Kaka Yesu Miyo Tich Makare mar Nyasaye Onenre

“Kuom rembe, Nyasaye nokete [Kristo] mondo obed misango kuom yie, mondo tich makare mar Nyasaye onen.”​—RUMI 3:25.

1, 2. (a) Ang’o ma Muma puonjowa kuom chal mar dhano? (b) Gin penjo mage ma sulani biro nono?

WECHE manie Muma mawuoyo kuom ng’anjo ma ne otimore e puodho mar Eden, ong’ere ahinya. Mana kaka oler e weche maluwogi, gik matimorenwa nikech richo mar Adam yudowa waduto: “Richo nobiro e piny kuom ng’at achiel, kendo tho nobiro e piny kuom richo, kamano bende tho nobiro ni ji duto, nikech ji duto ne otimo richo.” (Rumi 5:12) Kata watem matek manade timo gik makare, pod wakier, kendo mano miyo dwarore ni Nyasaye owenwa. Kata mana jaote Paulo noywak kama: “Gi maber madwaro timo ok atim; to gi marach ma ok adwar timo e matimo. Yaye, an ng’at ma chandore!”​—Rumi 7:19, 24.

² Nikech onyuolwa e richo, ng’eyo dwoko mag penjo maluwogi dwarore: Ere kaka ne inyalo nyuol Yesu ma Ja-Nazareth maonge richo, to ang’o momiyo nobatise? Ere kaka kit ngima Yesu nomiyo tich makare mar Nyasaye onenore? To moloyo duto, tho mar Yesu nochopo ang’o?

Ne Oket Kiawa Kuom Tich Makare mar Nyasaye

3. Ere kaka Satan nowuondo Hawa?

³ Jonyuolwa mokwongo, Adam gi Hawa, nokwedo loch Nyasaye goyiem ka giyiero bedo e bwo loch ‘thuol machon, miluongo ni Jachien kendo Satan.’ (Fwe. 12:9) Ne ane kaka mano notimore. Satan noketo kiawa kabe yo ma Jehova Nyasaye lochogo en yo makare. Notimo kamano kopenjo Hawa niya: ‘Mano adieri koso, Nyasaye osewacho, kik ucham kuom yien duto ma ni e puodho?’ Hawa nonwoyo chik ma Nyasaye nochiwo e yo maler ni, yath moro achiel ne ok owinjore omul, nono to ne gidhi tho. Omiyo Satan nodonjo ne Nyasaye kaka jamiriambo. Jachien nowacho niya, “Ok unutho ngang’.” Nomedo wuondo Hawa mondo oyie ni nitie gimoro maber ma Nyasaye ne tuonogi, kendo ni kuom chamo olemono, nodhi bet kaka Nyasaye ka en thuolo mar timo dwache owuon.​—Chak. 3:1-5.

4. Ere kaka dhano nobiro mobet e bwo loch mar Satan?

⁴ Gima Satan ne temo wacho en ni, dhano ne dhi bedo mamor moloyo, ka gitayore kendgi giwegi maok otelnegi gi Nyasaye. Kar riwo lwedo ratiro ma Nyasaye nigo mar bedo jaloch makare e wigi, Adam nowinjo chiege kendo noriwore kode e chamo olemo ma ne osekwergi. Omiyo Adam noketho winjruok ma ne en-go gi Jehova kendo norwakowa e bwo ting’ mapek mar richo kod tho. Gie kindeno bende, dhano nobiro mobedo e bwo loch mar Satan, “nyasach pinyni.”​—2 Kor. 4:4; Rumi 7:14.

5. (a) Ere kaka Jehova nomakore gi wachne? (b) En geno mane ma Nyasaye nochiwo ne nyikwa Adam gi Hawa?

⁵ Mana kaka nosewacho, Jehova nomiyo Adam gi Hawa kum mar tho. (Chak. 3:16-19) Kata kamano, dwaro mar Nyasaye ne ok orem. Mano ne ok nyalre ngang’! Sama ne ong’ado bura ne Adam gi Hawa, Jehova  nochiwo weche moko machiwo geno ne nyikwagi. Notimo kamano kuom nyiso ni ne odhi chiwo ‘kodhi’ ma Satan ne dhi ketho ofunj tiende. Kata kamano, ofunj tiend Kodhi ma ne osingino ne dhi chango, kendo ne odhi ‘ketho wi’ Satan. (Chak. 3:15) Muma lero wachni ayanga kowacho kama e wi Yesu Kristo: “Wuod Nyasaye nofwenyore nikech wachni, mondo oketh tich Satan.” (1 Joh. 3:8) To ere kaka tim Yesu koda thone nomiyo tich makare mar Nyasaye onenre?

