Kaka Rawar Resowa
Kaka Rawar Resowa
“Ng’a ma oyie kuom Wuowi en gi ngima ma nyaka chieng’; to ng’a ma ok winj Wuowi ok none ngima, to mirimb Nyasaye osiko kuome.”—JOH. 3:36.
1, 2. Achiel kuom gik ma nomiyo ochak go Zion’s Watch Tower ne en ang’o?
GOCHO mar ang’wen mar Zion’s Watch Tower nowacho kama Oktoba 1879: “Ng’ato ang’ata masomo Muma adimba biro neno kaka tho Kristo en gima duong’.” Sulano notieko gi weche monego okaw gi pekgi: “Watang’uru gi gimoro amora machayo kata makwedo tho Kristo kaka misango kod raum richo.”—Som 1 Johana 2:1, 2.
2 Achiel kuom gik momiyo ne ochak go Zion’s Watch Tower Julai 1879, ne en siro wach rawar ma en puonj mar Muma. Gasedno noting’o “chiemo e kinde makare,” nimar e giko higini mag 1800, ji mang’eny ma ne wacho ni gin Jokristo nochako bedo gi kiawa kabe tho Yesu ne nyalo bedo rawar mar richowa. (Math. 24:45) E kindeno, ng’eny ji nochako rwako puonj mar ni gik moko nosieko kendgi maok ochwegi, ma en paro makwedo adier mar ni dhano orem nikech richo. Joma oyie gi puonj mar ni gik moko nosieko kendgi maok ochwegi, puonjo ni rawar ok en gima ochuno nimar ngima dhano lokore kende owuon ka medo bedo maber moloyo. Omiyo puonj madwarore ahinya en ma jaote Paulo nomiyo Timotheo niya: ‘Rit gino ma ne omiyi; kik ichik iti ni twak manono maonge tiende, kod mbekni mag ng’eyo, to chutho ok en “ng’eyo.” Jomoko mawacho ni gin kod ng’eyono osebayo yo gia kuom yie.’—1 Tim. 6:20, 21.
3. Gin penjo mage makoro wabiro nono?
3 Onge kiawa ni in ok idwar ‘bayo yo ia kuom yie.’ Mondo omi irit yieni motegno, biro bedo maber nono penjo maluwogi: Ang’o momiyo rawar en gima dwarore e ngimana? Ang’o ma ne dwarore eka mondo ochiw rawarno? Ere kaka chiwo ma nengone duong’ni nyalo resa e mirimb Nyasaye?
Inyalo Reswa Kuom Mirimb Nyasaye
4, 5. Ang’o manyiso ni mirimb Nyasaye osiko kuom chenro marach mar piny masani?
4 Muma kaachiel gi weche ma dhano oseneno ratiro, nyiso ni chakre Adam donj e richo, mirimb Nyasaye ‘osesiko kuom’ oganda dhano. (Joh. 3:36) Mano nenore maler nikech gikone onge dhano moro amora mosetony ne tho. Loch Satan ok osegeng’o dhano chuth kuom masira masiko ka yudo ji, kendo onge sirkand dhano ma osechopo dwaro mag jogo duto manie bwogi. (1 Joh. 5:19) Omiyo dhano pod chandore nikech lweny, mahundu, kod dhier.
5 Kuom mano, nenore maler ni chenro marach mar piny masani onge gi gweth mar Jehova. Paulo nowacho kama: “Mirimb Nyasaye elore a e polo, komon gi richo duto.” (Rumi 1:18-20) Omiyo, jogo madak e ngima maok luwre gi kaka Nyasaye dwaro to tamore loko chunygi, ok bi tony kuom gik ma timbegi biro kelo. Kindegi, mirimb Nyasaye elore kokalo kuom lando weche mag bura, masani iolo kaka masiche e piny Satan, kendo wechego yudore e thoth bugewa mawuoyo kuom Muma.—Fwe. 16:1.
6, 7. En tich mane ma Jokristo mowal tayo, to thuolo mane ma pod nitie ne jogo manie twech mar piny Satan?
6 Be mano koro nyiso ni sa oserumo ne jogo madwaro a e twech mar loch Satan mondo gibi gibed e winjruok gi Nyasaye? Ooyo, thuolo mar loso winjruok gi Jehova pod lach ahinya. Jokristo mowal, ma gin “joote Kristo,” tayo tij lendo ma e yo migwelogo ji moa e ogendini duto ni: “Winjreuru gi Nyasaye.”—2 Kor. 5:20, 21.
