mar pi machiegni gi dala mar Sukar. Kanyo ema nowachoe ne jopuonjrene niya: “Ting’uru wang’u ung’i puothe; nikech cham koro oromo keyo.” (Joh. 4:35) Yesu ok ne wuo kuom keyo masie, to nowuoyo kuom tij choko jogo ma chunygi nikare ma ne dhi bedo jolupne. Omiyo wechene ne gin magwelo jolupne mondo okaw okang’ mar tiyo tijno gin bende. Tich ne ng’eny, to kinde ne nok monego otimego!

2, 3. (a) Ang’o manyiso ni wadak e ndalo mag keyo? (b) En ang’o mwabiro nono e sulani?

² Weche Yesu e wi tij keyo gin weche makonyowa e yo makende e ndalowagi. Wadak e ndalo ma puodho mar ranyisi mochung’ne oganda dhano e piny, “koro oromo keyo.” Higa ka higa, ji tara mang’eny igwelo mondo orwak puonj madier machiwo ngima, kendo gana mang’eny mag jopuonjre manyien ibatiso. Wan gi thuolo makende mar tiyo e tij keyo maduong’ie moloyo moro amora mosetim, ka Ruodh keyo ma en Jehova Nyasaye, ema tayowa. Be ‘itiyo matek’ e tij keyono?—1 Kor. 15:58.

³ Kuom higini adek gi nus ma ne otiyogo ne Nyasaye e piny, Yesu noiko jopuonjrene ne tich ma ne gidhi timo kaka jokeyo. Sulani biro nono adek kuom puonj mang’eny ma Yesu nomiyo jopuonjrene. Puonj ka puonj jiwo kido mabiro konyowa ahinya sama watiyo matek e tij choko jopuonjre e ndalogi. Weuru wanon ane moro ka moro kuom kidogo.

Bolruok Dwarore

4. Ere kaka Yesu nonyiso ber mar bolruok?

⁴ Par ane wachni: Jopuonjre eka oa bedo gi ywaruok e wi wach jal maduong’ moloyo e kindgi. Chunygi koda wengegi pod nyalo bedo ni ne opong’ gi sigu. Koro Yesu luongo nyathi moro matin kae to ochunge e diergi. Kowuoyo kuom nyathi matinno, owacho kama: “Ng’at modoko mamuol [kata, “matimore owuon matin,” Byington] kaka nyathi matinni, jalo e ma nobed maduong’ moloyo e pinyruodh polo.” (Som Mathayo 18:1-4.) Kar bet gi paro kaka mar jopiny mapile ng’iyo duong’ ng’ato kaluwore gi telo, mwandu, koda migawo ma en-go, ne dwarore ni jopuonjre ong’e ni bedo maduong’ moloyo ne dhi luwore gi okang’ ma ‘gitimorego giwegi matin’ e wang’ jomoko. Jehova ne dhi gwedhogi kendo tiyo kodgi mana kane ginyiso bolruok madier.

5, 6. Ang’o momiyo nyaka ibolri mondo omi itim duto minyalo e tij keyo? Chiw ane ranyisi.

⁵ Nyaka chil kawuono, thoth ji e piny chiwo ngimagi e lawo telo, mwandu, koda migepe mag huma. Nikech mano, ok gibed gi thuolo moromo mar puonjruok e wi Nyasaye kendo tiyone. (Math. 13:22) Mopogore kodgi, oganda Jehova to mor ‘timore giwegi matin’ e wang’ jomoko mondo omi Ruodh keyo ogwedhgi kendo oyie kodgi.—Math. 6:24; 2 Kor. 11:7; Fili. 3:8.

⁶ Non ane ranyisi mar Francisco, masani en jaduong’-kanyakla e Amerka ma Milambo. Kane pod en rawera, noweyo sombe mar yunivasiti mondo obed japainia. Oparo kowacho kama: “Bang’e ka koro ne adwaro kendo, ne an gi thuolo mar yudo tich ma ne dhi miyo an  kod chiega wabed gi pesa mang’eny. Kar mano, ne wayiero mar keto ngimawa obed mayot mondo wadhi nyime tiyo ne Nyasaye kanyachiel kuom thuolowa duto. Bang’ kinde, ne wayudo nyithindo kendo mano koro nokelo pek momedore. Kata kamano, Jehova nokonyowa makore gi chenrowa mar dak e ngima mayot.” Francisco tieko kawacho kama: “Kuom higini mokalo 30, asebedo katiyo kaka jaduong’-kanyakla, kaachiel gi migepe mamoko makende mang’eny. Pok waywago ang’e ngang’ nikech keto ngimawa obed mayot.”