Tiend Batiso mar Yesu

6. Ere kaka wanyalo ng’eyo ni ne ok onyuol Yesu gi richo mar Adam?

⁶ Kane osebedo ng’ama duong’, Yesu nonego obed maromre chuth gi Adam, ka Adam ne pok otimo richo. (Rumi 5:14; 1 Kor. 15:45) Mano nyiso ni nyaka ne nyuol Yesu maonge richo. Ere kaka mano ne dhi nyalore? Malaika Gabriel nonyiso Mariam min Yesu e yo maler kama: ‘Roho maler nobi kuomi, kendo teko mar Ng’a Mamalo Chutho noumi. E momiyo nyathi mibiro nyuolo bende noluong ni maler, Wuod Nyasaye.’ (Luka 1:35) Kane Yesu pod tin, nenore ni Mariam min-gi nonyise weche moko motudore gi nyuolne. Omiyo, kinde moro ka Mariam kod Josef ne oyudo Yesu e hekand Nyasaye, Yesu nopenjogi kama: “Ne ukiya ni onego abed e od Wuora koso?” (Luka 2:49) Nenore ni a e tinne, Yesu nong’eyo ni ne en Wuod Nyasaye. Kuom mano, nyiso tich makare mar Nyasaye en gima ne omiyo pek ahinya.

7. Gin ang’o makare chuth ma Yesu ne nigo?

⁷ Yesu nonyiso ni nohero weche Nyasaye kuom dhi e chokruoge mag lamo maok obare. Nikech bedo gi paro makare chuth, nyaka bed ni weche duto ma ne owinjo kendo somo e Ndiko mag Dho-Hibrania, ne donjone e yo mong’ith. (Luka 4:16) Bende ne en-gi gimachielo makare chuth—ringruok ma ne inyalo chiw ne dhano kaka misango. Sama ne ibatise, Yesu ne lemo kendo nyalo bedo ni ne oparo kuom weche ma ne okor e Zaburi 40:6-8.​—Luka 3:21; som Jo Hibrania 10:5-10. *

8. Ang’o momiyo Johana Jabatiso notemo sindo batiso mar Yesu?

⁸ Johana Jabatiso ne temo sindo batiso mar Yesu. Nikech ang’o? En nikech Johana ne batiso Jo-Yahudi kaka ranyisi mar ni giseloko  chunygi a e richo mar ketho Chik. Kaka watne machiegni, nyaka bed ni Johana nong’eyo ni Yesu ne en ng’at makare, omiyo ne onge tiende ni olok chunye a e richo. Yesu nonyiso Johana maler ni ne owinjore obatise. Yesu nolero kama: “E kaka owinjore mondo wachop tim makare duto.”​—Math. 3:15.

9. Batiso mar Yesu nochung’ ne ang’o?

⁹ Kaka dhano makare chuth, Yesu ne nyalo ng’eyo ni mana kaka Adam, en bende ne en gi nyalo mar nyuolo oganda dhano maonge richo. Kata kamano, Yesu ne ok nigi gombo ma kamano ngang’, nikech mano ok e kaka Jehova ne dwarone. Nyasaye ne ooro Yesu e piny mondo ochop migawo mar Kodhi ma ne osingi, kata kaka Mesia. Mano noriwo migawo mar chiwo ngimane makare chuth kaka misango. (Som Isaiah 53:5, 6, 12.) En adier ni gimomiyo ne obatis Yesu opogore gi mano momiyo ibatiswa. Batiso mare ne ok dwar ni ochiwre e yor singruok ne Jehova nikech noyudo Yesu en jakanyo mar oganda mar Jo-Israel, ma en oganda ma nosechiwore ne Nyasaye. Kar mano, batiso mar Yesu ne en mar chiwruok owuon mondo otim dwach Nyasaye kaka Ndiko mawuoyo kuom Mesia nosewacho.

