Ogwel Ji Duto!

OGWEL ji duto ne ang’o? Mondo gilim achiel kuom ofise mag Joneno mag Jehova, ma ihinyo luong ni Bethel. Kwan mag ofisego gin 118, kendo giyudore e pinje mopogore opogore. Kinde mang’eny, welo nyiso chuny mamor ma gin-go kuom neno tije mitimo e Bethel.

Bang’ neno jotich matiyo ne Jehova matek kendo gi mor e ofis manie piny Mexico, rawera moro ma japuonjre Muma ne mor ahinya, mi nopenjo kama: “Ang’o monego atim mondo omi adag kendo ati kae?” Ne owachne ni: “Mokwongo, nyaka batisi. Kae to daber ka itiyo kaka painia—jaland Pinyruoth kuom thuoloni duto.” Rawerano noluwo kaka ne owachne, kendo higini ariyo bang’e ne ogwele mondo oti e Bethel ma Mexico, kama koro osetiyoe kuom higini 20 mosekalo.

Tiend Bethel En Ang’o?

E dho Hibrania, tiend “Bethel” en “Od Nyasaye.” (Chak. 28:17, 19) Gik moko duto manie ofise mopogore opogore, itiyogo e goyo kendo keyo Muma gi buge malero Muma, koda e chiwo kony korka weche chuny ne kanyakla mag Joneno mag Jehova, ma kwan-gi okalo 100,000 e piny mangima. Chiegni jotich 20,000 mag Bethel—chwo gi mon moa e kit ngima mopogore opogore—tiyo ne Jehova koda owete gi nyimine ma Jokristo ka gitimo kamano gi chunygi kendo kuom thuologi duto. Jogo mosebedo ka tiyo tijno kuom higini mogwaro, sani tiyo kanyachiel gi rowere mapod tekregi ng’eny. E seche mag odhiambo koda e giko juma, jood Bethel joriwore gi kanyakla machiegni mag Joneno mag Jehova e chokruok koda e tij lendo mar Jokristo. Gitiyo bende gi thuologi e puonjruok Muma, yueyo, koda e timo gigegi giwegi.

Jood Bethel imiyo kony matin mar pesa dwe ka dwe. Gichamo chiemo mamit magero del, kendo gidak e alwora maler kendo mowinjore. Bethel ok en kama olos mondo ji odagie mana e ngima mayom. Kata kamano, olosgi e yo mamiyo gichopo tich madwarore. Mor ma welo bedogo ok mana kuom neno ute, lum gi maupe mopidhi, koda kaka tich tire e yo mochanore maber, to bende gimor neno chuny mang’won kod winjruok mantiere e Bethel. Ng’ato ka ng’ato tiyo matek, kata kamano onge ng’ama timore modich ahinya maok domos welo. Ei Bethel, onge chuny mar ng’awruok nikech anyuola kata somo mar ng’ato, kendo onge ng’ama kawore maduong’ nikech migawo momiye. Migawo ka migawo duong’, obed mar rito ler, pecho kata loso lum gi maupe, tedo, kata tiyo kar goyo buge kata e ofis. Jood Bethel tiyo kanyachiel kaka joka ng’ato mondo  gikony e riwo lwedo tij Joneno mag Jehova.​—Kol. 3:23.

Winj Ane Kuom Jood Bethel Moko

We wanon ane moko kuom jogo maloso jood Bethel. Ang’o ma nomiyo gibedo gi chuny mar dwaro tiyo e Bethel? Kaw ane ranyisi mar Mario. E kinde ma ne obedo achiel kuom Joneno mag Jehova, Mario ne nigi tich maduong’ e kambi mar mtokni e piny Jerman, kendo ne en gi thuolo mar yudo huma. Mapiyo bang’ batisone, ne ochiwore mar tiyo kuom juma achiel e Bethel me pinygi. Ne okete e migawo mar tiyo e kar goyo buge. Mario ne nyalo neno pogruok maduong’ e kind jotich wetene me Bethel kod mag kambi. Omiyo, ne opong’o fom kokwayo mar tiyo e Bethel kuom thuolone duto. Kata obedo ni thoth wedene koda jotich wetene ne ohum nono gi yiero ma notimono, Mario sani tiyo e Bethel ma Jerman gi mor.

Thoth jomoko donjo e tij Bethel ka gionge somo kata lony moro amora makende. Mano e kaka Abel makoro osetiyo e Bethel ma Mexico kuom higini 15 ne chalo. Owacho kama: “Bethel osebedona kaka skul gadier. Asepuonjora tiyo gi masinde ma korgi tek mag goyo buge. Ang’eyo ni lony makoro an-go nyalo miyo alos pesa mang’eny oko mar Bethel, kata kamano ok anyal yudo gigo ma an-go kae—kuwe mar chuny koda mor maonge parruok kata piem mopong’ kuonde mang’eny mag tich. Chunya neno ni aseyudo somo maber moloyo duto manyalore, somo mosekonya timo dongruok e lony mar paro koda kaka jatich Nyasaye. Kata ka dine adhi e yunivasiti maber manade, dine ok ayudo gweth kaka ma aseyudogi.”