7. Ere kaka isetemo tiyo gi puonj michiwo e Jo Rumi 12:16?

⁷ Ka ikwedo gik mamiyo ji “sungore” e pinyni kendo iyie ‘lalori gi jo mamuol,’ in bende inyalo bedo gi thuolo mar yudo gweth koda migepe momedore e tij keyo.—Rumi 12:16; Math. 4:19, 20; Luka 18:28-30.

Kinda Kelo Gweth Mabeyo

8, 9. (a) Ket ane e yo machuok ngech Yesu e wi talanta. (b) Ngeroni nyalo jiwo jomage moloyo?

⁸ Kido machielo madwarore mondo omi watim duto mwanyalo e tij keyo, en kinda. Yesu nonyiso mano e ngero mar talanta. * Ngerono wuoyo kuom ng’at ma kane pok odhi e wuoth moro mabor, noketo mwandune e lwet jotichne adek. Nomiyo jatich mokwongo talanta abich, mar ariyo talanta ariyo; to mar adek talanta achiel. Bang’ ka ruodhgi nosedhi, jotich ariyo mokwongo notimo kinda mapiyo mar ‘loko ohala’ gi talanta ma ne omigi. Kata kamano, jatich mar adek to ne en “jasamuoyo.” Ne okunyo bur e lowo mopandoe talanta mare. Kane ruodhgi oduogo, nomiyo jotich ariyo mokwongo pok, kuom ketogi e wi “gik mang’eny.” Nomayo jatich mar adek talanta ma ne oyudo osemiye, mi ne oriembe oa e ode.—Math. 25:14-30.

⁹ Onge kiawa ni chunyi dwaro ni mondo ibed kaka jotich ma jokinda ma Yesu nowuoyoe e ngerono, kendo mondo itim duto minyalo e tij timo ji jopuonjre. To nade kapo ni sani nitie gik mamoni timo tijni e okang’ madwarore? Dibed ni pek mar yuto miyo itiyo kuom seche mang’eny mondo eka irit joodi. Kata nyalo bedo ni koro tekoni tin nikech ijaduong’ kata nikech midekre. Ka en kamano, ngero mar talanta oting’o puonj mabiro jiwi.

10. Ere kaka ruoth miwuoyoe e ngerono nonyiso ni ong’eyo nyalo mar jotije, to ang’o momiyo iparo ni mano en gima jiwowa?

¹⁰ Ne ni e ngerono, ruodh jotichgo nong’eyo maber ni ng’ato ka ng’ato kuomgi ne nigi nyalo mopogore opogore. Bedo  ni ne omiyo “ng’ato ka ng’ato kaka tekre owuon obet,” konyowa ng’eyo mano. (Math. 25:15) Nikech nyalo ma ne jatich mokwongo nigo, noyudo ohala maloyo jatich mar ariyo. Kata kamano, ruodhgi ne oyie kendo norwako kinda mar jotich ariyogo duto, mi oluongogi ni jotich ‘mabeyo kendo mogen,’ kendo nomiyogi pok machalre. (Math. 25:21, 23) Kamano bende, Ruodh keyo ma en Jehova Nyasaye, ong’eyo kaka chal mari nyalo moni timo kaka diher e tije. Kuom adier, obiro rwako kinda minyiso kuom tiyone gi chunyi duto kendo obiro miyi pok mowinjore.—Mari. 14:3-9; som Luka 21:1-4.

11. Nyis ane kaka bedo gi kinda e kinde mag chandruok nyalo kelo gweth mang’eny.

¹¹ Ranyisi mar Selmira, nyaminwa ma Jakristo modak e piny Brazil, nyiso ni bedo gi chal maber e ngima ok ema mi ng’ato bed jakinda e tij Nyasaye. Higini piero ariyo mokalo, jokuoge ne onego chwor Selmira gi bunde, mi ne odong’ gi ting’ mar pidho nyithindo adek matindo. Tij ot ma ne otimo ne jomoko ne dwaro ni oti kuom seche mogwaro, kotiyo gi yor wuoth ma jonyo ng’ato ahinya. Kata obedo ni ne en gi pekgo, noloso chenrone e yo maber mondo omi oti kaka japainia mapile. Ariyo kuom nyithinde adek bende nobedo jopainia kaka en. Owacho kama: “Kuom higini mokalo, asepuonjo ji makalo 20 Muma, kendo gisebedo kaka jokanyo mag ‘oda.’ Kata mana gie sani, pod waherore kendo wan osiepe. Mano en gweth maduong’ ma pesa ok nyal ng’iewo.” Kuom adier, Ruodh keyo osegwedho kinda mar Selmira!