10. Timo dwach Nyasaye kaka Mesia noriwo ang’o, to ere kaka Yesu noneno migepego?

¹⁰ Gima Jehova ne dwaro ni Yesu otim ne oriwo lando Pinyruodh Nyasaye, timo ji jopuonjre kendo ikogi ne tijno e kinde mabiro. Chiwruok mar Yesu bende noriwo ikruokne mar nano e bwo sand kod tho malit, konyisogo kaka oriwo lwedo loch makare mar Jehova Nyasaye. Nikech Yesu nohero Wuon mare me polo ahinya, ne omor timo dwach Nyasaye kendo nomor ahinya gi chiwo ringre kaka misango. (Joh. 14:31) Bende nomor ahinya ng’eyo ni ne inyalo chiw nengo mar ngimane makare ne Nyasaye kaka rawar, mondo owarwa kuom bedo wasumb richo kod tho. Be Nyasaye noyie gi chiwruok ma Yesu notimo owuon mondo ochop migepe madongogi? Ee, notimo kamano!

11. Ere kaka Jehova nonyiso ni ne oyie gi Yesu kaka Mesia, kata Kristo?

¹¹ Jondiko ang’wen duto mag Injili nondiko kanyiso ni mapiyo bang’ ka Yesu noa e pi Aora Jordan, Jehova Nyasaye nonyiso maler ni oyie kode. Johana Jabatiso notimo nende kama: ‘Naneno roho ka lor kaka akuru moa e polo, kendo nobet kuom Yesu. An bende naneno, kendo nahulo nenona ni jali e Wuod Nyasaye.’ (Joh. 1:32-34) E wi mano, e kinde nogo Jehova nowacho niya: “Jali en Wuoda mahero, chunya mor kode.”​—Math. 3:17; Mari. 1:11; Luka 3:22.

Nochung’ Motegno Nyaka e Tho

12. Ang’o ma Yesu notimo kuom higini adek gi nus bang’ batisone?

¹² Kuom higini adek gi nus ma ne oluwo, Yesu nochiwore chuth kuom puonjo ji e wi Wuon mare koda loch makare mar Nyasaye. Kata obedo ni wuotho koni gi koni e Piny Manosingi ne miyo ool, onge gimoro amora ma ne oweyo mondo omone bedo janeno kuom adiera. (Joh. 4:6, 34; 18:37) Yesu nopuonjo jomoko kuom Pinyruodh Nyasaye. Kuom chango jomoko e yor hono, pidho oganda ma ne nigi kech, kata mana chiero jomotho, Yesu nonyiso gima Pinyruodhno ne dhi timo ne oganda dhano.​—Math. 11:4, 5.

13. Ang’o ma Yesu nopuonjo e wi lamo?

¹³ Kar miyore duong’ en owuon kuom puonj koda tijene mag chango ji, Yesu noketo ranyisi maber mar bolruok kochiwo pak duto ne Jehova. (Joh. 5:19; 11:41-44) Yesu  bende nowuoyo kuom gik madwarore ahinya ni wakwa e lamo. Lamowa onego oriw kwayo ni mondo nying Nyasaye, ma en Jehova, “obed maler,” kendo ni loch makare mar Nyasaye okaw kar loch marach mar Satan, mondo dwaro mar Nyasaye “otimre e piny kaka e polo.” (Math. 6:9, 10) Yesu bende nojiwo ni watim kaluwore gi lamogo kuom ‘dwaro mokwongo pinyruodh Nyasaye, gi wachne makare.’​—Math. 6:33.

14. Kata obedo ni Yesu ne en ng’at makare chuth, ang’o momiyo kinda ne dwarore e migawo mare mar chopo dwaro mar Nyasaye?

¹⁴ Kaka kinde thone mar misango ne sudo machiegni, e kaka Yesu nomedo ng’eyo kaka ting’ ma ne en-go ne pek sidang’. Chopo dwaro mar Wuon mare koda miyo nyinge obed maler, ne dwaro ni Yesu onan e bwo tem maok kare kendo tho malit. Ndalo abich kapok otho, Yesu nolemo niya: “Koro chunya parore, to awach ang’o? Wuora, resa e sani. To wachni e momiyo nabiro e sani.” Bang’ wacho wechego manyiso kit dhano mapile, Yesu notero pache kuom wach ma ne duong’ moloyo, molemo niya: “Wuora, mi nyingi duong’.” Jehova nodwoko sano sano niya: “Asemiye duong’, bende namiye duong’ kendo.” (Joh. 12:27, 28) Ee, Yesu noikore kadho e bwo sand maduong’ie moloyo ma dhano osekadhoe. Kata kamano, onge kiawa ni winjo weche ma Wuon mare me polo nowachogo nomiyo Yesu obedo gadier ni ne odhi miyo loch Jehova onenre, kendo nyiso ni lojno ema kare. Kendo mano e kaka notimore!