7 Jaote Paulo nowacho ni, Yesu “resowa a e mirima ma biro.” (1 Thes. 1:10) Yo mogik ma Jehova biro nyisogo mirimbe biro kelo kethruok mosiko ne joricho motamore loko chunygi. (2 Thes. 1:6-9) Ng’a gini mabiro tony? Muma wacho kama: “Ng’a ma oyie kuom Wuowi en gi ngima ma nyaka chieng’; to ng’a ma ok winj Wuowi ok none ngima, to mirimb Nyasaye osiko kuome.” (Joh. 3:36) Ee, e kinde ma chenro mar pinyni biro chopo e gikone, jogo duto manobed mangima to keto yie kuom Yesu koda kuom rawar, biro tony e kethruok mar odiechieng’ mogik mar mirimb Nyasaye.
Kaka Rawar Tiyo
8. (a) Adam gi Hawa ne nigi thuolo mane majaber e nyimgi? (b) Ere kaka Jehova nonyiso ni en Nyasaye mang’ado bura kare?
8 Ne ochwe Adam gi Hawa kaka joma kare maonge richo. Ka dine gisiki ka giwinjo Nyasaye, piny dikoro opong’ gi kothgi modak gi mor kanyachiel e Paradis. Kata kamano, gima lit en ni jonyuolwa mokwongo noyiero mar ketho chik Nyasaye goyiem. Nikech mano, ne omigi kum mar tho ma nyaka chieng’ kendo ne oriembgi e Paradis mokwongo. Ka nochopo kama ne giyudo nyithindo, richo nosemako dhano duto, kendo gikone dichwo gi dhako mokwongo nobet moti ma githo. Mano nyiso ni Jehova chopo wechene adier. E wi mano, en Nyasaye mang’ado bura kare chuth. Noyudo Jehova osesiemo Adam ni chamo olemo ma ne okwer ne dhi kelo tho—kendo mano ema notimore.
9, 10. (a) Ang’o momiyo nyithind Adam tho? (b) Ere kaka wanyalo tony ne tho manyaka chieng’?
9 Kaka koth Adam, onyuolwa e del morem mar richo kendo ma gikone tho. Kane Adam otimo richo, inyalo wachi ni ne wan e nungone e yor ranyisi. Omiyo kum mar tho noriwowa wabende. Ka Jehova ne nyalo loko kum mar tho maonge chulo rawar, dine obedo jamiriambo kuom wechene. Omiyo wanyalo wacho ni Paulo nowuoyo e lowa ka nowacho niya: “Wang’eyo ni Chik en mar chuny; to an dhand ringruok, moseng’iew abet e loch richo. Yaye, an ng’at ma chandore! Ng’ano ma biro resa e ringruokni mar tho?”—Rumi 7:14, 24.
10 Mana Jehova Nyasaye kende ema ne nyalo chiwo mise mar weyonwa richowa kendo gonyowa a e kum mar tho ma nyaka chieng’, kotiyo gi okang’ maluwore gi buchene makare. Notimo mano kuom oro Wuode mohero koa e polo mondo onyuole kaka dhano maonge richo, ma ne nyalo chiwonwa ngimane kaka rawar. Mopogore gi Adam, Yesu nosiko kaka ng’a makare chuth. Kuom adier, “ne ok oketho.” (1 Pet. 2:22) Omiyo Yesu ne nyalo bedo gi nyalo mar nyuolo oganda dhano maonge richo. Kar mano, ne oyie mondo wasik Nyasaye onege eka oyud thuolo mar kawo nyithind Adam obed mage, kendo mondo omi jogo maketo yie kuome thuolo mar yudo ngima mochwere. Ndiko lero niya: “Nyasaye en achiel, kendo e kind Nyasaye kod ji nitie jagach achiel; en dhano, ma en Kristo Yesu. En e ma nochiwore owuon mondo obed rawar ni ji duto.”—1 Tim. 2:5, 6.
11. (a) En ranyisi mane minyalo tigo e lero ber mar rawar? (b) Rawar konyo e okang’ maduong’ maromo nade?