12. Ere kaka wanyalo nyiso kinda e tij lendo?

¹² Ka chal mar ngimani gie sani moni tiyo tij lendo kaka diher, podi inyalo temo timo duto minyalo e tij keyo kuom neno ni yore milendogo gin makelo nyak maber. Ka itiyo adimba gi paro makonyo michiwonwa juma ka juma e Chokruok mar Tijwa, ibiro piago lony mari e tij lendo kendo ibiro manyo yore manyien mag lendo. (2 Tim. 2:15) Bende, kanyalore, inyalo loso chenro, kata weyo timo gik moko maok ochuno ahinya, mondo omi iriw lwedo chenro ma kanyakla oseketo mag timo tij lendo maok ibari.—Kol. 4:5.

13. En ang’o mamiyo ng’ato bedo gi kinda kendo siko kode?

¹³ Ng’e maler ni chuny mopong’ gi erokamano ne Nyasaye ema miyo ng’ato bedo jakinda. (Zab. 40:8) Jatich mar adek miwuoyoe e ngech Yesu mar talanta ne oluoro ruodhe, kendo nokawo ruodhe kaka ng’at makoch maok owinjore. Nikech mano, jalo nokunyo talantane kar tiyo gi talantano e medo mwandu mag ruodhe. Mondo kik wabed gi chuny mar samuoyo kamano, dwarore ni wanyag kendo wabed gi winjruok machiegni ahinya gi Ruodh keyo, ma en Jehova. Ket tenge kinde mar puonjruok koda paro matut kuom kido mage mabeyo—herane, horruok mos, kod ng’wonone. Kuom timo kamano, chunyi biro jiwi timo duto minyalo e tije.—Luka 6:45; Fili. 1:9-11.

Nyaka ‘Ubed Maler’

14. Jogo madwaro tiyo kaka jokeyo nyaka kaw okang’ mane madwarore?

¹⁴ Konwoyo weche manie Ndiko mag Dho-Hibrania, jaote Petro nyiso dwaro mar Nyasaye kuom jotichne manie piny, kowacho niya: “Kaka Jal ma noluongou oler, un bende beduru maler e timu duto. Nikech nondiki niya, ‘Unubed maler, nikech aler.’” (1 Pet. 1:15, 16; Lawi 19:2; Rapar 18:13) Wechego nyiso ni dwarore ni joma timo tij keyo, obed maler e timbegi koda e winjruokgi gi Nyasaye. Wanyalo chopo e okang’ madwaroreno kuom kawo ondamo mag luokruok e yor ranyisi. Ere kaka inyalo tim mano? En kokalo kuom kony mar wach Nyasaye ma en adier.

15. Adiera mar wach Nyasaye nigi teko mar timonwa ang’o?

¹⁵ Iporo wach Nyasaye ma en adier gi pi mitiyogo e pwodho kata miyo gimoro obed maler.  Kuom ranyisi, jaote Paulo nondiko ni kanyakla mar Jokristo mowal ler e wang’ Nyasaye, mana kaka miaha maler mar Kristo, ma ne omiyo obedo maler kokalo kuom “lwok mar pi kod wach, . . . obed maler ma onge seyo.” (Efe. 5:25-27) Motelo, noyudo Yesu bende osewuoyo kuom wach Nyasaye ma ne olando ma ne nigi teko mar miyo ji obed maler. Kowuoyo gi jopuonjrene, Yesu nowacho kama: “Un koro uler, nikech wach ma nawachonu.” (Joh. 15:3) Omiyo, adiera manie wach Nyasaye nigi teko mar miyo ng’ato obed maler e timbe koda e winjruokne gi Nyasaye. Mana ka waweyo mondo adiera mar Nyasaye oluokwa e yo machalo kamano, eka Nyasaye biro yie gi yorwa mar lamo.