Gima Tho Yesu ne Ochopo

15. Kane pok otho, ang’o momiyo Yesu nowacho ni: “Orumo”?

¹⁵ Sama Yesu noliero e yadh-sand kochiegni gamo muche mogik, nowacho niya: “Orumo!” (Joh. 19:30) Mano kaka Yesu nochopo gik madongo kokalo kuom kony mar Nyasaye e kinde mag higini adek gi nus chakre batisone nyaka thone! Kane Yesu otho, piny ne oyiengni, kendo jaduong’ lweny mar Rumi ma ne ochung’ne nego Yesu nowacho kama: “Adier, jali ne en Wuod Nyasaye.” (Math. 27:54) Nenore ni jalwenyno noyudo oseneno kijaro Yesu kuom wacho ni ne en Wuod Nyasaye. Kuom sand duto ma ne okadhoe, Yesu nosiko kochung’ motegno kendo nyiso ni Satan en jamiriambo maduong’. Kuom jogo duto mariwo lwedo loch Nyasaye, Satan noseketo kiawa kama: “Gik moko duto ma dhano nigo nochiu ni kech ngimane.” (Ayub 2:4) Kuom chung’ne motegno, Yesu nonyiso ni Adam gi Hawa ne nyalo chung’ motegno e bwo tem margi ma ne yot moloyo. Maduong’ie moloyo en ni ngima kod tho mar Yesu, nomiyo tich koda loch makare mar Jehova onenore maler. (Som Ngeche 27:11.) Be nitie gimoro kendo ma tho Yesu osechopo? Ee, nitie!

16, 17. (a) Ang’o momiyo bedo gi winjruok maber gi Nyasaye ne nyalore ne joneno mag Jehova ma ne odak kapok ndalo Jokristo? (b) Ere kaka Jehova nogwedho chung’ motegno mar Wuode, to ang’o ma pod Ruoth Yesu Kristo dhi nyime timo?

¹⁶ Nitie jotich Jehova mang’eny ma ne ngima kane Yesu pok obiro e piny. Ne gin gi winjruok maber gi Nyasaye kendo ne omigi geno mar chier. (Isa. 25:8; Dan. 12:13) Kata kamano, kaluwore gi buchene makare, ere kaka Jehova Nyasaye maler, ne nyalo gwedho dhano ma joricho e yo majaber kamano? Muma lero kama: “Kuom rembe [Yesu Kristo], Nyasaye nokete mondo obed misango kuom yie, mondo tich makare mar Nyasaye onen, nimar kuom ng’wonone  Nyasaye noweyo richo ma notim chon; kendo mondo tichne makare onen e ndalogi ni en owuon en kare, kendo ni oketo ji duto kare ma yie kuom Yesu.”​—Rumi 3:25, 26. *

¹⁷ Jehova nogwedho Yesu kuom chiere momiye migawo maduong’ moloyo ma ne en-go kane pok obiro e piny. Sani koro Yesu nigi ringruok mar roho maok nyal tho kendo ma nigi duong’ moloyo. (Hib. 1:3) Kaka Jadolo Maduong’ kendo Ruoth, Yesu Kristo dhi nyime konyo jolupne omi tich makare mar Nyasaye onenre. To mano kaka wamor ni Wuonwa me polo, Jehova, e Jagwedh jogo duto matimo kamano kendo mamakore e tiyone ka giluwo ranyisi mar Wuode!​—Som Zaburi 34:3; Jo Hibrania 11:6.

18. Ang’o ma sula maluwo biro wuoyoe?

¹⁸ Chakre gi Abel, dhano moluoro Nyasaye ne bedo gi winjruok machiegni gi Jehova nikech ne ginyiso yie kendo ne gin gadier kuom Kodhi ma ne osingi. Jehova nong’eyo ni Wuode ne dhi chung’ motegno e bwo tem kendo ni thone ne dhi umo “richo mag piny” e yo makare chuth. (Joh. 1:29) Tho Yesu bende konyo jo modak e kindegi. (Rumi 3:26) Omiyo, gin gweth mage ma rawar mar Kristo nyalo keloni? Mano e gima sula maluwo biro wuoyoe.

[Weche moler piny]

Inyalo Dwoko Nade?

• Ere kaka noket kiawa kuom loch makare mar Nyasaye?

• Batiso mar Yesu nochung’ ne ang’o?

• Tho mar Yesu nochopo ang’o?

[Penjo mag Puonjruok]

[Picha manie ite mar 9]

Be ing’eyo tiend batiso mar Yesu?