11 Kaka rawar tiyo en gima inyalo ler tiende kuom tiyo gi ranyisi mar joma bengi marach okwalo pesagi duto ma ne gikano kuno, mi mano orwakogi e gowi. Bang’e, mana kaka owinjore, ing’adone weg bengino buch twech e jela kuom higini mogwaro. To nade kuom jokeno ma ne onge ketho? Nikech gisedong’ jodhier, gionge yo machielo mar konyruok mak mana ka ng’at moro ma jamewo okawo ohand bengino modwokonegi pesa duto ma ne gisekano, kendo ogonyogi e gowi. E yo machalo kamano, Jehova Nyasaye kod Wuode mohero oseng’iewo nyithi Adam, kendo giserucho gowi mar richo kokalo kuom remb Yesu ma nochwer. Mano e momiyo Johana Jabatiso ne nyalo wacho kuom Yesu kama: ‘Neuru, Nyarombo mar Nyasaye, ma golo richo mag piny!’ (Joh. 1:29) Oganda dhano me piny migolo richogi oriwo, ok mana joma ngima kende, to jomotho bende.
Gima ne Dwarore e Chiwo Rawarno
12, 13. Ang’o mwanyalo puonjore kuom chuny ma Ibrahim ne nigo mar chiwo Isaka?
12 Ok wanyal ng’eyo ngang’ ni chiwo rawar nokawo Wuonwa me polo kod Wuode mohero nengo maduong’ maromo nade. Kata kamano, Muma wuoyo kuom ranyisi manyalo konyowa paro matut kuom wachno. Kuom ranyisi, par ane kaka nyaka bed ni Ibrahim nowinjo kane oluwo kaka Nyasaye nochike modhi e wuodh ndalo adek nyaka Moria: “Kaw wuodi koro, wuodi ma miderma, en mihero, Isaka, kendo idhi e piny Moria; kendo chiwe kanyo ka misango miwang’o e wi got moro ma nanyisi.”—Chak. 22:2-4.
13 Gikone, Ibrahim nochopo kama nonyise. Parie kaka nyaka bed ni chunye nochandore kotweyo bede Isaka koda tiendene, kendo kete e wi altar ma Ibrahim wuon ema nogero. Mano kaka ting’o pala mondo oneggo wuode nyaka bed ni nomiyo owinjo malit e chunye! Parie kaka Isaka ne winjo kane en e wi altar, korito mondo ong’ole gi ng’ol ma ne dhi nege. Malaika mar Jehova nochungo lbrahim mana gie sa mowinjore. Gima Ibrahim gi Isaka notimo e kindeno konyowa ng’eyo kaka Jehova nowinjo kane oweyo mondo jo Satan oneg Wuode. Kaka Isaka noriwo Ibrahim lwedo en gima nyiso chuny ma Yesu ne nigo koikore mar mondo osande kendo othonwa.—Hib. 11:17-19.
14. Ang’o ma ne otimore e ngima Jakobo ma konyowa ng’eyo gima ne dwarore e chiwo rawar?
14 Ranyisi machielo minyalo tigo e lero gima ne dwarore e chiwo rawar nenore bende kuom gima notimore e ngima Jakobo. Kuom yawuote duto, wuowi ma ne Jakobo ohero ahinya ne en Josef. Gima lit en ni owete Josef ne nenone nyiego kod sigu. Kata kamano, Josef noyie mondo wuon mare oti kode e ng’eyo chal mar owetene. E kindeno, ne gikwayo romb Jakobo kilomita 100 yo masawa koa dalagi Hebron. Parie kaka Jakobo nowinjo kane yawuote oduogo ka giting’o law Josef kotimo remo! Ne okok kama: “Ma e nanga wuoda; ondiek marach osechame; ma onge kiawa osekidho Josef.” Mano nokelo ne Jakobo lit ahinya, mi noywago Josef kuom ndalo mang’eny. (Chak. 37:33, 34) Ka gimoro otimore, Jehova ok kaw okang’ e yo machal chuth gi kaka dhano morem kawo. Kata kamano, paro matut kuom gima notimore e ngima Jakobo, nyalo konyowa ng’eyo e okang’ moro, kaka nyaka bed ni Nyasaye nowinjo sama ne osand Wuode mohero monege malit kaka dhano e piny.
Kaka Rawar Konyowa
15, 16. (a) Ere kaka Jehova nonyiso ni oyie gi rawar? (b) Ere kaka rawar osekonyi?
15 Jehova Nyasaye nochiero Wuode ma ne ochung’ motegno e ringruok mar roho, ma nigi duong’. (1 Pet. 3:18) Kuom odiechienge 40, Yesu makoro ne osechier nofwenyore ne jopuonjrene, kotego yiegi kendo ikogi ne tij lendo maduong’ ma ne gidhi timo. Kae to noidho e polo. Kuno ema ne ochiwoe ne Nyasaye nengo mar rembe ma ne ochwer, ma ne idhi tigo kuom jolupne madier maketo yie kuom nengo mar misango mar rawar. Jehova Nyasaye nonyiso ni ne oyie gi rawar mar Kristo kuom miyo Yesu migawo mar olo roho maler kuom jopuonjrene ma ne ochokore Jerusalem e odiechieng Pentekost 33 E Ndalowa.—Tich 2:33.