16. Ere kaka wanyalo siko ka waler e rito puonj koda chike Nyasaye?

¹⁶ Kuom mano, mondo wabed jotich e keyo mar Nyasaye, nyaka wakwong wagol e kit ngimawa, timbe duto mochido e wang’e. Ee, mondo wadhi nyime bedo joma owinjore tiyo tij keyo, nyaka wabed joma keto ranyisi maber e rito chike makare kod puonj mamalo mag Jehova. (Som 1 Petro 1:14-16.) Mana kaka warito pile ler marwa mar del, e kaka nyaka wayie mondo wach adiera mar Nyasaye opwodhwa pile. Mano dwaro ni wabed joma somo Muma kendo dhi e chokruoge mag Jokristo. Dwarore bende ni watim kinda ahinya mar tiyo gi puonj ma Nyasaye miyowa e ngimawa. Timo kamano biro miyo wabed gi nyalo mar kedo kendo kwedo kido mag richo kod gik pinyni manyalo chidowa. (Zab. 119:9; Jak. 1:21-25) Ee, mano kaka en gima hoyo chuny ng’eyo ni kokalo kuom kony mar wach Nyasaye ma en adier, inyalo ‘luokwa’ mi puodhwa kuom richo, kata mana maduong’!—1 Kor. 6:9-11.

17. Mondo omi wasiki ka waler, en puonj mane mar Muma ma nyaka waluw?

¹⁷ Be iyie mondo wach adiera mar Nyasaye ochik ngimani? Kuom ranyisi, itimo nade sama omiyi siem kuom yore maricho mag piny korka manyo mor kod yueyo? (Zab. 101:3) Be itemo mondo kik ibed gi tudruok ka ok ochuno, gi joskul kod jotich weteni maok luw puonj miluwo? (1 Kor. 15:33) Be itimo kinda madwarore e loyo nyawo ma in-go manyalo miyo ibed maok ler e wang’ Jehova? (Kol. 3:5) Be itemo mondo kik idonj e ywaruok mag siasa mar jopiny kod chuny mar sigu nikech hero pinyu moloyo, ma en chuny mopong’ ahinya e tuke mag piem?—Jak. 4:4.

18. Ere kaka bedo maler e timbewa koda e puonjwa biro konyowa bedo jokeyo mayudo nyak maber?

¹⁸ Bedo ng’ama winjo wach kuom weche monyisgo biro keloni gweth mabeyo. Koporo jopuonjrene mowal kod bede yadh mizabibu, Yesu nowacho kama: ‘Bedena duto ma ok nyag olemo, Wuora golo oko, kendo bede duto ma nyago olemo, oloso mondo omed nyak.’ (Joh. 15:2) Kaka imedo yie mondo pi adiera manie Muma opwodhi, e kaka ibiro medo nyago olemo momedore.

Gweth Mwayudo Sani Koda e Kinde Mabiro

19. Ere kaka ne ogwedh jopuonjre Yesu nikech kinda margi e tij keyo?

¹⁹ Jopuonjre ma ne ochung’ motegno e tiegruok ma Yesu nomiyogi, bang’e ne obiro moyudo roho maler chieng’ Pentekost 33 E Ndalowa, mi gibedo gi teko mar bedo joneno “nyaka tung’ piny.” (Tich 1:8) Ne  ochopo kama ne gibedo jokanyo mag bura maduong’, jomisonari, kaka jodongo malworo, kendo ne gikonyo ahinya e tij lando wach maber ne “chuech duto e bwo polo.” (Kol. 1:23) Mano kaka ne giyudo gweth mang’eny, kendo kelo mor ne jomoko!

20. (a) Gin gweth mage miseyudo nikech timo duto minyalo e tij keyo mar choko ji? (b) Ing’ado mar timo ang’o?

²⁰ Ee, kuom nyiso bolruok, kinda, kod rito puonj makare manie Wach Nyasaye, wabiro dhi nyime timo duto mwanyalo e tich maduong’ mar keyo masani dhi nyime. Sama ji mang’eny yudo lit kod nyosruok mar chuny nikech lawo mwandu kod manyo dak e kit ngima mar chopo gombogi giwegi, wan to wan gi mor kod chuny mokuwe gadier. (Zab. 126:6) Maduong’ moloyo duto, ‘tichwa ok obedo kayiem ne Ruoth.’ (1 Kor. 15:58) Ruodh keyo, Jehova Nyasaye, biro gwedhowa mochwere, nikech ‘tichwa gi hera mwanyiso ni waherogo nyinge.’—Hib. 6:10-12.

[Weche moler piny]

Be Iparo?

Sama itemo mondo itim duto minyalo e tij keyo . . .

• ang’o momiyo dwarore ni inyis bolruok?

• ere kaka inyalo bedo gi kinda kendo siko kode?

• ang’o momiyo dwarore ni wasiki ka waler e rito chike koda puonj Nyasaye?

[Penjo mag Puonjruok]

[Picha manie ite mar 17]

Bolruok nyalo konyowa keto ngimawa obed mayot mondo wariw lwedo weche Pinyruoth