Limo Bethel Nyalo Jiwo Ng’ato

Timo atima limbe e Bethel kende nyalo konyo e jiwo winjruok mar ng’ato gi Nyasaye. Mano e kaka nobet ne Omar, e piny Mexico. Min mare ne opuonje adiera manie Muma. Kata kamano, kane oromo jahigini 17, Omar noweyo dhi e chokruoge mag Jokristo kendo noweyo timo tij lendo bende. Gikone nodonjo e timbe maricho kendo noluwo yor ngima mar lawo mwandu. Bang’e ka koro notiyo e kambi moro mar masinde, chieng’ moro kambino ne  ooro jotich ma achiel kuomgi ne en Omar, mondo gidhi ginyis jo Bethel ma Mexico kaka itiyo gi masin moro. Omar wacho kama: “Bang’ nyisogi kaka masindno tiyo, jo Bethel ne owuotho kodwa e alwora ma kanyo mondo wane tije mitimo. Gik ma ne aneno koda kaka ne otimna e yo mang’won, ne omiyo aparo matut kuom kit ngima ma ne aluwo, ma ne poga kod Jehova. Mapiyo ne achako dhi e chokruoge kod puonjruok Muma kendo. Dweche auchiel bang’ limo Bethel, ne obatisa. Adwoko ne Jehova erokamano kuom jip ma ne ayudo kokalo kuom limo Bethel.”

Masahiko, e piny Japan, bende ne odongo e od Joneno. Kata kamano, nochako paro ni yor ngima mar Jokristo nigi chike mang’eny madiyo ji ahinya. Nodonjore gi weche mag skul moweyo dhi e chokruoge kaachiel gi tij lendo. Masahiko paro kama: “Chieng’ moro, joodwa kaachiel gi osiepe manok ma Jokristo nong’ado mar dhi limo Bethel. Nikech joodwa ne ojiwa ahinya, an bende ne adhi kodgi. Limo Bethel ne oduogo chunya, moloyo kinde moro amora. Mor ma ne ayudo kuom bedo kanyachiel gi Jokristo mamoko e kinde mar wuodhno, ne en mor mapok ne abedogo ngang’ ka ne an kanyachiel gi osiepena maok Joneno. Gombo mar dak ka aluwo yor ngima mar Jokristo ne odongo e chunya, mi ne akwayo mondo opuonjruok Muma koda.” Masahiko sani en jatich matiyo ne Nyasaye kuom thuolone duto e kanyaklagi.

Janeno moro ne odar e piny France nikech tich, modhi e dala mar Moscow e piny Russia. Kane en kuno, ne ok oyudo thuolo mar romo gi oganda Jehova, kendo winjruokne gi Jehova nodoko mayomyom. Ne odonjo e tim maok kare kendo gikone ne okende gi jal maok Janeno. Bang’e nyaminwa moro ma Jakristo nobiro lime koa France, mi giduto ne gidhi nyaka dala mar St. Petersburg, Russia, mondo gilim Bethel. Ondiko kama: “Kane wachopo Bethel, ne orwakwa e yo mamor ahinya kendo mano nomulo chunya. Kuwe ne ogundho kanyo ahinya. Ne aneno ni roho mar Jehova nikanyo. Ere kaka ne anyalo timo ketho mar sudo mabor gi riwruok mar oganda Jehova kamano? Bang’ limbena Bethel, ne akwayo Jehova e lamo mondo okonya, kendo nachako puonjo nyithinda Muma ka an gi kinda momedore.” Kaachiel gi yore mamoko ma ne otigo e konyo Janeno machon ne yomyom e yieni, limo Bethel ne ojiwe ahinya mi bang’e ne otimo dongruok maber.

To nade jip ma jogo maok olony gi Joneno mag Jehova yudo bang’ limo Bethel? E higa 1988, Alberto, ma ne odich ahinya gi weche siasa, nolimo Bethel e piny Brazil. Ler man kuno, chenro maber, to chutho chutho kaka ne ji timo tije e yo mathuolo, ne omore sidang’. Matin nono kapok nolimo Bethel, noyudo Alberto osetimo limbe e seminari kama ipuonjoe weche din, kendo owadgi chiege ne tiyo kanyo kaka padri. Alberto nofwenyo pogruok. Alberto wacho kama: “Gik moko duto mitimo e seminarino, ne itimo e yo maling’ling’.” Mapiyo bang’ limbene Bethel, noyie mondo opuonjruok Muma kode, moweyo weche siasa, kendo sani en jaduong’-kanyakla.

Bi Ilim Bethel!

Ji mang’eny osetimo kinda e okang’ mamalo mondo omi gidhi gilim Bethel manie pinygi. Kuom ranyisi, e piny Brazil, Paulo kod Eugenia nokuno pesa kuom higini ang’wen mondo gidhigo e wuodh odiechienge ariyo makawo kilomita 3,000 ka gitiyo gi bas, mondo gidhi gine Bethel manie pinyno. Giwacho kama: “Limbewano ne owinjore ndi gi kinda ma ne watimo. Sani koro walony gi riwruok mar oganda Jehova. Sama walero ne jogo mwapuonjo Muma wach tich mitiyo e Bethel, seche moko gijopenjo ni, ‘Un, be usedhi kuno?’ Sani koro wanyalo dwoko ni, ee wasedhi.”

Be Bethel nitie e pinyu kata e piny machiegni kodu? Wagweli ni mondo idhi itim limbe kuno. Kuom adier, ka idhi e Bethel ibiro rwaki gi mor kendo ibiro yudo jip mar dhi nyime tiyo ne Jehova.

[Picha manie ite mar 18]

Mario

[Picha manie ite mar 18]

Abel

[Picha manie ite mar 18]

Jerman

[Picha manie ite mar 18]

Japan

[Picha manie ite mar 18]

Brazil