16 Gikanyono, jolup Kristo mowalgi nochako jiwo jowetegi mondo otony e mirimb Nyasaye kuom yie mondo obatisgi e nying Yesu Kristo eka owenegi richogi. (Som Tich Joote 2:38-40.) Chakre kinde makendeno nyaka sani, ji tara gi tara moa e ogendini duto osebiro mobedo gi winjruok gi Nyasaye kokalo kuom keto yie kuom misango mar rawar mar Yesu. (Joh. 6:44) Nyaka chop kae, dwarore ni wanon penjo moko ariyo: Be nitie jomoko kuomwa ma ne omi geno mar ngima mochwere nikech timbegi giwegi mabeyo? Bang’ yudo geno majaber kama, be wanyalo wite?
17. Ere kaka onego ikaw gweth maduong’ mar bedo osiep Nyasaye?
17 Chutho, rawar ok en gima wawinjore yudo. Kata kamano, keto yie kuom rawarno osemiyo ji tara gi tara obedo osiepe Nyasaye, ka gin gi geno mar dak nyaka chieng’ e paradis e piny. Kata kamano, bedo osiepe Jehova ok nyis ni koro wanyalo siko ka wan e winjruokno. Mondo omi watony kuom mirimb Nyasaye mar kinde mabiro, nyaka wadhi nyime bedo gi chuny manyiso erokamano maduong’ kuom ‘rawar ma Kristo Yesu nochiwo.’—Rumi 3:24; som Jo Filipi 2:12.
Dhi Nyime Keto Yie Kuom Rawar
18. Keto yie kuom rawar oriwo timo ang’o?
18 Johana 3:36, ma e ndiko matayo sulani, nyiso ni keto yie kuom Ruoth Yesu Kristo oriwo winje bende. Erokamano ma wan-go kuom rawar onego omi wadag e ngima maluwore gi puonj mag Yesu, moriwo nyaka gik ma ne opuonjo e wi bedo gi timbe mabeyo. (Mari. 7:21-23) “Mirimb Nyasaye” biro kuom jogo duto mapok oloko chunygi kuom timbe kaka terruok, oyuma kata ngera mochido, koda “tim ma ok ler duto,” moriwo nyaka tim rango ponografi.—Efe. 5:3-6.
19. Gin yore mage mabeyo mwanyalo nyisogo ni waketo yiewa kuom rawar?
19 Nyiso erokamano kuom rawar onego omi wamed bedo modich gi tije manyiso ‘luoro Nyasaye.’ (2 Pet. 3:11) We waket tenge kinde moromo mar kwayo e lamo gi kinda, puonjruok Muma kendwa wawegi, dhi e chokruoge, timo lamo mar joot, kod nyiso chuny mar timo tij lando Pinyruoth. Kendo mad ‘kik wiwa wil ngang’ gi timo maber kod pogo giwa ne jo moko ma ongego, nikech mago e misengini ma Nyasaye morgo.’—Hib. 13:15, 16.
20. Jogo duto ma dhi nyime keto yie kuom rawar nyalo geno yudo gweth mane mar kinde mabiro?
20 E kinde ma mirimb Jehova biro muoch e wi chenro marach mar pinyni, mano kaka wabiro mor ni ne waketo yie kuom rawar kendo wasebedo kwanyiso erokamano kuom chiwono! Kendo e piny manyien ma Nyasaye osesingo, wabiro siko ka wanyiso erokamano kuom misango ma ne oresowa kuom mirimb Nyasaye.—Som Johana 3:16; Fweny 7:9, 10, 13, 14.
Inyalo Dwoko Nade?
• Ang’o momiyo rawar ne dwarore?
• Ang’o ma ne dwarore mondo eka ochiw rawar?
• Gin ber mage ma rawar kelo?
• Ere kaka wanyalo nyiso ni waketo yie kuom misango mar rawar mar Yesu?
[Penjo mag Puonjruok]
[Picha manie ite mar 13]
Thuolo mar bedo kendo gi winjruok e kindwa gi Jehova, pod nitie
[Piche manie ite mar 15]
Paro matut kuom gik ma ne otimore e ngima Ibrahim, Isaka, kod Jakobo, nyalo konyowa neno gima ne dwarore eka mondo ochiw rawar